Predicá e Bon Nobo cu Conviccion Fuerte
1 Na principio di promé siglo, Jesucristo a comisioná su siguidónan pa predicá e bon nobo di Reino i “haci disipel di hende di tur nacion.” (Mat. 24:14; 28:19, 20) Testigonan di Jehova a tuma e instruccion aki na serio, p’esei pa fin di siglo 20, nos hermandad cristian a aumentá te na mas cu 5.900.000 disipel den 234 pais. Esta un gritu di alabansa magnífico na nos Tata celestial!
2 Awor nos a drenta siglo 21. Nos Adversario ta purba sutilmente di interferí cu nos trabou principal di predicá e Reino i haci disipel. E ta usa preshonnan for dje sistema di cosnan aki den un intento pa kita nos atencion, gasta nos tempu i agotá nos energia mediante un cantidad di preocupacion i interesnan cu no ta esencial. En bes di laga e sistema aki dicta loke ta importante den bida, nos ta proba pa nos mes for dje Palabra di Dios kico ta mas importante, esta, haci e boluntad di Jehova. (Rom. 12:2) Esei ta nificá obedecé e exhortacion bíblico pa ‘predicá e palabra den tempu faborabel i difícil i cumpli cu nos ministerio plenamente.’—2 Tim. 4:2, 5.
3 Desaroyá Conviccion Firme: Cristiannan tin cu “para completo i cu conviccion firme den tur e boluntad di Dios.” (Col. 4:12) E palabra “conviccion” ta ser definí como “un creencia fuerte; e condicion di ta convencí.” Como cristian nos mester ta convencí cu Dios su palabra profético ta sigur i cu awor nos ta leu den e tempu di fin. Nos mester tin un creencia mes fuerte cu di apostel Pablo, kende a bisa cu e bon nobo “en realidad ta e poder di Dios pa salbacion pa tur hende cu tin fe.”—Rom. 1:16.
4 Diabel ta usa hende malbado i impostor, kende nan mes a ser engañá, pa influenciá i engañá otro hende. (2 Tim. 3:13) Dor cu nos a ser spiertá di esaki di antemano, nos ta dal paso pa fortalecé nos conviccion cu nos tin e berdad. En bes di laga e ansiedadnan di bida fria nos celo, nos ta sigui pone interesnan di Reino na promé lugá. (Mat. 6:33, 34) Tampoco nos no kier perde e urgencia dje tempu for di bista, i kisas sinti cu e fin dje sistema aki ta leu ainda. E ta hala cada bes mas cerca. (1 Ped. 4:7) Aunke tal bes nos ta sinti cu e plamamentu dje bon nobo tin poco efecto den algun pais debí n’e testimonio cu ya caba a ser duná einan, e trabou di duna advertencia tin cu sigui.—Eze. 33:7-9.
5 E preguntanan clave leu den e tempu di fin aki ta: ‘Mi ta tuma Jesus su comision di haci disipel na serio? Ora mi ta predicá e bon nobo, mi ta demostrá conviccion fuerte di cu e Reino ta algu real? Mi ta decididu di tin un participacion mas grandi posibel den e ministerio aki cu ta salba bida?’ Como cu nos ta realisá con leu nos ta den e tempu di fin, nos tin cu presta atencion na nos mes i na nos comision di predicá i siña otronan. Haciendo esaki nos lo salba tantu nos mes como esnan cu scucha nos. (1 Tim. 4:16) Con nos tur por fortalecé nos conviccion como minister?
6 Imitá e Tesalonicensenan: Apostel Pablo, cordando riba e trabou duru dje rumannan na Tesalónica, a bisa nan: “E bon nobo cu nos ta predicá no a resultá di ta entre boso cu papiamentu so, sino tambe cu poder i cu spiritu santu i conviccion fuerte, mescos cu boso sa ki sorto di hende nos a bira pa boso pa causa di boso; i boso a bira imitadó di nos i di Señor, ya cu boso a aceptá e palabra bou di hopi tribulacion cu goso di spiritu santu.” (1 Tes. 1:5, 6) Sí, Pablo a encomendá e congregacion di tesalonicensenan pasobra apesar di hopi tribulacion nan a predicá cu celo i conviccion fuerte. Kico a pone cu nan por a haci esaki? Pa gran parti, e celo i conviccion cu nan a mira den apostel Pablo i su colaboradónan tabatin un efecto positivo riba nan. Con asina?
