“E Heridanan di un Amigu”

Apostel Pablo a mira e necesidad di duna algun conseho pa corigí e cristiannan di promé siglo na Galacia. Probablemente pa prevení rencor, el a puntra: “Pues anto, mi a bira boso enemigu pa motibu cu mi ta bisa boso e berdad?”—Galationan 4:16.

Pablo no a bira nan enemigu dor di ‘bisa nan e berdad.’ De echo, e tabata actua na armonia cu e principio bíblico: “Fiel ta e heridanan di un amigu.” (Proverbionan 27:6, Beibel Santu) Pablo tabata sa cu hende cu faya lo por a sinti nan heridá den nan orguyo. Sin embargo, e tabata conciente cu keda sin duna un pecadó e disiplina necesario lo por a nificá stroba e persona ei di ricibí un expresion di Jehova Dios su amor. (Hebreonan 12:5-7) P’esei, como un amigu fiel cu tabatin na pechu e interes di e congregacion riba término largu, Pablo no a hala atras pa duna coreccion.

Awe, Testigonan di Jehova ta cumpli cu nan comision di “haci disipel di hende di tur nacion, . . . siñando nan pa warda tur loke [Jesucristo] a manda.” Cumpliendo cu e trabou aki, e cristiannan sincero aki no ta comprometé berdadnan bíblico cu ta exponé i condená doctrina robes i conducta no-cristian. (Mateo 15:9; 23:9; 28:19, 20; 1 Corintionan 6:9, 10) En bes di bira enemigu cu hende mester rechasá, nan ta manifestá e interes di un berdadero amigu.

Cu perspicacia inspirá dor di Dios, e salmista a skirbi: “Si e hustu mester golpia mi, esei lo ta un bondad amoroso; i si e mester reprendé mi, esei lo ta zeta riba cabes, cu mi cabes lo no kier nenga.”—Salmo 141:5.