Ekspresá ku Konvikshon

ORA un persona ta papia ku konvikshon, hende ta mira ku e ta kere firmemente loke e ta bisa. Apòstel Pablo a demostrá tal konvikshon den su sirbishi. El a skirbi esnan ku a bira kreyente na Tesalónika: “Nos evangelio no a yega serka boso den palabra so, sino tambe . . . ku pleno konvikshon.” (1 Tes. 1:5) E apòstel a demostrá e konvikshon ei tantu na su manera di papia komo na e manera ku el a biba, i nos tambe mester demostrá esaki ora nos ta siña hende e bèrdatnan bíbliko.

Papia ku konvikshon no ta nifiká ser kabesura, arogante òf dògmátiko (para riba un punto pa kua no tin sufisiente prueba). Mas bien, e persona ku ta papia ku konvikshon tokante e Palabra di Dios ta hasi esei na un manera ku ta demostrá ku e tin fe firme.—Heb. 11:1.

Okashonnan pa Ekspresá Nos Mes ku Konvikshon. Ta importante pa papia ku konvikshon ora bo ta den sirbishi di vèlt. Hopi bes hende ta ripará no solamente loke bo ta bisa, sino tambe kon bo ta bis’é. Nan por sinti loke bo ta pensa realmente di e tema ku bo ta papiando di dje. Bo konvikshon por indiká—ku mas forsa ku bo palabranan so—ku bo tin algu di gran balor pa kompartí ku nan.

Tambe ta nesesario pa ekspresá konvikshon ora bo ta papia ku un ouditorio di rumannan den fe. Apòstel Pedro a skirbi su promé karta inspirá “eksortando i dunando testimonio ku esaki ta e grasia berdadero di Dios,” i el a animá e rumannan: “Para firme.” (1 Ped. 5:12) Ora apòstel Pablo a skirbi e kongregashon na Roma, el a ekspresá un konvikshon ku a fortalesé e kristiannan ei. El a skirbi: “Mi ta konvensí ku ni morto, ni bida, ni angelnan, ni prinsipadonan, ni kosnan presente, ni kosnan futuro, ni podernan, ni haltura, ni profundidat, ni ningun otro kos kreá, lo por separá nos for di e amor di Dios ku ta den Kristu Hesus nos Señor.” (Rom. 8:38, 39) Tambe Pablo a skirbi na un manera konvinsente tokante e nesesidat di prediká na otro hende. E selo ku e mes a demostrá den e aktividat ei a mustra bon kla ku e tabata personalmente konvensí di su importansia. (Echo. 20:18-21; Rom. 10:9, 13-15) Ansianonan kristian mester demostrá e mesun konvikshon ei awe ora nan ta siña hende for di e Palabra di Dios.

Mayornan mester ekspresá nan mes ku konvikshon ora nan ta studia ku nan yunan i na otro okashonnan ku nan ta papia tokante asuntunan spiritual ku nan. Pa logra esaki, mayornan mes tin ku kultivá amor den nan kurason, amor pa Dios i pa su kaminda. E ora ei nan por papia ku nan yunan ku un konvikshon sinsero, ‘pasobra for di e abundansia di kurason boka ta papia.’ (Luk. 6:45; Deu. 6:5-7) Tambe tal konvikshon lo motivá mayornan pa pone un ehèmpel di “fe sinsero,” fe sin hipokresia.—2 Tim. 1:5.

Ta spesialmente importante pa ekspresá bo mes ku konvikshon ora bo fe ta ser poné na prueba. Un kompañero di skol, un maestro òf un kolega di trabou kisas ta haña straño ku bo no ta partisipá den sierto selebrashon. Un kontesta firme huntu ku un splikashon lógiko lo por yuda e persona respetá bo posishon basá riba Beibel. Kiko si un hende ta purba preshoná bo pa partisipá den mal kondukta, podisé pa hasi algu desonrado, usa droga òf kometé inmoralidat seksual? Ta importante pa bo laga e persona komprondé bon kla ku abo sigur no ta hasi e kosnan ei i ku nada lo no pone bo kambia di idea. Bo mester papia ku konvikshon ora bo ta rechasá e proposishon. Ora Yosef a resistí e proposishon indesente di e esposa di Pótifar, el a deklará ku firmesa: “Kon . . . mi por hasi e maldat grandi aki i peka kontra Dios?” Ora e muhé a persistí, Yosef a hui bai pafó.—Gén. 39:9, 12.

