“Tin un Tempu Stipulá” pa Traha i pa Sosegá

 1. Kiko hopi hende ta pensa tokante trabou?

KIKO mayoria di hende den bo pais ta pensa tokante trabou? Den hopi pais, hende ta traha mas ku nunka promé. Debí na esei, hopi di nan ta muchu drùk pa sosegá, pa pasa tempu ku nan famia òf pa siña tokante Dios. (Ekl. 2:23) Di otro banda, tin hende ku no ta gusta traha mes i nan ta bini ku tur sorto di èksküs pa no traha.—Pro. 26:13, 14.

2-3. Ki ehèmpel Yehova i Hesus a pone tokante trabou?

² Yehova i Hesus tin un punto di bista masha diferente tokante trabou; un punto di bista balansá. No tin ningun duda ku Yehova gusta traha. Hesus a konfirmá esei ora el a bisa: “Mi Tata ta traha te ainda, i ami tambe ta sigui traha.” (Huan 5:17) Pensa riba tur e trabou ku Dios a hasi ora el a krea e kantidat inkontabel di angel-, strea- i planetanan. Nos ta mira tambe hopi kos bunita ku Dios a krea aki riba tera. E salmista tabatin rason di bisa: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea.”—Sal. 104:24.

³ Hesus a imitá su Tata, Yehova. El a yuda Yehova “establesé e shelunan” i e tabata ku Yehova “manera un trahadó eksperto.” (Pro. 8:27-31) Hopi mas despues, ora Hesus tabata riba tera, el a hasi un ekselente trabou. E trabou ei tabata manera kuminda p’e, i tur loke el a hasi riba tera a proba ku ta Dios a mand’é.—Huan 4:34; 5:36; 14:10.

 4. Kiko nos por siña for di Yehova i Hesus tokante sosiegu?

⁴ Akaso e ehèmpel ku Yehova i Hesus a pone tokante traha duru ke men ku nos no tin nodi di sosegá? Niun ora so! Beibel ta bisa ku despues ku Yehova a krea shelu i tera, “el a sosegá i a keda refreská.” (Éks. 31:17) Komo ku Yehova nunka ta kansa i no mester di sosiegu, nos por komprondé ku Yehova a stòp di krea kos i a tuma tempu pa apresiá tur loke el a krea. Hesus tambe a traha duru ora e tabata riba tera, pero el a apartá tempu pa sosegá i kome ku su amigunan.—Mat. 14:13; Luk. 7:34.

 5. Kiko ta difísil pa e sirbidónan di Dios?

⁵ Beibel ta animá sirbidó di Dios pa nan ta trahadó, no floho. (Pro. 15:19) Kisas bo tin ku traha pa proveé pa bo famia. I tur kristian tin e responsabilidat di prediká e bon notisia. Pero, bo mester di sufisiente sosiegu tambe. Bo ta haña ku tin biaha ta difísil pa bo balansá e tempu ku bo ta usa pa trabou, sirbishi i sosiegu? Kon nos por sa kuantu tempu nos mester dediká na trabou i kuantu tempu nos mester reservá pa sosiegu?

 6. Kon Marko 6:30-34 ta mustra ku Hesus tabatin un punto di bista balansá di trabou i sosiegu?

⁶ Ta importante pa nos tin un punto di bista balansá tokante trabou. Bou di inspirashon Rei Sálomon a skirbi ku “tin un tempu stipulá pa . . . tur evento,” òf aktividat, i entre nan el a menshoná planta, konstruí, yora, hari i baila. (Ekl. 3:1-8) Ta bisto ku dos kos importante den bida ta trabou i sosiegu. Hesus tabatin un punto di bista balansá di nan dos. Na un okashon, e apòstelnan a regresá despues di a prediká. Nan tabata asina okupá ku “nan no a haña ni sikiera chèns di kome” ni sosegá. Hesus a bisa nan: “Ban ku mi, boso so, na un lugá solitario i sosegá un poko.” (Lesa Marko 6:30-34.) No ta semper Hesus i su disipelnan por a sosegá ora nan tabata ke. Ma, Hesus tabata sa ku nan tur tabatin mester di sosiegu.

 7. Kon un análisis di e lei di sabat por yuda nos?

⁷ Tin biaha, nos tur mester di sosiegu òf kambio den nos rutina diario. Un lei ku Dios a duna e israelitanan a demostrá esei bon kla: nan mester a warda sabat semanal. Aunke nos no ta obligá pa obedesé e Lei di Moises awe, nos por benefisiá si nos analisá loke e ta bisa tokante sabat. Esei por yuda nos evaluá nos punto di bista tokante trabou i sosiegu.

