Problemanan di Humanidat Lo Kaba Pronto!

“YUDANSA humanitario tin masha poko balor si e no ta forma parti di un plan stratégiko i polítiko mas amplio diseñá pa atendé e kousanan básiko di konflikto. Eksperensia a mustra bes tras bes ku yudansa humanitario so no por resolvé e problemanan ku tin un karakter fundamentalmente polítiko.”—The State of the World’s Refugees 2000.

Apesar dje gran esfuerso humanitario, e problemanan di humanidat ta oumentá sin miserikòrdia. Tin posibilidat pa yega na un solushon polítiko duradero? No mashá. Pero na unda otro nos por akudí? Den un pasashi signifikativo na kuminsamentu di apòstel Pablo su karta n’e kristiannan na Efeso, e ta splika kon Dios lo pone fin na tur problema di humanidat. Asta e ta indiká ki medio Dios lo usa pa hasi esaki: un instrumento ku lo atendé e kousanan básiko di tur e problemanan ku ta afligí nos awe. Pakiko no analisá loke Pablo a bisa? E pasashi ta na Efesionan 1:3-10.

“Rekohé Tur Kos Huntu Atrobe den e Kristu”

E apòstel ta bisa ku e propósito di Dios ta pa bini ku loke e ta yama “un atministrashon [òf, maneho di asuntunan] n’e límite kompleto dje tempu señalá.” Kiko esaki ta nifiká? E ta nifiká ku Dios a fiha un tempu den kua lo e perkurá pa “rekohé tur kos huntu atrobe den e Kristu, e kosnan den shelu i e kosnan riba tera.” (Efesionan 1:10, NW) Sí, Dios a kuminsá un areglo pa trese tur kos den shelu i riba tera bèk na armonia bou di su kòntròl direkto. Relashoná ku e palabranan aki tradusí komo “rekohé tur kos huntu atrobe,” e analista di Beibel J. H. Thayer ta duna e komentario interesante aki: “Reuní pa su mes atrobe . . . tur kos i kriatura bibu (te awor aki desuní dor di piká) den un solo estado kombiná di kompañerismo den Kristu.”

Dios tin ku hasi esaki pa motibu dje desunion ku a kuminsá reina den prinsipio. Na kuminsamentu di historia humano, nos promé mayornan, Adam ku Eva, a djòin Satanas e Diabel den rebelion kontra Dios. Nan kier tabata independiente pa disidí pa nan mes loke tabata bon i loke tabata malu. (Génesis 3:1-5) Yehova a kumpli ku su hustisia dor di saka nan for di su famia. Nan a pèrd’é komo nan Dios. Dor di esei, humanidat a bin kai den imperfekshon ku tur e konsekuensianan teribel ku nos ta pasa aden awe.—Romanonan 5:12.

Dios Ta Permití Maldat pa un Tempu

Kisas bo ta puntra: ‘Pakiko Dios a laga nan hasi esei? Pakiko e no a simplemente usa su poder supremo i imponé su boluntat, evitando asina tur e doló i sufrimentu ku nos ta pasa aden awor?’ Esei por parse masha lógiko. Pero kiko uso di un poder aplastante asina lo proba realmente? Abo lo atmirá òf keda kontentu ku un hende ku riba e promé indikashon ku otro hende no ta di akuerdo kuné ta simplemente kaba ku tur oposishon pasobra e tin e poder pa hasi esei? Sigur ku no.

E rebeldenan ei no a reta Dios pa su poder todopoderoso mes. Loke nan a kuestioná partikularmente ta su derecho di goberná i su manera di goberná. Pa resolvé di una bes pa semper e kuestionnan fundamental ku a lanta, Yehova a laga su kriaturanan dirigí nan mes asuntunan sin su intervenshon direkto pa un tempu limitá. (Eklesiástes 3:1; Lukas 21:24) Ora e tempu ei kaba, lo e intervení pa bolbe ehersé kòntròl total riba tera. Pa e tempu ei lo ta klaramente bisto ku su manera di goberná ta e úniko manera ku por garantisá pas, felisidat i prosperidat duradero p’e habitantenan di tera. E ora ei tur e opresornan di mundu lo ser eliminá pa semper.—Salmo 72:12-14; Daniel 2:44.

