Esposonan, Rekonosé Kristu Komo Boso Kabes
“Kristu ta e kabes di tur hòmber.”—1 KORINTIONAN 11:3.
1, 2. (a) Kon lo bo por midi éksito di un esposo? (b) Pakiko ta sumamente importante pa rekonosé ku ta Dios a establesé e areglo di matrimonio?
KON lo bo midi éksito di un esposo? Na su kapasidat mental òf físiko? A base di e kantidat di plaka ku e por gana? Òf esei ta foral na e manera amoroso i bondadoso ku e ta trata su kasá i yunan? Si evaluá esposonan a base di e último kriterio aki, hopi di nan lo no pasa e prueba ku éksito pasobra nan ta laga e spiritu di e mundu aki i normanan di hende dirigí nan. Pakiko? Esei ta prinsipalmente debí ku nan no ta rekonosé ni apliká e guia di Esun ku a originá matrimonio—Esun ku “a traha un muhé ku e repchi ku el a tuma for di e hòmber i a hib’é pa e hòmber.”—Génesis 2:21-24.
2 Hesukristu a konfirmá e relato bíbliko aki ku ta mustra ku matrimonio ta di orígen divino, ora el a bisa e hendenan di su tempu ku a kritik’é: “Boso no a lesa ku esun ku a krea hende for di prinsipio ‘a traha nan hòmber i muhé,’ i a bisa: ‘Pa e motibu aki un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni. P’esei loke Dios a uni [den matrimonio], no laga ningun hende separá.” (Mateo 19:4-6) E sekreto pa logra un matrimonio eksitoso anto ta di rekonosé ku ta Dios a establesé e areglo di matrimonio i ku ta ora hende apliká e instrukshonnan ku nan por haña den su Palabra, Beibel, nan lo por tin éksito.
Un Faktor Klave pa Esposo Por Tin Éksito
3, 4. (a) Kiko a duna Hesus un bon konosementu di matrimonio? (b) Ken ta e esposa figurativo di Hesus, i kon esposonan mester trata nan esposa?
3 Pa un esposo por tin éksito, e tin ku studia loke Hesus a bisa i imit’é den loke el a hasi. Hesus su konosementu riba e materia aki ta profundo pasobra e tabata presente na e kreashon di e promé pareha humano i tambe na nan matrimonio. Yehova Dios a bis’é: “Laga nos traha hende segun nos imágen, konforme nos semehansa.” (Génesis 1:26) Sí, Dios tabata papiando ku Esun ku El a krea promé ku tur otro persona òf kos i ku “tabata na su lado, manera un trahadó eksperto.” (Proverbionan 8:22-30) E persona aki ta “e primogénito di henter kreashon.” E ta “e prinsipio di e kreashon di Dios,” ku a eksistí asta promé ku e kreashon di e universo.—Kolosensenan 1:15; Revelashon 3:14; Lukas 1:26-31.
4 Hesus ta ser yamá “e Lamchi di Dios,” i e ta ser deskribí figurativamente komo un esposo. Un angel a yega di bisa: “Bin aki, lo mi mustra bo e brùit, e esposa di e Lamchi.” (Juan 1:29; Revelashon 21:9) Ken anto ta su brùit, òf su esposa? “E esposa di e Lamchi” ta konsistí di Kristu su fiel siguidónan ungí ku spiritu, kendenan lo partisipá kuné den su gobernashon selestial. (Revelashon 14:1, 3) P’esei, e manera ku Hesus a trata su disipelnan tempu ku e tabata huntu ku nan riba tera ta sirbi komo un modelo pa esposonan den nan trato ku nan esposa.
