Capitulo 15

Edificando un Famia Cu Ta Onra Dios

 1-3. Pakico algun hende no ta capas pa resolvé problemanan cu ta comun den matrimonio i criamentu di yu, pero pakico e Bijbel por yuda?

SUPONE cu bo ta planea pa construí bo propio cas. Promé bo ta cumpra e tereno. Cu anticipacion ansioso, bo ta imaginá bo cas nobo. Pero kico si bo no tin e hermentnan ni ningun abilidad den construccion? Ki frustrante bo esfuersonan lo ta!

² Hopi pareha ta drenta bida matrimonial imaginando nan mes un famia felis, sin embargo nan no ta poseé ni e hermentnan ni e abilidadnan necesario pa edificá un famia felis. Djis despues di e dia di casamentu, patronchinan di comportacion negativo ta desaroyá. Bringamentu i pleitamentu ta bira un rutina diario. Ora yunan nace, e tata i mama nobo ta descubrí cu nan falta e abilidad pa ser tata i mama mes tantu cu nan falta e abilidad pa tin un matrimonio felis.

³ Sin embargo, felismente e Bijbel por yuda. Su principionan ta manera hermentnan cu ta capacitá bo pa edificá un famia felis. (Proverbionan 24:3) Laga nos mira con.

HERMENTNAN PA EDIFICA UN MATRIMONIO FELIS

 4. Pakico por spera problemanan den matrimonio, i ki guia ta ser proveé den e Bijbel?

⁴ Maske con bon un pareha casá ta parce di ta cuadra cu otro, nan ta diferenciá den composicion emocional, experencia di infancia, i antecedente familiar. P’esei, por spera algun problema despues di matrimonio. Con nan lo ser atendé? Wel, ora constructornan ta construí un cas, nan ta consultá e plannan di e arkitecto. Esaki ta e guia cu mester sigui. E Bijbel ta proveé Dios su guia pa edificá un famia felis. Laga nos examiná awor un par di esakinan.

 5. Con e Bijbel ta enfatisá e importancia di lealtad den matrimonio?

⁵ Lealtad. Jesus a bisa: “Loke Dios a uni bou di un yugo laga ningun hende separá.”a (Mateo 19:6) Apostel Pablo a skirbi: “Laga matrimonio ser onorabel entre tur, i e cama di matrimonio sea sin mancha, pasobra Dios lo husga fornicadornan i adúlteronan.” (Hebreonan 13:4) P’esei hende casá mester sinti un obligacion pa cu Jehova pa keda fiel na nan casá.—Génesis 39:7-9.

 6. Con lealtad lo yuda preservá un matrimonio?

⁶ Lealtad ta duna e matrimonio dignidad i siguridad. Casánan leal sa cu, kico cu pasa, nan lo sostené un e otro. (Eclesiástes 4:9-12) Ki diferente for di esnan cu ta bandoná nan matrimonio n’e promé problema chikitu cu presentá! Tal individuonan ta concluí masha lihé cu nan a ‘scoge e persona robes,’ cu nan ‘no ta stima otro mas,’ cu un casá nobo ta e solucion. Pero e conclusion aki no ta duna ningun di e dos casánan e oportunidad di desaroyá emocionalmente. Mas bien, personanan desleal asina lo hiba e mésun problemanan pa e casá nobo. Ora un persona tin un bon cas pero ta descubrí cu e dak ta lek, siguramente e ta trata na drech’é. E no ta djis muda pa un otro cas. Di igual manera, cambiando casá no ta e forma pa resolvé e cuestionnan cu ta e fuente di disputa matrimonial. Ora problemanan surgi, no trata na pone fin n’e matrimonio, sino traha duru pa preservá e matrimonio. Tal lealtad ta trata e union matrimonial como algu digno pa protehá, pa mantené, i pa apreciá.

 7. Pakico comunicacion hopi bes ta difícil pa hendenan casá, pero con bistiendo “e personalidad nobo” por yuda?

⁷ Comunicacion. “Plannan ta frustra ora no tin papiamentu confidencial,” un proverbio bíblico ta bisa. (Proverbionan 15:22) Sin embargo, comunicacion ta difícil pa algun pareha casá. Pakico esei ta e caso? Pasobra hende tin diferente estilo di comunicá. Esaki ta un echo cu hopi bes ta hiba na bastante malcomprendimentu i frustracion. Con e persona a ser criá por hunga un rol den esaki. Por ehempel, algun hende kisas a ser criá den un cas caminda e mayornan semper tabata pleita. Awor como adultonan casá, nan no sa con pa papia cu nan casá den un manera bondadoso i amoroso. No obstante, bo cas no mester degenerá den ‘un cas yen di pleitamentu.’ (Proverbionan 17:1) E Bijbel ta enfatisá pa bisti “e personalidad nobo,” i e no ta dispensá amargura malicioso, gritamentu, i abla ofensivo.—Efesionan 4:22-24, 31.

