“Yunan, Obedesé Boso Mayornan”

“Yunan, obedesé boso mayornan den Señor, pasobra esaki ta hustu.”—EFESIONAN 6:1.

 1. Kon obedensia por ta un protekshon pa bo?

KISAS nos ta na bida aworakí pasobra nos a obedesé, miéntras ku otronan no ta na bida pasobra nan no a obedesé. Obedesé kiko? Por ehèmpel, e spièrtamentunan ku nos kurpa ‘trahá na un manera maravioso’ ta duna nos. (Salmo 139:14) Tal bes nos wowonan ta kuminsá mira nubia skur, i nos oreanan ta tende zonidu di bos. Nos ta sinti kon bientu ta kuminsá supla mas fuerte. Pa hende ku a siña tokante posibel situashonnan di peliger, esakinan ta señalnan di atvertensia pa bai buska un lugá di skonde pa e tormenta akompañá pa werlek i hagel ku ta aserkando i ku por pone nan bida na peliger.

 2. Pakiko yu tin mester di spièrtamentu, i pakiko nan mester obedesé nan mayornan?

² Boso, hóbennan, tin mester di spièrtamentu tokante posibel situashonnan di peliger, i boso mayornan tin e responsabilidat pa duna boso esakinan. Tal bes bo ta kòrda kon nan a bisa bo: “No mishi ku e stof. E ta kayente.” “No bai kaminda laman ta hundu. E ta peligroso.” “Wak den tur dos direkshon promé ku bo krusa kaya.” Lamentablemente, tin mucha ku no a obedesé i a sufri leshon òf asta pèrdè nan bida. “Ta hustu,” apropiá i korekto pa obedesé bo mayornan. Esei ta sabí tambe. (Proverbionan 8:33) Un otro teksto di Beibel ta bisa ku esei ta ‘agradá’ nos Señor Hesukristu. En bèrdat, Dios ta manda bo obedesé bo mayornan.—Kolosensenan 3:20; 1 Korintionan 8:6.

Obedensia Ta Trese Rekompensa Duradero

 3. Kiko ta ‘e berdadero bida’ pa mayoria di nos, i kon yunan por spera di hañ’é?

³ Obedensia na bo mayornan ta protehá bo “bida presente” òf aktual, pero obedensia lo habri kaminda tambe pa bo disfrutá di e bida ‘ku tin ku bin,’ ‘e berdadero bida.’ (1 Timoteo 4:8; 6:19) Pa mayoria di nos, e berdadero bida ta bida sin fin riba tera den Dios su mundu nobo ku e ta primintí na hende ku ta kumpli fielmente ku su mandamentunan. Un di e mandamentunan aki ku ta di sumo importansia ta bisa: “Onra bo tata i bo mama (ku ta e promé mandamentu ku un promesa), pa bai bo bon i pa bo tin bida largu riba tera.” Pues si bo obedesé bo mayornan, lo bo ta felis. Bo futuro lo ta sigur, i lo bo por haña bida eterno den un paradeis riba tera!—Efesionan 6:2, 3.

 4. Kon yunan por onra Dios i benefisiá di esaki?

⁴ Ora bo ta onra bo mayornan dor di obedesé nan, bo ta onra Dios tambe pasobra e ta esun ku ta manda bo obedesé nan. Na mes momento, esei ta benefisiá bo. Beibel ta bisa: “Ami ta SEÑOR bo Dios, kende ta siña bo, pa bo prosperá.” (Isaias 48:17; 1 Juan 5:3) Kon bo obedensia ta benefisiá bo? E ta hasi bo mama ku bo tata kontentu, i na nan turno, nan sigur lo mustra nan goso den maneranan ku lo hasi bo bida mas felis. (Proverbionan 23:22-25) Pero mas importante ainda, bo obedensia ta hasi bo Tata selestial kontentu, i lo e bendishoná bo na maneranan maravioso! Laga nos mira kon Yehova a bendishoná i protehá Hesus, kende a bisa tokante su mes: “Semper mi ta hasi e kosnan ku ta agrad’é.”—Juan 8:29.

