No Laga Bo Punto Fuerte Bira Bo Debilidad

Cu 16 compartimento herméticamente cerá den su bodega, nan tabata considerá cu tabata imposibel pa e crusero di luho Titanic por hundi. Riba su biahe di inauguracion na 1912 el a hiba rond di mitar dje cantidad di boto salbabida necesario. E barcu a dal den un ijsberg anto hundi, costando bida di mas cu 1.500 hende.

REY Uzías di antiguo Jerusalem, un homber temeroso di Dios, tabata un comandante militar briyante. Cu yudansa di Jehova el a derotá su enemigunan unu tras di otro. “Dor di esei [Uzías] su fama a bai un gran distancia, pasobra el a ser yudá maraviyosamente te ora el a bira fuerte.” Pero despues “su curason a bira halsá . . . di manera cu el a actua na moda infiel contra Jehova su Dios.” Dor dje actitud halsá di Uzías, Dios a dal e cu lepra.— 2 Crónicanan 26:15-21; Proverbionan 16:18.

E dos relatonan aki ta siña nos cu ora bo no balansá bo puntonan fuerte cu sabiduria, modestia i humildad, fácilmente nan por bira debilidad of desbentaha. Ta bon pa pensa seriamente riba esaki, pasobra di un manera of otro, nos tur tin algun punto fuerte, of don, i nos kier pa nan ta beneficioso i un fuente di goso pa nos mes i pa otronan, particularmente pa nos Creador. Berdad, nos mester usa tur don cu nos tin di Dios plenamente, i na mes momento control’é pa e sigui ser un bentaha balioso.

Por ehempel, un hende cu ta stima su trabou por haci su punto fuerte un debilidad fácilmente dor di bira adicto na trabou. Por laga di ta fácil pa nek of gaña un hende cauteloso, pero e por ta dje cauteloso ei cu nunca e no ta tuma un decision. Eficiencia tambe ta un cualidad excelente, pero si bo hib’é te na un extremo i ignorá e factor humano, e resultado lo por ta un ambiente friu i stijf cu ta fomentá infelicidad. P’esei, tuma un ratu pa meditá riba bo propio puntonan fuerte. Bo ta manehá nan bon? Nan ta un bendicion pa otronan? Mas cu tur cos, bo ta usa nan pa onra Jehova, e Fuente di “tur bon don”? (Santiago 1:17) Cu esei na mente, laga nos tira un bista mas detayá riba algun otro ehempel di puntonan fuerte cu por desaroyá bira debilidad, i asta desbentaha, si no controlá nan.

Usa Abilidadnan Mental Na Moda Sabí

Si nos tin bon cabes, sin duda esei ta un excelente bentaha. Tog, e por bira un debilidad si e hiba na demasiado confiansa den nos mes, of un punto di bista hinchá di nos mes, foral si otronan ta encomendá of elogiá nos muchu. Of nos por desaroyá un punto di bista intelectual tocante e Palabra di Dios i publicacionnan pa studia Bijbel.

Demasiado confiansa den nos mes por surgi den vários manera. Por ehempel, ora un hende cu un bon cabes ricibí un asignacion pa papia den e congregacion cristian, kisas un discurso público of un parti den e Scol di Ministerio Teocrático, e por laga su preparacion te na último momento, por ta asta sin ni pidi pa Jehova su bendicion. Mas bien, e ta confia den su reserva di conocimentu i su abilidad pa pensa kico pa bisa durante su parti mes. Abilidad natural por camuflá su negligencia pa un tempu, pero sin Jehova su bendicion completo, su progreso spiritual lo baha, i kisas asta stop. Wak con un don excelente ta bai dispidí!—Proverbionan 3:5, 6; Santiago 3:1.

Ademas, un hende di mente skerpi lo por adoptá un punto di bista intelectual di Bijbel i yudansanan pa studia Bijbel. Sin embargo, tur loke tal tipo di conocimentu ta haci ta “hincha” bo balor propio manera un blas; e no ta ‘edificá’ relacionnan cristian amoroso. (1 Corintionan 8:1; Galationan 5:26) Di otro banda, semper e homber spiritual ta pidi pa e spiritu di Dios i ta confia den dje, sin importá su abilidadnan mental. Su punto fuerte ta bira asta mas bentahoso segun cu e ta crece den amor, humildad, conocimentu i sabiduria—i tur esei nechi balansá.—Colosensenan 1:9, 10.

