Yehova Ta Tende Nos Sklamashon pa Yudansa

“E wowonan di SEÑOR ta riba e hustunan, i su oreanan ta atento pa skucha nan sklamashon.”​—SAL. 34:15.

1, 2. (a) Kon hopi hende ta sinti awe? (b) Dikon esaki no ta un sorpresa pa nos?

BO TA pasando den angustia? Si esei ta e kaso, bo no ta e úniko. Miónes di hende ta lucha pa trata ku e preshonnan diario di bida den e mal sistema di kosnan aki. Pa algun hende, e situashon ta parse kasi insoportabel. Nan ta sinti meskos ku e salmista David, kende a skirbi: “Mi ta agotá i mashá kibrá; mi ta keha pa motibu di e inkietut di mi kurason. Mi kurason ta bati duru, mi forsa ta faya mi; i e lus di mi wowo, asta esei a bai laga mi.”—Sal. 38:8, 10.

² Pa nos ku ta kristian, e angustianan di bida no ta un sorpresa. Nos ta komprondé ku “dolónan di parto” ta parti di e señal ku Hesus a profetisá di su presensia. (Mar. 13:8; Mat. 24:3) E palabra griego tradusí akinan komo “dolónan di parto” por ta referí generalmente na kalamidat òf angustia. E ta deskribí bon kla kon intenso hende su sufrimentu ta den e tempunan “trabahoso” òf [“difísil,” BPK] aki.—2 Tim. 3:1.

Yehova Ta Komprondé Nos Angustia

 3. Di kiko e pueblo di Dios ta bon konsiente?

³ Yehova su pueblo ta bon konsiente ku nan no ta skapa di e efektonan di e angustianan aki, i ku tur probabilidat, e kondishonnan desfaborabel aki lo bira asta pió. Ademas di loke humanidat en general ta eksperensiá, komo sirbidónan di Dios, nos tin un “atversario, e Diabel,” ku ta desididu pa kaba ku nos fe. (1 Ped. 5:8) Lo por ta masha fásil pa nos sinti manera David a sinti. El a bisa: “Reproche a kibra mi kurason, i mi ta sinti mi malu. I mi tabata spera pa kompashon, ma no tabatin, i pa konsoladónan, ma mi no a haña ningun.”—Sal. 69:20.

 4. Kiko ta konsolá nos ora nos ta pasando den angustia?

⁴ David tabata ke men ku e no tabatin ningun sorto di speransa? Nò. Tuma nota di loke el a bisa mas aleu den e salmo ei: “SEÑOR ta tende esnan den nesesidat, i no ta despresiá esnan di dje ku ta prezu.” (Sal. 69:33) Den un sentido amplio, nos por sinti de bes en kuando komo si fuera nos angustia i aflikshonnan ta tene nos prezu. Por parse ku otro hende realmente no ta komprondé nos situashon—i kisas esei ta bèrdat. Pero meskos ku David, nos por haña konsuelo sabiendo ku Yehova ta komprondé nos angustia plenamente.—Sal. 34:15.

 5. Ki konfiansa Rei Salomon tabatin?

⁵ David su yu hòmber Salomon a resaltá e punto aki durante e dedikashon di e tèmpel na Yerusalèm. (Lesa 2 Krónikanan 6:29-31.) El a roga Yehova pa tende orashon di kada persona sinsero ku aserká Yehova ku “su mes aflikshon i su mes doló.” Kon Dios lo a reakshoná riba e orashonnan di e hendenan angustiá aki? Salomon a ekspresá su konfiansa ku Dios lo no solamente a tende nan orashonnan, sino ku lo el a aktua tambe na nan fabor. Dikon? Pasobra e realmente konosé “kurason di e yunan di hende.”

 6. Kon nos por trata ku angustia, i dikon?

⁶ Asina nos tambe por aserká Yehova den orashon ku ‘nos mes aflikshon i nos mes doló,’ esta, kada un di nos ku nos angustia. E echo ku nos sa ku e ta komprondé nos angustia i ta interesá den nos, mester konsolá nos. Apòstel Pedro a konfirmá esaki ora el a bisa: ‘Tira tur boso preokupashon riba dje, pasobra e ta perkurá pa boso.’ (1 Ped. 5:7) Yehova ta ègt interesá den loke ta pasa ku nos. Hesus a enfatisá Yehova su interes amoroso ora el a bisa: “Dos mòfi no ta wòrdu bendí pa ún sèn? I ni un di nan lo no kai na suela [“sin konosementu,” NW] di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.”—Mat. 10:29-31.