Hesus—Un Bon Trahadó

 5. Ki motibu nos tin pa kere ku Hesus tabata un bon trahadó?

⁵ Hesus tabata e promé yu di su mama, Maria. Su tata di kriansa, Hosé, tabata un karpinté. Hesus tambe a bira un karpinté; aparentemente el a siña e fishi di Hosé. (Mateo 13:55; Marko 6:3; Lukas 1:26-31) Ki tipo di karpinté bo ta kere Hesus tabata? Wèl, promé ku su mama bírgen a konsibié pa via di un milager, e tabata den shelu. Komo si fuera ta sabiduria tabata na palabra, el a splika: “Mi tabata na [Dios] su lado, manera un trahadó eksperto, i dia tras dia mi tabata su delisia.” Dios tabata masha kontentu ku Hesus, kende den shelu tabata un bon trahadó. Bo no ta kere ku tempu e tabata un hóben riba tera tambe el a hasi un gran esfuerso pa ta un bon trahadó, un bon karpinté?—Proverbionan 8:30; Kolosensenan 1:15, 16.

 6. (a) Pakiko bo ta kere ku Hesus lo mester a hasi trabou di kas tempu ku e tabata mucha? (b) Den ki manera yunan por imitá Hesus?

⁶ Sin duda, tempu ku Hesus tabata chikitu, e tabata hunga ku otro mucha, manera Beibel ta bisa ku mucha tabata hasi den e tempu ei. (Zakarias 8:5; Mateo 11:16, 17) Pero, bo por ta sigur ku komo yu mayó den un famia grandi di poko rekurso, ademas di e preparashon ku el a risibí for di Hosé pa bira un karpinté, e tabatin trabou di kas tambe pa hasi. Despues, Hesus a bira un predikadó i a dediká su mes asina tantu na su ministerio te ku el a sakrifiká komodidatnan personal. (Lukas 9:58; Juan 5:17) Bo por mira maneranan den kua bo por imitá Hesus? Bo mayornan sa pidi bo limpia bo kamber òf hasi otro trabounan di kas? Nan ta animá bo pa adorá Dios dor di asistí na reunionnan kristian i papia tokante bo kreensianan ku otro hende? Kon bo ta kere ku e hóben Hesus lo a reakshoná riba e tipo di petishonnan ei?

Un Bon Studiante i Maestro di Beibel

 7. (a) Ku ken Hesus lo a biaha pa bai selebrá e Pasku Hudiu? (b) Unda Hesus tabata ora e otro hendenan a kohe kaminda pa kas, i kiko e tabata hasi einan?

⁷ Tur miembro maskulino di un famia israelita mester a subi bai rindi adorashon na Yehova n’e tèmpel durante e tres fiestanan hudiu. (Deuteronomio 16:16) Tempu Hesus tabatin 12 aña, henter su famia lo a biaha bai Yerusalèm pa selebrá e Pasku Hudiu. Esei probablemente a inkluí su mitar ruman hòmber- i muhénan. Pero den e personanan ku a biaha ku e famia di Hesus lo tabatin Salomé tambe, kende posiblemente tabata ruman muhé di Maria, huntu ku su esposo Zebedeo i nan yunan Santiago i Juan, kendenan despues a bira apòstel.a (Mateo 4:20, 21; 13:54-56; 27:56; Marko 15:40; Juan 19:25) Riba nan biahe di regreso, Hosé ku Maria lo a asumí ku Hesus tabata huntu ku nan famianan, pues na promé instante nan no a ripará ku e no tabata den e grupo. Tres dia despues, ora Maria ku Hosé finalmente a haña Hesus, e tabata den tèmpel, “sintá meimei di e siñadónan, ta skucha nan i ta hasi nan pregunta.”—Lukas 2:44-46.

