“Awor nos ta duna boso ordu, rumannan, . . . pa alehá for di tur ruman cu ta anda desordenadamente i no segun e tradicion cu boso a ricibí di nos. Di boso parti, rumannan, no stop di haci loke ta bon. Pero si un hende no ta obediente na nos palabra mediante e carta aki, ten’é marcá, stop di asociá cuné, p’e keda bergonsá. I tog no consider’é como un enemigu, sino sigui amonest’é como ruman.”—2 Tesalonicensenan 3:6, 13-15.

Distinto dje tres situacionnan mencioná ariba, tin esun cu tin di haber cu hende ‘desordená’ cu 2 Tesalonicensenan ta papia di dje. Pablo a skirbi cu esakinan tabata “ruman” ainda, i p’esei mester a amonestá i trata nan como ruman. Pues, e problema cu e rumannan ‘desordená’ no tabata un simpel asuntu personal entre cristiannan, ni di suficiente seriedad cu ancianonan di congregacion mester a dal paso pa scomulgacion, manera Pablo sí a haci en coneccion cu e situacion inmoral na Corinto. Esnan ‘desordená’ no tabata culpabel di picá grave, manera e homber scomulgá na Corinto.

Tambe el a laga e congregacion sa cu lo ta na su lugá pa nan como cristiannan individual ‘marca’ esnan desordená. Esaki a implicá cu e rumannan mester a tuma nota di esnan kende nan accion a corespondé cu e curso di cua a spierta e congregacion públicamente. Pablo a consehá pa nan “alehá for di tur ruman cu ta anda desordenadamente.” Sigur esei no por tabata kier men evitá un persona asina completamente, pasobra nan mester a “sigui amonest’é como ruman.” Nan lo a sigui tin contacto cristian na reunion i kisas den e ministerio. Nan por a spera cu nan ruman lo a reaccioná faborablemente riba spiertamentu i bandoná su moda di anda cu ta molestiá otro hende.