Uni̇́ Den E Laso Perfecto Di Amor

“Sea armoniosamente uní den amor.”​—⁠COLOSENSE 2:⁠2.

SCUCHA! Un bos duru resonando den henter cielu bisando: “Ai dje tera i dje laman, pasobra e Diabel a baha cerca boso, teniendo gran rabia, sabiendo cu e tin un periodo corticu di tempu.” (Revelacion 12:12) Cu pasamentu di cada aña, e mensahe ei ta bira mas i mas menasante p’e habitantenan dje tera.

² Jehova su gran adversario ta conocí pa hopi tempu como un resistidor (Satanas) i un calumniador (Diabel). Pero e gañador aki ta hungando awor un otro papel malicioso​—⁠el a bira un dios rabiá! Pakico? Pasobra el a ser expulsá for di cielu dor di Miguel i su angelnan den e guera cu a cuminsá den cielu na 1914. (Revelacion 12:​7-9) E Diabel sa cu e tin solamente un tempu corticu pa proba su desafio di cu e por apartá tur hende for di adorá Dios. (Job 1:11; 2:​4, 5) Sin un manera di scapa, Satanas i su demoñonan ta manera un ‘zwerm’ di abeha rabiá cu ta baha nan rabia riba e masanan inkieto di humanidad.​—⁠Isaías 57:⁠20.

³ E sucesonan aki, invisibel pa wowo humano, ta splica pakico tin awor un colapso moral general den humanidad. Tambe nan ta splica hende su esfuerso frenético pa lapi e fragmentacion di nacionnan cu simplemente no por biba den armonia cu otro. Gruponan di tribu i étnico ta atacá otro ferosmente, resultando den miyones di hende sin cas i desplasá. Nada straño cu maldad ta aumentando na un escala sin precedente! Manera Jesus a pronosticá, ‘amor di mayor parti di humanidad ta friando.’ Tur caminda cu bo mira, falta di armonia i di amor ta marca humanidad inkieto awe.​—⁠Mateo 24:⁠12.

⁴ En bista dje situacion di mundu, Jesus su oracion pa su siguidornan ta haña un nificacion mas profundo: “Mi ta pidí bo, pa no saca nan for dje mundu, sino pa vigilá riba nan pa causa di e malbado. Nan no ta parti dje mundu, mescos cu ami no ta parti dje mundu.” (Juan 17:​15, 16) Awe, “e malbado” ta baha su rabia specialmente riba esnan “cu ta warda e mandamentunan di Dios i cu tin e trabou di duna testimonio di Jesus.” (Revelacion 12:17) Si no tabata pa Jehova su percuracion vigilante i amoroso, su fiel Testigonan lo a ser eliminá. Nos bida ta dependé di cu si nos ta probechá di tur e provisionnan cu Dios ta haci pa nos siguridad i bienestar spiritual. Esei ta enbolbé nos hacimentu di esfuerso na armonia cu e funcionamentu di Su poder mediante Cristo, manera e apostel a urgi na Colosense 1:⁠29.

⁵ Aunke Pablo probablemente nunca a topa su rumannan na Colosas cara-cara, el a stima nan. El a bisa nan: ‘Mi ta deseá cu boso por a comprendé con profundo mi ansiedad pa boso ta.” (Colosense 2:​1, The New Testament in Modern English, di J. B. Phillips) Siendo cu Jesus su siguidornan no ta parti dje mundu, “e malbado” lo sigui purba kibra e unidad dje rumannan dor di sembra entre nan e spiritu dje mundu. E noticianan cu Epafras a trece for di Colosas a indicá cu esaki tabata tumando lugá na un cierto grado.

⁶ Un di Pablo su interesnan principal pa su rumannan cristian por ser resumí den e palabranan: “Sea armoniosamente uní den amor.” Su palabranan tin nificacion special awe, den un mundu yen di desunion i falta di amor. Si nos tuma Pablo su conseho na pechu, nos lo disfrutá di Jehova su cuido. Tambe nos lo experenciá e poder di su spiritu den nos bida, yudando nos pa resistí e presionnan dje mundu. Ki sabí e conseho aki ta! Pues, Colosense 2:2 lo ta nos texto di aña pa 1995.

