“Nenga di admiti cuenta falso”

E BIJBEL ta yen di experencia i relato tocante hende. Nos no solamente ta gusta lézanan sino també ta beneficiá di nan. Apóstol Pablo a skirbi ne congregacion cristian den Roma: “Tur loke tabata skirbí den tempo pasá tabata skirbí pa nos instruccion, pa mediante nos awante i mediante consuelo di Scritura nos por tene speranza.”​—⁠Romano 15:⁠4.

Pablo mes a participa den e contamento di experencia. E Bijbel ta bisa di Pablo i Barnabás ne conclusion di nan promé biahe misional: “Ora nan a yega [na Antioquía di Siria] i a reuni e congregacion hunto, nan a procede di conta e cantidad di cos cu Dios a haci pa medio di nan.” (Echo 14:27) Sin duda e rumanan a keda mashá animá pa tal experencia.

Sin embargo, tur experencia no ta edificante. Bao di inspiracion, Pablo a adverti Timoteo: “Nenga di admiti cuenta falso cu ta viola loke ta santo i cu muher bieu ta conta.” (1 Timoteo 4:⁠7) I el a skirbi na Tito cu hende cristian leal no mag presta “atencion na fábula hudío i mandamento di hende cu ta apartánan dje berdad.”​—⁠Tito 1:⁠14.

Eseinan tabata cua cuenta falso, of fábula? E dos palabra ta bini dje palabra griego myʹthos (“mito, of leyenda”). The International Standard Bible Encyclopaedia ta bisa cu e palabra ta detayá “un cuenta (religioso) cu no tin relacion cu e realidad.”

E mundo dje tempo di Pablo tabata yen di tal cuenta. Un ehempel ta e buki falso di Tobit, probablemente skirbí mas cu dos cien aña promé cu e tempo di Pablo. E cuenta ta menciona Tobit, un hudío religioso, cu a bira ciegu ora mest di páhara a cai den su wowo. Despues, el a manda su yiu, Tobías, pa cobra un debe. Riba camina, bao di direccion di un angel, Tobías a obtene e curazón, higra, i gal di un piscá. Despues el a contra cu un biuda cu, aunque el a casa siete bez, tabata birgen ainda pasobra spiritu malu a mata cada casá durante anochi di nan casamento. Bao di influencia dje angel, Tobías a casa cu e biuda i a corre e demoño cu e kimamento dje curazón i higra dje piscá. Usando e gal dje piscá, Tobías despues a restora e bista di su tata.

Claramente, e cuenta no ta e berdad. Además di su carácter fantástico i su atraccion na supersticion, e ta contene error. Por ehempel, e cuenta ta bisa cu Tobit a presenciá tanto e rebelion dje tribunan di nort como e deportacion di israelita na Nínive, suceso den e historia di Israel cu tabata 257 aña for di otro. Sin embargo, e cuenta ta bisa cu Tobit tabatin 112 aña di edad ne tempo di su morto.​—⁠Tobit 1:​4, 11; 14:​1, The Jerusalem Bible.

Tal fábula ta contrario cu “modelo di palabra saludable” cu fiel sirbidor di Dios a proclama. (2 Timoteo 1:13) Nan ta producto di imaginacion, contrario cu echo histórico, e sorto di cos cu muher bieu perverso ta conta. Eseinan tabata cuenta cu hende cristian tabatin cu nenga.

Poniendo palabra dje berdad na prueba

Cuenta similar ta abunda awe. Pablo a skirbi: “Lo tin un periodo di tempo ora [hende] lo no soporta siñanza saludable, sino, . . . lo aparta nan oído for dje berdad, pasobra nan lo ser desviá na cuenta falso.” (2 Timoteo 4:​3, 4) Den cierto parti di mundo, cuenta di loke ta sobrenatural ta tur camina i ta popular. P’sei, hende cristian sabiamente ta “pone na prueba palabra” di cuenta religioso pa mira si nan ta cuadra cu e Bijbel.​—⁠Job 12:⁠11.

Claramente, hopi cuenta no ta cuadra. Por ehempel, den hopi parti di mundo ta común pa tende cuenta cu ta apoya e idea di cu alma ta spiritu cu no ta muri nunca. Tal cuenta ta relatá con hende ta muri, solamente pa presenta di nobo sea den e curpa di un mucha recién nací, como un spiritu, como un bestia, of como un persona den otro lugar.

Sin embargo, e Palabra di Dios ta mustra cu alma humano no ta spiritu cu no ta muri nunca; sino cu alma ta muri. (Ezekiel 18:⁠4) Además, e Bijbel ta bisa cu hende morto ta sin bida den e graf, i no por pensa, papia, ni haci nada. (Eclesiastés 9:​5, 10; Romano 6:23) Pues, hende cu cuenta falso ta gaña cu ta promove e idea cu alma ta inmortal, manera Pablo a bisa, “ta desviá” for di “siñanza saludable” bíblico.