5. Pa ken Hesus mester sirbi komo un ehèmpel?
5 Beibel ta presentá Hesus komo un ehèmpel pa tur su siguidónan, ya ku e ta bisa: “Kristu . . . a sufri pa boso, lagando un ehèmpel pa boso [esta, tur su siguidónan], pa boso sigui den su pasonan.” (1 Pedro 2:21) Ma e ta un ehèmpel spesialmente pa hende hòmber. Beibel ta bisa: “Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.” (1 Korintionan 11:3) Siendo ku Kristu ta kabes di e hòmber, esposonan tin ku imitá su ehèmpel. P’esei, pa un famia por tin éksito i felisidat, nan mester apliká e prinsipio di hefatura. Ku esaki na mente, esposonan tin ku trata nan esposa na un manera amoroso meskos ku Hesus ta trata su esposa figurativo, esta, su disipelnan.
Kon pa Trata ku Problema Matrimonial
6. Kon esposonan mester biba ku nan esposa?
6 Den e mundu yen di difikultat aki, foral esposonan tin ku imitá Hesus su ehèmpel di pasenshi, amor i firmesa dor di sostené prinsipionan hustu. (2 Timoteo 3:1-5) Beibel ta bisa: “Boso, esposonan, biba ku boso esposanan ku komprenshon.” (1 Pedro 3:7) Sí, ora esposonan ta trata ku problemanan matrimonial, nan tin ku imitá Kristu i mustra komprenshon. Hesus a pasa den pruebanan mas grandi ku kualke otro hende, pero e tabata konsiente ku ta Satanas, su demoñonan i e mundu malbado aki tabata responsabel pa esakinan. (Juan 14:30; Efesionan 6:12) Nunka Hesus no a keda sorprendí ora el a haña su mes ku prueba, pues esposonan tampoko no mester keda sorprendí ora nan ta “sufri tribulashon den e bida aki.” Beibel ta spièrta hende ku ta bai kasa ku nan por ferwagt e tribulashon ei.—1 Korintionan 7:28.
7, 8. (a) Kiko ta nifiká biba ku esposa ku komprenshon? (b) Pakiko esposanan mester wòrdu trata ku onor?
7 Beibel ta bisa ku esposonan mester biba ku nan esposa “ku komprenshon, manera ku un vaso mas delikado, komo ku e ta hende muhé; i dun’é onor.” (1 Pedro 3:7) En bes di dominá su esposa den un forma brutu, manera Beibel a profetisá ku hende hòmber generalmente lo hasi, un esposo ku tin e aprobashon di Dios lo onra su esposa. (Génesis 3:16) Lo e ke trat’é komo un poseshon presioso, i nunka probechá dje echo ku e tin mas forsa físiko pa hasi su esposa daño. Mas bien, lo e tene kuenta ku su sintimentunan, i trat’é semper ku rèspèt i dignidat.
8 Pakiko ta na su lugá pa esposonan duna onor na nan esposa? Beibel ta kontestá: “Siendo ku boso tambe ta heredero ku nan dje fabor inmeresí di bida, pa boso orashonnan no ser strobá.” (1 Pedro 3:7, NW) Esposonan tin ku komprondé ku Yehova no ta konsiderá un hòmber ku ta ador’é mas balioso ku un muhé ku tambe ta ador’é. Hende muhé ku ta ser konsiderá digno di Dios su aprobashon lo haña e mesun rekompensa di bida eterno ku hende hòmber—hopi asta ta haña bida den shelu, kaminda “no tin ni hòmber ni muhé.” (Galationan 3:28) Pues esposonan tin ku kòrda ku loke ta hasi un persona presioso pa Dios ta su fieldat, i no e echo ku e ta un hòmber òf un muhé, esposo òf esposa, òf un mucha.—1 Korintionan 4:2.
9. (a) Pa ki motibu esposonan mester onra nan esposa? (b) Kon Hesus a mustra onor na hende muhé?
