Yuda Otronan Cana di un Manera Digno di Jehova

“Nos . . . no a stop di haci oracion pa boso i di pidi pa boso por . . . cana di un manera digno di Jehova afin di agrad’é plenamente segun cu boso ta sigui producí fruta den tur bon obra.”—COLOSENSENAN 1:9, 10.

 1, 2. Kico specialmente por ta un fuente di goso i satisfaccion?

“NOS ta biba den un trailer riba un hacienda. Dor di tene nos bida simpel, nos tin mas tempu pa alcansá hende cu e bon nobo. Nos a ser bendicioná abundantemente cu e privilegio di yuda hopi otro hende dedicá nan bida na Jehova.”—Un pareha casá, ministernan di tempu completo na Sur África.

² Bo no ta di acuerdo cu tin goso den yuda otro hende? Tin hende cu regularmente ta purba yuda hende enfermo, solitario of den necesidad, i nan ta saca satisfaccion for di loke nan ta haci. Cristiannan berdadero tin sigur cu compartí conocimentu di Jehova Dios i Jesucristo cu otro hende ta e mihó yudansa cu nan por ofrecé. Ta esaki so por pone cu hende ta aceptá e rescate di Jesus, desaroyá un bon relacion cu Dios, i asina bini na remarke pa bida eterno.—Echonan 3:19-21; 13:48.

 3. Ki sorto di dunamentu di yudansa merecé nos atencion?

³ Sin embargo, kico di yuda otronan cu ya caba ta sirbi Dios, i cu ta sigui “E Caminda”? (Echonan 19:9) Sin duda, bo interes den nan ta mas grandi cu nunca, pero kisas bo no ta mira con bo por haci mas, of duna nan yudansa riba un base continuo. Of kisas ta parce cu bo situacion ta pone cu bo no por haci mashá pa yuda nan, limitando e satisfaccion cu lo bo por haña. (Echonan 20:35) E buki di Colosensenan ta siña nos tocante tur e dos aspectonan aki.

 4. (a) Bou di ki circunstancia Pablo a skirbi e colosensenan? (b) Kico Epafras tabatin di haber cu esaki?

⁴ Ora apostel Pablo a skirbi e cristiannan na Colósas e tabata na Roma bou di aresto di cas, pero e por a ricibí bishita. Manera lo bo a spera, Pablo a usa su libertad limitá pa predicá tocante e Reino di Dios. (Echonan 28:16-31) Pablo su compañeronan cristian por a bishit’é, i kisas algun di nan tabata asta prezu huntu cuné na algun ocasion. (Colosensenan 1:7, 8; 4:10) Unu di nan tabata Epafras, e evangelisadó celoso dje stad di Colósas na Frigia, n’e region di plateau cu ta keda oost di Efeso den Asia Menor (awe Turkia). Epafras a hunga un papel importante den forma un congregacion na Colósas, i el a traha duru p’e congregacionnan dje stadnan Laodicea i Hierápolis cu a keda den cercania. (Colosensenan 4:12, 13) Pakico Epafras a biaha bai bishitá Pablo na Roma, i kico nos por siña for di Pablo su reaccion?

Yudansa Eficas p’e Colosensenan

 5. Di con Pablo a skirbi e colosensenan?

⁵ Epafras a haci e biahe pisá pa Roma pa e por a consultá cu Pablo tocante e situacion dje congregacion di Colósas. El a informá tocante e fe, e amor i e esfuersonan pa evangelisá di e cristiannan ei. (Colosensenan 1:4-8) Sin embargo, tambe lo e mester a trece dilanti su preocupacion tocante e mal influencianan cu tabata peligrá e spiritualidad dje colosensenan. Pablo a respondé pa medio di un carta inspirá cu a contrarestá algun dje puntonan di bista cu maestronan falsu tabata plama. El a enfocá particularmente riba e papel central cu Jesucristo mester hunga.a Su yudansa a encerá únicamente cu el a enfatisá cierto berdadnan bíblico? Di ki otro manera e por a yuda e colosensenan, i ki les nos por saca tocante yuda otro hende?

