‘Sea Imitadó di Dios’ den Uso di Bo Poder

 1. Den ki trampa sutil hende imperfekto ta kai fásilmente?

“NO TIN poder sin un trampa skondí.” E palabranan ei di un poëta di siglo 19 ta hala atenshon na un peliger sutil: mal uso di poder. Lamentablemente, hende imperfekto ta kai fásilmente den e trampa aki. En bèrdat, atraves di historia ‘hende a ehersé outoridat riba otro hende pa su daño.’ (Eklesiastés 8:9) Uso di poder sin amor a resultá den hopi sufrimentu humano.

2, 3. (a) Kiko ta remarkabel tokante e manera ku Yehova ta usa su poder? (b) Den ki sentido nos por tin poder, i kon nos mester usa e poder ei semper?

² Pero no ta remarkabel ku Yehova Dios, kende tin poder sin límite, nunka ta hasi mal uso di e poder ei? Manera nos a nota den e kapítulonan anterior, semper e ta usa su poder—sea pa krea, pa destruí, pa protehá òf pa restorá—na armonia ku su propósitonan amoroso. Ora nos meditá riba kon e ta ehersé su poder, nos ta sinti nos impulsá pa hala serka dje. Esei, na su turno, por motivá nos pa ‘bira imitadó di Dios’ den e manera ku nos ta hasi uso di poder. (Efesionan 5:1) Pero ki poder nos komo ser humano insignifikante ta poseé?

³ Kòrda ku hende a ser kreá den e “imágen” i semehansa di Dios. (Génesis 1:26, 27) P’esei, te na sierto grado, nos tambe tin poder. Nos tin poder den sentido ku nos ta kapas pa traha, òf pa logra sierto kosnan; ku nos por ta den un posishon di kontròl òf outoridat riba otro hende; ku nos por influensiá otro hende, foral esnan ku ta stima nos; ku nos tin forsa físiko òf rekurso material. E salmista a bisa enkuanto Yehova: “Serka bo e fuente di bida ta.” (Salmo 36:9) P’esei, sea direktamente òf indirektamente, Dios ta e fuente di kualkier poder legítimo ku nos tin. P’esei nos kier us’é den un manera ku ta agrad’é. Kon nos por hasi esei?

4, 5. (a) Kiko ta e klave pa usa poder na un manera korekto, i kon e ehèmpel di Dios mes ta demostrá esaki? (b) Kon amor lo yuda nos usa poder na un manera korekto?

⁴ E klave pa usa poder na un manera korekto ta amor. E ehèmpel di Dios mes no ta demostrá esaki? Kòrda e análisis di Kapítulo 1 riba Dios su kualidatnan prinsipal, esta, poder, hustisia, sabiduria i amor. Kua di e kuater kualidatnan aki ta predominá? Amor, pasobra 1 Juan 4:8 ta bisa ku “Dios ta amor.” Sí, e esensia mes di Yehova ta amor; amor ta influensiá tur loke e ta hasi. Pues tur demostrashon di su poder ta motivá pa amor, i na final di kuenta, e ta pa benefisio di esnan ku ta stim’é.

⁵ Amor lo yuda nos tambe usa nos poder na un manera korekto. Al fin i al kabo, Beibel ta bisa nos ku amor ta “kariñoso” i “no ta buska su propio interes.” (1 Korintionan 13:4, 5) P’esei, amor lo no duna nos espasio pa aktua na un manera brutu òf kruel ku esnan riba ken nos tin sierto outoridat. En bes di esei, nos lo trata otro hende ku dignidat i pone nan nesesidatnan i sintimentunan promé ku esnan di nos.—Filipensenan 2:3, 4.

6, 7. (a) Kiko ta temor di Dios, i pakiko e kualidat aki lo yuda nos evitá di hasi mal uso di poder? (b) Ilustrá e konekshon entre amor pa Dios i temor di desagrad’é.

⁶ Amor ta ligá ku un otro kualidat ku por yuda nos evitá di abusá di poder: temor di Dios. Kiko ta e balor di e kualidat aki? “Pa medio di e temor di SEÑOR hende ta keda leu for di maldat,” segun Proverbionan 16:6. Mal uso di poder sigur ta un di e maldatnan for di kua nos tin ku keda leu. Temor di Dios lo prevení ku nos ta abusá di esnan riba ken nos tin outoridat. Pakiko? Pasobra, entre otro, nos ta konsiente ku nos ta responsabel na Dios p’e manera ku nos ta trata otro hende. (Nehemias 5:1-7, 15) Pero temor di Dios ta enserá mas ku esei. E palabranan di e idioma original pa “temor” hopi bes ta referí na un rèspèt profundo di Dios. Beibel ta relashoná temor ku amor pa Dios. (Deuteronomio 10:12, 13) E rèspèt profundo aki ta enserá un temor saludabel di desagradá Dios—no djis pasobra nos tin miedu di e konsekuensianan sino pasobra nos ta stim’é di kurason.

