Jehova Por Haci Bo Poderoso
COLOSAS
“E ta dunando poder na esun cansá; i esun sin energia dinámico e ta laga abundá den pleno potencia.”—ISAIAS 40:29.
JEHOVA ta un Dios “abundante den poder.” Nos por mira prueba di Dios su “poder eterno i Divinidad” den e magnificencia di su creacion físico. Esnan cu ta nenga di reconocé tal evidencia dje echo cu e ta Creador ta inexcusabel.—Salmo 147:5; Romano 1:19, 20.
2 Jehova su poder ta bira mas i mas evidente segun cu científiconan ta explorá profundamente den e universo, cu su galaxianan incontabel extendiendo pa cientos di miyones di aña di lus. Riba un anochi scur sin nubia, contemplá e cielu i mira si bo no ta sinti mescos cu e salmista a sinti: “Ora mi mira bo cielunan, e obranan di bo dedenan, e luna i e streanan cu bo a prepará, kico ta hende mortal pa bo ten’é na cuenta, i e yu di hende terenal pa bo percurá p’e?” (Salmo 8:3, 4) I ki bon Jehova a percurá pa hende, pa nos! El a proveé e promé homber i muher cu un bunita hogar terenal. Asta su tera tabatin poder—pa vegetacion crece, produciendo alimento nutritivo i incontaminá. Hende i bestia ta saca poder físico for dje manifestacion aki di Dios su poder.—Génesis 1:12; 4:12; 1 Samuel 28:22.
3 Ademas dje echo cu cielu ta fasinante i cu e tera su flora i fauna ta encantador, nan ta manifestá Dios su poder na nos. Apostel Pablo a skirbi: “Su cualidadnan invisibel ta ser mirá claramente desde e creacion di mundu padilanti, pasobra nan ta ser percibí dor dje cosnan creá, asta su poder eterno i Divinidad.” (Romano 1:20) Pero tin un evidencia mas di su poder cu ta merecé nos atencion i aprecio. Bo por puntra bo mes, ‘Kico ta manifestá Dios su poder asta mas cu e universo?’ E contesta ta Jesucristo. Realmente, bou di inspiracion apostel Pablo ta bisa cu Cristo clabá na staca ta “e poder di Dios i e sabiduria di Dios.” (1 Corintio 1:24) ‘Pakico esei ta asina?’ bo por puntra, ‘I ki relacion esei tin cu mi bida awor aki?’
Poder Manifestá Mediante Su Yu
4 Dios su poder a ser demostrá p’e promé bes ora el a crea su Yu unigénito, trahá den su imágen. E Yu spiritual aki a sirbi Jehova como un “obrero maestro” dor di a usa Dios su poder abundante den creacion di tur otro cos. (Proverbio 8:22, 30) Pablo a skirbi na su rumannan cristian na Colosas: “Pa medio di dje tur otro cos a ser creá den cielu i riba tera, e cosnan visibel i e cosnan invisibel . . . Tur otro cos a ser creá mediante dje i p’e.”—Colosense 1:15, 16.
5 Nos ta parti dje ‘cosnan creá riba tera.’ Pues Dios su poder por a ser extendé na nos como hende? Wel, atrabes di Dios su trato cu hende imperfecto, na cierto ocasionnan Jehova a duna poder adicional na su sirbidornan afin cu nan por a cumpli cu su propósitonan. Moises tabata sa cu, en general, hende imperfecto ta biba 70 of 80 aña. (Salmo 90:10) Kico di Moises mes? El a alcansá 120 aña di edad, tog “su wowo no a bira scur, i su forsa vital no a hui.” (Deuteronomio 34:7) Aunke esei no kier men cu Dios ta permití cada un di su sirbidornan biba asina largu of mantené un vigor asina, e ta proba sí cu Jehova por duna poder na hende.
