Ora Desakuerdo Surgi den Matrimonio

NIUN esposo òf esposa ku sano huisio no ta gusta pa tin konflikto den nan matrimonio, pero tòg esei ta sosodé hopi. Por lo general, un di e partnernan ta bisa algu ku ta iritá e otro. Nan ta hisa bos, rabia ta lanta, i esaki ta resultá den pleitunan emoshonal kargá ku remarkenan sarkástiko. Despues ta sigui un silensio friu durante kua e dos partnernan ta nenga opstinadamente di papia ku otro. Ku tempu e rabia ta baha i nan ta pidi otro despensa. Tin pas den kas atrobe, a lo ménos te ora e siguiente desakuerdo presentá.

Pleitu matrimonial ta tópiko di un gran kantidat di chiste i di programanan di televishon, pero e realidat no ta nada prèt. De fakto, un proverbio bíbliko ta bisa: “Palabra papiá pa loko ta hùrt hende profundamente.” (Proverbionan 12:18, BPK) Sí, palabranan ofensivo por laga sikatrisnan emoshonal ku ta keda pa hopi tempu despues ku e pleitu a terminá. Pleitamentu por hiba asta na violensia.—Eksodo 21:18.

Klaru ku tin biaha, problema den matrimonio ta inevitabel debí ku nos ta imperfekto. (Génesis 3:16; 1 Korintionan 7:28) Sin embargo, ora e pleitunan ta frekuente i intenso, nos no mester ignorá nan pensando ku ta algu normal. Ekspertonan a ripará ku parehanan ku kontinuamente ta pleita tin mas chèns di divorsiá ku tempu. P’esei anto, ta masha importante pa abo i bo kasá siña trata ku desakuerdo na un manera pasífiko.

Analisá e Situashon

Si abo ku bo kasá ta pleita hopi, purba determiná si boso pleitunan ta sigui un sierto patronchi. Generalmente, kiko ta sosodé ora abo ku bo kasá no ta di akuerdo riba un asuntu? Boso diskushon ta sali for di man mesora i para bira un avalancha di insulto i akusashon? Si esei ta e kaso, kiko bo por hasi?

Promé, analisá onestamente kon abo personalmente lo por ta kontribuí na e problema. Bo ta rabia lihé? Di naturalesa bo ta kla pa diskutí? Kiko bo kasá lo bisa di bo relashoná ku esaki? Ta importante pa konsiderá e último pregunta aki, pasobra podisé abo i bo kasá tin un punto di bista diferente di ki ora un persona ta pleitista.

Por ehèmpel, suponé ku bo kasá tin e tendensia di ta reservá, e no ta ekspresá su sintimentunan fásilmente, miéntras ku abo sí ta masha franko i direkto, i hopi emoshonal ora bo ta ekspresá bo mes. Podisé bo ta bisa: “Ta asina mi a lanta haña tur hende den mi famia ta komuniká. No ta pleita mi ta pleita!” I kisas pa bo en bèrdat e no ta un pleitu. Pero podisé loke pa abo ta un manera franko i stret di bisa kosnan, pa bo kasá ta un konfrontashon ofensivo i agresivo. E echo so ku bo sa ku abo i bo kasá su estilo di komuniká ta diferente por yuda prevení mal komprondementu.

Kòrda tambe ku no ta tur biaha ku hende ta pleita nan ta grita. Pablo a skirbi kristiannan: “Pone un banda  . . lantamentu di bos, insulto.” (Efesionan 4:31) Esaki ta inkluí no solamente loke nos papia ku bos haltu sino tambe e gana di diskutí ku nos ta transmití ku nos palabranan. Mirá for di e punto di bista ei, asta ora bo flùister bo por ta pleita si bo palabranan ta iritante òf humiante.

Ku e informashon anterior na mente, analisá atrobe kon bo ta trata ku desakuerdonan ku bo tin ku bo kasá. Bo ta kla pa diskutí? Manera nos a mira, e berdadero kontesta riba e pregunta ei pa gran parti ta dependé di loke bo kasá ta pensa. En bes di rechasá bo kasá su punto di bista dor di bis’é ku e ta muchu sensitivo, purba mira bo mes manera é ta mira bo, i hasi e kambionan nesesario. Pablo a skirbi: “No laga ningun hende buska su mes interes, sino esun di su próhimo.”—1 Korintionan 10:24.

“Pone Bon Atenshon Kon Boso Ta Skucha”

Nos ta haña un otro aspekto di trata ku desakuerdo den e palabranan di Hesus: “Pone bon atenshon kon boso ta skucha.” (Lukas 8:18) Ta sierto ku aki Hesus no tabata papia di komunikashon den matrimonio. Sin embargo, e prinsipio aki ta apliká den matrimonio tambe. Kon bon bo ta skucha bo kasá? Bo ta skuch’é mes? Òf bo ta interumpié bruskamente ku solushonnan demasiado simpel pa problemanan ku bo no ta komprondé bon kon nan ta sintá den otro.? Beibel ta bisa: “Esun ku respondé promé ku e skucha, esei ta bobedat i bèrgwensa p’e.” (Proverbionan 18:13) Pues anto, ora un desakuerdo surgi, abo ku bo kasá tin ku papia riba e asuntu i skucha otro di bèrdat.