 8. Kiko Hesus a hasi den e tèmpel, i pakiko e hendenan a keda asombrá?

⁸ Ki tipo di “pregunta” Hesus a hasi e siñadónan? E preguntanan ku el a hasi lo no tabata djis pa satisfasé su kuriosidat òf simplemente pa haña informashon. E palabra griego ku Beibel ta usa aki por a referí na e tipo di preguntanan ku sa ser hasí den un kaso hudisial. Pues e por a enserá preguntanan di interogashon. Sí, for di mucha Hesus a desaroyá bira un studiante di Beibel ku a asombrá maestronan religioso bon eduká! Beibel ta bisa ku “tur esnan ku a tend’é a keda strañá di su komprondementu i su kontestanan.”—Lukas 2:47.

 9. Kon bo por sigui Hesus su ehèmpel den studiamentu di Beibel?

⁹ Kon bin Hesus na un edat yòn asina por a asombrá asta e maestronan vèrsá ku su konosementu di Beibel? Sin duda e tabata bendishoná ku mayornan temeroso di Dios ku a dun’é instrukshon divino for di infansia. (Eksodo 12:24-27; Deuteronomio 6:6-9; Mateo 1:18-20) Siguramente Hosé a bai snoa ku e hóben Hesus pa e tende e maestronan lesa i papia tokante e Skritura. Abo tambe ta bendishoná ku mayornan ku ta studia Beibel ku bo i ta bai reunionnan kristian ku bo? Bo ta balorá nan esfuersonan, meskos ku Hesus a apresiá esnan di su mayornan? Bo ta kompartí ku otro hende loke bo ta siña, meskos ku Hesus a hasi?

Hesus Tabata Sumiso

10. (a) Pakiko Hesus su mayornan lo mester tabata sa unda nan por a hañ’é? (b) Ki bon ehèmpel Hesus a laga pa yunan?

¹⁰ Kon bo ta kere Maria ku Hosé a sinti nan ora ku finalmente despues di tres dia nan a haña Hesus den e tèmpel? Sin duda, nan a sinti un gran alivio. Ma Hesus a keda sorprendí ku su mayornan no tabata sa na unda e tabata. Tur dos tabata sa ku Hesus a bin na mundu via di un milager. Ademas, ounke nan no tabata na haltura di tur e detayenan, nan lo tabata sa algu tokante su futuro papel komo Salbadó i komo Gobernante di e Reino di Dios. (Mateo 1:21; Lukas 1:32-35; 2:11) P’esei, Hesus a puntra nan: “Pakiko boso tabata buska mi? Boso no tabata sa ku mi mester tabata den e kas di mi Tata?” Sin embargo, obedientemente Hesus a bai ku su mayornan i a regresá kas na Názarèt. Beibel ta bisa: “El a keda sometí na nan.” Ademas, “su mama tabata warda tur e palabranan aki den su kurason.”—Lukas 2:48-51.

11. Ki lès tokante obedensia bo por siña for di Hesus?

¹¹ Bo ta haña ta fásil pa imitá Hesus dor di semper obedesé bo mayornan? Òf bo ta kere ku hopi bes nan no ta komprondé e mundu djawe i ku bo ta mas sabí ku nan? Ta bèrdat ku kisas bo sa mas ku nan tokante sierto kosnan—tal bes tokante uso di telefòn selular, kòmpiuter òf otro aparato moderno. Pero pensa riba Hesus, kende a asombrá maestronan vèrsá ku “su komprondementu i su kontestanan.” Probablemente bo ta di akuerdo ku kompará kuné, bo sa masha poko. Tòg, Hesus tabata sumiso na su mayornan. Esei no nesesariamente ta nifiká ku semper e tabata di akuerdo ku nan desishonnan. No opstante, “el a keda sometí na nan” te dia el a bira grandi. Ki lès bo ta kere bo por siña for di su ehèmpel?—Deuteronomio 5:16, 29.

