16, 17. (a) Con Pablo a haña curashi p’e ministerio? (b) Ki medidanan nos tin cu tuma si algun aspecto di nos ministerio cristian ta intimidá nos?

¹⁶ Pablo a skirbi e cristiannan na Tesalónica: “Despues cu nos a sufri promé i tabata tratá insolentemente den Filípos (manera boso sa), nos a tuma un curashi mediante nos Dios pa papia e bon nobo di Dios cu boso cu hopi lucha.” (1 Tesalonicensenan 2:2) Den ki manera Pablo i su compañeronan a ser “tratá insolentemente” na Filípos? Segun algun erudito, e palabra griego cu Pablo a usa ta expresá insulto, trato bergonsoso of escandaloso. E autoridadnan filipense a maltratá nan cu bara, a tira nan den prizon, i a mara nan na cadena. (Echonan 16:16-24) Con e experencia doloroso ei a afectá Pablo? E hendenan dje siguiente stad cu Pablo a bishitá riba su biahe di misionero, esta Tesalónica, a haña cu Pablo a hala atras den miedu? No, el a “tuma un curashi.” El a vence miedu i a sigui predicá cu curashi.

¹⁷ Di unda Pablo su curashi a bini? For di paden? No, el a bisa cu el a tuma curashi “mediante nos Dios.” Un obra di referencia pa traductornan di Bijbel ta bisa cu lo por traducí e declaracion aki como “Dios a saca miedu for di nos curason.” Pues si bo ta sinti cu bo no tin muchu curashi den bo ministerio, of cu algun aspecto di dje ta parce di intimidá bo, pakico no apelá na Jehova p’e haci mescos cu bo? Pidié pa saca e miedu for di bo curason. Pidié pa yuda bo tuma un curashi p’e trabou. Ademas, tuma algun otro medida práctico. Por ehempel, haci areglo pa traha cu un persona cu ta ábil den e forma di duna testimonio cu ta preocupá bo. Esei lo por encerá teritorio di negoshi, testificacion riba caya, predicacion informal of testificacion via telefon. Tal bes bo partner lo ta dispuesto pa hiba delantera na promé instante. Si ta asina, observá i siña. Anto tuma un curashi pa purba bo mes tambe.

18. Ki bendicionnan nos por experenciá si nos tuma curashi den nos ministerio?

¹⁸ Si bo realmente tuma un curashi, pensa kico por ta e resultado. Ora bo persistí i no laga bo mes bira desanimá, probablemente lo bo haña bon experencia compartiendo e berdad, experencianan cu di otro manera lo bo a perde di haña. (Mira página 25.) Lo bo tin e satisfaccion di sa cu bo a agradá Jehova dor di haci algu cu ta difícil pa bo. Lo bo experenciá su bendicion i yudansa pa vence bo miedu. Bo fe lo bira mas fuerte. Realmente, bo no por purba edificá fe den otro hende sin na mésun momento edificá bo mes fe.—Hudas 20, 21.

Nan A Tuma Curashi

TUMA curashi pa predicá no ta semper fácil. De facto, na un ocasion apostel Pablo a bisa cu e tabata hacié “cu hopi lucha.” (1 Tesalonicensenan 2:2) E “lucha” aki pa predicá ta bal e esfuerso? Aunke no tin garantia pa experencianan extraordinario, hopi bes e pueblo di Dios ta keda contentu cu nan a tuma curashi. Considerá algun ehempel.

Un mucha muher di ocho aña cu yama Tara a scucha atentamente ora su maestro tabata conta e klas cu durante Guera Mundial II, e prezunan hudiu den campo di concentracion mester a bisti un Strea di David geel como identificacion. Tara a puntra su mes si e mester a papia. E ta corda: “Mi a haci oracion cu wowo habri.” Despues el a hisa su man i a bisa cu tabatin Testigonan di Jehova tambe den e camponan ei i cu nan mester a bisti un triángulo puus na nan paña. E maestro a haña e informacion interesante i el a yama Tara danki. Tara su comentario a habri caminda pa mas combersacion cu e maestro, kende despues a laga henter e klas wak e video Testigonan di Jehova Ta Para Firme Contra Atake Nazi.

Na Guinea, West Africa, un hóben publicadó no-bautisá cu yama Irène kier a haci progreso den su ministerio. E misionero cu tabata studia Bijbel cuné a anim’é pa purba laga e revistanan Toren di Vigilancia i Spierta! cu su compañeronan studiante na scol. Na principio, Irène no tabatin masha gana, pasobra su compañeronan no tabata gusta. Sin embargo, motivá p’e animacion dje misionero, Irène a dicidí di acercá e studiante cu a parce di ta mas contra, promé. Pa Irène su sorpresa, e mucha muher a reaccioná bon i a aceptá e revistanan cu smak. Otro studiantenan tambe a tuma revista. Den e luna ei, Irène a laga mas tantu revista cu el a laga den e cincu lunanan anterior huntu.

Na Trinidad un anciano tabata duda masha pa acercá e cabes di un scol pa mustr’é e balor educacional dje revista Spierta! Tog, el a tuma un curashi. E ta bisa: “Mi a haci oracion i drenta e curá dje scol. Mi no por a kere, pero e cabes di scol tabata masha amabel mes.” El a aceptá e revista Spierta! cu tin e tema “Ki Speransa Tin pa Hóbennan Djawe?” i asta el a bai di acuerdo pa us’é ora di duna les. For di e tempu ei padilanti, el a aceptá 40 revista cu diferente tema.

Como un hóben, semper Vaughn a haña e trabou di predicá algu difícil. “Mi tabata bira nervioso, mi mannan tabata soda i mi tabata papia purá—mi no por a bai trankil.” Tog, el a bira minister di tempu completo. Apesar di esei, no tabata semper fácil p’e expresá su mes. Un biaha, despues di un dia desanimante di cana busca trabou, e kier a duna testimonio na un persona den trein. “Sikiera asina, algu bon por a sosodé tog riba e dia ei.” Pero e aparencia di ta hombernan importante dje comerciantenan den e trein, a intimid’é. Finalmente, el a tuma curashi pa papia cu un homber di mas edad cu tabata banda di dje. E resultado tabata un combersacion largu. “Pa un hóben, bo ta haci bon pregunta,” e comerciante a bisa. I el a puntra: “Teólogo bo ta?” Vaughn a contestá: “No, mi ta Testigo di Jehova.” E homber a smail i bisa: “Ah, awor sí mi ta comprendé.”

Tur e Testigonan aki—i un cantidad incontabel mas—ta contentu cu nan a tuma curashi pa predicá. Abo lo haci mescos?