9 Loke Pedro a bisa na final, esta, “pa [su] orashonnan no ser strobá,” ta enfatisá ku e esposo mester trata su esposa ku onor. E strobansa ku e apòstel ta menshoná por ta hopi peligroso! E por asta pone ku e orashonnan di un esposo ta wòrdu blòkiá, manera a sosodé ku algun sirbidó di Dios den pasado ku a neglishá nan debernan. (Lamentashon 3:43, 44) Ta sabí anto pa hòmbernan kristian, tantu esnan kasá komo esnan ku ta pensa di kasa—studia kon Hesus a trata hende muhé ku dignidat. El a aseptá nan kalurosamente komo parti di e grupo ku a kompañ’é den su ministerio, i el a trata nan ku bondat i rèspèt. Na un okashon, Hesus asta a revelá un bèrdat masha asombroso promé na hende muhé i a bisa nan pa informá e hende hòmbernan tokante dje!—Mateo 28:1, 8-10; Lukas 8:1-3.
Ehèmpel Spesialmente pa Esposonan
10, 11. (a) Pakiko foral esposonan tin ku studia e ehèmpel di Hesus? (b) Kon esposonan mester stima nan esposa?
10 Manera nos a mira anteriormente, Beibel ta kompará e relashon ku un esposo tin ku su esposa ku esun ku Kristu tin ku su “brùit,” esta, su kongregashon di siguidónan ungí. E Palabra di Dios ta bisa: “E esposo ta kabes di e esposa, meskos ku Kristu tambe ta kabes di e iglesia.” (Efesionan 5:23) E palabranan ei mester animá esposonan pa analisá ki tipo di lider Hesus tabata pa su siguidónan. Ta solamente dor di hasi e análisis aki esposonan lo por sigui e ehèmpel di Hesus apropiadamente i duna nan esposa guia, amor i kuido, manera Hesus a hasi ku su kongregashon.
11 Beibel ta urgi: “Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efesionan 5:25) Den e kapítulo anterior di Efesionan, “e iglesia,” òf kongregashon, ta ser yamá “e kurpa di Kristu.” E kurpa simbóliko aki tin hopi miembro di ámbos sekso, i nan tur ta kontribuí pa e kurpa funshoná na un manera efikas. Klaru ku Hesus ta “kabes di e kurpa,” esta, e kongregashon.—Efesionan 4:12; Kolosensenan 1:18; 1 Korintionan 12:12, 13, 27.
12. Kon Hesus a mustra amor na su kurpa figurativo?
12 Hesus a mustra amor na su kurpa figurativo, e kongregashon, partikularmente den e manera amoroso ku el a sirbi e interesnan di esnan ku lo a bira su miembronan. Por ehèmpel, ora su disipelnan tabata kansá, el a bisa nan: “Ban ku mi . . . na un lugá solitario i sosegá un ratu.” (Marko 6:31) Den e deskripshon ku un di e apòstelnan a duna di Hesus su aktividat apénas algun ora promé ku nan a ehekut’é, el a skirbi: ‘El a stima te na fin esnan di dje [esta, miembronan di su kurpa simbóliko] ku tabata den mundu.’ (Juan 13:1) Hesus a duna un bunita ehèmpel di kon esposonan mester trata nan esposa.
13. Kon Pablo ta konsehá esposonan pa stima nan esposa?
13 Apòstel Pablo a referí mas aleu na e ehèmpel ku Hesus a pone pa esposonan, konsehando nan: “Esposonan tambe mester stima nan esposa manera nan mes kurpa. Esun ku ta stima su esposa ta stima su mes; pasobra nunka ni un hende no a odia su mes karni, ma ta aliment’é i ta kuid’é, meskos ku Kristu tambe ta hasi ku e iglesia.” Anto Pablo a agregá: “Laga kada un di boso tambe stima su esposa manera su mes.”—Efesionan 5:28, 29, 33.
14. Kon un esposo ta trata su kurpa imperfekto, i kiko esaki ta indiká tokante e manera ku e mester trata su esposa?
14 Pensa riba esei. Un hòmber bon na kabes ta hasi daño na su mes kurpa pa malu? Ora un hòmber dal su dede di pia, e ta sut’é pasobra esaki a pon’é trompeká? Klaru ku nò! Un esposo ta humiá su mes dilanti su amigunan òf ta hasi redu tokante su mes fayonan? Nò tòg? Pakiko anto lo e ‘suta’ su esposa ku su lenga, òf ku algu pió, si e esposa kometé un fayo? Esposonan mester tene kuenta no solamente ku nan mes interesnan sino tambe ku esnan di nan esposa.—1 Korintionan 10:24; 13:5.
