Bo Ta Traha Bon ku Otro?

Tempu Hesus tabata den shelu, el a siña sierto kualidatnan ku a yud’é traha bon ku otronan. Anto aki riba tera, e tabata un bon ehèmpel di un hende ku a traha bon ku otronan. Kiko nos por siña for di Hesus su ehèmpel? Ora nos wak e manera ku el a traha ku otronan, nos por saka tres prinsipio ku lo yuda nos tambe traha bon den grupo òf tim. E prinsipionan akí lo yuda nos ta mas uní ku nos rumannan.

Pa un hende traha bon ku otro e mester ta humilde. E ta balorá e hendenan ku e ta traha kuné anto no ta hala atenshon na su mes. Hesus a siña kon pa ta humilde for di su Tata. Aunke Yehova so meresé e título di Kreador, asina mes el a resaltá e trabou importante ku su Yu a hasi. Nos por mira esei na loke Dios a bisa na Génesis 1:26: “Laga nos traha hende segun nos imágen.” Ora Hesus a skucha esei, e por a realmente mira Yehova su humildat i gentilesa.—Sal. 18:35.

Ora Hesus tabata na tera, e tambe a mustra ku e tabata humilde. Ora ku hende tabata elogi’é pa e kosnan ku e tabata hasi, semper el a elogiá Dios. (Mar. 10:17, 18; Huan 7:15, 16) El a sòru pa semper tin pas entre e i su disipelnan anto el a trata nan komo amigu no komo esklabo. (Huan 15:15) El a asta laba nan pia pa siña nan e importansia di ta humilde. (Huan 13:5, 12-14) Meskos ku Hesus, nos mester balorá esnan ku nos ta traha kuné i no pone nos interes personal promé ku esun di nan. Nos lo logra hopi mas, si nos “mustra onor na otro” i no preokupá ken lo haña e elogio.—Rom. 12:10.

Un otro kos ku un hende humilde mester komprondé ta “ku hopi konsehero [plannan] ta wòrdu lográ.” (Pro. 15:22) Sin importá kuantu eksperensia òf abilidat nos tin, loke nos tin ku keda kòrda ta ku no tin niun hende ku sa tur kos. Asta Hesus mes a rekonosé ku tabatin kos ku e no tabata sa di dje. (Mat. 24:36) Anto, aunke Hesus su disipelnan tabata imperfekto, tòg e tabata ke sa nan opinion òf loke nan tabata sa. (Mat. 16:13-16) Ta di komprondé anto dikon tur su siguidónan tabata sinti nan kómodo rònt di dje. Ora nos ta humilde, ta konsiente di nos limitashonnan i ta skucha opinion di otronan, nos ta yuda pa tin pas. Anto huntu e plannan “ta wòrdu lográ.”

Ta masha importante pa ansianonan imitá Hesus su humildat ora ku nan ta traha huntu. Nan tin ku kòrda ku spiritu santu por pone kualke un di nan bisa algu ku lo yuda e kuerpo tuma bon desishon. Si den nan reunion, nan ta purba di tin un ambiente den kua nan tur por duna nan opinion, huntu nan lo tuma desishon ku lo yuda henter e kongregashon.

Si bo ke traha bon ku otro, bo mester ta rasonabel, fleksibel i no keda insistí pa kosnan bai manera abo ke. Sin duda Hesus a mira vários biaha kon rasonabel su Tata ta. Por ehèmpel, aunke humanidat tabata meresé morto Yehova a manda Hesus pa salba nan.—Huan 3:16.

Ora Hesus a mira ku tabatin motibu, el a sede. Un ehèmpel di esei ta ku aunke ku el a ser mandá pa e hudiunan tòg el a yuda un señora di Fenisia. (Mat. 15:22-28) Hesus tabata rasonabel tambe den loke e tabata ferwagt di su disipelnan. Aunke su bon amigu Pedro a neng’é dilanti di hende, Hesus tabata kla pa pordon’é. Despues Hesus a asta konfia Pedro ku responsabilidatnan importante. (Luk. 22:32; Huan 21:17; Echo. 2:14; 8:14-17; 10:44, 45) Hesus su ehèmpel ta laga nos mira bon kla ku ora nos sede, nos ta mustra otronan ku nos ta rasonabel.—Flp. 4:5.