Obedensia Ta un Reto

12. Kon obedensia por skapa bo bida?

¹² No ta semper fásil pa ta obediente. Esei a keda ilustrá un par di aña pasá ora dos mucha muhé tabata bai kore krusa un outopista di seis via en bes di pasa na haltu riba e brùg pa hende na pia. “Ban John,” nan tabata grita un kolega di skol ora esaki tabata kana bai den direkshon di e brùg. “Bo’n ta ban ku nos?” Ora John a duda, un dje mucha muhénan a tent’é: “Kobarde!” Ounke no ta miedu John tabatin, el a bisa nan: “Mi tin ku obedesé mi mama.” Un ratu despues, ora e tabata riba e brùg, el a tende zonidu di tayer ku ta kohe brek i a wak abou nèt ora un outo a dal e mucha muhénan. Un di nan a muri, i e otro a keda asina seriamente heridá ku mester a amputá su pia. Mama di e mucha muhénan, kende a bisa nan pa usa e brùg ariba, despues a bisa mama di John: “Mare nan tabata mes obediente ku bo yu.”—Efesionan 6:1.

13. (a) Pakiko bo mester obedesé bo mayornan? (b) Ki ora lo ta korekto pa un yu no hasi loke un mayor ta mand’é hasi?

¹³ Pakiko Dios ta bisa: “Yunan, obedesé boso mayornan”? Dor di obedesé bo mayornan, bo ta obedesé Dios. Ademas, bo mayornan tin mas eksperensia ku bo. Por ehèmpel, apénas sinku aña promé ku e aksidente menshoná ariba a tuma lugá, John su mama tabatin un amiga kende su yu hòmber a pèrdè su bida ora el a purba krusa e mesun outopista ei! Kisas bèrdat no ta semper fásil pa obedesé bo mayornan, pero ta Dios ta manda bo hasié. Di otro banda, si bo mayornan—òf otro hende—manda bo gaña, hòrta òf hasi kualke kos ku Dios ta desaprobá, bo tin ku “obedesé Dios mas ku hende.” P’esei despues ku Beibel ta bisa “obedesé boso mayornan,” e ta agregá e palabranan “den Señor.” Esei ta nifiká obedesé bo mayornan den tur kos ku ta na armonia ku Dios su leinan.—Echonan 5:29.

14. Pakiko ta mas fásil pa un hende perfekto ta obediente, pero pakiko e tin ku siña tòg tokante esaki?

¹⁴ Bo ta kere ku si bo ta perfekto—esta, “sin mancha, separá for di pekadónan” manera Hesus tabata—lo ta semper mas fásil pa bo obedesé bo mayornan? (Hebreonan 7:26) Si bo ta perfekto, lo bo no ta inkliná pa hasi loke ta malu, manera bo ta awor. (Génesis 8:21; Salmo 51:5) Sin embargo, asta Hesus tabatin ku siña lèsnan tokante obedensia. Beibel ta bisa: “Ounke ku [Hesus] tabata Yu, el a siña obedensia dor di e kosnan ku el a sufri.” (Hebreonan 5:8) Kon sufrimentu a yuda Hesus siña obedensia, un lès ku nunka e tabatin ku siña den shelu?

15, 16. Kon Hesus a siña obedensia?

¹⁵ Bou di direkshon di Yehova, Hosé ku Maria a protehá Hesus kontra daño tempu ku e tabata mucha. (Mateo 2:7-23) Pero na un dado momento Dios a kita protekshon sobrenatural for di Hesus. E sufrimentu mental i físiko ku Hesus a pasa aden despues tabata asina grandi ku Beibel ta bisa ku el a “ofresé orashon i súplika ku gran sklamashon i lágrima.” (Hebreonan 5:7) Na ki tempu esaki a sosodé?