Abilidad lo bira un debilidad tambe, si dor di dje nos desaroyá un punto di bista halsá tocante nos mes, revelando falta di modestia. Un persona talentoso, i esnan cu ta admir’é, por lubidá cu Jehova “no ta considerá ningun di esnan cu ta sabí den nan mes curason,” ni maske ki don nan tin. (Job 37:24) E Palabra di Dios ta bisa: “Sabiduria ta cu esnan modesto.” (Proverbionan 11:2) Apesar cu apostel Pablo tabata sumamente inteligente i bon siñá, el a bisa e corintionan: “Ami, ora mi a bini cerca boso, rumannan, mi no a bini cu extravagancia di abla of di sabiduria . . . mi a bini cerca boso den debilidad i den temor i cu hopi temblamentu; i mi papiamentu i loke mi a predicá no tabata cu palabranan persuasivo di sabiduria sino cu demostracion di spiritu i poder, pa boso fe por ta, no den sabiduria di hende, sino den e poder di Dios.”—1 Corintionan 2:1-5.

Un persona berdaderamente sabí no ta laga e punto di bista mundano di inteligencia, ni su definicion di éxito gañ’é. Pues, na lugá di usa su talentonan pa haña aprobacion di hende of pa acumulá rikesa mundano, e ta duna lo mihó di dje na Esun cu a dun’é su bida i abilidadnan. (1 Juan 2:15-17) Cu esei como meta e ta mantené interesnan di Reino promé den su bida, i e ta bira manera un “palu [fructífero] plantá cantu di coriente di awa.” Danki na Jehova su bendicion, i no na su propio talentonan natural, “tur loke e haci lo tin éxito.”—Salmo 1:1-3; Mateo 6:33.

Laga Cristianismo Fortificá Bo Puntonan Fuerte

Di naturalesa, cristianismo ta asina ricu na puntonan fuerte cu filosofianan mundano ta mustra pober compará cuné. Por ehempel, e bida cristian ta producí e mihó esposo i esposanan, e mihó bisiñanan i e mihó trahadónan—hende onesto, respetuoso, pacífico i diligente. (Colosensenan 3:18-23) Ademas, e entrenamentu cu cristiannan ta ricibí pa papia i siña ta haci cu nan tin bon abilidad di comunicá. (1 Timoteo 4:13-15) P’esei, no ta nada straño cu hopi bes doñonan di trabou ta scoge cristiannan pa duna responsabilidad extra i promocion. Pero si bo no tene cuidou, bo por haci maluso dje puntonan fuerte ei tambe. Un promocion of un oferta atractivo di trabou por bin nificá cu bo ta prácticamente dedicá bo mes na e compania, falta reunionnan cristian regularmente of sacrificá tempu balioso cu bo famia.

Na Australia, un anciano cristian i homber di famia, cu ademas tabata un negoshante masha exitoso “tabatin mundu den su man,” manera nan ta bisa. Tog el a nenga e tentacion di haña éxito den e sistema aki. E di: “Mi tabata kier pasa mas tantu tempu cu mi famia i den e ministerio cristian. P’esei ami cu mi casá a dicidí cu lo mi baha man poco poco na e tempu cu mi a dedicá na mi trabou seglar.” El a agregá: “Pakico lo mi traha cincu dia pa siman si no tabata necesario?” Dor di haci algun ahuste bon pensá den su bida, e anciano aki a descubrí cu e por a sigui cria su famia trahando tres pa cuater dia so pa siman. Cu tempu el a ricibí invitacion pa tuma parti den otro privilegionan di sirbishi, manera sirbi den e Comité di Salon di Asamblea local, i den administracion di congreso di distrito. Dor cu el a usa su puntonan fuerte di un moda sabí, nan a trece goso i satisfaccion p’e i su famia.

Un Actitud Balansá Tocante Privilegio

Bijbel ta animá hombernan cristian pa nan haci esfuerso pa alcansá privilegionan di sirbishi den congregacion. “Si un homber ta percurando pa alcansá un puesto di superintendente [of sirbidó ministerial], e ta deseoso di un trabou excelente.” (1 Timoteo 3:1) Mescos cu e otro puntonan fuerte mencioná caba, un disponibilidad pa aceptá responsabilidad tambe mester ser balansá cu sano huicio. Niun hende no mester tuma asina tantu responsabilidad cu e ta perde su goso den sirbi Jehova. Sí, un spiritu dispuesto ta encomendabel i asta necesario, pasobra Jehova ta desaprobá un actitud di hui pa trabou; pero disponibilidad mester reflehá modestia i “sano huicio” tambe.—Tito 2:12; Revelacion 3:15, 16.