En bes di hasi manera kos ku bo kasá su punto di bista no ta importante, hasi esfuerso pa bo tene “kompashon” kuné. (1 Pedro 3:8) Na griego original, e ekspreshon aki básikamente ta nifiká sufri ku e otro persona. Si bo kasá ta hopi preokupá ku algu, bo tin ku biba ku su sintimentu. Hasi esfuerso pa mira e asuntu for di su punto di bista.

Evidentemente, e hòmber deboto Isaak a hasi esei. Beibel ta konta nos ku su kasá, Rebeka, tabata hopi preokupá ku un problema di famia ku a enbolbé su yu hòmber Jakòb. El a bisa Isaak: “Mi ta fadá di mi bida pa motibu di e yu muhénan di Hèt; si Jakòb tuma un esposa manera esakinan, for di e yu muhénan di Hèt, for di e yu muhénan di e tera, pakiko biba ainda anto?”—Génesis 27:46.

Ta bèrdat ku dor di su preokupashon Rebeka probablemente a eksagerá kosnan. En realidat e tabata fadá di biba? Realmente lo el a preferá di muri si su yu hòmber a kasa ku un di e yu muhénan di Hèt? Probablemente ku nò. Tòg, Isaak no a hasi komo si fuera Rebeka su sintimentunan no tabata importante. En bes di esei, Isaak a rekonosé ku Rebeka tabatin motibu di ta preokupá, i el aktua di akuerdo ku esei. (Génesis 28:1) E siguiente biaha ku bo kasá ta hopi preokupá tokante un asuntu, hasi meskos ku Isaak. En bes di ignorá e asuntu i hasi komo si fuera ta algu insignifikante, skucha bo kasá, respetá su punto di bista i reakshoná na un manera kompasivo.

E Balor di Skucha i di Tin Perspikasia

Un proverbio bíbliko ta bisa: “Prudensia [òf, “perspikasia,” NW] di un hende ta hasi ku e no ta rabia lihé.” (Proverbionan 19:11) Den e kayente di un desakuerdo ta masha fásil pa reakshoná na un manera impulsivo riba kada palabra skèrpi ku bo kasá bisa. Pero generalmente esaki ta yuda solamente pa hasi e pleitu mas pió. P’esei, sea determiná pa ora bo ta skucha bo kasá, pa bo no solamente tende e palabranan ku e ta bisa sino tambe e sintimentunan tras di su palabranan. Dor di desplegá tal perspikasia òf komprondementu penetrante lo bo no laga bo mes ser distraí dor di e kosnan ku a molestiá abo, i lo bo yega na e kousa di e problema.

Por ehèmpel, suponé ku bo esposa ta bisa bo: “Nunka bo no tin tempu pa mi!” Lo bo por sinti bo iritá i impulsá pa rechasá e akusashon ei dor di presentá puru echo. Kisas bo ta kontestá: “Luna pasá mi a pasa henter un dia ku bo!” Pero si bo skucha ku atenshon lo bo por ripará ku eigenlijk bo esposa no ta pidi pa mas minüt òf ora. En bes di esei, podisé e ta bisando ku e ta sinti ku bo ta neglish’é i ku bo no ta stim’é. I ku e palabranan ei e ta pidi bo pa sigur’é di bo sintimentunan p’e.

Suponé ku bo ta un esposa i bo esposo ta ekspresá su preokupashon tokante un kompra ku bo a hasi resientemente. Babuká, e ta puntra: “Kon bo por a gasta tantu plaka asina?” Bo promé reakshon kisas ta pa defendé bo mes ku echonan relashoná ku e estado finansiero di e famia òf dor di kompará loke abo a kumpra ku loke e mes a yega di kumpra. Sin embargo, komprondementu penetrante lo yuda bo mira ku bo esposo kisas no ta papiando di florin ku depchi. Podisé, mas bien e ta sintié molestiá ku bo a tuma un desishon pa hasi un kompra grandi sin konsultá kuné.

Klaru ku kada pareha kisas tin un otro manera pa disidí kuantu tempu nan ta pasa huntu i kon nan ta tuma desishon tokante kosnan ku mester wòrdu kumprá. E lès ku nos tin ku saka ta ku ora surgi un desakuerdo, komprondementu penetrante lo pone ku bo no ta rabia lihé i lo yuda bo identifiká kiko realmente ta e problema. Na lugá di reakshoná na un manera impulsivo, sigui e spièrtamentu di e eskritor di Beibel Santiago. El bisa pa nos ta “lihé pa tende, no lihé pa papia i no lihé pa rabia.”—Santiago 1:19.

