Probecha dje Oportunidad Unico Aki!

PETER tabata basta avansá den su estudionan médico ora Bijbel su mensahe di salbacion a capta su interes. Ora el a gradua i a cuminsá traha como dokter den un hospital, su superiornan continuamente tabata anim’é p’e specialisá como neuro-ciruhano. Esaki tabata un oportunidad cu hopi dokter nobo lo a probechá di dje sin vacilá.

Sin embargo, Petera a dicidí di legumai e oportunidad aki. Pakico? Simplemente e tabata falta e ambicion i motivacion necesario? No, pasobra Peter debidamente a considerá e oferta cuidadosamente. Despues di a bira un Testigo di Jehova dedicá i bautisá, el a deseá pa dedicá mas tantu tempu posibel den e vários aspectonan dje ministerio cristian. Una bes cu el a cualificá como neuro-ciruhano, el a razoná, su profesion lo a guli mas i mas di su tempu i energia. Tabata bobo di su parti pa laga e oportunidad único aki pasa forbij, of tabata sabí di su parti?

Pa algun, Peter su decision por a parce bobo. Sin embargo, el a tuma textonan di Bijbel manera Efesionan 5:15, 16 na consideracion. Ei apostel Pablo a urgi compañeronan cristian: “Vigilá cuidadosamente p’e manera cu boso ta cana no ta manera hende imprudente sino manera hende sabí, cumprando e tempu oportuno pa boso mes, pasobra e dianan ta malu.”

Por fabor ripará e expresion “tempu oportuno.” E ta ser traducí for di un palabra griego usá den Bijbel mayoria bes pa referí na un tempu of periodo marcá pa cierto rasgonan of apropiado pa un actividad specífico. Aki Pablo a enfatisá cu cristiannan mester traha tempu pa asuntunan importante. En berdad, nan mester “haci sigur dje cosnan mas importante.” (Filipensenan 1:10) Esei ta un cuestion di fiha prioridadnan.

Pues, anto, kico ta e propósito divino pa nos tempu? Kico ta e boluntad di Dios pa esnan cu ta stim’é? Profecianan di Bijbel ta identificá nos tempu claramente como “e tempu di fin,” of “e último dianan.” (Daniel 12:4; 2 Timoteo 3:1) Cristo Jesus no a laga duda tocante kico lo ta di promé importancia pa nos tempu. El a bisa specíficamente cu promé cu e fin dje mal sistema di cosnan aki, ‘e bon nobo dje reino aki lo a ser predicá den tur e tera habitá como testimonio pa tur nacion.’ Solamente e ora ei e fin lo yega.—Mateo 24:3, 14.

P’esei, nos tin cu probechá di tur oportunidad pa predicá e bon nobo di Reino i haci disipel. (Mateo 28:19, 20) Ya cu e actividadnan aki nunca mas lo ser ripití, esaki ta e último oportunidad pa duna tur nos tempu i energia den e trabou salbador di bida aki. “Awor ta e tempu specialmente aceptabel.” En berdad, “awor ta e dia di salbacion.”—2 Corintionan 6:2.

Tumando un Decision Sabí

Peter—e yoncuman cu a ser mencioná den e introduccion—a pensa cuidadosamente tocante su decision i a evaluá su opcionnan. El a realisá cu lo no ta incorecto p’e studia cu e intencion di bira un neuro-ciruhano. Pero kico tabata di mayor importancia p’e? Esei tabata su actividad den e ministerio cristian, en bista dje urgencia dje trabou aki. N’e mésun tempu, e tabatin obligacionnan pa cumpli cuné. E tabata casá i tabatin cu mantené su esposa, kende ta participando den e trabou di predicá di tempu completo. (1 Timoteo 5:8) Tambe Peter tabatin cu paga su debenan bek relacioná cu su educacion. Kico, anto, el a dicidí di haci?

Peter a dicidí di specialisá den radiologia i haci exámen ultrasónico. Esaki tabata trabou cu lo a encerá un dia normal di trabou. Tambe lo el a ricibí su entrenamentu durante oranan regular di trabou. Ta berdad cu algun por considerá esaki como un puesto ménos prestigioso, pero lo e dun’é mas tempu pa dedicá na empeñonan spiritual.

Un otro punto mas a motivá Peter p’e tuma su decision. Aunke e no ta husga otronan cu kisas a dicidí den un manera diferente, e tabata sa cu birando demasiado enbolbí den asuntunan seglar en berdad ta presentá un peliger pa un cristian. Esei por pone cu e ta neglishá responsabilidadnan spiritual. Esaki ta ser ilustrá dor di un otro ehempel cu a drei rond di empleo.