15. (a) Ki ehèmpel Hesus a pone ora su disipelnan a manifestá debilidat humano? (b) Ki lès esposonan por saka for di e ehèmpel aki?
15 Pensa riba e manera ku Hesus a mustra interes den su disipelnan ora nan a manifestá debilidat humano, riba e anochi promé ku su morto. Ounke el a bisa nan bes tras bes pa hasi orashon, nan a pega soño tres biaha den e hòfi di Getsemané. Diripiente hòmbernan armá a rondoná nan. Hesus a puntra e hòmbernan: “Ta ken boso ta buska?” Ora nan a kontestá “Hesus di Názarèt,” el a bisa nan: “Ta Ami t’e.” Sabiendo ku ‘su ora’ di morto a yega, e di: “Si ta ami boso ta buska, laga esakinan bai.” Semper Hesus a tene kuenta ku e bienestar di su disipelnan—parti di su brùit figurativo—i el a buska un manera di skapa nan. Ora esposonan studia kon Hesus a trata su disipelnan, nan lo haña hopi prinsipio ku nan por apliká den e manera ku nan tin ku trata nan kasá.—Juan 18:1-9; Marko 14:34-37, 41.
Hesus Su Amor No Ta Basá Riba Emoshon So
16. Kiko Hesus tabata sinti pa Marta, pero kon Hesus a korigié?
16 Beibel ta bisa: “Hesus tabata stima Marta i su ruman muhé i Lázaro,” kendenan hopi bes a risibié komo huéspet den nan kas. (Juan 11:5) Pero Hesus no a laga di konsehá Marta ora Marta a duna demasiado atenshon na un kuminda ku e tabata preparando, lokual a strob’é di risibí instrukshon spiritual for di Hesus. El a bisa: “Marta, Marta, bo ta preokupá i ta molestiá bo kurpa ku asina hopi kos; ma poko kos ta nesesario, en realidat ún so.” (Lukas 10:41, 42) Sin duda, debí n’e kariño opvio ku Hesus tabatin pa Marta tabata fásil pa Marta aseptá su konseho. Asina tambe, esposonan mester trata nan esposa na un manera bondadoso, amoroso, usando palabranan bon skohí. Pero ora nan tin ku korigí nan kasá, ta apropiá pa nan papia na un manera franko, meskos ku Hesus a hasi.
17, 18. (a) Kon Pedro a reprendé Hesus, i pakiko Hesus mester a korigí Pedro? (b) Ki responsabilidat un esposo tin?
17 Na un otro okashon, Hesus a splika su apòstelnan ku e mester a bai Yerusalèm, kaminda “e ansianonan i saserdotenan prinsipal i eskribanan” lo a persiguié, i ku lo el a “wòrdu matá, i . . . lantá riba e di tres dia.” Ku esaki Pedro a hala Hesus un banda i a kuminsá reprend’é, bisando: “[“Sea bondadoso ku bo mes,” NW]! Esaki nunka lo no sosodé ku bo.” Tabata opvio ku Pedro a laga sentimentalismo strob’é di komprondé un punto. Hesus tabatin ku korigié, p’esei el a bisa Pedro: “Kita for di mi dilanti, Satanas! Bo ta un piedra di trompeká pa mi; pasobra bo no tin bo pensamentu riba e kosnan di Dios, sino riba esnan di hende.”—Mateo 16:21-23.