Ora bo papia, kòrda ku e manera ku bo ta papia ku bo kasá ta importante. Beibel ta bisa ku “lenga di hende sabí ta trese kuramentu.” (Proverbionan 12:18) Ora abo ku bo kasá ta diskutí, bo palabranan ta hinka òf hùrt, òf nan ta kura? Nan ta lanta opstákulo òf nan ta habri kaminda pa rekonsiliashon? Manera nos a mira kaba, e úniko kos ku kontestanan rabiá òf impulsivo ta hasi ta lanta pleitu.—Proverbionan 29:22.

Si un desakuerdo eskalá i bira un konflikto di palabra, hasi esfuerso pa trata ku e punto prinsipal. Enfoká riba e kousa di e problema i no riba e persona. Preokupá mas bien ku loke ta korekto en bes di ku ken tin rason. Tene kuidou pa bo palabranan no hasi e desakuerdo pió. Beibel ta bisa: “Un palabra skèrpi ta lanta rabia.” (Proverbionan 15:1) Sí, loke bo ta bisa i kon bo ta bis’é lo por determiná si bo ta haña e koperashon di bo kasá òf nò.

Hasi Esfuerso pa Resolvé, No pa Gana

Ora nos ta trata ku desakuerdo, e meta ta pa logra un solushon i no pa gana un pleitu. Kon boso por yega na un solushon? E manera mas sigur ta di buska i apliká konseho di Beibel, i foral esposonan mester tuma e inisiativa pa hasi esei. En bes di ser lihé pa ekspresá opinionnan fuerte riba un asuntu òf problema ku boso ta tratando, pakiko no purba wak nan for di e punto di bista di Yehova? Hasi orashon na dje, i buska e pas di Dios ku lo protehá boso kurason i fakultatnan mental. (Efesionan 6:18; Filipensenan 4:6, 7) Hasi esfuerso sinsero pa bo no wak solamente bo propio interes sino tambe esun di bo kasá.—Filipensenan 2:4.

Loke hopi bes ta hasi un situashon ku ta malu bira pió ta di laga sintimentunan di hùrt i emoshonnan deskontrolá dominá bo pensamentu- i akshonnan. Di otro banda, ser dispuesto pa laga e konseho di e Palabra di Dios reahustá nos pensamentunan ta hiba na pas, akuerdo, i Yehova su bendishon. (2 Korintionan 13:11, NW) P’esei, laga e “sabiduria di ariba” guia boso, manifestá kualidatnan ku ta agradá Dios i kosechá e benefisionan di “esnan ku ta hasi pas.”—Santiago 3:17, 18.

Realmente, nos tur mester siña trata ku desakuerdo na un manera pasífiko asta si esaki ta nifiká sakrifiká preferensianan personal. (1 Korintionan 6:7) Sí, apliká Pablo su konseho pa kita “rabia, furia, malisia, kalumnia i palabra sushi for di boso boka. . . . Pone un banda e hende bieu ku su práktikanan malbado, i . . . bisti e hende nobo.”—Kolosensenan 3:8-10.

Klaru ku de bes en kuando lo bo por bisa kosnan ku despues ta duel bo. (Santiago 3:8) Ora esaki sosodé, pidi bo kasa despensa. Sigui hasi esfuerso. Ku tempu, lo tin hopi chèns ku abo i bo kasá lo mira ku boso a mehorá masha hopi den boso manera di trata ku desakuerdo.

[Kuadro/Plachi na página 22]

Tres Paso pa Plakia un Pleitu

• Skucha bo kasa. Proverbionan 10:19

• Respetá su punto di bista. Filipensenan 2:4

• Reakshoná den un manera amoroso. 1 Korintionan 13:4-7

[Kuadro/Plachi na página 23]

Loke Bo Por Hasi Awor

Hasi bo kasá e preguntanan aki bou, i skucha su kontesta sin interumpié. Kaba bo kasá por hasi meskos ku bo.

• Mi ta gusta pleita?

• Mi ta ègt skucha ora bo ta ekspresá bo mes, òf mi ta bula reakshoná promé ku bo a kaba di papia?

• Bo ta haña mi palabranan ta zona rabiá òf ku mi no tin kunes?

• Kiko nos tur dos por hasi pa mehorá nos manera di komuniká, foral ora nos no ta di akuerdo riba un asuntu?

[Plachi na página 21]

Bo ta skucha?

[Plachi na página 22]

“Mi ta sinti ku e ta neglishá mi i ku e no stima mi”

[Plachi na página 22]

“Nunka bo no tin tempu pa mi!”

[Plachi na página 22]

“Luna pasá mi a pasa henter un dia ku bo!”