Un hende ku ta rasonabel lo ta fleksibel tambe. Esei ta pone ku e por traha na pas ku tur sorto di hende. Hesus a trata esnan rònt di dje asina bon ku su enemigunan envidioso a akus’é di ta “amigu di kobradó di belasting i pekadó.” Esei tabata hendenan ku a aseptá su mensahe. (Mat. 11:19) Nos tambe por traha bon ku tur sorto di hende meskos ku Hesus? Louis, un ruman ku a traha hopi tempu den e trabou di sirkuito i na Bètel ku rumannan di diferente background, a bisa: “Traha huntu ku otro hende imperfekto ta meskos ku traha un muraya ku piedra di diferente tamaño. Debí ku e piedranan ta di diferente tamaño, bo mester hasi hopi esfuerso pa lanta e muraya stret. Pero esei ta posibel. Di ami su banda, mi a purba di adaptá mi mes di manera ku nos por traha na pas ku otro anto pa e trabou por kaba.” Esei ta un bon aktitut pa nos tin!

Na ki momento nos por demostrá ku nos ta rasonabel ku e rumannan den nos kongregashon? Esei ta ora nos ta huntu ku nos grupo di sirbishi. Kisas den nos grupo, nos ta traha ku diferente ruman ku tin diferente responsabilidat den nan famia òf ku ta di diferente edat. Nos por adaptá nos tèmpo òf nos manera di prediká ya asina e rumannan ku nos ta traha kuné por tin mas goso den nan sirbishi?

Un hende ku ta traha bon ku otro ta “kla pa kompartí.” (1 Tim. 6:18) Segun ku Hesus tabata traha na lado di su Tata, lo el a ripará ku Yehova no ta skonde kos. Ora Yehova tabata “establesé e shelunan,” Hesus tabat’ei i por a siña for di dje. (Pro. 8:27) Despues, Hesus mes tabata masha kontentu pa kompartí ku su disipelnan “tur kos ku [el] a tende di [su] Tata.” (Huan 15:15) Ku e ehèmpel ei na mente, nos tambe mester ta kla pa kompartí nos konosementu i eksperensia ku e rumannan ku nos ta traha kuné. Ta klaru ku un ruman ku ta traha bon ku otro lo no wanta informashon ku ta nesesario òf importante atras pa e por keda ku kontrol. Lo e ta kontentu pa kompartí ku otronan tur e bon kosnan ku e sa.

Algu ku tambe nos por hasi ta di kompartí palabranan animante ku e rumannan ku nos ta traha huntu kuné. No ta asina ku nos ta sinti nos bon ora un hende tuma nota di tur e esfuerso ku nos ta hasi i ta gradisí nos di kurason? Hesus a tuma tempu pa bisa e hendenan ku e tabata traha huntu kuné tur e bon kosnan ku el a mira den nan. (Kompará ku Mateo 25:19-23; Lukas 10:17-20.) El a asta bisa nan ku nan lo “hasi obranan mas grandi” ku esnan di dje. (Huan 14:12) Riba e anochi promé ku su morto, el a elogiá su fiel apòstelnan bisando: “Boso ta esnan ku a keda huntu ku mi durante mi pruebanan.” (Luk. 22:28) Bo por imaginá bo kon e palabranan ei lo a animá nan? Si nos tambe tuma tempu pa elogiá e rumannan ku nos ta traha huntu kuné, sigur nan lo ta mas felis i mas produktivo.

Un ruman hòmber ku yama Kayode a bisa: “Un hende ku ta traha bon ku otronan no mester ta perfekto. E mester ta un hende ku ta fásil pa traha huntu kuné i ku ta hasi otronan felis.” Kiko di abo, bo ta asina? Dikon no puntra e rumannan ku bo ta traha huntu kuné si nan ta pensa ku bo ta fásil pa traha kuné? Si nan ta gusta traha huntu ku bo meskos ku Hesus su disipelnan a gusta traha huntu kuné, bo por bisa meskos ku Apòstel Pablo: “Nos ta traha huntu ku boso pa boso goso.”—2 Kor. 1:24.