 6. Na kico Pablo a duna énfasis den su carta n’e colosensenan?

⁶ Mas promé den su carta, Pablo a laga nos comprendé un forma di yudansa cu nos lo por pasa por alto. Tabata un manera eficas pa duna yudansa sin cu bo mester ta presente, pasobra Pablo i Epafras tabata leu for di Colósas. Pablo a afirmá: “Nos ta gradicí Dios e Tata di nos Señor Jesucristo semper ora nos ta haci oracion [nota na pia di página: “haciendo oracion semper”] pa boso.” Sí, a trata aki di oracionnan specífico na fabor dje cristiannan na Colósas. Pablo a agregá: “P’esei nos tambe, desde e dia cu nos a tende di dje, no a stop di haci oracion pa boso i di pidi pa boso por ser yená cu e conocimentu exacto di su boluntad den tur sabiduria i comprendimentu spiritual.”—Colosensenan 1:3, 9.

 7, 8. Hopi bes nos oracionnan personal i di congregacion ta toca cua tema?

⁷ Nos sa cu Jehova ta e “Tendedor di oracion,” i p’esei nos por confia cu e ta dispuesto di tende e oracionnan cu nos ta haci na armonia cu su boluntad. (Salmo 65:2; 86:6; Proverbionan 15:8, 29; 1 Juan 5:14) Pero ora nos ta haci oracionnan na fabor di otro hende, con nos ta hacié?

⁸ Por ta cu hopi bes nos ta pensa riba ‘henter e asociacion di rumannan den mundu,’ i ta haci oracion pa nan. (1 Pedro 5:9) Of kisas nos ta acercá Jehova tocante cristiannan i otronan den un region asotá dor di desaster of tragedia. Ora cu e disipelnan di promé siglo cu tabata biba otro caminda a tende di e hamber cu tabatin na Hudea, nan lo mester a haci masha hopi oracion pa nan rumannan asta promé cu nan a manda fondo di auxilio. (Echonan 11:27-30) Den nos tempu, na reunionnan cristian caminda un cantidad di hende mester comprendé pa por bisa “Amen,” hopi bes nos ta tende oracion tocante henter e hermandad, of tocante un grupo grandi di ruman.—1 Corintionan 14:16.

Sea Specífico den Oracion

 9, 10. (a) Ki ehempelnan ta mustra cu ta bon pa haci oracion tocante hende specífico? (b) Con oracion specífico a ser hací pa Pablo?

⁹ Sin embargo, Bijbel ta duna nos ehempel di oracionnan pa otro hende cu tabata mas specífico, pa hende individual. Pensa riba e comentario di Jesus registrá na Lucas 22:31 i 32. E tabata rondoná pa su 11 apostelnan. Nan tur lo tabatin mester di Dios su yudansa den e tempunan difícil nan dilanti, i Jesus a haci oracion pa nan. (Juan 17:9-14) Tog Jesus a duna atencion special na Pedro dor di haci un súplica specífico pa e disipel ei. Mas ehempel: Eliseo a resa pidi Dios su yudansa pa un homber specífico, su yudante. (2 Reynan 6:15-17) Apostel Juan a pidi pa Gayo sigui bon den sentido físico i spiritual. (3 Juan 1, 2) I otro oracionnan a enfocá riba gruponan specífico.—Job 42:7, 8; Lucas 6:28; Echonan 7:60; 1 Timoteo 2:1, 2.

¹⁰ Pablo su cartanan ta enfocá atencion riba e asuntu di haci oracion cu ta masha specífico. El a pidi pa haci oracion p’e, of pa e cu su asociadonan. Colosensenan 4:2 i 3 ta bisa: “Perseverá den oracion, kedando lantá den dje cu gradicimentu, n’e mésun tempu haciendo oracion tambe pa nos, pa Dios habri un porta di expresion pa nos, pa papia e secreto sagrado tocante e Cristo, pa cua, realmente, mi ta den cadena di prizon.” Considerá e otro ehempelnan aki tambe: Romanonan 15:30; 1 Tesalonicensenan 5:25; 2 Tesalonicensenan 3:1; Hebreonan 13:18.