7 E bida mes di Pablo i su compañeronan di biahe a duna testimonio cu nan tabatin Dios su spiritu riba nan i cu nan a kere sinceramente loke nan tabata predicá. Promé cu Pablo cu Sílas a bin Tesalónica, nan a ser tratá insolentemente na Filípos. Sin tene huicio, nan a bati nan, encarcelá nan i pone nan na sepa. Pero, e experencia duru aki, no a fria nan celo pa e bon nobo. Intervencion divino a causa nan liberacion, a hiba na combertimentu dje carcelero i su famia di cas, i a habri caminda pa e rumannan aki sigui den nan ministerio.—Echo. 16:19-34.
8 Cu forsa dje spiritu di Dios, Pablo a yega Tesalónica. Ei el a traha duru pa proveé su mes necesidadnan i despues a dedicá su mes plenamente na siña e tesalonicensenan e berdad. El a probechá di tur oportunidad pa declará e bon nobo. (1 Tes. 2:9) Pablo su predicacion cu conviccion fuerte tabatin un efecto asina poderoso riba e pueblo local, cu algun di nan a bandoná nan adoracion idólatra i a bira sirbidó dje Dios berdadero, Jehova.—1 Tes. 1:8-10.
9 Persecucion no a stroba e creyentenan nobo di predicá e bon nobo. Motivá dor di nan fe nobo i plenamente convencí cu nan lo ricibí bendicionnan eterno, e tesalonicensenan a sinti nan impulsá pa proclamá e berdad cu nan a aceptá cu asina un entusiasmo. E congregacion ei a bira asina activo cu e noticia di nan fe i celo a plama pa otro partinan di Macedonia i asta te den Acaya. P’esei, ora Pablo a skirbi su promé carta na e tesalonicensenan, nan bon obranan ya caba tabata bon conocí. (1 Tes. 1:7) Esta un ehempel sobresaliente!
10 Motivá dor di Amor pa Dios i pa Hende: Con nos, mescos cu e tesalonicensenan, por mantené conviccion personal fuerte ora nos ta predicá e bon nobo awe? Pablo a skirbi tocante nan: “Nos ta tene presente tur ora boso fiel obra i boso esfuerso vigoroso debí na amor.” (1 Tes. 1:3, nota na pia di pág.) Ta obvio cu nan tabatin un amor profundo i sincero pa Jehova Dios i pa e hendenan na ken nan a predicá. Tabata e mésun amor aki cu a motivá Pablo i su compañeronan pa compartí cu e tesalonicensenan “no solamente e bon nobo di Dios, sino tambe [nan] propio alma.”—1 Tes. 2:8.
11 Di igual manera, nos amor profundo pa Jehova i pa nos próhimo ta lanta den nos e deseo pa participá plenamente den e trabou di predicá cu Dios a duna nos pa haci. Teniendo e amor ei, nos ta reconocé cu ta nos responsabilidad personal, cu Dios a duna nos, pa plama e bon nobo. Dor di meditá cu aprecio i den un forma positivo riba tur loke Jehova a haci pa dirigí nos na “e berdadero bida,” nos ta ser motivá pa conta otro hende e mésun berdadnan maraviyoso cu nos ta kere di henter nos curason.—1 Tim. 6:19.
12 Miéntras nos ta keda ocupá den e trabou di predicá, nos amor pa Jehova i pa hende tin cu sigui crece. Si ta asina, nos lo ser stimulá pa intensificá nos participacion den e ministerio di cas pa cas i pa participá den tur otro forma di duna testimonio cu ta habrí pa nos. Nos lo probechá di oportunidadnan pa duna testimonio informal na famia, bisiña i conocínan. Maske kisas mayoria hende ta rechasá e bon nobo cu nos ta ofrecé i algun lo purba interferí cu e proclamacion dje Reino, nos ta sinti un goso interno. Con bini? Pasobra nos sa cu nos a haci nos best pa duna testimonio tocante e Reino i yuda hende gana salbacion. I Jehova lo bendicioná e esfuerso cu nos ta haci pa haña hende di curason recto. Asta ora e preshonnan di bida ta oprimí nos i Satanas ta purba debilitá nos goso, nos tin e capacidad pa mantené nos conviccion fuerte i nos celo den duna testimonio na otro hende. Ora nos tur haci nos parti, esaki ta resultá den congregacionnan fuerte i celoso manera esun di Tesalónica.
