E Punto di Bista Bíblico

Matrimonio Mester Ta un Union di Bida Largu?

ESEI ta cos di puntra anto? Matrimonio no ta ‘pa den tempu bon i den tempu malu’ i ‘te ora morto separá nos,’ manera votonan matrimonial den mundu occidental sa bisa? Sí, por lo general votonan matrimonial ta declará cu e bruid i e bruidegom ta haciendo un compromiso pa bida largu. Pero hopi hende no ta considerá nan mes mará mas n’e promesanan solem ei. Cantidadnan alarmante di pareha casá ta habri for di otro, tin di nan despues di un par di luna casá, i otronan despues di décadanan. Di con e respet pa matrimonio ta menguando? Bijbel ta duna e contesta.

Por fabor, analisá 2 Timoteo 3:1-3, i compar’é cu loke bo ta observá den mundu awe. En parti, e versículonan ei ta bisa: “Den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, . . . malagradecidu, desleal, sin cariño natural, no dispuesto na ningun acuerdo, . . . sin dominio propio.” E profecia ei ta impresionante pasobra e ta asina exacto. E actitudnan ei a daña i debilitá relacionnan matrimonial rond mundu, loke e porcentahe haltu di divorcio ta proba.

Ta bisto cu hopi hende a perde respet pa matrimonio. En bista di esaki, nos por puntra: Mester tuma matrimonio asina na serio? Ta existí santidad di matrimonio? Con cristiannan mester mira matrimonio? Ki yudansa Bijbel ta ofrecé na parehanan casá awe?

Dios Su Punto di Bista A Cambia?

Na principio, Dios no a papia dje enlace matrimonial como algu temporal. Génesis 2:21-24 ta relatá con el a uni e promé homber i muher, i ei no ta haci mencion di un opcion pa divorciá of separá. Mas bien, versículo 24 ta bisa: “Un homber lo bandoná su tata i su mama i e tin cu pega na su esposa i nan tin cu bira un solo carni.” Kico e texto bíblico ei kier men?

Considerá e curpa humano, e manera cu su diferente tehidonan ta pegá na otro sin nachi i e manera cu wesunan ta uni den djoin fuerte cu no ta causa friccion. Esta un unidad! Esei sí ta algu duradero! Pero ki un agonia ora e organismo sin igual aki ser lesioná seriamente! P’esei, na Génesis 2:24, e término “un solo carni” ta enfatisá con íntimo i permanente e union matrimonial mester ta. Tambe e ta duna e spiertamentu indirecto cu lo tin gran dolor si disolvé e union ei.

Aunke atrabes dje último milenionan e bientunan di cambio a forma i cambia puntonan di bista humano, Dios ketu bai ta mira matrimonio como un compromiso pa bida largu. Rond di 2.400 aña pasá, algun homber hudiu a cuminsá bandoná nan promé esposa i casa cu muhernan mas hóben. Dios a condená e práctica aki, declarando via profeta Malakías: “‘Boso tin cu warda boso mes tocante boso spiritu, i no laga ningun hende trata e esposa di su hubentud di un manera traicionero. Pasobra el a odia divorcio,’ Jehova e Dios di Israel a bisa.”—Malakías 2:15, 16.

Mas cu cuater siglo despues, Jesus a reafirmá Dios su punto di bista original di matrimonio ora el a cita Génesis 2:24 i despues a manda: “Loke Dios a uni bou di un yugo, no laga ningun hende separá.” (Mateo 19:5, 6) Añanan despues apostel Pablo a instruí cu “un esposa no mester bai for di su esposo” i cu “un esposo no mester bandoná su esposa.” (1 Corintionan 7:10, 11) E textonan bíblico aki ta declará precis kico ta Dios su punto di bista di matrimonio.

Tin ocasion cu Bijbel ta permití pa un matrimonio terminá? Sí, un matrimonio ta terminá ora un dje casánan muri. (1 Corintionan 7:39) Adulterio tambe por disolvé un matrimonio si e casá inocente dicidí esei. (Mateo 19:9) Si no ta trata di eseinan, Bijbel ta animá parehanan pa keda huntu.

Con pa Haci Matrimonio Duradero

Dios kier pa matrimonio dura, no como un lucha pa sobrebibí, sino como un biahe felis. Su deseo ta pa un esposo cu esposa solucioná nan problemanan i disfrutá profundamente di otro su compania. Su Palabra ta percurá guia pa un matrimonio felis i duradero. Por fabor, tuma nota dje siguiente textonan.

Efesionan 4:26: “No laga solo baha cu boso den un estado provocá.”a Un homber felismente casá ta kere cu ta e texto aki ta yuda e cu su esposa solucioná nan desacuerdonan unbes. E ta bisa: “Si bo no por drumi despues di un desacuerdo, algu no ta bon. Bo no por permití e problema sigui.” Tabatin biaha cu e cu su casá a papia cabalmente tocante nan problemanan te den mardugá. Pero esei ta funcioná. E ta agregá: “Aplicando principionan bíblico ta duna resultadonan maraviyoso.” Dor di haci esei, e homber aki cu su esposa a disfrutá di un matrimonio felis pa 42 aña.

Colosensenan 3:13: “Sigui soportá otro i pordoná otro libremente.” Un esposo ta splica con e cu su esposa ta pone esaki na práctica: “Casánan por iritá otro sin cu necesariamente un a haci algu malu, ya cu tur hende tin faltanan menor i custumbernan cu ta molestiá otro hende. Nos ta soportá otro dor di no permití e cosnan aki alehá nos for di otro.” Sin duda e actitud ei a yuda e pareha aki durante e 54 añanan cu nan tin casá!

Dor di aplicá e principionan bíblico ei, parehanan ta reforsá e banchi cu ta uni esposo i esposa. Dje manera ei nan matrimonio por ta gososo, satisfaciente i pa bida largu.

[Nota]