18 Hesus a kaba di deklará kiko tabata e boluntat di Dios p’e, esta, ku e mester a sufri hopi kos i ser matá. (Salmo 16:10; Isaias 53:12) Pues Pedro no mester a kuminsá reprendé Hesus. Sí, ta Pedro mester a haña korekshon firme, meskos ku nos tur tin biaha. Komo kabes di famia, e esposo tin e outoridat i responsabilidat di korigí miembronan di famia, inkluso su kasá. Ounke tin biaha e mester ta firme, e korekshon aki mester ser duná na un manera bondadoso i amoroso. Pues meskos ku Hesus a yuda Pedro pone kosnan den e perspektiva korekto, tin biaha esposonan lo tin ku hasi meskos ku nan esposa. Por ehèmpel, si e esposa su forma di bisti òf uso di hoya òf kosmétika kuminsá desviá for di e patronchi modesto rekomendá den e Skritura, kisas su esposo tin ku mustr’é na un manera bondadoso pakiko lo e tin ku hasi algun ahuste.—1 Pedro 3:3-5.
Ta Bon pa Esposonan Tin Pasenshi
19, 20. (a) Ki problema a desaroyá entre e apòstelnan di Hesus, i kon Hesus a trata ku e asuntu? (b) Kuantu éksito e esfuersonan di Hesus tabatin?
19 Si tin algu ku no ta bayendo bon i ku tin mester di atenshon, esposonan no nesesariamente mester ferwagt ku nan esfuersonan sinsero pa korigí e asuntu lo logra mesora. Hesus mester a hasi hopi esfuerso pa kambia aktitut di su apòstelnan. Por ehèmpel, entre nan a desaroyá un rivalidat ku kasi na fin di Hesus su ministerio a bolbe manifestá su mes. Nan a pleita ku otro tokante kua di nan tabata mas importante. (Marko 9:33-37; 10:35-45) No hopi tempu despues di e di dos okashon, Hesus a hasi areglo pa selebrá su último Pasku Hudiu ku nan den privá. N’e okashon ei, ni un di nan a tuma e inisiativa pa hasi e trabou humilde di laba pia di otro. Hesus sí a hasié. Anto el a bisa nan: “Mi a duna boso un ehèmpel.”—Juan 13:2-15.
20 Esposonan ku ta demostrá un aktitut humilde manera esun di Hesus probablemente lo haña e koperashon i apoyo di nan esposa. Pero nan mester tin pasenshi. Despues riba e mesun anochi ei di e Pasku Hudiu, e apòstelnan a bolbe diskutí ku otro tokante kua di nan tabata mas importante. (Lukas 22:24) Kambio di aktitut i kondukta hopi bes ta tuma tempu i ta sosodé gradualmente. Pero ora e resultadonan ta positivo, meskos ku den e kaso di e apòstelnan, e ta duna hopi satisfakshon.
21. En bista di e problemanan ku matrimonionan ta konfrontá awe, kiko esposonan tin ku kòrda i hasi?
21 Awe, e problemanan ku matrimonionan ta konfrontando ta mas grandi ku nunka. Hopi hende no ta tuma nan voto matrimonial na serio mas. P’esei, esposonan, reflekshoná riba e orígen di matrimonio. Kòrda ku esun ku a krea i establesé e areglo aki ta nos Dios amoroso, Yehova. El a manda su Yu, Hesus, no solamente komo nos Reskatadó—nos Salbadó—sino tambe komo un modelo pa esposonan imitá.—Mateo 20:28; Juan 3:29.
Kon Lo Bo Kontestá?
• Pakiko ta importante pa nos rekonosé e orígen di matrimonio?
• Den ki maneranan esposonan ta ser animá pa stima nan esposa?
• Menshoná algun ehèmpel di e manera ku Hesus a trata ku su disipelnan ku ta mustra kon un esposo lo mester ehersé su outoridat komo kabes na un manera similar.
[Plachi na página 14]
Pakiko esposonan mester studia e ehèmpelnan di e manera ku Hesus a trata hende muhé?
[Plachi na página 15]
Ora Hesus su disipelnan tabata kansá, el a mustra konsiderashon
[Plachi na página 16]
Esposonan mester konsehá nan esposa ku bondat i palabranan bon skohí