Abo Lo Paga un Mecha Cu Ta Huma?

JESUCRISTO a declará e bon nobo dje Reino di Dios na tur clase di hende. Hopi di nan tabata oprimí i desanimá. Pero Jesus a duna nan un mensahe alentador. E tabatin compasion pa hende cu ta sufri.

E escritor di Evangelio, Mateo, a resaltá Jesus su compasion halando atencion na un profecia registrá dor di Isaías. Citando palabranan cu Cristo a cumpli cuné, Mateo a skirbi: “Lo e no machicá ningun caña kibrá, i lo e no paga ningun mecha di linen cu ta huma, te ora e manda husticia cu éxito.” (Mateo 12:20; Isaías 42:3) Kico e palabranan aki ta nificá, i con Jesus a cumpli cu e profecia aki?

Un Bistaso n’e Profecia

Caña ta crece generalmente den un moeras i no ta un mata fuerte i stabil. Un “caña kibrá” en berdad lo ta swak. P’esei e ta parce di representá hende cu ta oprimí of sufri manera e homber cu e man secu kende Jesus a cura riba Sabat. (Mateo 12:10-14) Pero kico dje referencia profético na un mecha di lampi?

Un lampi comun di cas dje promé siglo E.C. tabata un wea di klei chikitu manera un canica cu man den forma rondó. E lampi generalmente tabata ser yená cu zeta di olijfi. Dor di adhesion di molecuul entre material sólido i líkido, un mecha trahá di linen a trek e zeta manda ariba pa alimentá e candela. Naturalmente, un ‘mecha cu ta huma’ lo ta un cu ta cerca di paga.

Jesus a proclamá su mensahe consolador na hopi hende cu tabata figurativamente manera un caña kibrá, di sak abou i maltratá. E hendenan aki tambe tabata manera mecha di linen cu ta huma pasobra nan último chispa di bida casi a ser pagá. Nan realmente tabata oprimí i desanimá. Sin embargo, Jesus sí no a trapa un caña figurativo kibrá of paga un mecha simbólico cu ta huma. Su palabranan amoroso, tierno i compasivo no a desanimá ni deprimí mas ainda hende cu tabata sufri. Mas bien, su comentarionan i su tratonan cu nan tabatin un efecto edificante.—Mateo 11:28-30.

Awe, tambe, hopi hende tin mester di compasion i animacion pasobra nan ta enfrentá problemanan desalentador. Asta sirbidornan di Jehova no ta semper fuerte ora di contratempu. Tin biaha algun ta parce mechanan cu ta humando. P’esei cristiannan mester ta animador—wayando e candela, na moda di papia—fortaleciendo otro asina ei.—Lucas 22:32; Echonan 11:23.

Como cristiannan nos kier ta edificante. Nos lo no purba deliberadamente pa debilitá ningun hende cu ta busca yudansa spiritual. En berdad, nos ta deseá na imitá Jesus su ehempel den fortalecé otronan. (Hebreonan 12:1-3; 1 Pedro 2:21) E echo cu inconcientemente nos por trapa cualkier persona cu ta acudí na nos pa animacion ta bon motibu pa considerá seriamente nos manera di trata cu otronan. Nos siguramente no kier ‘paga un mecha cu ta humando.’ Ki guia bíblico por yuda nos relacioná cu esaki?

Efectonan di Crítica

Si un cristian ‘dal algun paso falsu, esnan cu tin cualificacionnan spiritual mester trata na reahustá un persona asina den un spiritu di suavedad.’ (Galationan 6:1) Sin embargo, lo ta apropiado pa busca defecto den otronan i probechá di tur oportunidad pa corigí nan? Of lo ta corecto pa stimulá nan pa haci mas dor di insinuá cu nan esfuersonan actual ta insuficiente, tal bes dunando nan un sintimentu di culpa? No tin evidencia cu Jesus a haci ningun dje cosnan ei. Aunke ta nos intencion pa yuda otronan mehorá, esnan cu ta ricibí crítica poco amabel por sinti nan debilitá mas bien cu fortalecí. Asta crítica constructivo por ta basta desanimador si e bira demasiado. Si e mihó esfuersonan di un cristian conciencial mester topa solamente cu desaprobacion, e por prácticamente legumai tur cos i bisa, ‘Pakico purba mes?’ En berdad, e por entregá completamente.

