Referensia pa Material i Tarea pa Reunion Nos Bida i Sirbishi Kristian

6-12 DI MEI

TESORONAN DI E PALABRA DI DIOS | 2 KORINTIONAN 4-6

“Nos No Ta Entregá”

it-1-S 70

Perseveransia

Ademas, ta importante pa nunka nos no pèrdè for di bista e speransa kristian, esta, bida eterno sin piká. E hendenan ku ta persiguí nos no por kita e speransa ei for di nos, ni si nan mata nos. (Rom 5:4, 5; 1Te 1:3; Rev 2:10) Tur sufrimentu ku nos ta pasa aden aktualmente lo parse insignifikante ora ku e gran speransa ei kumpli. (Rom 8:18-25) Komo ku nos tin e speransa di biba pa semper, kualke sufrimentu ku nos por ta pasando aden—pa intenso ku e por ta—lo resultá di ta “leve i pa un tempu kòrtiku.” (2Ko 4:16-18) Si un persona keda kòrda ku tur prueba ta temporal i si e ta tene duru na e speransa kristian, esei por yud’é pa e no desesperá i bira infiel na Yehova Dios.

Buska Hoyanan Spiritual

w12-S 1/2 28-29

“Pone un Smail Riba Yehova Su Kara”

David Splane, un miembro di Kuerpo Gobernante, a duna e diskurso bíbliko akí. (2 Korintionan 4:7) Di kua tesoro e tabata papia? Di konosementu òf di sabiduria? Su kontesta: “Nò. E tesoro ku apòstel Pablo a papia di dje ta nos ‘sirbishi’ di ‘revelá e bèrdat.’” (2 Korintionan 4:1, 2, 5) Ruman Splane a rekordá e studiantenan ku e sinku lunanan di lès ku nan a haña tabata pa prepará nan pa un asignashon spesial den sirbishi di Dios. E asignashon ei ta algu ku nan mester balorá mashá.

E oradó a splika ku e “pòchi di klei” ta representá nos kurpa. Despues, el a mustra e kontraste entre un pòchi trahá di klei i un pòchi trahá di oro. Hende no tabata usa pòchi di oro hopi. Pero pòchi di klei sí nan tabata usa regularmente. Si nos warda un tesoro den un pòchi di oro, nos lo duna e pòchi di oro mes tantu balor ku e tesoro ku tin den dje. Ruman Splane a bisa e studiantenan: “No hala atenshon na boso mes. Komo misionero, boso mester dirigí hende su atenshon na Yehova. Boso mester ta pòchi di klei humilde.”

20-26 DI MEI

TESORONAN DI E PALABRA DI DIOS | 2 KORINTIONAN 11-13

“Pablo Su ‘Sumpiña den Karni’”

w08-S 15/6 3-4 §3

Fuerte Apesar di Debilidat

Apòstel Pablo, un otro fiel sirbidó di Yehova di antigwedat, a roga Yehova tres biaha pa kita su “sumpiña den karni,” esta, un problema òf prueba persistente ku e tabatin. Nos no sa kiko e prueba tabata, pero meskos ku un sumpiña molestoso, esei tabata algu ku por a stroba Pablo di sirbi Yehova ku goso. Pablo tabata sinti komo si fuera kontinuamente e prueba ei tabata dal e wanta. Yehova su kontesta riba Pablo su petishon tabata: “E bondat inmeresí ku mi a demostrá bo ta sufisiente pa bo, pasobra mi poder ta bira kompleto pa bo ora bo ta débil.” Yehova no a kita Pablo su sumpiña den karni. Aunke Pablo tabatin ku sigui lucha ku su prueba, el a bisa: “Ora mi ta débil, e ora ei mi ta poderoso.” (2 Kor. 12:7-10) Kiko e tabata ke men?

Buska Hoyanan Spiritual

it-1-S 317

Sunchi

E “Sunchi Santu.” E “sunchi santu” (Rom 16:16; 1Ko 16:20; 2Ko 13:12; 1Te 5:26) òf “sunchi di amor” (1Pe 5:14), ku tal bes hende di mes sekso tabata duna otro, tabata komun entre e kristiannan di promé siglo. E forma akí di kumindá otro ku e kristiannan di promé siglo tabatin kisas a bini di e kustumber hebreo di antigwedat di kumindá un hende ku un sunchi. Aunke Beibel no ta duna detaye, evidentemente e “sunchi santu” òf “sunchi di amor” a reflehá e amor i union sano ku tabata reina den e kongregashon kristian.—Hua 13:34, 35.

27 DI MEI–2 DI YÜNI

TESORONAN DI E PALABRA DI DIOS | GALATIONAN 1-3

“Mi A Konfront’é Kara Kara”

it-2-S 567-568 §7

Algun tempu despues, Pedro mes a bai Antiokia di Siria i tabata anda ku e rumannan no hudiu. Pero ora sierto hudiu di Herúsalèm a yega, Pedro, probablemente pa motibu di miedu di hende, a stòp di anda ku e rumannan no hudiu. Ora Pedro a hasi esei, el a bai kontra guia di spiritu santu ku a indiká ku Dios no ta hasi distinshon di persona. E kondukta di Pedro tabatin influensia asta riba Bárnabas. Unabes Pablo a tuma nota di e situashon, ku kurashi el a skual Pedro dilanti di tur hende, ya ku Pedro su komportashon lo a stroba e progreso di kristianismo.—Gal 2:11-14.

Buska Hoyanan Spiritual

it-1-S 984-985

Galationan, Karta na e

No tin indikashon ku ora Pablo a sklama: “O galationan insensato,” ku e tabata pensa riba un sierto grupo étniko di orígen eksklusivamente galo ku tabata biba den e parti nort di Galasia. (Gal 3:1) Mas bien, Pablo a skual sierto di e rumannan den e kongregashonnan na Galasia ku a laga sierto hudiu entre nan influensiá nan. E hudiunan ei tabata purba di demostrá na nan manera ku nan ta hustu pa medio di e Lei di Moises, en bes di ser ‘deklará hustu pa medio di fe’ manera e pakto nobo a hasi posibel. (Gal 2:15–3:14; 4:9, 10) E “kongregashonnan di Galasia” na kendenan Pablo a dirigí e karta tabata un meskla di hende hudiu i no hudiu. (Gal 1:2) Esnan no hudiu tabata konsistí di hende ku a ser sirkunsidá i di hende ku no tabata sirkunsidá, i sin duda algun di nan tabata desendiente di e keltanan (òf, e galonan, un pueblo di Wèst Europa). (Ech 13:14, 43; 16:1; Gal 5:2) Pablo a yama tur e kristiannan ei galatio pasobra nan tabata biba na Galasia. Henter e tono di e karta ta indiká ku el a skirbi e kristiannan ku e tabata konosé bon di e parti zùit di e provinsia romano akí i no hende kompletamente deskonosí p’e di e parti nort, ku aparentemente nunka el a bishitá.