11. Pa ken Epafras tabata haci oracion ora e tabata na Roma?

¹¹ Mescos tabata e caso cu Pablo su compañero na Roma. “Epafras, cu ta di entre boso, . . . ta manda su cumindamentu pa boso, semper haciendo su esfuerso pa boso den su oracionnan.” (Colosensenan 4:12) E palabra traducí como “haciendo esfuerso” por duna e idea di “lucha,” manera un atleta den e weganan di antigwedad. Pa ken Epafras tabata haci oracion ferviente? Gewoon pa tur creyente rond mundu of pa adoradónan berdadero den henter Asia Menor? Pablo a indicá cu Epafras tabata haci oracion specíficamente pa esnan na Colósas. Epafras tabata conocé nan situacion. Nos no conocé nan tur pa nomber, ni nos no sa cua ta e problemanan cu nan tabata confrontá, pero pensa riba algun posibilidad. Kisas Lino tabata lucha contra e influencia dje filosofianan cu tabata reina, i Rufo lo por tabatin mester di fortalesa pa resistí e atraccion di su prácticanan di ántes den hudaismo. Kisas Pérsis cu un esposo incrédulo, tabatin mester di awante i sabiduria pa cria su yunan den Señor, i Asíncrito cu tabata sufri di un malesa fatal, por tabatin mester di extra consuelo? Sí, Epafras tabata conocé e rumannan den su congregacion, i el a haci oracion pa nan cu fervor, pasobra tantu e como Pablo tabata kier pa e hendenan deboto ei a cana di un manera digno di Jehova.

12. Con nos por ta mas specífico den nos oracionnan privá?

¹² Bo ta mira algu cu nos por imitá, un manera pa nos yuda otro hende? Manera a bini padilanti, hopi bes oracionnan público na reunionnan cristian tin un caracter mas general, dor cu tin tur tipo di hende den e auditorio. Pero nos oracionnan personal i di famia por ta bastante specífico. Aunke tin bes cu nos ta pidi Dios p’e guia i bendicioná tur superintendente biahero of wardadónan spiritual, nos no por ta mas specífico algun bes? Por ehempel, pakico no usa nomber ora di pidi p’e superintendente di circuito cu ta bishitá bo congregacion, of p’e conductor di bo Studio di Buki di Congregacion? Filipensenan 2:25-28 i 1 Timoteo 5:23 ta mustra Pablo su interes pa e salú di Timoteo i Epafrodito individualmente. Nos tambe lo no por desplegá un interes asina den hende enfermo cu nos conocé pa nomber?

13. Ki tipo di situacionnan ta asuntunan cu ta apropiado pa nos mencioná den nos oracionnan privá?

¹³ Ta berdad cu nos mester evitá di mete den asuntu privá di otro hende, pero ta apropiado pa nos oracionnan manifestá interes genuino den hende cu nos ta conocé i stima. (1 Timoteo 5:13; 1 Pedro 4:15) Kisas un ruman homber a perde su trabou, i nos no por dun’é un otro. Pero nos por mencion’é pa nomber i enfocá riba su dificultad den nos oracionnan personal. (Salmo 37:25; Proverbionan 10:3) Nos sa di un ruman muher soltero cu a subi na edad sin casá i sin yu, dor cu e ta determiná pa casa “solamente den Señor”? (1 Corintionan 7:39) Ora bo ta haci oracion den privá, pakico no pidi Jehova bendicion’é i yud’é keda leal den su sirbishi? Un otro ehempel por ta esaki: Kisas dos anciano a duna conseho na un ruman homber cu a cometé un eror. Pakico tur dos no ta mencion’é pa nomber den nan oracionnan privá de bes en cuando?

14. Di ki manera oracionnan specífico tin di haber cu yuda otronan?

¹⁴ Tin un abundancia di hende cu bo por incluí den bo oracionnan personal; hende cu bo sa cu tin mester di Jehova su apoyo, consuelo, sabiduria i spiritu santu, of cualkier fruta di tal spiritu. Sea pa motibu cu bo ta leu for di nan, of pa cualkier otro motibu, kisas bo ta sinti cu no tin masha cos cu bo por yuda nan cuné den sentido material of directo. Pero no lubidá di haci oracion pa bo rumannan. Bo sa cu nan kier cana di un manera digno di Jehova, pero nan por tin ègt mester di yudansa pa nan sigui hacié pa semper. Bo oracionnan ta clave pa nan ricibí yudansa.—Salmo 18:2; 20:1, 2; 34:15; 46:1; 121:1-3.

