Bo “Eskudo Grandi di Fe” Ta den Bon Kondishon?

1-2. (a) Segun Efesionan 6:16, dikon nos mester di un “eskudo grandi di fe”? (b) Ki pregunta nos lo haña kontesta p’e?

ABO tin un “eskudo grandi di fe”? (Lesa Efesionan 6:16.) Klaru ku sí! Meskos ku un eskudo grandi ta protehá mayoria parti di kurpa di un sòldá, asina tambe bo fe ta protehá bo kontra mal influensia di e mundu akí ku ta inmoralidat, violensia i tur práktika ku ta bai kontra di Dios su normanan.

² Pero, komo ku nos ta bibando den “e último dianan,” nos fe lo sigui pasa den hopi prueba. (2 Tim. 3:1) Kon bo por sa si bo eskudo di fe ta fuerte? I kiko bo tin ku hasi pa bo por tin bo eskudo bon tené? Laga nos haña kontesta pa e preguntanan ei.

 3. Kiko e sòldánan tabata hasi ku nan eskudo, i dikon?

³ Den tempu bíbliko, un eskudo tabata furá ku kueru. E sòldánan tabata hunta zeta riba nan eskudo pa konserbá e kueru i pa evitá ku e partinan di metal ta frusa. Si un sòldá realisá ku su eskudo tin daño, lo e hasi sigur ku e eskudo lo ser drechá mesora ya asina ei e ta kla pa e siguiente bataya.

 4. Dikon bo mester inspekshoná bo eskudo di fe, i kon bo mester hasi esei?

⁴ Meskos ku e sòldánan di antigwedat, regularmente bo mester inspekshoná bo eskudo di fe i ten’é den bon kondishon. Niun hende no por hasi esei pa bo. Asina ei, semper lo bo ta kla pa bataya. Ki bataya? Komo kristian, nos ta lucha kontra forsanan spiritual di maldat. (Efe. 6:10-12) Kon bo por hasi sigur ku bo ta prepará pa enfrentá prueba? Promé, pidi Yehova yuda bo. Despues, usa Beibel pa saminá bo fe pa wak si e ta na armonia ku Dios su boluntat. (Heb. 4:12) Beibel ta bisa: “Konfia den SEÑOR ku henter bo kurason, i no dependé riba bo mes komprondementu.” (Pro. 3:5, 6) Ku esei na mente, dikon no analisá algun di e desishonnan ku bo a tuma resientemente? Por ehèmpel, si bo a yega di haña bo ku problema finansiero, bo a kòrda riba e promesa di Yehova na Hebreonan 13:5? Ei Yehova ta bisa: “Hamas lo mi bandoná bo, i hamas lo mi laga bo desampará.” E promesa ei a duna bo konfiansa ku Yehova lo yuda bo? Si ta asina, bo eskudo di fe ta den bon kondishon.

 5. Kiko bo por deskubrí ora bo saminá bo fe?

⁵ Ora bo tuma tempu pa saminá bo fe, kisas lo bo keda sorprendí di e resultado. Podisé lo bo deskubrí algun debilidat ku bo no tabata sa di dje. Por ehèmpel, podisé lo bo ripará ku preokupashon di mas, mentira i desanimashon a kousa daño na bo fe. Si esei ta e kaso, kon bo por evitá ku bo fe ta sufri mas daño?

 6. Menshoná algun kos ku ta normal pa nos preokupá tokante dje.

⁶ Ta normal ku nos ta preokupá tokante sierto kos, manera por ehèmpel agradá Yehova i Hesus. (1 Kor. 7:32) Si nos a kometé un piká grave, nos ke drecha nos amistat ku Dios mas lihé ku ta posibel. (Sal. 38:18) Ta normal tambe ku nos ke agradá nos kasá, i nos tur ta preokupá pa e bienestar di nos famia i nos rumannan den fe.—1 Kor. 7:33; 2 Kor. 11:28.

 7. (a) Kon preokupashon di mas por kousa daño na nos fe? (b) Segun Proverbionan 29:25, dikon nos no mester tin miedu di hende?