6 Mustrando mas aleu Dios su abilidad pa duna poder na hende homber i muher ta loke el a haci cu esposa di Abraham. “Sara mes a ricibí poder pa concibí desendencia, asta ora el a pasa e límite di edad, siendo cu el a considerá fiel esun cu a primintí.” Of considerá con Dios a duna poder na huesnan i otronan den Israel: “Gideon, Barac, Sámson, Jefte, David i tambe Samuel i e otro profetanan, kendenan . . . for di un estado débil a ser hací poderoso.”—Hebreo 11:11, 32-34.
7 Tal poder por obra den nos caso tambe. Bon, awor aki kisas nos no ta spera desendiente mediante un milager, of kisas nos no ta manifestá poder manera esun di Sámson. Pero nos por ta poderoso sí, manera Pablo a mencioná na hende comun na Colosas. Sí, Pablo a skirbi na hende homber, muher i mucha, tal como esnan cu nos ta haña den congregacionnan awe, i el a bisa cu nan tabata “siendo hací poderoso cu tur poder.”—Colosense 1:11.
8 Durante Jesus su ministerio terenal, Jehova a mustra claramente cu su poder tabata obrando mediante su Yu. Por ehempel, na un ocasion ora multitud di hende a aglomerá rond di Jesus den Capernaum, “Jehova su poder tabata ei p’e haci curacion.”—Lucas 5:17.
9 Despues di su resureccion, Jesus a sigurá su siguidornan cu nan lo a ‘ricibí poder ora e spiritu santu a yega riba nan.’ (Echo 1:8) Ki cierto esaki tabata! Un historiador ta informá riba e desaroyonan algun dia despues di Pentecoste na 33 E.C.: “Cu gran poder e apostelnan a sigui duna testimonio tocante e resureccion dje Señor Jesus.” (Echo 4:33) Pablo mes tabata un cu a ser hací poderoso p’e trabou cu Dios a comision’é p’e haci. Despues di su combertimentu i recuperacion di bista, el “a sigui gana mas poder i tabata confundí e hudiunan cu a biba den Damasco segun cu el a proba lógicamente cu esaki ta e Cristo.”—Echo 9:22.
10 Pablo siguramente tabatin mester di poder adicional, ora nos considerá e resistencia spiritual i mental necesario pa efectuá tres biahe misional cubriendo miles di kilometer. Tambe el a wanta tur sorto di dificultad, soportando encarcelacion i enfrentando morto como mártir. Con el a haci esaki? El a contestá: “E Señor a para cerca mi i a inyectá mi cu poder, pa mediante mi e predicacion por ta plenamente cumplí.”—2 Timoteo 4:6-8, 17; 2 Corintio 11:23-27.
11 No ta sorprendente, anto, cu ora Pablo a skirbi su “rumannan den union cu Cristo” na Colosas, el a sigurá nan cu nan por a ser “hací poderoso cu tur poder te n’e alcanse di [Jehova] su glorioso potencia pa boso wanta plenamente i pa boso tin gran pacenshi cu goso.” (Colosense 1:2, 11) Aunke e palabranan ei tabata dirigí principalmente na cristiannan ungí, tur esnan cu ta sigui den e pasonan di Cristo por saca hopi beneficio for di loke Pablo a skirbi.
Hací Poderoso na Colosas
12 E congregacion na Colosas, situá den e provincia romano di Asia, probablemente a ser formá dor di e predicacion dje fiel cristian yamá Epafras. Ta parce cu ora el a tende di Pablo su encarcelacion na Roma rond di 58 E.C., Epafras a determiná pa bishitá e apostel i anim’é cu un informe excelente dje amor i constancia di su rumannan na Colosas. Epafras probablemente tambe a duna un informe verídico tocante algun problema den e congregacion colosense cu tabatin mester di coreccion. En buelta, Pablo a sinti e urgencia pa skirbi e congregacion un carta di animacion i spiertamentu. Bo tambe por saca bastante animacion for di capítulo 1 dje carta ei, pasobra e ta tira lus riba con Jehova por haci su sirbidornan poderoso.