Traha pa Fortalecé Otronan

15. Pakico nos mester ta interesá den e parti final di Colosensenan?

¹⁵ Claro cu oracion ferviente i specífico no ta e único manera pa yuda otronan, specialmente esnan cu ta cerca di bo i cu bo ta stima. E buki di Colosensenan ta mustra esei cla. Hopi erudito ta di opinion cu Pablo a djis agregá saludo i cumindamentu personal despues cu el a duna guia en cuanto doctrina i conseho práctico. (Colosensenan 4:7-18) Al contrario, nos a mira caba cu e parti final aki dje buki ta contené conseho digno di atencion, i tin mas cu nos por siña dje seccion aki.

16, 17. Kico nos por bisa tocante e rumannan mencioná na Colosensenan 4:10 i 11?

¹⁶ Pablo a skirbi: “Aristarco, mi compañero di prizon ta manda su cumindamentu pa boso i tambe Marco, primu di Barnabas, (tocante ken boso a ricibí mandamentu di ricibié cu gustu si un dia e yega cerca boso,) i Jesus cu ta ser yamá Justo, cu ta di esnan circuncidá. Esakinan so ta mi compañeronan di trabou p’e reino di Dios, i ta nan mes a bira un yudansa fortalecedor pa mi.”—Colosensenan 4:10, 11.

¹⁷ Ei Pablo a identificá cierto rumannan cu a merecé mencion special. El a bisa cu nan tabata di esnan circuncidá, esta, di antecedencia hudiu. Tabatin hopi hudiu circuncidá na Roma, i p’e tempu ei algun tabata cristian. Sin embargo, esnan cu Pablo a mencioná tabata esnan cu a yud’é. Probablemente nan no a duda pa asociá cu cristiannan di antecedencia gentil, i nan lo mester a predicá gososamente n’e gentilnan huntu cu Pablo.—Romanonan 11:13; Galationan 1:16; 2:11-14.

18. Con Pablo a encomendá algun di esnan cu tabata cuné?

¹⁸ Nota Pablo su comentario: “Ta nan mes a bira un yudansa fortalecedor pa mi.” El a usa un palabra griego cu ta aparecé esun biaha aki so den Bijbel. Hopi traductor ta traducié “consolá.” Pero tin un otro palabra griego (pa·ra·ka·lé·o) cu mas tantu ta ser traducí como “consolá” of “consuelo.” Pablo a us’é na otro camindanan den e mésun carta aki, pero no na Colosensenan 4:11.—Mateo 5:4; Echonan 4:36; 9:31; 2 Corintionan 1:4; Colosensenan 2:2; 4:8.

19, 20. (a) Kico e expresion cu Pablo a usa pa e rumannan cu a yud’é na Roma ta nificá? (b) Di ki manera e rumannan ei kisas a yuda Pablo?

¹⁹ Esnan cu Pablo a mencioná lo mester a haci mas cu duna consuelo cu boca. E expresion griego traducí “yudansa fortalecedor” na Colosensenan 4:11 tabata ser usá tin bes den textonan seglar pa referí na un remedi pa calma sufrimentu. E Bijbel New Life Version ta traducié: “Esta un yudansa nan tabata pa mi!” Today’s English Version ta usa e frase: “Nan tabata un gran yudansa pa mi.” Kico e rumannan cristian ei cu a biba cerca di caminda Pablo tabata, lo a haci pa yud’é?

²⁰ Pablo por a ricibí bishita, pero tabatin hopi cos cu e no por a haci, por ehempel cumpra su necesidadnan básico, cuminda i paña pa winter. Con lo e por a obtené rolnan p’e studia, of cumpra loke e tabatin mester pa skirbi? (2 Timoteo 4:13) Bo no por imaginá bo e rumannan aki yudando Pablo cu su necesidadnan, cu cosnan básico manera haci cómpras of rospondi p’e? Kisas e kier a wak con ta bai cu un cierto congregacion, i edifik’é. Como cu e tabata cerá e no por a hacié, pues podisé e rumannan ei a bishitá e congregacionnan pa Pablo, hiba mensahe, i trece informe bek. Esta fortalecedor!