 8. Segun Éksodo 31:12-15, kiko e israelitanan mester a hasi riba sabat?

⁸ Beibel ta bisa ku despues di e di seis “dia,” Yehova a stòp di krea kos riba tera. (Gén. 2:2) Pero, Yehova gusta traha, pues el a sigui hasi esei den otro forma. (Huan 5:17) E lei di sabat a sigui e mes patronchi ku esun menshoná na Génesis, es desir, traha seis dia i sosegá e di shete dia. Sabat a proba ku e israelitanan tabatin un relashon spesial ku Yehova i tabata un rekordatorio ku Yehova a saka nan for di Egipto. E tabata un dia di “sosiegu kompleto, santu na SEÑOR.” (Lesa Éksodo 31:12-15.) Niun hende no por a traha riba sabat: ni mucha, ni esklabo ni bestia doméstiko. (Éks. 20:10) Di e manera ei, e israelitanan por a duna mas atenshon na asuntu spiritual.

 9. Ki punto di bista robes tokante sabat tabatin den tempu di Hesus?

⁹ Sabat tabata bon pa e pueblo di Dios. Ma, hopi lider religioso den tempu di Hesus a traha regla ekstremo i rígido tokante kon pa warda sabat. Nan a bisa ku riba sabat no tabatin mag di kita tapushi òf kura hende malu. (Mar. 2:23-27; 3:2-5) E punto di bista ei no a reflehá Dios su manera di pensa, i Hesus a laga esnan ku a skuch’é komprondé esei bon kla.

10. Segun Mateo 12:9-12, kiko tabata Hesus su punto di bista tokante sabat?

¹⁰ Hesus i su siguidónan hudiu tabata sosegá riba sabat pasobra nan tabata obedesé e Lei di Moises.b Pero, Hesus a demostrá den loke el a bisa i hasi ku mester a apliká e lei na un manera rasonabel i ku riba e dia ei tabatin mag di hasi bon obra. El a bisa bon kla: “Tin mag di hasi un bon obra riba sabat.” (Lesa Mateo 12:9-12.) Hesus no a pensa ku si un hende hasi bon obra, lo el a kibra ku e lei di sabat. Loke Hesus a hasi a mustra dikon ta importante pa no traha riba e dia ei. Debí ku e israelitanan no tabata traha riba e dia ei, nan por a enfoká riba aktividat spiritual. Hesus a lanta den un famia ku tabatin e kustumber di usa sabat pa adorá Dios. Nos sa esei pasobra ora Hesus tabata na e stat kaminda el a lanta, Názarèt, Beibel ta bisa: “Manera tabata su kustumber riba dia di sabat, el a drenta snoa i a lanta para pa lesa e Skritura.”—Luk. 4:15-19.

11. Ken a pone un bon ehèmpel pa Hesus tokante trabou?

¹¹ Hose siguramente a siña Hesus, su yu adoptá, kiko ta Dios su punto di bista tokante trabou miéntras ku e tabata siñ’é e fishi di karpinté. (Mat. 13:55, 56) Anto Hesus lo a mira Hose traha duru, dia tras dia, pa proveé pa su famia grandi. Ta interesante pa sa ku mas despues Hesus a bisa su disipelnan: “E trahadó meresé su salario.” (Luk. 10:7) Sí, Hesus tabata sa kiko ta nifiká traha duru.

12. Ki teksto ta mustra Beibel su punto di bista tokante traha duru?

¹² Apòstel Pablo tambe tabata sa kiko ke men traha duru. Su trabou prinsipal tabata di prediká tokante Hesus su nòmber i mensahe. Pero, Pablo a traha tambe pa perkurá pa su mes. E tesalonisensenan tabata sa ku e tabata ‘traha ku sodó di su frenta’ “di dia i anochi” pa asina e no pone “un karga pisá” riba niun hende. (2 Tes. 3:8; Echo. 20:34, 35) Ku e palabranan ei, Pablo kisas tabata referí na loke el a hasi na Korinto. Ei, el a keda serka Akila ku Priskila i “komo ku nan tabatin e mesun fishi di traha tènt, el a . . . traha huntu ku nan.” E echo ku Pablo a traha “di dia i anochi” no ke men ku el a traha nònstòp. Por ehèmpel, riba sabat el a prediká na e hudiunan, kendenan tampoko no a traha e dia ei.—Echo. 13:14-16, 42-44; 16:13; 18:1-4.