“Promé ku Fundashon di Mundu”

E propósito di Yehova tabata pa hasi tur esaki for di hopi tempu kaba. Pablo ta menshoná “promé ku fundashon di mundu.” (Efesionan 1:4) Esei no tabata promé ku e kreashon di tera òf di Adam ku Eva. E mundu ei tabata “masha bon,” i ainda rebelion no a kuminsá. (Génesis 1:31) Ta na ki “mundu” apòstel Pablo a referí anto? Esei tabata e mundu dje yunan di Adam ku Eva, esta, un mundu di humanidat pekaminoso i imperfekto ku tin e speransa di ser reskatá. Promé ku kualkier yu a nase, ya Yehova tabata sa kaba kon lo e atendé asuntunan pa aliviá e desendientenan di Adam ku sí por ser reskatá.—Romanonan 8:20.

Klaro ku esaki no kier men ku e Soberano di universo tin ku atendé asuntunan manera hende ta hasi. Den kaso di hende, nan ta rekonosé ku por surgi un situashon di emergensia, i p’esei nan ta plania vários strategia en detaye pa trata ku e situashon. En kambio, e Dios todopoderoso ta simplemente establesé su propósito i kumpli kuné. Tòg, Pablo ta splika kon Yehova a disidí di resolvé asuntunan pa trese un alivio permanente pa humanidat. Kiko e medidanan ei tabata?

Ken Lo Trese Alivio?

Pablo ta splika ku e disipelnan di Kristu ungí ku spiritu tin un tarea spesial pa yuda deshasí dje daño ku e piká di Adam a kousa. Segun Pablo, Yehova “a skohe nos den [Kristu]” pa goberná ku Hesus den su Reino selestial. Pablo ta splika mas aleu bisando ku Yehova a “predestiná nos pa wòrdu adoptá komo su yunan pa medio di Hesukristu.” (Efesionan 1:4, 5) Naturalmente no ta individualmente Yehova a skohe, òf predestiná nan. Loke sí el a predestiná ta un klase di hende fiel i dediká ku huntu ku Kristu lo deshasí dje daño ku Satanas e Diabel i Adam ku Eva, a kousa n’e famia humano.—Lukas 12:32; Hebreonan 2:14-18.

Esei sí ta algu asombroso! Den prinsipio, ora Satanas a kuestioná Dios su derecho di goberná, el a insinuá ku Dios a kometé un fayo ku su kreashon humano, esta ku ora nan haña nan bou di hopi preshon òf tentashon, nan tur lo rebelá kontra e mando di Dios. (Job 1:7-12; 2:2-5) Den un demostrashon dramátiko di “e gloria di su grasia,” Yehova Dios ku tempu a mustra su konfiansa den su kreashon terenal dor di adoptá algun miembro di e famia pekaminoso di Adam komo yu spiritual. Esnan ku ta den e grupito aki lo bai shelu pa sirbi einan. Pa ki propósito?—Efesionan 1:3-6; Huan 14:2, 3; 1 Tesalonisensenan 4:15-17; 1 Pedro 1:3, 4.

Apòstel Pablo ta bisa ku e yunan adoptá di Dios aki ta bira “koheredero ku Kristu” den su Reino selestial. (Romanonan 8:14-17) Komo rei i saserdote, nan lo yuda libra e famia humano di e doló i sufrimentu ku e ta pasa aden awor akí. (Revelashon 5:10) Bèrdat, “henter e kreashon ta keha i ta sufri e dolónan di parto huntu, te awor.” Pero pronto e yunan di Dios skohé spesialmente aki lo djòin Hesukristu, i tur hende obediente un biaha mas “lo wòrdu librá for di . . . sklabitut na korupshon pa drenta den e libertat glorioso di e yunan di Dios”.—Romanonan 8:18-22.