 8. Kico por ta útil ora bo no ta di acuerdo cu bo casá?

⁸ Kico bo por haci ora tin desacuerdonan? Si abo cu bo casá cuminsá perde control di boso beis, boso lo haci bon di sigui e conseho di Proverbionan 17:14: “Promé cu e pleitu cuminsá, bai for di einan.” Sí, boso lo por suspendé e discusion te cu mas despues, ora tantu abo como bo partner a calma. (Eclesiástes 3:1, 7) Kico cu sosodé, haci esfuerso pa ta “lihé pa tende, tardá pa papia, tardá pa rabia.” (Santiago 1:19) Bo meta mester ta pa remediá e situacion, no pa gana e discusion. (Génesis 13:8, 9) Scoge palabranan i un manera di papia cu lo calma abo i bo casá. (Proverbionan 12:18; 15:1, 4; 29:11) Ariba tur cos, no keda den un estado provocá, pero busca yudansa dor di boso dos huntu comunicá cu Dios den oracion humilde.—Efesionan 4:26, 27; 6:18.

 9. Pakico por ser bisá cu comunicacion ta cuminsá den e curason?

⁹ Un proverbio bíblico ta bisa: “E curason di esun sabí ta laga su boca mustra perspicacia, i na su lipnan e ta agregá persuasiva.” (Proverbionan 16:23) Realmente, anto, e clave pa comunicacion exitoso ta den e curason, i no den e boca. Kico ta bo actitud pa cu bo casá? E Bijbel ta animá cristiannan pa mustra “compasion.” (1 Pedro 3:8) Bo por haci esaki ora bo casá ta experenciá ansiedad inkietante? Si ta asina, esei lo yudá bo sa con pa contestá.—Isaías 50:4.

10, 11. Con un esposo por aplicá e conseho di 1 Pedro 3:7?

¹⁰ Onor i Respet. Ta ser bisá na esposonan cristian pa biba cu nan esposanan “di acuerdo cu conocimentu, asignando na nan onor manera na un baso mas débil, esun femenino.” (1 Pedro 3:7) Onrando bo esposa ta enbolbé reconociendo su balor. Un esposo cu ta biba cu su esposa “di acuerdo cu conocimentu” ta mustra gran aprecio pa e esposa su sintimentunan, su vigor, inteligencia, i dignidad. E esposo lo kier haña sa tambe con Jehova ta mira hende muher i con e ta deseá pa nan ser tratá.

¹¹ Laga nos bisa, cu den bo cas, bo tin un baso masha útil cu ta specialmente delicado. Lo bo no trat’é cu masha cuidou? Wel, Pedro a usa e término “baso mas débil” den un sentido similar, i esaki mester motivá un esposo cristian pa manifestá consideracion tierno pa su kerida esposa.

12. Con un esposa por demostrá cu e ta respetá su esposo profundamente?

¹² Pero ki conseho e Bijbel ta duna un esposa? Pablo a skirbi: “E esposa mester tin respet profundo pa su esposo.” (Efesionan 5:33) Mescos cu un esposa mester sinti cu e ta ser onrá i tiernamente stimá dor di su casá, un esposo mester sinti cu e ta ser respetá dor di su esposa. Un esposa respetuoso lo no haci conocí públicamente na forma desconsiderá su esposo su fayonan, sea cu e ta un cristian of no. E esposa lo no kita e dignidad dje esposo dor di critik’é i rebah’é sea den privá of den público.—1 Timoteo 3:11; 5:13.

13. Con puntonan di bista por ser expresá den un manera pacífico?

¹³ Esaki no ta nificá cu un esposa no por expresá su opinionnan. Si algu ta molesti’é, e por expresá su mes respetuosamente. (Génesis 21:9-12) Expresando un idea na su esposo lo ta parecido na tiramentu di un bala p’e. E esposa por tir’é suavemente di manera cu e por fangu’é fácilmente, of e por tir’é cu asina un forsa cu e ta herid’é. Cuantu mas mihó lo ta si ámbos partner evitá di lansa acusacionnan pero, mas bien, ta papia den un manera bondadoso i suave!—Mateo 7:12; Colosensenan 4:6; 1 Pedro 3:3, 4.