⁷ Den un carta anterior n’e corintionan, e apostel a usa e curpa humano como un ilustracion. El a skirbi cu “no mester tin division” den e congregacion di cristiannan ungí sino cu “su miembronan mester tin e mésun cuido un pa otro.” (1 Corintio 12:​12, 24, 25) Ki un ilustracion maraviyoso! Nos miembronan di curpa ta interdependiente, cada un uní cu e resto di nos curpa. Mésun principio ta aplicá na nos asociacion mundial di rumannan, formá dor di esnan ungí i miyones di persona cu ta spera di biba den un paradijs riba tera. Nos no mester separá nos mes for dje curpa di compañénan cristian pa biba independientemente! Funcionando mediante Cristo Jesus, Dios su spiritu ta bini na nos na un gran midí mediante nos asociacion cu nos rumannan.

Armonia Ta Conectá cu Conocimentu

⁸ Un di Pablo su puntonan clave tabata cu armonia cristian ta conectá cu conocimentu, particularmente esun tocante Cristo. Pablo a skirbi cu cristiannan mester ta “armoniosamente uní den amor i afin di alcansá tur e rikesanan dje pleno siguransa di nan comprendimentu, afin di alcansá un conocimentu exacto dje secreto sagrado di Dios, esta, Cristo.” (Colosense 2:⁠2) Nos a gana conocimentu​—⁠echonan​—⁠desde cu nos a cuminsá studia e Palabra di Dios. Como parti di gana un comprendimentu dje manera cu hopi dje echonan aki ta cuadra den e propósito di Dios, nos ta mira e papel crucial di Jesus. “Cuidadosamente scondí den dje ta tur e tesoronan di sabiduria i di conocimentu.”​—⁠Colosense 2:⁠3.

⁹ Ta asina abo ta sinti tocante Jesus i su papel den Dios su propósito? Hopi hende den cristiandad ta cla pa mencioná Jesus, afirmando cu nan a acept’é i a ser salbá. Pero nan realmente conoc’é? Apénas, pasobra mayoria ta kere den e doctrina anti-bíblico di Trinidad. Abo no solamente conocé e berdad relacioná cu esaki pero probablemente bo tin tambe un conocimentu amplio di loke Jesus a bisa i a haci. Miyones di hende a ser yudá den esaki dor di un studio informativo usando e buki E homber mas importante cu hamás a biba. Sin embargo, nos tin cu sigui profundisá nos conocimentu di Jesus i su camindanan.

¹⁰ E declaracion cu “tur e tesoronan di sabiduria i di conocimentu” ta “cuidadosamente scondí” den Jesus no ta nificá cu tal conocimentu ta fuera di nos gara. Mas bien, e por ser compará cu un mina habrí. Nos no tin cu busca rond den un área inmenso puntrando nos mes unda pa cuminsá coba. Nos sa caba​—⁠berdadero conocimentu ta cuminsá cu loke Bijbel ta revelá tocante Jesucristo. Segun cu nos ta comprendé mas plenamente Jesus su papel den e logramentu di Jehova su propósito, nos ta obtené e tesoronan di berdadero sabiduria i di conocimentu exacto. Pues loke nos mester haci ta coba cada bes mas profundo, sacando mas dje stenchinan of cosnan precioso disponibel for dje fuente aki unda nos a coba caba.​—⁠Proverbio 2:​1-5.