13 Bo por imaginá con e rumannan na Colosas mester a sinti ora Pablo a describí nan como “rumannan fiel den union cu Cristo.” Nan a merecé di ser encomendá pa nan ‘amor pa tur e santunan’ i pa nan ‘dunamentu di fruta dje bon nobo’ cuminsando for dje tempu cu nan a bira cristian! E mésun expresionnan aki ta conta pa nos congregacion, pa nos individualmente?—Colosense 1:2-8.
14 Pablo tabata asina conmoví dor dje informe cu el a ricibí cu el a bisa e colosensenan cu e no a stop di resa pa nan i pidi pa nan ser ‘yená cu e conocimentu exacto di [Dios] su boluntad den tur sabiduria i comprension spiritual, afin cu nan por cana di un manera digno di Jehova.’ El a resa pa nan ‘sigui duna fruta den tur bon obra i aumentá den e conocimentu exacto di Dios, siendo hací poderoso cu tur poder te n’e alcanse di su glorioso potencia pa nan wanta plenamente i pa nan tin gran pacenshi cu goso.’—Colosense 1:9-11.
Hací Poderoso Awe Tambe
15 Ki un ehempel excelente Pablo a pone pa nos! Nos rumannan rond mundu tin necesidad di nos oracionnan pa nan wanta i mantené nan goso apesar di nan sufrimentunan. Mescos cu Pablo, nos mester ta specífico den nos oracionnan ora nos haña noticia cu rumannan di un otro congregacion, of otro pais, ta pasando tempunan difícil. Talbes un congregacion den cercania ta ser afectá dor di un desaster natural of un dificultad spiritual. Of talbes cristiannan ta mustrando awante den un pais cu ta sufri di guera civil of matansanan entre individuonan di diferente tribu. Den oracion nos mester pidi Dios yuda nos rumannan “cana di un manera digno di Jehova,” pa sigui duna fruta di Reino miéntras nan ta mustrando awante, i pa aumentá den conocimentu. Den e manera aki sirbidornan di Dios ta ricibí e poder di su spiritu, “siendo hací poderoso cu tur poder.” Bo por ta sigur cu bo Tata lo tende i lo respondé.—1 Juan 5:14, 15.
16 Pablo a skirbi cu e colosensenan mester a ‘gradicí e Tata kende a haci nan apto pa participá den e herencia dje santunan den e lus.’ Laga nos tambe gradicí nos Tata celestial pa nos lugá den su areglo, sea den e region celestial of esun terenal di su Reino. Con Dios a haci hende imperfecto apto desde su bista? Pablo a skirbi su rumannan ungí: “El a libra nos for di e autoridad dje scuridad i a transferí nos den e reino dje Yu di su amor, pa medio di ken nos tin nos liberacion mediante rescate, e pordon di nos picánan.”—Colosense 1:12-14.
17 Sea cual sea nos speransa, celestial of terenal, nos ta gradicí Dios diariamente pa nos liberacion for dje sistema malbado di scuridad aki, lográ mediante nos fe den e provision precioso dje sacrificio di rescate di Jehova su Yu stimá. (Mateo 20:28) Cristiannan ungí cu spiritu a beneficiá dje rescate cu a ser aplicá na nan den un manera special di manera cu nan por ser ‘transferí den e reino dje Yu di Dios su amor.’ (Lucas 22:20, 29, 30) Pero e “otro carnénan” tambe ta beneficiá dje rescate asta awor aki. (Juan 10:16) Nan por ricibí Dios su pordon di manera cu nan tin un posicion hustu dilanti dje como su amigunan. Nan tin un participacion grandi den proclamá “e bon nobo aki di reino” den e tempu di fin aki. (Mateo 24:14) Ademas di esei, nan tin e maraviyoso speransa di bira completamente hustu i físicamente perfecto, pa fin dje Reinado di Mil Aña di Cristo. Segun cu bo ta lesa e descripcion na Revelacion 7:13-17, mira si bo no ta di acuerdo cu esaki lo ta prueba cu bo a ser librá i bendicioná.