14. Kico bo mester haci si bo casá ta mustra poco interes den aplicá principionan bíblico den matrimonio?

¹⁴ Manera nos a mira, principionan bíblico por yudá bo edificá un matrimonio felis. Pero kico si bo casá ta mustra poco interes den loke e Bijbel tin di bisa? Tog hopi por ser lográ si bo aplicá e conocimentu di Dios den bo rol. Pedro a skirbi: “Boso, esposanan, sea sumiso na boso esposonan, di manera cu, si cualkier un no ta obediente na e palabra, nan por ser ganá sin un palabra mediante e conducta di nan esposanan, pa motibu di tabata testigonan ocular di boso conducta puru huntu cu respet profundo.” (1 Pedro 3:1, 2) Naturalmente, mescos lo ta aplicá na un esposo kende su esposa ta indiferente pa cu e Bijbel. Maske kico bo casá scoge pa haci, laga principionan bíblico haci abo un mihó casá. E conocimentu di Dios por hací bo tambe un mihó mayor.

CRIANDO YUNAN DI ACUERDO CU E CONOCIMENTU DI DIOS

15. Con métodonan defectuoso di cria yu por ser pasá di un generacion pa otro, pero con por kibra e ciclo aki?

¹⁵ Simplemente teniendo un zag of un martin no ta haci un persona un carpinté ábil. Di igual manera, simplemente teniendo yu no ta haci un persona un mama of tata ábil. Sea concientemente of no, mayornan hopi bes ta cria nan yunan e manera cu nan mes a ser criá. Pues, métodonan defectuoso di cria yu tin biaha ta ser pasá di un generacion pa otro. Un proverbio hebreo di antigua ta bisa: “Tatanan ta esnan cu ta come druif cu no ta hechu, pero ta e djentenan dje yunan ta coge ril.” Sin embargo, e Scritura ta mustra cu un persona no mester sigui e curso cu su mayornan a establecé. E por scoge un caminda diferente, unu influenciá dor di Jehova su leynan.—Ezekiel 18:2, 14, 17.

16. Pakico ta importante pa percurá pa bo famia, i kico esaki ta incluí?

¹⁶ Jehova ta spera pa mayornan cristian duna nan yunan guia i cuido apropiado. Pablo a skirbi: “Siguramente si cualkier hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe i ta pió cu un hende sin fe.” (1 Timoteo 5:8) Palabranan fuerte! Cumpliendo cu bo rol como un proveedor, locual ta incluí percurá p’e necesidadnan físico, spiritual, i emocional di bo yunan, ta un privilegio i responsabilidad di un persona piadoso. E Bijbel ta proveé principionan cu por yuda mayornan edificá un ambiente felis pa nan yunan. Considerá algun di esakinan.

17. Kico ta necesario pa bo yunan por tin Dios su ley den nan curason?

¹⁷ Pone un ehempel excelente. Mayornan israelita a haña e mandamentu: “Bo mester inculcá [Dios su palabranan] den bo yu i papia di nan ora bo ta sinta den bo cas i ora bo ta cana riba caminda i ora bo ta drumi i ora bo ta lanta.” Mayornan mester a siña Dios su normanan na nan yunan. Pero e spiertamentu aki a ser introducí cu e declaracion: “E palabranan aki cu mi ta mandando bo awe mester resultá di ta riba bo curason.” (Deuteronomio 6:6, 7) Sí, mayornan no por duna loke nan no tin. E leynan di Dios mester ta skirbí promé riba boso mes su curason si boso kier skirbi nan riba e curason di boso yunan.—Proverbionan 20:7; compará cu Lucas 6:40.

18. Con Jehova a pone un ehempel excelente pa mayornan den expresá amor?

¹⁸ Sigurá nan di bo amor pa nan. N’e bautismo di Jesus, Jehova a declará: “Abo ta mi Yu, esun stimá; mi a aprobá bo.” (Lucas 3:22) Asina Jehova a reconocé su Yu, expresando libremente cu el a aprob’é i dunando siguransa di Su amor p’e. Mas despues Jesus a bisa su Tata: “Bo a stimá mi promé cu e fundamentu dje mundu.” (Juan 17:24) Como mayornan piadoso, pues, duna bo yunan expresionnan verbal i físico di bo amor pa nan—i haci esaki hopi bes. Semper corda cu “amor ta edificá.”—1 Corintionan 8:1.