¹¹ Por ehempel, kisas nos sa cu Jesus a laba pia di su apostelnan. (Juan 13:​1-20) Pero, nos a meditá riba e les cu e tabata siñando i e actitud cu el a manifestá? Haciendo esei, nos por saca un tesoro di sabiduria cu ta permití nos​—⁠sí, impulsá nos​—⁠pa cambia e manera cu nos ta trata cu un ruman homber of muher kende su personalidad pa hopi tempu a iritá nos. Of ora nos ricibí un asignacion cu nos no gusta mashá, nos por respondé di un manera diferente una bes nos comprendé e pleno nificacion di Juan 13:​14, 15. Dje manera ei e conocimentu i sabiduria ta afectá nos. Kico por ta e efecto riba otronan segun cu nos ta imitá Cristo su ehempel mas plenamente na armonia cu un mayor conocimentu di dje? Probablemente e tou lo ‘ta mas armoniosamente uní den amor.’a

Distraicion Por Daña Armonia

¹² Si conocimentu exacto ta facilitá cu nos ‘ta armoniosamente uní den amor,’ kico ta resultá for di loke ta ser “yamá falsamente ‘conocimentu’ ”? Net lo contrario​—⁠controversia, desacuerdo i desviacion for dje fe. Pues nos mester vigilá contra tal conocimentu falsu, manera Pablo a spierta Timoteo. (1 Timoteo 6:​20, 21) Tambe Pablo a skirbi: “Mi ta bisa esaki pa ningun hende gaña boso cu argumentonan persuasivo. Tene cuidou: kisas por tin un hende cu lo hiba boso como su víctima mediante filosofia i engaño bano segun e tradicion di hende, segun e cosnan elementario dje mundu i no segun Cristo.”​—⁠Colosense 2:​4, 8.

¹³ E cristiannan colosense tabata rondoná dor dje influencia peligroso di loke en realidad tabata yamá falsamente conocimentu. Hopi hende den i cerca di Colosas tabatin gran aprecio pa filosofia griego. Tambe tabatin e hudaistanan cu tabata kier p’e cristiannan warda e Ley di Moises, manera su festivalnan i rekisitonan di alimento. (Colosense 2:​11, 16, 17) Pablo no tabata contra pa su rumannan gana berdadero conocimentu, pero nan mester a tene cuidou pa ningun hende hiba nan como víctima, usando argumentonan persuasivo pa convencé nan pa asumí un simpel punto di bista humano riba bida i accionnan. Bo por comprendé cu si algun ruman den e congregacion laga nan pensamentu i decisionnan ser guiá dor di tal conceptonan i actitudnan no-bíblico pa cu bida, esei lo stroba armonia i amor entre e miembronan di congregacion.

¹⁴ ‘Sí,’ bo por pensa, ‘mi ta mira e peliger cu e colosensenan a enfrentá, pero ami no ta core rísico di ser influenciá dor di conceptonan griego, manera esun di un alma inmortal of un dios trinitario; tampoco mi ta mira ningun peliger di ser tentá dor dje dianan di fiesta pagano di religion falsu for di cua mi a scapa.’ Excelente. Ta bon pa keda firmemente convencí tocante e superioridad dje berdad simpel revelá mediante Jesus i cu ta disponibel den e Scritura. Sin embargo, por ta cu nos ta core rísico cu otro filosofianan of puntonan di bista humano prevalente awe?

¹⁵ Un actitud asina ta existí pa hopi tempu caba: “Awor unda e promesa di su binimentu ta? Nos tatanan a bai sosegá, pero ainda tur cos ta sigui exactamente manera e tabata semper.” (2 Pedro 3:​4, The New English Bible) E sintimentu ei por ser expresá cu otro palabra, pero e punto di bista ta mescos. Por ehempel, un persona por razoná, ‘Na principio ora mi a siña e berdad décadanan pasá, e fin tabata “djis tras di porta.” Pero ainda e no a yega, i ken sa ki dia lo e bini?’ Ta cierto cu ningun hende sa ki dia e fin lo yega. Sin embargo, nota e punto di bista cu Jesus a urgi nos pa tin: “Sigui vigilá, keda lantá, pasobra boso no sa ki ora e tempu señalá ta.”​—⁠Marco 13:​32, 33.

¹⁶ Ki peligroso lo ta pa adoptá e punto di bista cu dor cu nos no sa ki dia e fin lo bini, nos mester planea pa un bida completo i “normal!” E actitud ei por ser reflehá den e razonamentu, ‘Mi por wel dal e pasonan cu lo permití ami (of mi yunan) haña un carera respetabel cu ta paga hopi bon i cu lo permití mi disfrutá di un bida cómodo. Naturalmente, lo mi asistí na reunionnan cristian i participá un poco den e trabou di predicacion, pero no tin motibu pa mi forsa mi mes of haci sacrificionan grandi.’​—⁠Mateo 24:​38-42.

