Bo Ta “Cumprando e Tempu Oportuno”?

APOSTEL Pablo a consehá e cristiannan di promé siglo na Efeso: “Vigilá cuidadosamente p’e manera cu boso ta cana no ta manera hende imprudente sino manera hende sabí, cumprando e tempu oportuno pa boso mes, pasobra e dianan ta malu.” (Efesionan 5:15, 16) Di con e conseho aki tabata necesario? Pa haña un contesta p’e pregunta ei, un persona mester tin conocimentu dje situacionnan cu e cristiannan a haña nan confrontá cuné den e stad antiguo ei.

Efeso tabata conocí pa su rikesa sobresaliente, inmoralidad grosero, crímen incontrolabel i vários actividad di demonismo. Fuera di eseinan, e cristiannan einan mester a lucha cu creencianan filosófico relacioná cu tempu. E griegonan no-cristian na Efeso no tabata kere cu tempu ta move den un direccion. Filosofia griego a siña nan cu bida ta ripití den ciclonan sin fin. Un persona cu a malusá su tempu den un ciclo di bida por a gana su tempu bek den un otro ciclo. E manera di pensa aki por a impulsá cristiannan na Efeso pa adoptá un actitud negligente pa cu Jehova su orario di sucesonan, incluso su orario pa trece huicio divino. P’esei, e conseho di Pablo pa ‘cumpra tempu oportuno’ tabata apropiado.

Pablo no tabata papiando di tempu djis den un sentido general. E palabra griego cu el a usa ta nificá un tempu señalá, un tempu oportuno pa un propósito specífico. Pablo tabata consehá e cristiannan di promé siglo pa haci bon uso dje periodo oportuno of dje tempu faborabel cu nan tabata disfrutá di dje den e dianan ei, promé cu su fin yega i cu lo no tabatin chens mas pa beneficiá dje misericordia di Dios i di su oferta pa gana salbacion.—Romanonan 13:11-13; 1 Tesalonicensenan 5:6-11.

Nos tambe ta bibando den un periodo di tempu oportuno. En bes di desperdiciá e periodo faborabel aki cu lo no ser ripití hamas, dor di sigui tras di placernan temporal cu mundu ta ofrecé, ta sabi pa cristiannan usa e tempu cu ta na nan disposicion pa efectuá “echonan di debocion na Dios” i asina fortalecé nan relacion cu e Creador, Jehova Dios.—2 Pedro 3:11; Salmo 73:28; Filipensenan 1:10.