Dependé Riba Yehova Su Yudansa

 7. Di ki yudansa nos por ta sigur di dje?

⁷ Sin ningun duda, nos por ta sigur ku Yehova tin tantu e deseo komo e poder pa yuda nos ora angustia ta afligí nos. “Dios ta nos refugio i fortalesa, un pronto ousilio den tempu di angustia.” (Sal. 34:15-18; 46:1) Kon Dios ta duna e yudansa ei? Konsiderá loke 1 Korintionan 10:13 ta bisa: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” Kisas Yehova ta dirigí asuntunan pa kita nos problema, òf e por duna nos e fortalesa nesesario pa soport’é. Ámbos manera ta un yudansa pa nos.

 8. Kon nos por benefisiá di e yudansa di Dios?

⁸ Kon nos por benefisiá di e yudansa ei? Tuma nota di loke Beibel ta konsehá nos pa hasi: ‘Tira tur boso preokupashon riba dje.’ Esaki ta nifiká ku den un sentido figurativo nos ta pone den man di Yehova e responsabilidat di tur nos preokupashonnan. Nos ta purba di no preokupá mas, i ku pasenshi nos ta konfia ku lo e perkurá pa nos nesesidatnan. (Mat. 6:25-32) Pa nos por tin un konfiansa asina, nos mester ta humilde i no dependé riba nos propio forsa i sabiduria. Dor di humiá nos mes “bou di e man poderoso di Dios,” nos ta rekonosé nos posishon humilde. (Lesa 1 Pedro 5:6.) Esaki, na su turno, ta yuda nos trata ku tur loke Dios permití. Ounke nos kisas ta anhelá pa haña un alivio inmediato, nos tin konfiansa ku Yehova sa eksaktamente ki ora i kon pa aktua na nos fabor.—Sal. 54:7; Isa. 41:10.

 9. Ki klase di karga David mester a tira riba Yehova?

⁹ Kòrda David su palabranan registrá na Salmo 55:22: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” David tabata hopi angustiá ora el a skirbi e palabranan aki. (Sal. 55:4) Hende ta kere ku David a skirbi e salmo aki ora su yu Absalon a trama un kòmplòt pa kita e reinado for di dje. David su konsehero di konfiansa, Ahitofel, a djòin e konspirashon. David mester a hui bai Yerusalèm pa e skapa su bida. (2 Sam. 15:12-14) Asta bou di e sirkunstansianan angustioso ei, David a sigui konfia den Dios, i e no a keda desapuntá.

10. Kiko nos tin ku hasi ora nos ta pasa den angustia?

¹⁰ Ta masha importante pa nos, meskos ku David, hasi orashon na Yehova tokante kualke angustia ku nos kisas ta pasando aden. Laga nos konsiderá loke apòstel Pablo a urgi nos pa hasi relashoná ku e asuntu aki. (Lesa Filipensenan 4:6 i 7.) Kiko lo ta e resultado di un orashon intenso asina? “E pas di Dios, ku ta surpasá tur komprondementu, lo warda [nos] kurason i [nos] mente den Kristu Hesus.”

11. Kon “e pas di Dios” ta protehá nos kurason i nos mente?

¹¹ Orashon lo kambia bo situashon? Kisas sí. Pero nos mester realisá sí ku no ta semper Yehova ta kontestá nos orashonnan n’e manera ku nos lo tabata ke. Sin embargo, orashon ta yuda nos mantené nos balansa mental di manera ku nos angustia no ta hoga nos. “E pas di Dios” por kalma nos ora nos ta kargá ku emoshonnan ku ta angustiá nos. Meskos ku un trupa di sòldá asigná pa protehá un stat kontra di un invashon di enemigu, “e pas di Dios” lo protehá nos kurason i nos mente. Ademas, lo e yuda nos vense nos miedu, duda- i pensamentunan negativo i ta pone ku nos lo no reakshoná impulsivamente i na un manera bobo.—Sal. 145:18.