¹⁷ Sin embargo, nos no por nenga cu Jesus i su apostelnan a recomendá pa nos biba cu un sentido di urgencia pa predicá e bon nobo, pa forsa nos mes i pa ser dispuesto pa haci sacrificionan. Pablo a skirbi: “Mi ta bisa esaki, rumannan, e tempu cu a keda ta reducí. Di awor padilanti, laga esnan cu tin esposa haci como si nan no tin, . . . i esnan cu ta cumpra como esnan cu no tin propiedad, i esnan cu ta haci uso dje mundu como esnan cu no ta us’é plenamente; pasobra e esena dje mundu aki ta cambiando.”​—⁠1 Corintio 7:​29-31; Lucas 13:​23, 24; Filipense 3:​13-15; Colosense 1:29; 1 Timoteo 4:10; 2 Timoteo 2:4; Revelacion 22:⁠20.

¹⁸ Leu di sugerí pa nos pone un bida cómodo como nos meta, Pablo a skirbi bou di inspiracion: “Nos no a trece nada na mundu, ni tampoco nos no por hiba nada cu nos. Pues, teniendo sosten i bistí, nos lo keda contentu cu e cosnan aki. . . . Lucha e lucha excelente di fe, haña un gara firme riba e bida eterno pa cua bo a ser yamá i a ofrecé e excelente declaracion público dilanti hopi testigo.”​—⁠1 Timoteo 6:​7-12.

¹⁹ Ora un congregacion ta consistí di cristiannan celoso cu ta forsa intensivamente pa ‘ofrecé un excelente declaracion público,’ armonia ta un resultado natural. Nan no ta entregá n’e actitud, ‘Bo tin hopi cos bon wardá pa hopi aña; bai trankil, come, bebe, gosa di bida.’ (Lucas 12:19) Mas bien, nan ta uní den e mésun esfuerso, dispuesto pa haci sacrificio pa tin un participacion mas completo posibel den e trabou aki cu nunca mas lo ser ripití.​—⁠Compará cu Filipense 1:​27, 28.

Cauteloso Tocante Argumentonan Persuasivo

²⁰ Naturalmente, tin otro maneranan den cua cristiannan por ser ‘engañá cu argumentonan persuasivo’ of engañonan bano cu ta stroba pa nos ‘ta armoniosamente uní den amor.’ E oficina di sucursal di Watch Tower Society na Alemania a skirbi: “Un caso a hiba na controversia, cu publicadornan i asta ancianonan apoyando diferente banda den argumentonan relacioná cu e clasenan di terapia cu un cierto ruman ta usa.” Nan a agregá: “Debí n’e variedad amplio di métodonan cu ta ser usá i e gran cantidad di pashent, esaki ta un asuntu controversial i, si e métodonan terapéutico tin elementonan spiritista, e por ta peligroso tambe.”​—⁠Efesio 6:⁠12.

²¹ Cristiannan kier keda bibu i saludabel pa nan por adorá Dios. No obstante, den e sistema aki nos ta sometí na behes i enfermedad cu ta bini di imperfeccion. En bes di enfatisá asuntunan di salú, nos tin cu concentrá riba e berdadero solucion, pa nos i pa otronan. (1 Timoteo 4:16) Cristo ta e punto focal dje solucion ei, mescos cu e tabata e foco di Pablo su conseho n’e colosensenan. Pero corda, Pablo a indicá cu algun por bini cu “argumentonan persuasivo” kitando nos atencion for di Cristo, talbes hiband’e den direccion di métodonan di diagnosticá malesa, tratamentunan, of dietanan.​—⁠Colosense 2:​2-4.