Kon Nos Ta Demostrá Konvikshon. E palabranan ku bo ta usa por demostrá bo konvikshon. Na vários okashon Hesus a introdusí deklarashonnan importante ku e palabranan: “Di bèrdat, di bèrdat, mi ta bisa boso.” (Huan 3:3, 5, 11; 5:19, 24, 25) Pablo a reflehá su konvikshon ku ekspreshonnan manera “mi ta konvensí,” “mi sa i ta konvensí den Señor Hesus” i “mi ta papia bèrdat, mi no ta gaña.” (Rom. 8:38; 14:14; 1 Tim. 2:7) Tabatin biaha ku Yehova a inspirá profetanan pa hasi deklarashonnan enfátiko relashoná ku e kumplimentu di su palabra, manera por ehèmpel: “E lo bin sigur.” (Hab. 2:3) Ora bo ta referí na e profesianan aki, lo bo por usa ekspreshonnan similar. Si bo ta konfia den Yehova i no den bo mes, i si bo ta papia ku otro hende ku e debido rèspèt, e palabranan ei ku ta reflehá konvikshon lo duna prueba ku bo tin un fe firme.

Tambe bo por demostrá konvikshon dor di papia ku entusiasmo i intensidat. Bo ekspreshon di kara, bo gestonan, bo postura i moda di hasi i aktua ta kontribuí na esaki, ounke nan por varia di hende pa hende. Asta si di naturalesa bo ta un hende tímido òf bo tin un stèm suave, si bo ta plenamente konvensí ku loke bo ta bisa ta bèrdat i ku otro hende mester tend’é, bo konvikshon lo keda bisto.

Klaru ku e konvikshon ku nos ta mustra mester ta di kurason. Si hende ta sinti ku nos ta fingi i no ta papia ku sinseridat, probablemente nan lo saka e konklushon ku nos mensahe no tin peso. P’esei, mas ku tur kos, sea bo mes. Si bo ta papia ku un públiko grandi, bo tin ku papia ku un stèm mas duru ku normal i ku mas intensidat. Pero bo meta mester ta pa ekspresá bo mes ku sinseridat i na un manera natural.

Yudansa pa Papia ku Konvikshon. Ya ku konvikshon ta enserá loke bo ta sinti pa bo mensahe, bon preparashon ta importante. No ta basta pa djis kopia informashon for di un publikashon anto kaba ripití loke e ta bisa. Bo tin ku komprondé e informashon bon pa bo por ekspres’é ku bo mes palabra. Bo mester ta plenamente konvensí ku e ta bèrdat i ku e tin balor pa bo ouditorio. Esaki ta nifiká ku ora bo ta prepará bo presentashon, bo tin ku tene kuenta ku e sirkunstansia di bo ouditorio i tambe ku loke nan sa kaba di e tema òf kiko nan ta pensa di dje.

Si bo ta papia ku fluides lo ta mas fásil pa bo ouditorio sinti bo konvikshon. P’esei fuera di prepará bon informashon, bo tin ku train bo presentashon bon tambe. Pone atenshon spesial na e sekshonnan ku mester di mas entusiasmo, ya asina bo por presentá nan sin dependé demasiado di bo notanan. No lubidá di pidi Yehova su bendishon riba bo esfuerso pa asina bo haña “e kurashi di papia” den un manera ku ta reflehá ku bo ta konvensí ku bo mensahe ta bèrdat i importante.—1 Tes. 2:2.