¹⁶ Esei a sosodé partikularmente durante e último oranan di Hesus su bida riba tera ora Satanas a hasi un esfuerso kabal pa kibra Su integridat. E idea di ku su morto komo un supuesto malechor lo a duna su Tata un mal nòmber aparentemente a tormentá Hesus asina tantu ku segun ku “e tabata hasi orashon [den e hòfi di Getsemané] su sodó a bira manera gotanan di sanger ku tabata kai abou na suela.” Un par di ora despues, e forma ku el a muri riba un staka di tormento tabata asina doloroso ku Hesus a dal gritu di “sklamashon [huntu ku] lágrima.” (Lukas 22:42-44; Marko 15:34) Dje manera ei el a “siña obedensia dor di e kosnan ku el a sufri” i asina a alegrá e kurason di su Tata. Awor den shelu, Hesus ta sinti nos doló segun ku nos ta lucha pa ta obediente.—Proverbionan 27:11; Hebreonan 2:18; 4:15.

Siña e Lès di Obedensia

17. Ku ki aktitut nos tin ku aseptá disiplina?

¹⁷ Ora bo tata i bo mama disipliná bo, esei ta mustra ku nan ke lo mihó pa bo, ku nan ta stima bo. Beibel ta puntra: “Kua yu no ta risibí disiplina serka su tata?” Lo no ta tristu si bo mayornan no ta stima bo sufisiente pa saka tempu i hasi esfuerso pa korigí bo? Meskos tambe, Yehova ta korigí bo pasobra e ta stima bo. “Na e momento mes ningun disiplina no ta parse di ta kousa di goso, sino di doló; ma pa esnan ku a wòrdu entrená dor di dje, despues e ta duna e fruta pasífiko di hustisia.”—Hebreonan 12:7-11.

18. (a) Disiplina amoroso ta evidensia di kiko? (b) Di loke bo mes a mira, ki efekto positivo tal disiplina tabatin riba hende?

¹⁸ Un rei den Israel di antigwedat, kende Hesus a menshoná pa su gran sabiduria, a bisa ku mucha tin mester di korekshon amoroso di nan mayornan. Salomon a skirbi: “Esun ku laga di usa bara ta odia su yu, ma esun ku ta stim’é ta disiplin’é for di trempan.” Salomon a bisa asta ku un persona ku ta risibí korekshon amoroso lo por libra su alma for di morto. (Proverbionan 13:24; 23:13, 14; Mateo 12:42) Un ruman muhé kristian ta kòrda ku tempu e tabata mucha i a komportá su mes malu na reunionnan kristian, su tata tabata bis’é ku ora nan yega kas lo el a haña straf. Aworakí e tin grato rekuerdo di su tata pa e disiplina amoroso ku el a risibí di dje, lokual a moldia su bida na un manera ekselente.

19. Pa ki motibu spesial bo tin ku obedesé bo mayornan?

¹⁹ Si bo tin mayornan ku ta stima bo sufisiente pa saka tempu i hasi esfuerso pa disipliná bo na un manera amoroso, sea gradisidu. Obedesé nan, meskos ku nos Señor Hesukristu a obedesé su mayornan, Hosé ku Maria. Pero obedesé nan spesialmente pasobra bo Tata selestial, Yehova Dios, ta bisa bo pa hasi esei. Asina lo bo benefisiá bo mes, lo “bai bo bon i [lo] bo tin bida largu riba tera.”—Efesionan 6:2, 3.

[Nota]

Kon Lo Bo Kontestá?

• Ki benefisionan yunan por risibí ora nan obedesé nan mayornan?

• Komo mucha, kon Hesus a pone un ehèmpel den obedesé su mayornan?

• Kon Hesus a siña obedensia?

[Plachi na página 24]

Ku diesdos aña di edat Hesus tabata vèrsá den e Skritura

[Plachi na página 26]

Kon Hesus a siña obedensia for di e kosnan ku el a sufri?