Jesus su suavedad, perspicacia i sintimentu pa hende a pone asta esnan mas humilde sinti nan mes na cas den su presencia. Awe tambe, hende ta sinti nan bon cerca personanan cu tin empatia i interes personal como nan punto fuerte. Den e congregacion cristian, ancianonan caluroso i acercabel asina ta “donnan den hende” sumamente balorá. Nan ta “un lugá di sconde for dje tempestad di awaceru, manera riu di awa den un tera secu, manera e sombra di un baranca grandi den un tera agotá.”—Efesionan 4:8; Isaías 32:2.

Pero ancianonan mester balansá e tempu cu nan ta dedicá na yuda otronan cu nan propio necesidad pa studio personal, meditacion, oracion i e ministerio público. Naturalmente, ancianonan casá mester dedicá tempu na nan famia tambe; nan mester ta mas acercabel ainda pa nan.

Muhernan Capas —Un Bendicion Maraviyoso

Mescos cu ancianonan capas, muhernan spiritual tambe ta masha balioso pa Jehova su organisacion. En general, hende muher tin e don di ta interesá den otro hende—un cualidad cu Jehova ta balorá i animá. ‘No vigilá cu interes personal boso mes asuntunan so, sino tambe cu interes personal den asuntu dje otronan,’ apostel Pablo a skirbi. (Filipensenan 2:4) Tog, e “interes personal” aki tin su límite, pasobra ningun cristian lo kier bira un “hende cu ta mete den asuntu di otro hende”; ni un hacidó di redu tampoco.—1 Pedro 4:15; 1 Timoteo 5:13.

Hende muher tin hopi otro don. Un esposa cristian, por ehempel, por tin mas abilidad mental cu su casá. Tog, como “esposa capas” cu ta teme Jehova, lo e respetá su esposo i usa su abilidad pa complementá esnan di dje, no pa competí cuné. I en bes di envidi’é of carga rencor contra dje, un esposo sabí i humilde lo balorá e puntonan fuerte di su casá i considerá nan un goso. Lo e anim’é pa usa su talentonan plenamente pa edificá su cas i yuda su yunan ‘teme Jehova,’ mescos cu e mes. (Proverbionan 31:10, 28-30; Génesis 2:18) Esposo i esposanan modesto i humilde asina ta prosperá den matrimonionan cu di berdad ta onra Jehova.

Dominá Un Personalidad Fuerte

Ora un personalidad fuerte tin como meta busca husticia i cumpli cu Jehova su boluntad di henter alma, e ta un recurso balioso, si suavis’é cu modestia i humildad. Tog, e por ta un debilidad si e ta pone nos dominá of intimidá otronan. Esaki ta e caso specialmente den e congregacion cristian. Cristiannan mester por sinti nan trankil cu otro, incluso ora nan ta cerca ancianonan di congregacion.—Mateo 20:25-27.

Ancianonan, di nan banda, mester por sinti nan trankil den otro su compania. I ora nan reuní, ta spiritu santu, no forsa di personalidad, ta loke mester influenciá nan decisionnan. Berdad, spiritu santu por influenciá cualkier anciano dje cuerpo, asta esun mas hóben of recien nombrá. P’esei, esnan cu tin personalidadnan mas fuerte, asta ora nan sinti cu nan tin rason, mester controlá nan forsa dor di siña e arte di mustra consideracion, pues, “mustra onor” na otro ancianonan. (Romanonan 12:10) Eclesiástes 7:16 ta spierta bondadosamente: “No bira demasiado hustu, ni mustra bo mes excesivamente sabí. Pakico bo mester causa desolacion pa bo mes?”

Jehova, e Fuente di “tur bon don,” ta controlá su forsa impresionante cu perfeccion absoluto. (Santiago 1:17; Deuteronomio 32:4) Anto e ta nos Maestro! Laga nos siña for di dje anto, i traha duru, tantu pa desaroyá nos donnan natural, of puntonan fuerte, como pa controlá nan di un forma sabí, modesto i amoroso. Esei lo ta un gran bendicion pa otronan!

[Plachinan na página 27]

Adelanto spiritual ta dependé di studio cu oracion i dependencia riba Jehova

[Plachi na página 29]

Interes personal combiná cu modestia ta un bendicion

[Rekonosementu pa Pòtret na página 26]

Pa cortesia di The Mariners’ Museum, Newport News, VA