13. Kiko nos por siña for di e ehèmpel di Pablo?

¹³ Apòstel Pablo a pone un bon ehèmpel. Apesar ku e mester a traha, el a hasi sigur di partisipá regularmente “den e trabou santu di deklará e bon notisia di Dios.” (Rom. 15:16; 2 Kor. 11:23) El a animá otro hende pa hasi meskos. El a yama Akila ku Priskila su “kompañeronan di trabou den Kristu Hesus.” (Rom. 12:11; 16:3) Pablo a konsehá e korintionan pa nan tin “hopi di hasi den e trabou di Señor.” (1 Kor. 15:58; 2 Kor. 9:8) Yehova a asta inspirá apòstel Pablo pa skirbi: “Si un hende no ke traha, no lag’é kome tampoko.”—2 Tes. 3:10.

14. Kiko e palabranan di Hesus na Huan 14:12 ke men?

¹⁴ E trabou di mas importante den e último dianan akí ta di prediká i di hasi disipel. De echo, Hesus a profetisá ku su disipelnan lo hasi obra asta mas grandi ku di dje! (Lesa Huan 14:12.) E no tabata ke men ku nan lo a hasi milager meskos ku el a hasi. Mas bien, nan lo a prediká i siña hende na hopi mas lugá, na hopi mas tantu hende i pa un periodo di tempu hopi mas largu kompará kuné.

15. Ki pregunta nos mester hasi nos mes, i dikon?

¹⁵ Si bo tin un trabou, puntra bo mes: ‘Mi ta konosí komo un bon trahadó? Mi ta kaba mi trabou na tempu i duna lo mihó ku mi por?’ Si bo kontesta ta sí, e ora ei probablemente bo doño di trabou ta konfia bo i bo koleganan lo ta mas dispuesto pa skucha e bon notisia. Di otro banda, relashoná ku nos trabou di prediká i di siña hende, puntra bo mes: ‘Mi ta konosí komo un hende ku ta traha duru den sirbishi? Mi ta prepará bon pa e promé kòmbersashon? Mi ta rebishitá hende interesá mesora? Mi ta partisipá regularmente den diferente área di sirbishi?’ Si bo kontesta ta sí, lo bo tin goso den bo sirbishi.

16. Ki diferensia tin entre e punto di bista di Hesus i su apòstelnan relashoná ku sosiegu kompará ku hopi hende awe?

¹⁶ Hesus tabata sa ku tantu e komo su apòstelnan mester a sosegá de bes en kuando. Ma, den e tempunan ei, meskos ku awe, hopi hende tabata pensa meskos ku e hòmber riku den un ilustrashon di Hesus. E hòmber ei a konvensé su mes: “Bai trankil, kome, bebe i gosa.” (Luk. 12:19; 2 Tim. 3:4) E kos di mas importante pa e hòmber ei tabata sosiegu i plaser. Di otro banda, Hesus i su apòstelnan no a enfoká riba disfrutá di e plasernan di bida.

17. Kon nos ta usa nos tempu liber?

¹⁷ Nos ta purba di imitá Hesus usando nos tempu liber no solamente pa sosegá sino tambe pa prediká i asistí na nos reunionnan. De echo, pa nos, e dos aktividatnan ei ta asina importante ku nos ta hasi tur loke nos por pa partisipá den nan ku regularidat. (Heb. 10:24, 25) Asta ora nos ta ku fakansi, nos ta keda ku nos rutina spiritual di asistí regularmente na reunion unda ku nos ta i buska oportunidat pa kòmbersá ku hende ku nos topa.—2 Tim. 4:2.

18. Kiko nos Rei, Kristu Hesus, ke pa nos hasi?

¹⁸ Nos ta masha kontentu ku nos Rei, Kristu Hesus, ta rasonabel i ta yuda nos tin un punto di bista balansá di trabou i sosiegu! (Heb. 4:15) E ke pa nos haña e sosiegu ku nos mester. E ke tambe pa nos traha duru pa perkurá pa nos nesesidatnan físiko i hasi esfuerso pa partisipá den e trabou refreskante di hasi disipel. Den e siguiente artíkulo, nos lo analisá loke Hesus a hasi pa libra nos for di un forma kruel di sklabitut.