18 Pablo su carta ta yuda nos realisá cuantu nos debe n’e homber mas grandi cu a yega di biba. Kico Dios tabata logrando mediante Cristo? “[Esei tabata] pa reconciliá atrobe cu su mes tur otro cos dor di haci pas mediante e sanger cu el a drama riba e staca di tormento, sin importá cu nan ta e cosnan riba tera of e cosnan den cielu.” Dios su propósito ta pa trece tur creacion bek den armonia completo cuné, manera esei tabata promé cu e rebelion den Eden. E Persona cu a ser usá pa crea tur cos ta e mésun Persona cu awor ta ser usá pa logra e reconciliacion aki.—Colosense 1:20.
Hací Poderoso pa Ki Propósito?
19 Responsabilidad ta bini pa nos cu ta reconciliá cu Dios. Un tempu nos tabata pecaminoso i alehá for di Dios. Pero awor, despues di a pone fe den e sacrificio di Jesus i cu nos mente no mas riba obranan cu ta malu, básicamente nos ta den un condicion “santu i sin mancha, i no exponí na ningun acusacion dilanti [Dios].” (Colosense 1:21, 22) Imaginá bo, mescos cu Dios no tabatin bergwensa di e fiel testigonan ei di pasado, asina e no tin bergwensa di nos, pa ser inbocá como nos Dios. (Hebreo 11:16) Awe, ningun hende por acusá nos cu nos ta carga su nomber ilustre ilegítimamente, ni cu nos tin miedu di declará e nomber ei na tur parti dje tera!
20 Tog nota e advertencia cu Pablo a agregá na Colosense 1:23: “Con tal, naturalmente, cu boso continuá den e fe, establecí riba e fundeshi i constante i no siendo alehá for dje speransa dje bon nobo ei cu boso a tende, i cu a ser predicá den tur creacion cu ta bou di cielu.” Asina tantu ta dependé riba nos kedamentu fiel na Jehova, siguiendo den e pasonan di su Yu stimá. Jehova i Jesus a haci asina tantu pa nos! Laga nos mustra nos amor pa nan dor di sigui Pablo su conseho.
21 E cristiannan colosense lo mester tabata emocioná pa tende cu ‘e bon nobo cu nan a tende’ ya caba a ser “predicá den tur creacion cu ta bou di cielu.” Awe ta asta mas excitante pa tende te na ki alcanse e bon nobo di Reino ta ser proclamá dor di mas cu cuater miyon i mei Testigo den mas cu 230 pais. Wel, cada aña casi 300.000 persona di tur nacion ta reconciliando nan mes cu Dios!—Mateo 24:14; 28:19, 20.
22 Aunke Pablo aparentemente tabata encarcelá n’e tempu cu el a skirbi e carta n’e colosensenan, e no a lamentá su suerte di ningun manera. Mas bien, el a bisa: “Mi ta alegrá awor den mi sufrimentunan pa boso.” Pablo tabata sa kico a nificá ‘pa wanta plenamente i tene gran pacenshi cu goso.’ (Colosense 1:11, 24) Pero e tabata sa cu e no a haci esaki riba su mes forsa. Jehova a haci’é poderoso! Ta mescos awe. Miles di Testigo cu a ser encarcelá i persiguí no a perde nan goso den sirbi Jehova. Mas bien, nan a yega na apreciá e berdad dje palabranan di Dios manera nos por haña na Isaías 40:29-31: “E ta dunando poder na esun cansá . . . Esnan cu ta sperando den Jehova lo recobrá poder.”
23 E ministerio dje bon nobo cu ta centralisá riba Cristo tabata masha importante pa Pablo. E tabata kier pa otronan apreciá e balor dje papel di Cristo den e propósito di Dios, pues el a describi’é como “e secreto sagrado cu tabata scondí for dje sistemanan di cosnan di pasado i for dje generacionnan di pasado.” Pero e no mester a keda un secreto pa semper. Pablo a agregá: “Awor el a ser manifestá na su santunan.” (Colosense 1:26) Ora rebelion a cuminsá den Eden, Jehova a duna un promesa di mihó cosnan pa bini, profetisando cu ‘e simia dje muher lo machicá cabes dje colebra.’ (Génesis 3:15) Kico esaki a nificá? Pa generacionnan, pa siglonan largu, el a keda un misterio. Anto Jesus a bini, i el a “tira lus riba bida i incorupcion mediante e bon nobo.”—2 Timoteo 1:10.