⁷ Di otro banda, preokupashon di mas por kousa daño na nos fe. Por ehèmpel, kisas nos ta preokupá di mas tokante kuminda i paña. (Mat. 6:31, 32) E preokupashon ei por pone ku nos ta kuminsá enfoká riba haña mas kos material. Nos por asta kuminsá stima plaka. E ora ei, nos fe den Yehova lo bira suak i nos amistat kuné lo sufri daño. (Mar. 4:19; 1 Tim. 6:10) Ademas, nos por kuminsá preokupá di mas tokante loke otro hende ta pensa di nos. Esei por pone ku nos ta haña mas miedu di chèrchi i persekushon ku miedu di desagradá Yehova. Kon nos por protehá nos mes kontra e peliger ei? Roga Yehova pa duna nos e fe i kurashi ku nos tin mester.—Lesa Proverbionan 29:25; Luk. 17:5.

 8. Kiko nos mester hasi si un hende kuminsá papia mentira tokante Yehova i nos rumannan?

⁸ Satanas, “e tata di mentira,” ta usa hende ku e tin bou di su kontrol pa plama mentira tokante Yehova i nos rumannan. (Huan 8:44) Por ehèmpel, e apóstatanan ta saka mentira i ta trose e bèrdat tokante e organisashon di Yehova riba website, televishon i otro medio di komunikashon. E mentiranan ei ta forma parti di e “flechanan sendí” di Satanas. (Efe. 6:16) Kiko nos mester hasi si un hende kuminsá papia ku nos tokante e mentiranan ei? No skuch’é! Dikon nò? Pasobra nos tin fe den Yehova i nos ta konfia nos rumannan. De echo, nos ta evitá tur kontakto ku apóstata. Nos no ta laga niun hende ni nada, a ni sikiera kuriosidat, pone nos skucha òf drenta diskushon ku apóstata.

 9. Kiko desanimashon por hasi ku nos?

⁹ Desanimashon por suak nos fe. Tin biaha, problema por desanimá nos. Ta klaru ku nos no por ignorá nos problemanan. Esei lo ta iresponsabel di nos parti. Pero, loke nos no mester hasi ta di pensa konstantemente riba nan pasobra esei por pone ku nos ta lubidá e maravioso speransa ku Yehova a duna nos. (Rev. 21:3, 4) Desanimashon por kaba ku tur nos energia i pone nos entregá. (Pro. 24:10) Pero, esei no tin nodi di pasa ku nos.

10. Kiko bo ta siña for di e karta di un ruman muhé?

¹⁰ Laga nos wak kiko un ruman muhé na Merka a hasi pa tene su fe den bon kondishon miéntras e ta kuida su kasá ku ta masha malu. Den un karta ku el a skirbi pa e sede mundial, el a bisa: “Tin biaha, e situashon ta duna nos hopi strès i ta desanimá nos, pero nos tin speransa. Mi ta masha gradisidu pa tur loke Yehova a duna nos pa fortalesé nos fe i lanta nos ánimo. Di bèrdat nos tin mester di e konseho i animashon ei. Esei ta yuda nos sigui padilanti i soportá e pruebanan ku Satanas ta benta riba nos.” E palabranan di e ruman muhé ei ta mustra ku ta posibel pa vense desanimashon! Kon? Mira bo pruebanan komo un oportunidat pa bo demostrá ku bo ta leal na Yehova i pa bo oponé Satanas. Rekonosé ku Yehova por duna bo e konsuelo ku bo mester. I balorá e kuminda spiritual ku e ta proveé.

11. Ki pregunta nos mester hasi nos mes pa wak si nos fe ta den bon kondishon?

¹¹ Tin área di bo eskudo di fe ku no ta den bon kondishon? Durante e último lunanan, bo a evitá di laga preokupashon di mas dominá bo? Bo a resistí e tendensia di skucha mentira di apóstata i diskutí ku nan? I bo a logra trata ku desanimashon? Si bo kontestanan ta “sí,” bo fe ta den bon kondishon. Pero, nos mester keda alerta pasobra Satanas ta purba di usa otro arma kontra nos. Laga nos wak un di nan.

12. Kiko materialismo por hasi ku nos?

¹² Materialismo por distraí nos i nos por neglishá nos eskudo di fe. Apòstel Pablo a bisa: “Ningun hende ku ta sirbi komo sòldá no ta enbolbé su mes den e aktividatnan komersial di bida diario, ya asina e por haña aprobashon di esun ku a tum’é den servisio komo sòldá.” (2 Tim. 2:4) De echo, e sòldánan romano no tabatin mag di enbolbé nan mes den negoshi. Kiko lo a pasa si un sòldá pasa por alto di esei?