Un cierto predicador di Reino di tempu completo tabata un artista diplomá. E por a mantené su mes financieramente dor di bende su cuadronan. Aunke e tabata dedicá mayoria di su tempu n’e ministerio cristian importantísimo, dje manera ei e por a mantené su mes cómodamente. Sin embargo, un deseo pa progresá den su carera artístico a cuminsá crece. El a bira mas enbolbí den pintamentu i e mundu di arte, a bandoná e ministerio di tempu completo, i finalmente a bira totalmente inactivo pa loke ta e actividad di predicá e Reino. Cu tempu, el a bira enbolbí den conducta no-bíblico, resultando den su expulsion for dje congregacion cristian.—1 Corintionan 5:11-13.

E Tempu cu Nos Ta Biba den Ta Special

Como personanan cu ta sirbiendo Jehova awor, siguramente nos kier keda fiel na dje. Nos sa cu nos ta bibando den e tempu di mas extraordinario den historia humano. Afin di sigui sirbi Dios i biba cu e circunstancianan actual eficasmente, kisas nos tin cu haci vários ahuste. Nos por compará esaki cu e tempu di cosecha pa un cunukero. Esei ta un periodo di actividad special, ora ta ser sperá di trahadornan di cunucu pa haci mas esfuerso cu normal i pa traha mas ora pa dia. Pakico? Pasobra e cosecha mester ser recogé den un periodo di tempu limitá.

A sobra solamente un tempu masha limitá p’e mal sistema di cosnan actual. Awor mas cu nunca promé, un cristian berdadero mester haci esfuerso pa sigui e ehempel di Jesus i cana den su pasonan. Su curso di bida riba tera a demostrá claramente loke tabata di mayor importancia p’e. El a bisa: “Nos tin cu haci e trabounan di esun cu a mandá mi miéntras cu ta di dia; e anochi ta bini ora ningun hende por traha.” (Juan 9:4) Bisando cu e anochi ta bini, Jesus tabata refiriendo n’e tempu di su prueba, clabamentu na staca i morto, ora cu su ministerio terenal lo a terminá i lo e tabata incapas pa participá den e trabounan di su Tata celestial.

Ta cierto cu durante su ministerio di tres aña i mei, Jesus a dedicá algu di su tempu pa haci milager i cura e enfermonan. No obstante, el a usa mayor parti di su tempu pa predicá e mensahe di Reino i pa “predicá un liberacion n’e catibunan” di religion falsu. (Lucas 4:18; Mateo 4:17) Jesus a haci esfuerso diligente den su ministerio i tambe a tuma tempu pa entrená su disipelnan di manera cu nan por a edificá riba e fundeshi cu el a pone i sigui eficasmente cu e trabou di predicá. Jesus a probechá di tur oportunidad pa promové interesnan di Reino i tabata kier pa su disipelnan haci mescos.—Mateo 5:14-16; Juan 8:12.

Mescos cu Jesus, nos cu ta su siguidornan dje tempu actual tin cu mira e situacion di humanidad manera Jehova Dios ta mir’é. Tempu ta cabando p’e sistema di cosnan aki, i Dios misericordiosamente kier pa tur hende haña e oportunidad di gana salbacion. (2 Pedro 3:9) P’esei, lo no ta sabí pa pone tur otro actividad na segundo lugá despues di hacimentu dje boluntad di Jehova? (Mateo 6:25-33) Specialmente durante un tempu asina special manera esaki, algu cu normalmente lo a ser considerá como importante por wel bira di ménos importancia den nos bida como cristiannan.

Lo duel cualkier un di nos un dia di a pone e boluntad di Dios na promé lugá den nos bida? Siguramente cu no, pasobra e curso cristian di sacrificio propio ta maraviyosamente recompensador. Por ehempel, Jesus a bisa su disipelnan: “En berdad mi ta bisa boso, Ningun hende a laga cas of ruman homber of ruman muher of mama of tata of yu of cunucu pa mi causa i pa causa dje bon nobo cu lo no haña shen biaha mas tantu awor den e periodo di tempu aki, cas i ruman homber i ruman muher i mama i yu i cunucu, huntu cu persecucion, i den e binidero sistema di cosnan bida eterno.”—Marco 10:29, 30.

Ningun hende por bisa cuantu placa e recompensanan cu ta bini pa esnan cu ta usa nan tempu pa alabá Jehova i pa proclamá e mensahe di Reino, ta bal. Nan ta disfrutá di asina tantu bendicion! Esaki ta incluí berdadero amigunan, e satisfaccion di ta haci e boluntad divino, Dios su sonrisa di aprobacion, i e prospecto di bida sin fin. (Revelacion 21:3, 4) I ta ki un bendicion pa yuda hende spiritualmente i trece onor na Jehova su nomber santu como su Testigonan! No cabe duda, “cumprando e tempu oportuno” ta un curso berdaderamente sabí i recompensador. Awor mas cu nunca promé ta e tempu pa participá den declará e bon nobo dje Reino di Dios. Lo bo probechá dje oportunidad único aki i tene duru n’e?

[Nota]