24 Sí, e “secreto sagrado” ta centralisá rond di Cristo i e Reino Mesiánico. Pablo a mencioná “e cosnan den cielu,” refiriendo na esnan cu lo participá den e gobernacion di Reino cu Cristo. Esakinan lo sirbi pa trece bendicionnan incontabel na tur e “cosnan riba tera,” esnan cu lo disfrutá di un paradijs eterno aki. Bo por mira cu tabata masha apropiado anto, pa Pablo referí na “e rikesanan glorioso dje secreto sagrado aki.”—Colosense 1:20, 27.
25 Pablo a spera ansiosamente riba su lugá den e Reino. Sin embargo, el a realisá cu esei no tabata algu pa cua e por a simplemente spera sin haci nada. “En berdad mi ta trahando duru, forsando mi mes di acuerdo cu e funcionamentu di dje i cu ta obra den mi cu poder.” (Colosense 1:29) Nota cu Jehova, mediante Cristo, a haci Pablo poderoso p’e por a cumpli cu un ministerio salbador di bida. Jehova por haci mescos pa nos awe. Pero nos mester puntra nos mes, ‘Mi tin e spiritu di evangelisá cu mi tabatin na principio ora mi a siña e berdad?’ Kico ta bo contesta? Kico por yuda cada un di nos pa sigui ‘traha duru i forsa nos mes di acuerdo cu e funcionamentu di Jehova su poder’? E siguiente artículo ta considerá netamente e punto aki.
[Study Questions]
1, 2. Cua ta algun evidencia di Jehova su poder abundante?
3. Ademas dje cosnan físico dje universo, kico mas ta manifestá Dios su poder?
4. Con Dios su poder a ser demostrá en coneccion cu su Yu?
5-7. (a) Den pasado, con sernan humano a ser enbolbí den manifestacionnan di Dios su poder? (b) Ki motibu tin pa kere cu Dios su poder por ser manifestá den e caso di cristiannan awe?
8, 9. Den e promé siglo, con Jehova su poder a ser hací bisto en coneccion cu sernan humano manera nos?
10. Con poder for di Dios tabata di gran yudansa den Pablo su caso?
11. Relacioná cu Dios su poder, Pablo a referí na ki speransa pa su co-sirbidornan na Colosas?
12, 13. Kico ta e marco di circunstancia dje carta n’e colosensenan, i kico probablemente tabata e reaccion riba dje?
14. Kico tabata Pablo su deseo relacioná cu e colosensenan?
15. Con nos por manifestá e mésun actitud manera a ser reflehá den loke Pablo a skirbi n’e colosensenan?
16, 17. (a) Manera Pablo a skirbi, pa kico nos mester ta gradicidu? (b) Den ki sentido e pueblo di Dios a ser librá i pordoná?
18. Ki reconciliacion mencioná den Colosense Dios ta logrando ainda?
19, 20. Riba kico nos condicion santu i sin mancha ta dependé?
21. Pakico nos tin gran motibu pa ta emocioná awe?
22. Asta si nos experenciá sufrimentu, kico Dios por haci pa nos?
23, 24. Kico ta e secreto sagrado mencioná na Colosense 1:26?
25. Manera ta ser indicá na Colosense 1:29, kico mester ta nos actitud awor?
[Caption on page 13]
Bo A Tuma Nota?
◻ Pakico nos por ta sigur cu Jehova por manifestá su poder na fabor di sernan humano?
◻ Kico ta e marco di circunstancia di Pablo su palabranan den Colosense capítulo 1?
◻ Con Dios ta efectuando e reconciliacion mencioná na Colosense 1:20?
◻ Usando su poder, kico Jehova por logra mediante nos?