“Redenshon”

Tur esaki a bira posibel pa medio di e sakrifisio di reskate di Hesukristu, loke definitivamente ta e ekspreshon mas impreshonante i sublime di e bondat inmeresí di Dios relashoná ku e mundu aki di humanidat ku ainda por ser reskatá. Pablo ta skirbi: “Den [Hesukristu] nos tin redenshon pa medio di su sanger, e pordon di nos pikánan, segun e rikesa di su grasia.”—Efesionan 1:7.

Hesukristu ta e figura prinsipal den e realisashon dje propósito di Dios. (Hebreonan 2:10) Su sakrifisio di reskate ta perkurá e base legal pa Yehova adoptá algun dje desendientenan di Adam den su famia selestial i pa aliviá humanidat di e konsekuensianan dje piká di Adam, sin suak e konfiansa den Su leinan i prinsipionan. (Mateo 20:28; 1 Timoteo 2:6) Yehova a hasi kosnan den un manera ku ta sostené su rektitut i ku ta kumpli ku e normanan di hustisia perfekto.—Romanonan 3:22-26.

Dios Su “Sekreto Sagrado”

Pa míles di aña, Dios no a revelá kon eksaktamente lo e kumpli ku su propósito pa tera. Den e promé siglo di nos era, “el a duna [kristiannan] di konosé e sekreto sagrado di su boluntat.” (Efesionan 1:9, NW) Pablo i su kompañeronan kristian ungí a komprendé bon kla e tarea magnífiko ku Hesukristu a risibí pa realisá e propósito di Dios. Tambe nan a kuminsá komprendé e papel spesial ku nan lo hunga komo koheredero ku Kristu den su Reino selestial. (Efesionan 3:5, 6, 8-11) Sí, e gobernashon di Reino den man di Hesukristu i su ko-gobernantenan ta e instrumento ku Dios lo usa pa trese pas duradero no solamente den shelu sino tambe riba tera. (Mateo 6:9, 10) Mediante dje, Yehova lo restorá e tera aki den e kondishon pa kua el a kre’é originalmente.—Isaías 45:18; 65:21-23; Echonan 3:21.

Su tempu señalá pa intervení i eliminá tur opreshon i inhustisia for di riba tera ta den futuro serkano. Pero, en realidat, Yehova a kuminsá e proseso di restorashon na Pentekòste di aña 33 di nos era. Kon el a hasi esaki? Dor di kuminsá na reuní e tempu ei ‘loke ta den shelu,’ es desir, esnan ku lo goberná ku Kristu den shelu. Esakinan a inkluí e kristiannan efesio. (Efesionan 2:4-7) Mas resien, den nos tempu, Yehova ta reuniendo “loke ta riba tera.” (Efesionan 1:10) Pa medio di un kampaña di predikashon mundial, e ta duna di konosé na tur nashon e bon nobo tokante su gobernashon di Reino den man di Hesukristu. Esnan ku ta respondé faborablemente ta ser reuní for di awor den un lugá di protekshon i kurashon spiritual. (Huan 10:16) Pronto, den un paradeis limpi aki riba tera, nan lo haña libertat kompleto for di tur inhustisia i sufrimentu.—2 Pedro 3:13; Revelashon 11:18.

Hende a dal “pasonan asombroso” den nan esfuersonan humanitario pa yuda esnan oprimí di humanidat. (The State of the World’s Children 2000) Pero e paso mas asombroso lo ta ora Kristu Hesus i su ko-gobernantenan den e gobernashon selestial di Reino intervení pronto den asuntunan humano. Nan lo resolvé kompletamente tur e kousanan básiko di konflikto i tur e otro kosnan malu ku ta afligí nos. Nan lo pone fin na tur e problemanan di humanidat.—Revelashon 21:1-4.

[Plachinan na página 4]

Esfuersonan humanitario no a resolvé e problemanan di humanidat

[Plachi na página 6]

E sakrifisio di reskate di Kristu a perkurá alivio pa humanidat for di e piká di Adam

[Plachi na página 7]

Ta posibel pa haña protekshon i kurashon spiritual awe

[Plachinan na página 7]

Pronto, e Reino Mesiániko lo aliviá humanidat di tur problema