²² Hende rond mundu ta ser inundá cu propaganda i experencianan personal tocante tur sorto di tratamentu i medionan di diagnosticá malesa. Algun di eseinan ta ser usá i reconocé ampliamente; otronan ta ser criticá ampliamente of ta sometí na sospecho.b Cada persona ta responsabel pa determiná loke lo e haci en cuanto su salú. Pero esnan cu ta aceptá Pablo su conseho hañá na Colosense 2:​4, 8 lo haña proteccion contra engaño dor di “argumentonan persuasivo” of “engaño bano” cu ta desviá hopi persona cu, faltando e speransa di Reino, ta desesperá pa alivio. Asta si un cristian ta convencí cu un cierto tratamentu ta parce bon p’e, e no mester promové esaki den e hermandad cristian, pasobra esei por bira un tópico di discusion i controversia amplio. Asina e por manifestá cu e ta respetá altamente e importancia di armonia den e congregacion.

²³ Apostel Pablo a enfatisá cu armonia cristian ta un base pa berdadero goso. Den su tempu e cantidad di congregacion tabata siguramente mas chikitu cu awe. Sin embargo, e por a skirbi n’e colosensenan: “Aunke mi ta ausente den carni, tog mi ta cu boso den spiritu, alegrando i contemplando boso bon ordu i e firmesa di boso fe pa cu Cristo.” (Colosense 2:⁠5; mira tambe Colosense 3:14.) Cuantu mas grandi nos causa di goso ta! Nos por mira berdadero evidencia di armonia, bon ordu i firmesa di fe den nos mes congregacion, cua ta reflehá e situacion general di Dios su pueblo rond mundu. Pues den e tempu corticu cu ta keda den e sistema actual, laga cada un di nos ta determiná pa “sea armoniosamente uní den amor.”

[Footnotes]

[Study Questions]

1, 2. Ki influencia cu ta dividí ta ser sintí specialmente awe?

3. Kico ta e efecto dje echo cu Satanas a ser degradá den nos tempu?

4. Pakico Dios su pueblo ta den peliger special?

5, 6. Con apostel Pablo a sinti pa cu e cristiannan colosense, i pakico e texto di aña pa 1995 ta apropiado?

7. Ki armonia mester ser hañá entre cristiannan berdadero?

8, 9. (a) Kico ta fundamental pa nos contribuí na armonia den e congregacion? (b) Con bo a gana conocimentu tocante Cristo?

10. Den ki manera conocimentu scondí ta disponibel pa nos?

11. Con nos por aumentá nos conocimentu i sabiduria dor di meditá riba Jesus? (Ilustrá cu Jesus su labamentu di pia di su disipelnan, of usa otro ehempelnan.)

12. Contra cua conocimentu nos mester vigilá?

13, 14. (a) Pakico e rumannan colosense a core rísico relacioná cu conocimentu? (b) Pakico algun ruman por sinti awe cu nan no ta coriendo un rísico similar?

15, 16. Ki punto di bista riba bida por afectá un cristian su pensamentu?

17, 18. Ki punto di bista Jesus i e apostelnan a urgi nos pa tin?

19. Con un congregacion ta ser afectá ora esnan den dje ta aceptá e punto di bista di bida cu Jesus a animá?

20. Cua ta un otro área den cua cristiannan por ser engañá?

21. Con un cristian por perde e foco corecto awe?

22. Ki actitud balansá nos mester tin en cuanto e numeroso pretensionnan tocante métodonan di diagnosticá malesa i tratamentu?

23. Pakico nos specialmente tin motibu pa goso?

[Caption on page 17]

Bo plannan pa futuro ta centralisá riba Jesus su presencia?

[Caption on page 18]

Bo A Ripará?

◻ Cua ta e texto di aña pa 1995 pa Testigonan di Jehova?

◻ Pakico e cristiannan colosense mester tabata armoniosamente uní den amor, i pakico nos awe tambe mester ta?

◻ Ki punto di bista peligroso riba bida specialmente cristiannan mester vigilá contra dje awe?

◻ Pakico cristiannan mester ta alerto pa no ser engañá dor di argumentonan persuasivo tocante salú i medionan di diagnosticá malesa?