13. Dikon un sòldá no mester a enbolbé su mes den negoshi?

¹³ Imaginá e siguiente esena. Un grupo di sòldá ta pasa henter mainta ta train ku nan spada. Pero, un sòldá no ta presente na e training. E ta drùk ta bende kuminda na plasa. Anochi, e sòldánan ta dediká nan tempu na inspekshoná nan armadura i sleip nan spada. Pero, esun ku ta bende kuminda, ta dediká su tempu na prepará kuminda pa bende e siguiente dia. Mainta, sòldá enemigu ta ataká e stat di sorpresa. Kua di e sòldánan lo ta kla pa bataya i ta gana e aprobashon di su komandante? I kua di e sòldánan ei abo lo ke tin banda di bo? Esun ku a prepará pa bataya òf esun ku tabata distraí?

14. Komo sòldá di Kristu, kiko ta mas balioso pa nos?

¹⁴ Meskos ku un bon sòldá, nos no mester laga nada distraí nos for di nos meta prinsipal: haña e aprobashon di nos Komandantenan, Yehova i Kristu. Esei ta mas balioso ku kualke otro kos ku e mundu di Satanas ta ofresé nos. Nos ta hasi sigur ku nos tin e tempu i energia ku nos mester pa sirbi Yehova i tene nos eskudo di fe, i sobrá di nos armadura spiritual, den bon kondishon.

15. Ki atvertensia Pablo a duna nos, i dikon?

¹⁵ Semper nos mester keda alerta. Dikon? Apòstel Pablo a atvertí nos ku “hende ku ta determiná pa bira riku” lo ser “desviá for di fe.” (1 Tim. 6:9, 10) E ekspreshon “desviá” ta indiká ku nos por ser distraí si nos ta purba di haña kos material innesesario. Nos kurason por keda eksponé na “hopi deseo bobo i perhudisial.” Pues, nos no mester laga e deseonan ei drenta nos kurason. Nos mester mira nan pa loke realmente nan ta: arma ku Satanas ta usa pa kousa daño na nos fe.

16. E relato na Marko 10:17-22 mester motivá nos pa pensa riba ki preguntanan?

¹⁶ Pero, suponé ku bo tin sufisiente plaka pa kumpra hopi kos material. Lo bo ta hasiendo algu robes si bo kumpra kos ku bo ke pero ku en realidat bo no mester? No nesesariamente. Pero, pensa riba e preguntanan akí: Asta si bo por afòrt pa kumpra algu, bo tin e tempu i energia pa us’é i kuid’é? Ta posibel ku lo bo pega bo kurason na e kosnan material ku bo tin? Bo ta kere ku bo amor pa kos material por pone bo reakshoná meskos ku e hòmber ku a rechasá Hesus su invitashon pa hasi mas den sirbishi di Dios? (Lesa Marko 10:17-22.) Lo ta hopi mas mihó pa hiba un bida simpel i dediká bo tempu balioso i energia na hasi e boluntat di Dios!

17. Kiko nos no mester lubidá nunka?

¹⁷ Nos no mester lubidá nunka ku nos ta den un guera i ku tur dia nos mester ta kla pa bataya. (Rev. 12:17) Nos rumannan no por karga nos eskudo di fe pa nos. Kada un di nos tin e responsabilidat pa keda ku nos eskudo di fe bon tené.

18. Dikon sòldá di antigwedat tabata keda ku nan eskudo bon tené?

¹⁸ Den antigwedat, un sòldá ku a mustra kurashi durante bataya lo a risibí onor. Pero, tabata un humiashon si el a regresá kas sin su eskudo. E historiadó romano Tásito a skirbi: “Bandoná bo eskudo tabata un desonor grandi.” Ta p’esei, e sòldánan tabata hasi sigur pa keda ku nan eskudo bon tené durante bataya.

19. Kiko nos tin ku hasi pa keda ku nos eskudo di fe bon tené?

¹⁹ Pa nos keda ku nos eskudo di fe bon tené, nos mester asistí regularmente na nos reunionnan i papia ku otro hende di Yehova i su Reino. (Heb. 10:23-25) Ademas, nos tin ku lesa Beibel tur dia i pidi Yehova yuda nos apliká su guia i konseho den tur loke nos ta hasi. (2 Tim. 3:16, 17) Asina ei, niun arma di Satanas lo kousa nos daño permanente. (Isa. 54:17) Nos “eskudo grandi di fe” lo protehá nos. Nos lo para firme, sirbiendo Yehova skouder ku skouder ku nos rumannan. I no solamente nos lo gana e batayanan di tur dia, sino tambe nos lo tin e onor di ta na Hesus su banda ora e gana e guera kontra Satanas i su siguidónan.—Rev. 17:14; 20:10.