19, 20. Kico ta enbolbí den duna disiplina apropiado na yunan, i con mayornan por beneficiá di Jehova su ehempel?

¹⁹ Disiplina. E Bijbel ta enfatisá e importancia di disiplina amoroso. (Proverbionan 1:8) Mayornan cu awe ta evitá nan responsabilidad pa guia nan yunan lo enfrentá casi sigur consecuencianan penoso den futuro. Sin embargo, mayornan ta ser advertí tambe pa no bai te n’e otro extremo. “Boso, tatanan,” Pablo a skirbi, “no iritá boso yunan, pa nan no bira desanimá.” (Colosensenan 3:21) Mayornan mester evitá di coregí nan yunan di mas of constantemente ferfelá tocante nan faltanan i criticá nan esfuersonan.

²⁰ Jehova Dios, nos Tata celestial, ta pone e ehempel den duná disiplina. Su coreccion nunca ta di mas. “Lo mi tin cu castigá bo na e grado apropiado,” Dios a bisa su pueblo. (Jeremías 46:28) Mayornan mester imitá Jehova den e asuntu aki. Disiplina cu ta surpasá límitenan razonabel of cu ta bai mas ayá cu e propósito intencioná di coregí i siña siguramente ta iritante.

21. Con mayornan por determiná si nan disiplina ta eficas?

²¹ Con mayornan por determiná si nan disiplina ta eficas? Nan por puntra nan mes, ‘Kico mi disiplina ta logra?’ E mester siña e yu algu. Bo yu mester comprendé pakico e disiplina ta ser duná. Tambe mayornan mester preocupá tocante e efecto despues di nan coreccion. Ta cierto cu casi tur yu na principio ta ser iritá dor di disiplina. (Hebreonan 12:11) Pero disiplina nunca mester pone un yu sinti’é spantá of bandoná of dun’é e impresion cu e ta profundamente malbado. Promé cu el a coregí su pueblo, Jehova a bisa: “No tene miedu, . . . pasobra mi ta cu bo.” (Jeremías 46:28) Sí, coreccion mester ser aplicá di tal manera cu bo yu ta sinti cu boso ta cuné como mayornan amoroso i apoyador.

ADKIRIENDO “DIRECCION ABIL”

22, 23. Con bo por adkerí e direccion necesario pa edificá un famia felis?

²² Nos por ta gradecidu cu Jehova a percurá e hermentnan cu nos mester pa edificá un famia felis. Pero simplemente teniendo e hermentnan no ta basta. Nos mester practicá pa usa nan apropiadamente. Por ehempel, un constructor por desaroyá mal hábitonan den e manera cu e ta usa su hermentnan. Asta e por usa algun di nan di un forma robes. Bou di e circunstancianan aki, ta masha probabel cu su métodonan lo resultá den un producto inferior. Di manera similar, kisas bo ta na altura awor di hábitonan insaludabel cu a gatia drenta den bo famia. Algun dje hábitonan por ta fuertemente ancrá i duru pa cambia. Sin embargo, sigui e conseho dje Bijbel: “Un persona sabí lo tende i adkerí mas instruccion, i un homber di comprendimentu ta esun cu ta adkerí direccion ábil.”—Proverbionan 1:5.

²³ Bo por adkerí direccion ábil dor di sigui gana e conocimentu di Dios. Sea alerto na principionan bíblico cu ta aplicá na bida di famia, i haci ahustenan caminda ta necesario. Observá cristiannan maduro kendenan ta pone un ehempel excelente como casánan i como mayornan. Papia cu nan. Ariba tur cos, trece bo preocupacionnan dilanti Jehova den oracion. (Salmo 55:22; Filipensenan 4:6, 7) E por yudá bo disfrutá di un bida di famia felis cu ta onr’é.

[Nota]

TEST BO CONOCIMENTU

Con lealtad, comunicacion, onor, i respet ta contribuí na un matrimonio felis?

Den ki maneranan mayornan por sigurá nan yunan di nan amor?

Cua factornan ta enbolbí den disiplina apropiado?

[Plachi di henter página 147]