21, 22. (a) Di con e palabranan na Colosensenan 4:11 lo mester interesá nos? (b) Cua ta algun manera cu nos por aplicá e ehempel di esnan cu tabata cu Pablo?

²¹ Loke Pablo a skirbi tocante ser “un yudansa fortalecedor” ta yuda nos comprendé con nos lo por yuda otronan. Kisas nan ta cana di un manera digno di Jehova pa loke ta su normanan moral, ta asistí na reunionnan cristian i ta participá den e trabou di predicá. Nan merecé nos palabranan di aprecio pa esei. Pero nos lo no por haci mas, i ser ‘yudansanan fortalecedor’ manera e rumannan cerca Pablo tabata?

²² Si bo conocé un ruman muher cu demostrando sabiduria a cumpli cu 1 Corintionan 7:37, pero cu awor ta sinti falta di un famia cercano, lo bo no por incluyé den algun actividad di famia, por ehempel invit’é pa come cu boso of asistí na un reunion chikitu di amigu i famia? Di con bo no ta invit’é pa biaha cu boso ora boso ta bai un congreso of cu vakansi? Of pidié p’e djoin boso na un ora cumbiniente ora boso ta bai cumpra cuminda. Por bisa mescos di biudo i biudanan, of kisas esnan cu no por stuur. Lo bo por haña cu ta recompensador pa tende nan experencianan of probechá di nan conocimentu tocante cosnan asina rutinario manera scoge bon fruta of paña pa mucha. (Levítico 19:32; Proverbionan 16:31) Un resultado natural di esei lo por ta cu boso ta bira mas íntimo cu otro, di manera cu nan lo por sinti nan mas liber pa pidi bo yudansa si nan tin mester di remedi di botica, of cos asina. E rumannan cu tabata cu Pablo na Roma lo mester a dun’é yudansa práctico, fortalecedor, mescos cu bo yudansa por ta. Un otro bendicion, tantu e tempu ei como awor, ta cu e lasonan di amor ta bira mas fuerte, i nos ta keda cu un determinacion firme pa sirbi Jehova lealmente huntu.

23. Lo ta bon pa nos cada un usa tempu pa haci kico?

²³ Cada un di nos por refleccioná tocante e situacionnan cu e artículo aki ta mencioná. Ta ehempel so nan ta, pero nan por corda nos di situacionnan real caminda nos por bira mas “un yudansa fortalecedor” pa nos rumannan. E idea no ta pa nos desaroyá e actitud cu hende humanitario tin. Esei no tabata e meta di e rumannan mencioná na Colosensenan 4:10 i 11. Nan tabata “compañeronan di trabou p’e reino di Dios.” E efecto fortalecedor tabatin di haber directamente cu esei. Laga ta mescos den nos caso.

24. Kico ta nos intencion ora nos ta haci oracion pa otronan i purba fortalecé nan?

²⁴ Ta pa e motibu aki nos ta mencioná otronan pa nomber den nos oracionnan privá i ta haci esfuerso pa fortalecé nan: Nos ta kere cu nos rumannan kier “cana di un manera digno di Jehova afin di agrad’é plenamente.” (Colosensenan 1:10) E echo ei ta conectá cu un otro cos cu Pablo a mencioná ora el a skirbi tocante e oracionnan di Epafras p’e colosensenan, pa nan por “para completo i cu conviccion firme den henter e boluntad di Dios.” (Colosensenan 4:12) Con nos personalmente por logra esei? Laga nos mira.

[Nota]

Bo A Tuma Nota?

• Con nos por yuda mas, mediante nos oracionnan privá?

• Den ki sentido algun cristian tabata un “yudansa fortalecedor” pa Pablo?

• Den ki tipo di situacionnan nos por ta un “yudansa fortalecedor”?

• Cu ki meta nos ta haci oracion pa nos rumannan i purba fortalecé nan?

[Plachi na página 18]

Bo por incluí un otro cristian ora bo famia ta sali?

[Rekonosementu]

Cortesia di Green Chimney’s Farm