Aunke dunamentu di conseho bíblico ta importante, e no mester caracterisá e spiritu di ancianonan nombrá of otronan den e congregacion. Reunionnan cristian no ta ser tené primordialmente pa duna i ricibí conseho. Mas bien, nos ta reuní huntu regularmente pa edificá i animá otro di manera cu tur por disfrutá di nan asociacion i nan sirbishi sagrado na Dios. (Romanonan 1:11, 12; Hebreonan 10:24, 25) Ta ki beneficioso ora nos ta dicerní e diferencia entre un defecto serio i un imperfeccion cu ta sabí i amoroso pa pasa por haltu di dje!—Eclesiástes 3:1, 7; Colosensenan 3:13.

Hende ta respondé mas lihé na animacion cu na crítica. En realidad, ora individuonan ta sinti nan criticá inhustamente, nan por pega asta mas fuerte n’e comportacion cu ta ser criticá! Pero ora nan ta ser encomendá pa un bon motibu, nan ta ser animá, i nan ta ser motivá pa mehorá. (Proverbionan 12:18) P’esei, mescos cu Jesus, laga nos ser animador i nunca ‘paga un mecha cu ta huma.’

Kico di Hacimentu di Comparacion?

Tendiendo e experencianan excelente di otro cristiannan por ta masha motivador. Jesus mes a alegrá ora el a tende tocante e éxito di su disipelnan den predicacion dje mensahe di Reino. (Lucas 10:17-21) Di igual manera, ora nos tende dje éxito, bon ehempel of integridad di otronan den e fe, nos ta ser animá i ta sinti nos mas determiná pa pega na nos curso cristian.

Sin embargo, kico si un informe a ser presentá den un manera cu ta duna idea di, ‘Bo no ta mes bon cu e cristiannan aki, i bo mester ta haciendo muchu mas mihó’? Esun cu ta scucha ta incliná pa cuminsá un programa enérgico pa bai dilanti? Ta probabel cu lo e bira desanimá i tal bes entregá, specialmente si comparacionnan ta ser hací of insinuá frecuentemente. Esaki lo parce mashá un mayor cu ta puntra su yu, ‘Pakico bo no por ta manera bo ruman?’ Un comentario asina por causa rencor i desanimacion, pero probablemente lo e no promové mihó comportacion. Comparacionnan por tin un efecto similar riba adultonan, asta haciendo nan un poco rencoroso pa cu esnan cu ken nan ta ser compará.

Nos no por spera pa tur hende haci mes tantu den Dios su sirbishi. Den un dje ilustracionnan di Jesus, un cierto doño a duna su esclabonan sea un, dos of cincu talento di plata. Esakinan a ser duná “na cada un segun su mes abilidad.” E dos esclabonan cu a negoshá sabiamente i a aumentá nan talentonan a ser encomendá pasobra nan tabata fiel, aunke nan trabou a duna resultadonan diferente.—Mateo 25:14-30.

Apostel Pablo a skirbi apropiadamente: “Laga cada un duna prueba di loke su mes trabou ta, i e ora ei lo e tin motibu pa hubilá en cuanto su mes so, i no den comparacion cu e otro persona.” (Galationan 6:4) Pa ta berdaderamente animador pa otronan, anto, nos mester purba evitá di haci comparacionnan negativo.