⁷ Pa ilustrá esaki, pensa riba e relashon sano entre un mucha chikitu ku su tata. E chikitin ta sinti ku su tata tin un interes kaluroso i amoroso den dje. Pero e ta konsiente tambe di loke su tata ta eksigí di dje, i e sa ku su tata lo disiplin’é si e komportá su mes malu. Ma e mucha no ta biba spantá di su tata. Al kontrario, e stima su tata hopi i ta gusta hasi loke ta agradá su tata. Meskos ta konta pa nos temor di Dios. Dor ku nos stima Yehova, nos Tata selestial, nos tin miedu di hasi kualkier kos ku lo hasi ‘su kurason tristu.’ (Génesis 6:6) Mas bien, nos tin gana di alegrá su kurason. (Proverbionan 27:11) P’esei nos kier usa nos poder na un manera korekto. Laga nos analisá mas aleu kon nos por hasi esaki.

 8. (a) Ki outoridat e esposo tin den famia, i kon e mester ehers’é e outoridat aki? (b) Kon un esposo por demostrá ku e ta onra su kasá?

⁸ Pensa na promé lugá riba e sírkulo familiar. Efesionan 5:23 ta bisa ku “e esposo ta kabes di e esposa.” Kon e esposo mester ehersé e outoridat ku Dios a dun’é? Beibel ta bisa e esposo p’e duna su kasá “onor” i pa biba kuné “ku komprenshon, manera ku un vaso mas delikado.” (1 Pedro 3:7) E sustantivo griego tradusí “onor” ta nifiká “preis, balor, . . . rèspèt.” Den algun kaso a tradusí e palabra aki komo “regalo” i “presioso.” (Echonan 28:10, BPK; 1 Pedro 2:7) Un esposo ku ta onra su kasá hamas lo maltrat’é físikamente; ni lo e no humi’é, ridikulis’é i lag’é sinti su mes indigno. Al kontrario, e ta rekonosé su balor i ta trat’é ku rèspèt. E ta demostrá ku echo i palabra—den privá i den públiko—ku e ta presioso den su bista. (Proverbionan 31:28) Di e forma ei e esposo ta gana no solamente e amor i rèspèt di su esposa sino, mas importante ainda, Dios su aprobashon.

 9. (a) Ki poder e esposa tin den famia? (b) Kiko por yuda un esposa usa su abilidatnan pa apoyá su kasá, i ku ki resultado?

⁹ E esposa tambe tin sierto poder den famia. Beibel ta papia di muhénan deboto ku, sin bai kontra e outoridat di nan kasá, a tuma inisiativa pa ehersé un bon influensia riba nan kasá òf pa yuda nan evitá di faya den huisio. (Génesis 21:9-12; 27:46–28:2) Kisas e esposa ta mas inteligente ku su kasá, òf kisas e tin otro kualidatnan ku e hòmber no tin. Tòg, e mester “respetá” su esposo i “sea sumiso” na dje “manera na Señor.” (Efesionan 5:22, 33) Ora e esposa tin e meta di agradá Dios, esei por yud’é usa su abilidatnan pa apoyá su kasá en bes di rebah’é òf purba domin’é. Un “muhé sabí” asina ta koperá estrechamente ku su esposo pa edifiká e famia. Asina lo e mantené pas ku Dios.—Proverbionan 14:1.

10. (a) Ki outoridat Dios a duna mayornan? (b) Kiko e palabra “disiplina” ta nifiká, i kon mester duna disiplina? (Mira tambe nota na pia di página.)

¹⁰ Tambe Dios a duna mayornan outoridat. Beibel ta spièrta: “Tatanan, no provoká boso yunan na rabia, ma lanta nan den e disiplina i instrukshon di Señor.” (Efesionan 6:4) Den Beibel, e palabra “disiplina” por nifiká “edukashon, formashon i instrukshon.” Yu tin mester di disiplina; ora nan haña guia, restrikshon i límitenan bon kla, nan ta desaroyá bon. Beibel ta relashoná tal disiplina, òf instrukshon, ku amor. (Proverbionan 13:24) P’esei, e “bara” di disiplina nunka mag hiba na maltrato físiko òf emoshonal.a (Proverbionan 22:15; 29:15) Un mayor ku ta disipliná su yu na un manera rígido òf kruel, sin sentido di amor, ta abusando di su outoridat komo mayor, i esei por kibra e ánimo di e mucha. (Kolosensenan 3:21) En kambio, un disiplina balansá ku ser duná korektamente ta yuda e yu komprondé ku su mayornan ta stim’é i ku nan tin interes den e klase di persona ku e ta birando.

