Pregunta di Lektor
Kiko ta e seyamentu ku Revelashon 7:3 ta referí na dje?
Revelashon 7:1-3 ta deklará: “Mi a mira kuater angel pará na e kuater skinanan di tera, wantando e kuater bientunan di tera, pa bientu no supla ni riba tera ni riba laman ni riba ningun palu. I mi a mira un otro angel ta subi for di kaminda solo ta sali, i e tabatin e seyo di e Dios bibu; i el a grita na bos haltu na e kuater angelnan, na kendenan a wòrdu permití pa hasi daño na e tera i na e laman, bisando: ‘No hasi daño na e tera ni na e laman ni na e palunan, te ora ku nos kaba di seya e sirbidónan di nos Dios na nan frenta.’”
Ora e angelnan laga “e kuater bientunan” bai, e resultado lo ta “e gran tribulashon,” esta, destrukshon di religion falsu i di e restu di e mundu malbado aki. (Revelashon 7:14) “E sirbidónan di nos Dios” ta e rumannan ungí di Kristu aki riba tera. (1 Pedro 2:9, 16) Pues, e profesia aki ta indiká ku e seyamentu di e rumannan di Kristu lo a ser kompletá ora e gran tribulashon kuminsá. Sin embargo, otro versíkulonan di Beibel ta indiká ku tin un promé seyamentu di e ungínan. P’esei tin biaha nos ta papia di un seyamentu inisial i un seyamentu final. Kiko ta e diferensia entre nan dos?
Laga nos konsiderá e nifikashon di e palabra “seya.” Den tempu antiguo, un seyo tabata un instrumento ku hende a usa pa imprimí algu riba un dokumento. E palabra por referí tambe na e kos imprimí mes. Den e tempu ei, tabata komun pa imprimí un marka ku e seyo den was òf klei i pega esei na un dokumento òf otro artíkulo pa indiká ku e ta outéntiko òf pa indiká ta di ken e ta.—1 Reinan 21:8; Jòb 14:17.
Pablo a kompará spiritu santu ku e marka di un seyo ora ku el a deklará: “Esun ku ta garantisá ku boso i ku nos ta pertenesé na Kristu i ku esun ku a ungi nos ta Dios. Tambe el a pone su seyo riba nos i a duna nos e garantia di loke tin ku bini, esta, e spiritu, den nos kurason.” (2 Korintionan 1:21, 22, NW) Pues, Yehova ta ungi e kristiannan aki ku su spiritu santu pa indiká ku nan ta pertenesé na dje.
Sin embargo, tin dos fase den e seyamentu di e ungínan. E promé seyamentu ta otro for di e seyamentu final (1) pa loke ta propósito i (2) tempu. E seyamentu inisial ta sirbi pa skohe un miembro nobo ku ta ser agregá na e kantidat di kristiannan ungí. E seyamentu final ta sirbi pa konfirmá ku e persona skohé i seyá aki a demostrá su lealtat plenamente. Ta te na e seyamentu final numa lo pone e seyo permanentemente ‘na frenta’ di e persona ungí, i asina identifik’é definitivamente komo un ‘sirbidó fiel i probá di nos Dios.’ E seyamentu menshoná na Revelashon kapítulo 7 ta referí na e fase final di e seyamentu aki.—Revelashon 7:3.
Relashoná ku e tempu di e seyamentu inisial, apòstel Pablo a skirbi kristiannan ungí: “Den dje boso a konfia tambe, despues di a tende e mensahe di bèrdat, e evangelio di boso salbashon; den kende tambe, despues di a kere, boso a wòrdu seyá ku e spiritu santu di promesa.” (Efesionan 1:13, 14) Den hopi kaso, e registro bíbliko ta mustra ku en bèrdat kristiannan di promé siglo tabata ser seyá djis despues ku nan a tende e bon nobo i a bira kreyente den Kristu. (Echonan 8:15-17; 10:44) E seyamentu ei a demostrá ku Dios a aprobá nan. Sin embargo, esei no a indiká Dios su aprobashon final. Dikon nò?
Pablo a deklará ku kristiannan ungí tabata “seyá pa e dia di redenshon” òf dia di liberashon. (Efesionan 4:30) Esaki ta indiká ku un periodo di tempu, por lo general hopi aña, lo a pasa despues di e seyamentu inisial ei. E ungínan tin ku keda fiel for di dia ku nan ser seyá ku spiritu santu te ‘e dia ku nan ser librá’ di nan kurpa karnal, es desir, te na nan morto. (Romanonan 8:23; Filipensenan 1:23, NW; 2 Pedro 1:10) P’esei ta te na final di su bida numa Pablo por a bisa: “Mi a terminá e kareda, mi a warda e fe; den futuro ta wardá pa mi e korona di hustisia.” (2 Timoteo 4:6-8) Ademas, Hesus a bisa un kongregashon di kristian ungí: “Sea fiel te na morto i lo mi duna bo e korona di bida.”—Revelashon 2:10; 17:14.
E palabra “korona” ta duna mas prueba ku tin un periodo di tempu entre e seyamentu inisial i esun final. Dikon? Den tempu antiguo, tabata e kustumber pa duna un korona na e koredó ku gana un kareda. Pa haña e korona, e tabatin ku hasi mas ku djis partisipá den e kareda. E tabatin ku kore henter e ruta te na final. Asina tambe, ta solamente si kristiannan ungí perseverá henter e ruta te na final di nan kareda—for di e seyamentu inisial te na esun final—nan lo ser koroná ku bida inmortal den shelu.—Mateo 10:22; Santiago 1:12.
Ki tempu e restu di kristiannan ungí ku a haña nan seyamentu inisial lo risibí nan seyamentu final? Tur ku ta na bida riba tera ainda lo ser seyá “na nan frenta” promé ku komienso di e gran tribulashon. Pues, ora ku e angelnan laga e kuater bientunan di tribulashon lòs, henter Israel spiritual lo a haña nan seyamentu final kaba, apesar ku algun lo ta na bida ainda den karni i tin ku terminá nan bida riba tera.