12. Ilustrá kon un persona por tin pas mental.

¹² Kon nos por tin pas mental ora nos ta pasando den angustia? Konsiderá un ilustrashon ku den algun aspekto ta kuadra ku nos situashon. Un empleado ta traha kisas bou di un manager ku ta gusta insult’é. Sin embargo, e trahadó ta haña un oportunidat pa ekspresá su sintimentunan serka e doño di e kompania, kende ta un hòmber bondadoso i rasonabel. E doño ta sigurá e empleado ku e ta komprondé e situashon i ta bis’é ku pronto lo e kita e manager for di e posishon ei. Kon esei ta laga e empleado sinti? E siguransa ku e doño di trabou a dun’é i e echo ku e sa kiko ta bai sosodé lo fortalesé su determinashon pa sigui padilanti, ounke miéntras tantu e tin ku konfrontá mas difikultat. Di mes manera, nos tambe sa ku Yehova ta komprondé nos situashon, i e ta sigurá nos ku pronto “e prens di e mundu aki lo wòrdu tirá pafó.” (Juan 12:31) Ki un konsuelo esei ta!

13. Ademas di resa, kiko mas nos tin ku hasi?

¹³ Pero esei ta nifiká ku djis hasi orashon na Yehova tokante nos problemanan ta sufisiente? Nò. Mas ta nesesario. Nos tin ku aktua na armonia ku nos orashonnan. Ora Rei Saul a manda hòmbernan na kas di David pa mat’é, David a resa: “Libra mi for di mi enemigunan, o mi Dios; protehá mi for di esnan ku ta lanta kontra mi. Libra mi for di esnan ku ta hasi inikidat, i salba mi for di hòmbernan dramadó di sanger.” (Sal. 59:1, 2) Ademas di hasi orashon, David a skucha su esposa i a tuma e medidanan nesesario pa hui i asina el a skapa. (1 Sam. 19:11, 12) Di un manera similar, nos por resa pidi Yehova sabiduria práktiko pa yuda nos enfrentá i kisas asta mehorá e situashon ku ta angustiá nos.—Sant. 1:5.

Kon Nos Por Haña Fortalesa pa Perseverá?

14. Kiko por yuda nos perseverá apesar di angustia?

¹⁴ Podisé Dios no ta kita nos angustia mesora. Esaki por sigui asta pa algun tempu. Si esei ta e kaso, kiko lo yuda nos perseverá? Di promé, kòrda ku ora nos sigui sirbi Yehova fielmente apesar di difikultat, nos ta duna prueba di nos amor p’e. (Echo. 14:22) Kòrda e akusashon ku Satanas a hasi den kaso di Jòb: “Akaso Jòb no tin motibu pa respetá Dios? Bo [no a] pone un protekshon rònt di dje, di su famia i di tur loke e ta poseé? Bo a bendishoná trabou di su mannan di manera ku su trupanan di bestia, grandi i chikí ta yena henter e pais. Pero rèk bo man i destruí tur loke e tin i lo e blasfemá bo abiertamente.” (Jòb 1:9-11, BPK) Mediante su integridat, Jòb a demostrá ku e akusashon ei tabata un gran mentira. Dor di perseverá bou di sirkunstansianan ku ta angustiá nos, nos tambe tin oportunidat pa demostrá ku Satanas ta un mentiroso. I nos perseveransia, na su turno, ta fortalesé nos speransa i konfiansa den Yehova.—Sant. 1:4.

15. Ki ehèmpelnan por fortalesé nos?

¹⁵ Di dos, kòrda ku “boso rumannan den henter mundu ta pasando dor di e mesun eksperensianan di sufrimentu.” (1 Ped. 5:9) Sí, “ningun tentashon, fuera di loke tur hende ta pasa aden, no a bin riba boso.” (1 Kor. 10:13) P’esei, bo por haña fortalesa i kurashi ora bo ta meditá riba ehèmpel di otronan en bes di enfoká riba bo propio difikultatnan. (1 Tes. 1:5-7; Heb. 12:1) Tuma tempu pa pensa riba ehèmpel di personanan ku bo konosé i ku a perseverá fielmente apesar di angustia doloroso ku nan a pasa aden. Bo a yega di buska den e publikashonnan eksperensia di bida real di hende ku a pasa den algu similar na loke abo ta konfrontá? E relatonan aki lo por fortalesé bo mashá.