11. Kon yunan por usa nan poder na un manera korekto?

¹¹ Kiko di e yunan? Kon nan por usa nan poder na un manera korekto? “Gloria di hende yòn ta nan forsa,” segun Proverbionan 20:29. Sin duda, e mihó manera ku hóbennan por usa nan energia i vigor ta den sirbishi di nos “Kreadó.” (Eklesiastés 12:1) Hóbennan mester kòrda ku nan akshonnan por afektá e sintimentu di nan mayornan. (Proverbionan 23:24, 25) Ora yunan obedesé nan mayornan temeroso di Dios i sigui un kaminda rekto, esei ta alegrá kurason di nan mayornan. (Efesionan 6:1) Un kondukta asina ta “agradabel na Señor.”—Kolosensenan 3:20.

12, 13. (a) Kon ansianonan mester mira nan outoridat den e kongregashon? (b) Ilustrá pakiko ansianonan mester trata e tou ku ternura.

¹² Yehova a perkurá superintendentenan pa hiba delantera den e kongregashon kristian. (Hebreonan 13:17) E hòmbernan kapasitá aki mester usa e outoridat ku Dios a duna nan pa yuda nan rumannan i pa kontribuí n’e bienestar di e tou. E posishon ku ansianonan tin ta duna nan derecho di dominá nan rumannan? Di ningun manera! Ansianonan mester tin un punto di bista balansá i humilde di nan papel den e kongregashon. (1 Pedro 5:2, 3) Beibel ta bisa superintendentenan pa “pastoriá e kongregashon di Dios, kua el a kumpra ku e sanger di su propio Yu.” (Echonan 20:28, NW) Esaki ta un motibu di peso pa trata kada miembro di e tou ku ternura.

¹³ Nos por ilustr’é den e siguiente manera. Un bon amigu ta pidi bo kuida un kos di hopi balor p’e. Bo sa ku bo amigu a paga un preis haltu p’e artíkulo. Lo bo no trat’é ku delikadesa i ku hopi kuidou? Meskos tambe Dios a enkargá e ansianonan ku e responsabilidat di kuida un poseshon di hopi balor p’e: e kongregashon, kende su miembronan ta manera karné. (Juan 21:16, 17) Yehova tin asina tantu kariño pa su karnénan ku el a kumpra nan ku e sanger presioso di su Yu unigénito, Hesukristu. Yehova a paga e preis di mas haltu pa su karnénan. Ansianonan humilde ta tene esei na mente i ta trata Yehova su karnénan di akuerdo ku esei.

14. Ki poder lenga tin?

¹⁴ “Morto i bida ta den e poder di lenga,” segun Beibel. (Proverbionan 18:21) En bèrdat, lenga por kousa hopi daño. Kua di nos no a yega di sinti e doló fuerte di un komentario sin konsiderashon òf asta di menospresio? Pero lenga tin poder di kura tambe. “Lenga di hende sabí ta trese kuramentu,” segun Proverbionan 12:18. Sí, palabranan positivo i alentador por ta manera bálsamo kalmante i kurativo pa kurason. Laga nos wak un par di ehèmpel.

15, 16. Den ki maneranan nos por usa nos lenga pa stimulá nos rumannan?

¹⁵ Promé Tesalonisensenan 5:14 ta animá nos fuertemente pa “enkurashá esnan ku ta falta ánimo.” Sí, tin biaha asta fiel sirbidó di Yehova por haña nan ta lucha ku depreshon. Kon nos por yuda e rumannan aki? Elogiá nan di kurason pa e bon kosnan ku nan ta hasi; esei lo laga nan mira kuantu balor nan tin den bista di Yehova. Kompartí ku nan e palabranan poderoso di tekstonan di Beibel ku ta mustra e gran amor i interes profundo ku Yehova tin den esnan ku ta di “kurason kibrá” i “di spiritu abatí.” (Salmo 34:18) Ora nos ta usa e poder di nos lenga pa enkurashá i konsolá otro hende, nos ta mustra ku nos ta imitando e Dios di kompashon “kende ta konsolá esnan abatí.”—2 Korintionan 7:6.

¹⁶ Tambe nos por usa e poder di nos lenga pa duna e estímulo ku otronan tin tantu mester di dje. Un ruman a pèrdè un ser kerí den morto? Palabranan di kondolensia ku ta ekspresá nos interes i atenshon por konsolá un kurason tristu. Un ruman di edat ta sinti ku ya e no ta konta mas? Palabranan bon skohé por garantisá rumannan di edat ku nan ta útil i di hopi balor. Un ruman ta luchando ku un enfermedat króniko? Palabranan amabel sea via telefon òf personalmente por kontribuí hopi pa lanta e ánimo di esnan ku ta malu. Ki kontentu nos Kreadó lo keda ora nos usa e poder di abla pa ekspresá palabranan ku ta “bon pa edifikashon.”—Efesionan 4:29.