Algun Manera pa Edificá Otronan

Kico nos por haci pa edificá esnan desanimá i evitá di ‘paga un mecha cu ta huma’? Wel, percurando animacion no ta un asuntu di sigui un fórmula specífico. Sin embargo, probablemente nos palabranan lo edificá otronan si nos aplicá principionan bíblico. Cua ta algun dje cosnan aki?

Sea humilde. Na Filipensenan 2:3, Pablo a exhortá nos pa no ‘haci nada debí na pleitamentu of egotismo.’ En bes di esei, nos mester papia i actua humildemente. ‘Cu humildad di mente nos mester considerá otronan superior cu nos.’ Pablo no a bisa cu nos mester pensa cu nos no ta bal nada. Sin embargo, nos tin cu comprendé cu cada persona ta superior cu nos den un of otro manera. E palabra griego traducí aki como “superior” ta duna idea di un homber cu ta “alehá su wowonan for di su propio privilegionan, i cu ta contemplá diligentemente un otro su abilidadnan natural den cua e ta superior.” (New Testament Word Studies, di John Albert Bengel, Volúmen 2, página 432) Si nos haci esaki i considerá otronan superior, nos lo trata cu nan den un manera humilde.

Mustra respet. Dor di expresá nos mes sinceramente, nos por haci cla cu nos tin confiansa den fiel compañeronan creyente, mirando nan como individuonan cu ta deseá di agradá Dios. Pero suponé cu nan mester di yudansa spiritual. E ora ei laga nos duna yudansa den un manera respetuoso i dignificá. Pablo a bis’é asina aki: “Den mustra onor na otro hiba e delantera.”—Romanonan 12:10.

Sea un bon scuchador. Sí, pa por animá esnan cu kisas ta enfrentá problemanan desanimador, nos mester ta bon scuchador, no dunador di sermon. En bes di ofrecé sugerencia lihé i superficial, laga nos tuma e tempu necesario pa duna guia bíblico cu berdaderamente ta yena necesidadnan existente. Si nos no sa kico pa bisa, investigacion bíblico lo yuda nos papia di un manera consolador i fortalecé otronan.

Sea amoroso. Nos tin cu sinti amor pa esnan cu nos ta deseá di animá. Ora e ser aplicá na co-sirbidornan di Jehova, nos amor mester bai mas ayá cu simplemente actua den nan mihó interesnan. E mester enbolbé sintimentu intenso. Si nos tin tal amor pa henter e pueblo di Jehova, nos palabranan lo ta un berdadero animacion pa nan. Asta si nos mester ofrecé un sugerencia pa mehoramentu, no ta probabel cu loke nos bisa lo ser comprendé robes of lo causa daño ora nos motibu no ta simplemente pa declará nos punto di bista sino pa duna yudansa amoroso. Manera Pablo a bisa aptamente, “amor ta edificá.”—1 Corintionan 8:1; Filipensenan 2:4; 1 Pedro 1:22.

Semper Sea Edificante

Den e “último dianan” crítico aki, e pueblo di Jehova ta enfrentá hopi prueba. (2 Timoteo 3:1-5) Nada straño cu nan ta sufri algun biaha te na loke ta parce e límite di nan awante. Como sirbidornan di Jehova, nos siguramente lo no kier bisa of haci cosnan cu por causa ningun di nos co-adoradornan sinti nan manera mechanan humando cu ta cerca di paga.

Ta ki importante anto, pa nos animá otro! Laga nos haci tur nos esfuerso pa ta edificante dor di ser humilde i respetuoso cu co-adoradornan cu ta desanimá. Laga nos scucha cuidadosamente ora nan ta confia nos nan problemanan i semper busca pa yuda nan dor di dirigí atencion n’e Palabra di Dios, e Bijbel. Riba tur cos, laga nos desplegá amor, pasobra e fruta aki di Jehova su spiritu santu lo yuda nos fortalecé otro. Laga nos nunca papia of actua den un manera cu por ‘paga un mecha cu ta huma.’