13 No Entregá Nunca bou di Prueba: Tambe nos tin mester di conviccion ora nos ta enfrentá vários prueba. (1 Ped. 1:6, 7) Jesus a laga su disipelnan comprendé bon cla cu si nan a siguié, nan lo ta “obheto di odio di parti di tur nacion.” (Mat. 24:9) Pablo cu Sílas a experenciá esaki ora nan tabata na Filípos. E relato na Echonan capítulo 16 ta bisa cu nan a tira Pablo cu Sílas den e prizon interior i a pone nan na sepa. Por lo general, e prizon principal tabata un sorto di patio rondoná pa celnan cu tabatin e bentaha di haña lus i aire. Sin embargo, e prizon interior no tabatin lus i masha tiki ventilacion. Pablo cu Sílas tabatin cu trata cu scuridad, calor i mal holó dje lugá teribel ei di encarcelacion. Bo por imaginá bo e dolor cu nan lo mester tabatin miéntras cu nan tabata mará pa oranan na sepa cu nan lomba tur cortá i sangrando debí n’e halá di sota?
14 Apesar dje pruebanan aki, Pablo cu Sílas a keda fiel. Nan a demostrá conviccion sincero, i esei a fortalecé nan pa sirbi Jehova sin importá e test. Versículo 25 di capítulo 16 ta resaltá nan conviccion, ora e ta bisa cu Pablo cu Sílas tabata “haciendo oracion i alabando Dios cu cantica.” De facto, maske nan tabata den e prizon interior, nan tabata asina sigur cu nan tin Dios su aprobacion cu nan a canta duru te cu e otro prezunan por a tende nan! Awe nos mester tin e mésun conviccion ora nos ta enfrentá test di nos fe.
15 E pruebanan cu Diabel ta benta riba nos ta masha hopi. Pa algun ruman e por ta persecucion di famia. Hopi di nos rumannan ta enfrentá casonan legal. Nos por haña nos cu oposicion di apóstata. Tin carganan financiero i e ansiedad pa gana nos pan di cada dia. Hóbennan ta enfrentá preshon di nan pareunan na scol. Con nos por enfrentá e pruebanan aki cu éxito? Kico nos tin mester pa demostrá conviccion?
16 Promé cu tur cos i lo mas principal ta cu nos tin cu mantené un relacion personal i íntimo cu Jehova. Ora Pablo cu Sílas tabata den e prizon interior, nan no a usa e ocasion ei pa keha tocante nan situacion ni pa sinti duele di nan mes. Mesora nan a acudí na Dios den oracion i a alab’é cu cantica. Di con? Pasobra nan tabatin un relacion personal i íntimo cu nan Tata celestial. Nan a realisá cu nan tabata sufri pa causa di husticia i cu nan salbacion tabata den man di Jehova.—Sal. 3:8.
17 Ora nos ta enfrentá prueba awe, nos tambe tin cu acudí na Jehova. Pablo ta animá nos como cristian pa ‘laga nos peticionnan bira conocí na Dios; i e pas di Dios cu ta surpasá tur pensamentu lo warda nos curason i nos facultad mental.’ (Fil. 4:6, 7) Ki un consuelo pa sa cu Jehova lo no laga nos pasa dor di prueba nos so! (Isa. 41:10) Semper e ta cu nos tanten cu nos ta sirbié cu berdadero conviccion.—Sal. 46:7.
18 Un otro yudansa vital pa demostrá conviccion ta dor di keda ocupá den Jehova su sirbishi. (1 Cor. 15:58) Pablo cu Sílas a ser tirá den prizon pasobra nan tabata ocupá ta predicá e bon nobo. Nan a stop di predicá debí na nan pruebanan? No, nan a sigui predicá te asta den prizon, i despues cu a libra nan, nan a biaha pa Tesalónica i a bai n’e snoa dje hudiunan pa “razoná cu nan for dje Scritura.” (Echo. 17:1-3) Ora nos tin un creencia fuerte den Jehova i ta convencí cu nos tin e berdad, nada “lo por separá nos for di e amor di Dios cu ta den Cristo Jesus nos Señor.”—Rom. 8:35-39.