16. Kon Dios ta fortalesé nos ora nos ta konfrontá vários prueba?

¹⁶ Di tres, kòrda ku Yehova ta “e Tata di miserikòrdianan i Dios di tur konsuelo, kende ta konsolá nos den tur nos aflikshon, pa asina nos tambe por konsolá esnan ku ta den kualke aflikshon ku e mesun konsuelo ku Dios a konsolá nos kuné.” (2 Kor. 1:3, 4) Ta komo si fuera Dios ta pará na nos banda i ta animá nos i fortalesé nos, no solamente den e aflikshon ku nos ta pasando aden sino “den tur nos aflikshon.” E ora ei, esaki ta kapasitá nos pa konsolá otro hende “den kualke aflikshon.” Pablo a eksperensiá personalmente ku e palabranan aki ta bèrdat.—2 Kor. 4:8, 9; 11:23-27.

17. Kon Beibel por yuda nos trata ku e angustianan di bida?

¹⁷ Di kuater, nos tin Dios su Palabra, Beibel, ku “ta útil pa siñansa, pa reprendementu, pa korekshon, pa eduká den hustisia, pa e hende di Dios por ta [“plenamente kompetente, kompletamente ekipá,” NW] pa tur bon obra.” (2 Tim. 3:16, 17) E Palabra di Dios no solamente ta hasi nos “kompetente” i “ekipá pa tur bon obra,” sino tambe e ta yuda nos trata ku angustia. E ta hasi nos “plenamente kompetente” i “kompletamente ekipá.” E palabra original tradusí komo “kompletamente ekipá” ta nifiká literalmente “hasí adekuá” òf “prepará.” Den antigwedat, nan por a usa e palabra aki pa referí na un boto ku a ser prepará ku tur loke tabata nesesario pa un biahe òf na un mashin ku a ser hasí adekuá pa efektuá tur loke a ser sperá di dje. Di mes manera, mediante su Palabra, Yehova ta duna nos tur loke nos tin mester pa trata ku tur loke nos por haña nos kuné. Ta p’esei, nos por bisa: “Si Dios ta permitié, nos por soport’é ku su yudansa.”

Liberashon For di Tur Nos Angustia

18. Kiko mas nos tin ku enfoká riba dje ku lo yuda nos perseverá fielmente?

¹⁸ Di sinku, semper keda enfoká riba e echo maravioso ku Yehova pronto lo aliviá humanidat di tur angustia. (Sal. 34:19; 37:9-11; 2 Ped. 2:9) E liberashon ku finalmente nos ta haña di Dios, lo nifiká no solamente liberashon for di angustia aktual sino tambe e oportunidat di biba pa semper, sea den shelu huntu ku Hesus òf riba e tera kombertí den paradeis.

19. Kon nos por perseverá fielmente?

¹⁹ Tanten ku e tempu ei no yega, nos ta sigui trata ku situashonnan ku ta angustiá nos den e mundu malbado aki. Nos ta anhelá mashá e tempu ku e kosnan aki no ta eksistí mas! (Sal. 55:6-8) Laga nos keda kòrda ku nos perseveransia fiel ta duna prueba ku Diabel ta un mentiroso. I laga nos orashonnan i nos hermandat kristian—sabiendo ku nos rumannan ta pasando den e mesun pruebanan ku nos—fortalesé nos. Sigui ser plenamente kompetente i kompletamente ekipá dor di hasi bon uso di e Palabra di Dios. No permití nunka pa bo konfiansa den e kuido amoroso di e “Dios di tur konsuelo” tambaleá. Kòrda ku “e wowonan di [Yehova] ta riba e hustunan, i su oreanan ta atento pa skucha nan sklamashon.”—Sal. 34:15.

Bo Por Kontestá?

• Kon David a sinti tokante e angustia ku el a konfrontá?

• Ki konfiansa Rei Salomon a ekspresá?

• Kiko por yuda nos trata ku loke Yehova ta permití?

[Plachi na página 21]

Salomon tabatin konfiansa ku Yehova lo aktua na fabor di Su pueblo afligí

[Plachi na página 23]

David a tira su karga riba Yehova mediante orashon, i el a aktua di akuerdo ku loke el a resa p’e