17. Den ki manera importante nos por usa nos lenga pa benefisio di otro hende, i pakiko nos mester hasi esei?

¹⁷ E manera mas importante ku nos por usa e poder di lenga ta dor di kompartí e bon nobo di e Reino di Dios ku otro hende. “No laga di hasi bon na esnan ku meresé esaki, si ta den bo poder pa hasié,” segun Proverbionan 3:27. Nos tin e obligashon di kompartí e bon nobo ku nan, ya ku esaki por salba nan bida. Lo no ta korekto pa tene pa nos mes e mensahe urgente ku Yehova a duna nos generosamente. (1 Korintionan 9:16, 22) Pero te na ki grado Yehova ta spera pa nos partisipá den e obra aki?

18. Kiko Yehova ta spera di nos?

¹⁸ Amor pa Yehova ta impulsá nos pa partisipá plenamente den e ministerio kristian. Kiko Yehova ta spera di nos den esaki? Algu ku nos tur, sin importá nos sirkunstansianan di bida, por duna: “Tur loke boso hasi, hasi boso trabou di kurason, komo pa SEÑOR i no pa hende.” (Kolosensenan 3:23) Ora Hesus a duna e mandamentu di mas grandi, el a bisa: “Stima SEÑOR bo Dios ku henter bo kurason, i ku henter bo alma, i ku henter bo mente, i ku tur bo forsa.” (Marko 12:30) Sí, Yehova ta spera pa kada un di nos stim’é i sirbié ku henter nos alma.

19, 20. (a) Siendo ku alma ta enserá e kurason, mente i forsa, pakiko Marko 12:30 ta menshoná e otro fakultatnan aki riba nan mes? (b) Kiko ta nifiká sirbi Yehova di henter alma?

¹⁹ Kiko kier men sirbi Dios di henter alma? Alma ta referí na e persona kompletu, ku tur su abilidatnan físiko i mental. Ya ku alma ta enserá e kurason, mente i forsa, pakiko Marko 12:30 ta menshoná kada un di e otro fakultatnan aki riba nan mes? Pensa riba e siguiente ilustrashon. Den tempu di Beibel, un persona por a bende su mes (su alma) komo esklabo. Pero kisas e esklabo no tabata sirbi su doño di henter kurason; tal bes e no tabata usa tur su forsa òf tur su kapasidat mental pa sirbi e interesnan di su doño. (Kolosensenan 3:22) P’esei, evidentemente Hesus a menshoná e otro fakultatnan aki pa enfatisá ku nos no mester tene nada atras den nos sirbishi na Dios. Sirbi Dios ku henter nos alma ta nifiká duna di nos mes, usando e máksimo kapasidat di nos forsa i energia den su sirbishi.

²⁰ Sirbi di henter alma ta nifiká ku nos tur mester dediká e mesun kantidat di tempu i energia den sirbishi? Esei sigur no ta posibel, pasobra kada ken su sirkunstansianan i abilidatnan ta diferente. Por ehèmpel, un hóben ku bon salú i resistensia físiko lo por dediká mas tempu den e trabou di prediká ku un ruman ku debí na su edat no tin dje tantu energia ei. Un ruman soltero ku no tin obligashon di famia lo por hasi mas ku un otro ku tin ku perkurá pa su famia. Si nos tin e forsa i sirkunstansianan ku ta permití nos hasi hopi den sirbishi, nos mester ta mashá gradisidu! Klaru ku nos lo no kier tin un spiritu krítiko i kuminsá kompará nos mes ku otro rumannan den e asuntu aki. (Romanonan 14:10-12) Mas bien, nos kier usa nos forsa pa animá otro rumannan.

21. Kiko ta e manera mas mihó i mas importante pa usa bo poder?

²¹ Yehova a pone e ehèmpel perfekto den usa poder na un manera korekto. Nos kier imit’é te kaminda nos imperfekshon humano ta permití nos. Nos por usa nos poder na un manera korekto dor di trata esnan riba ken nos tin sierto outoridat ku dignidat. Ademas, nos kier traha di henter alma den e obra di prediká e mensahe ku Yehova a enkargá nos kuné, i ku por skapa bida di hende. (Romanonan 10:13, 14) Kòrda ku Yehova ta keda kontentu ora bo duna tur loke abo—bo alma—por duna. Bo kurason no ta impulsá bo pa bo hasi tur loke ta na bo alkanse pa sirbi un Dios asina komprensivo i amoroso? No tin un manera mas mihó òf mas importante pa usa bo poder.