Cuenta dje sobrenatural

Otro cuenta ta enfoca riba obra di spiritista i hacidor di bruha. Por ehempel, den algun parti di Africa, hende ta bisa cu tal spiritista i hacidor di bruha ta armá cu poder formidable, i por cambia nan mes of otro hende na reptil, macacu, i páhara; i por pasa na laira pa haci nan trabao; por aparece i desaparece; por pasa door di muraya; i por mira obheto derá bao di tera.

E gran abundancia di tal cuenta, hunto cu kerimento den nan na tur parti, por tin e tendencia di influenciá algun hende den e congregacion cristian di kere també cu nan ta e berdad. Nan por razona cu aunque hende normal no por haci tal cosnan, hende cu ta recibi poder sobrenatural for di persona spiritual, esta, demoño, por haci tal cosnan. Loke por parce un base pa tal conclusion ta 2 Tesalonicense 2:​9, 10, cu ta bisa: “E presencia dje homber malbado ta segun obramento di Satanás cu tur obra poderoso i siñal i seña engañoso i cu tur engaño inhusto pa esnan cu ta perece, como un castigo pasobra nan no a acepta e amor dje berdad pa nan ser salbá.”

Aunque ta cierto cu e texto ta mustra cu Satanás ta capaz pa haci obra poderoso, e ta bisa cu Satanás també ta autor di “siñal i seña engañoso,” i també autor di “engaño inhusto.” Consistentemente, e Bijbel ta mustra cu Satanás ta e gañador principal cu ta “gaña tur e tera habitá.” (Revelacion 12:⁠9) E ta maestro den hacimento di hende kere loke no ta berdad.

P’es motibo, asta e testimonio i confesion di hende cu tabata enbolbí den spiritismo i bruha hopi bez no ta confiabel. Hende asina por kere sinceramente cu nan a mira, a tende, of a experimenta cierto cosnan; pero, en realidad, nan no a hacié. Por ehempel, tin hende cu ta kere cu nan a comunica cu spiritu di hende morto. Pero nan ta equibocá, gañá, víctima di engaño satánico. E Bijbel ta bisa cu hende morto ta “baha den silencio.”​—⁠Salmo 115:⁠17.

Den bista dje historia di gañamento di e Diabel, e berdad di cuenta dje sobrenatural ta sumamente sospechoso en todo caso. E mayoría ta invento di imaginacion supersticioso, i exagerá cada bez cu nan ta contá.

Repeticion di tal fábula ta promove interés dje tata di mentira, Satanás e Diabel. (Juan 8:44) Nan ta estimula interés den costumber oculto cu ta repugnante pa Jehova Dios. (Deuteronomio 18:​10-12) Nan ta coge hende den laz di miedu i supersticion. No ta straño cu Pablo a conseha hende cristian “pa . . . no presta atencion na cuenta falso.”​—⁠1 Timoteo 1:​3, 4.

Rechazando testimonio di demoño

Sin embargo, con ta para si tal cuenta ta parce di ser correcto? Tin bez cu experencia a ser relatá di spiritu of spiritista cu ta reconoce e supremacía di Jehova Dios i e berdad di su testigonan. Hende cristian mester repiti tal cuenta?

No, nan no mester hacié. E Bijbel ta bisa cu ora spiritu impuro a grita cu Jesús tabata e Yiu di Dios, Jesús “a mándanan rigorosamente pa no duné di conoce.” (Marco 3:12) Di igual manera, ora un demoño di divinacion a forza un mucha muher pa identifica Pablo i Barnabás como “esclabo di Dios Haltísimo” i publicador dje “camina di salbacion,” Pablo a saca e spiritu foi dje. (Echo 16:​16-18) Ni Jesús, Pablo, ni ningun skirbidor di Bijbel a permiti demoño duna testimonio dje propósito di Dios ni di su sirbidornan escogí.

Ta notable, també, cu Jesucristo a biba den region spiritual promé cu el a bini na mundo. El a conoce Satanás personalmente. Sin embargo, Jesús no a diverti su disípelnan cu cuenta tocante e actividad di Satanás, ni no a duna detaye di loke e Diabel por haci of no haci. Satanás i su demoñonan no tabata amigo di Jesús. Nan tabata rechazá, rebelde, odiador di loke ta santo, i enemigo di Dios.

E Bijbel ta bísanos loke nos mester sa. E ta splica ken ta demoño, con nan ta gaña hende, i con nos por evitánan. E ta mustra cu Jehova Dios i Jesús ta mas fuerte cu demoño. I e ta instruínos di cu si nos ta sirbi Jehova Dios lealmente, spiritu malu no por hácinos ningun daño permanente.​—⁠Santiago 4:⁠7.

Pa un bon motibo, anto, hende cristian ta nenga cuenta falso, cuenta cu solamente ta resulta den e promocion di interés di hende cu ta opone Dios. Mescos cu Jesús ‘a duna testimonio dje berdad,’ su sigidornan ta haci mescos awe. (Juan 18:37) Sabiamente, nan ta obedece e conseho bíblico: “Cuanto cos cu ta berdadero . . . sigi considera e cosnan ei.”​—⁠Filipense 4:⁠8.

[Caption on page 31]

Cristian berdadero mester evita estrictamente tur manifestacion dje oculto