19 Ehempelnan Moderno di Conviccion Fuerte: Tin hopi ehempel sobresaliente di rumannan den nos tempu cu, mescos cu Pablo cu Sílas, a demostrá conviccion fuerte. Un ruman muher cu a sobrebibí e campo di concentracion di Auschwitz, ta conta dje fe i conviccion inkebrantabel cu e rumannan a demostrá einan. E ta conta: “Un biaha durante un interogacion, un oficial a bin riba mi cu moketa cerá. ‘Kico nos tin cu haci cu boso?’ el a sclama. ‘Si nos arestá boso, boso no tin cunes. Si nos manda boso prizon, boso no tin cunes mes. Si nos manda boso campo di concentracion, boso no ta preocupá. Ora nos sentenciá boso na morto, boso ta gewoon keda ei pará sin wori. Kico nos tin cu haci cu boso?’ ” Nos fe ta ser fortalecé mashá dor di mira e fe cu nos rumannan tabatin bou di circunstancianan asina duru! Nan a acudí constantemente na Jehova pa yuda nan wanta.
20 Sigur cu nos ta corda e conviccion di hopi di nos rumannan ora nan a haña nan confrontá cu e odio étnico cu a manifestá su mes den añanan recien. Apesar di haña nan mes den situacionnan peligroso, ruman hombernan den puesto di responsabilidad ta decididu pa soru pa nan rumannan ser alimentá spiritualmente. Tur ta sigui fiel cu e conviccion fuerte cu ‘ki arma cu nan forma contra nan, lo no tin éxito.’—Isa. 54:17.
21 Hopi di nos rumannan cu casá incrédulo tambe ta demostrá fe fuerte i awante. Un ruman homber na Guadeloupe a haña oposicion fuerte di su casá incrédulo. Pa desanim’é i strob’é di bai su reunionnan cristian, e casá no tabata cushiná p’e ni laba ni strika ni drecha su pañanan. Tin biaha pa dianan largu, e muher no tabata papia cuné. Pero dor di manifestá conviccion sincero den sirbi Jehova i acudí den oracion na dje pa yudansa, e ruman aki a logra wanta tur esei. Pa cuantu tempu? Pa un 20 aña asina, i despues di esei su casá su curason a cambia poco-poco. Cu tempu, e ruman por a alegrá di berdad pasobra su casá a aceptá e speransa dje Reino di Dios.
22 Por último, nos no tin cu lubidá e conviccion fuerte di nos rumannan hóben cu ta bai scol tur dia i ta trata cu preshon di nan pareunan i otro situacionnan difícil. Relacioná cu e preshon cu tin na scol pa nan haci mescos cu otro muchanan, un hobencita Testigo a bisa: “Ora bo ta na scol, semper tur hende ta animá bo pa bo ta un poco rebelde. E muchanan ta respetá bo mas si bo haci algu cu ta ‘net na rand.’ ” Esta un preshon grandi nos hóbennan ta enfrentá! Nan mester ta decididu den mente i curason pa resistí tentacion.
23 Hopi di nos hóbennan ta warda nan integridad bon, apesar di prueba. Un ehempel ta di un ruman hobencita cu ta biba na Francia. Un dia despues di almuerso, algun mucha homber a purba obligu’é di duna nan sunchi, pero el a haci oracion i a resistí fuertemente, pues e mucha hombernan a lagu’e trankil. Mas despues, un di nan a bin bek i a bis’é cu el a admir’é pa su curashi. E hobencita por a dun’é un bon testimonio tocante e Reino, i a splik’é dje normanan haltu cu Jehova ta pone pa tur cu kier tin parti den e bendicionnan dje Reino ei. Durante e aña escolar, e hobencita a splica su creencianan na henter klas tambe.
24 Esta un privilegio precioso nos tin di ser contá entre esnan cu Jehova ta contentu pa usa pa papia cu conviccion firme tocante su boluntad! (Col. 4:12) Ademas, nos tin e maraviyoso oportunidad di duna prueba di nos integridad ora nos ta bou di atake di nos Adversario brabu manera leon, Satanas e Diabel. (1 Ped. 5:8, 9) No lubidá nunca cu Jehova ta usa e mensahe di Reino pa trece salbacion tantu pa nos cu ta predik’é como pa esnan cu ta scuch’é. Mare e decisionnan cu nos tuma i nos bida diario duna prueba cu nos ta pone e Reino na promé lugá. Laga nos sigui predicá e bon nobo cu conviccion fuerte!