Timoteo​—“Un Berdadero Yu den Fe”

TIMOTEO tabata basta yong ora cu apostel cristian Pablo a scog’é como compañero di biahe. Esaki a duna inicio na un asociacion cu a sigui pa mas of ménos 15 aña. E relacion cu a desaroyá entre e dos hombernan aki tabata di tal forma cu Pablo por a yama Timoteo “mi yu stimá i fiel den Señor” i “un berdadero yu den fe.”—1 Corintionan 4:17; 1 Timoteo 1:2.

Ki clase di personalidad Timoteo tabatin cu Pablo a gust’é asina tantu? Con bini Timoteo a bira un compañero asina balioso? I ki lesnan beneficioso nos por saca for dje registro inspirá dje actividadnan di Timoteo?

Pablo Ta Scog’é

Pablo a topa cu e hóben disipel Timoteo ora cu e apostel a bishitá Listra (awe den Turkia) riba su segundo biahe di misionero rond di aña 50 E.C. Cristiannan di Listra i Iconio tabata papia bon di Timoteo, kende probablemente tabatin rond di 20 aña. (Echonan 16:1-3) El a cumpli cu e nificacion di su nomber, esta, “Un Cu Ta Onra Dios.” For di infancia Timoteo su wela Loida i su mama Eunice, a siñ’é for dje Santu Scritura. (2 Timoteo 1:5; 3:14, 15) Probablemente nan a aceptá cristianismo ora cu Pablo a bishitá nan stad pa promé bes un par di aña anterior. Awor, mediante funcionamentu dje spiritu santu, un cierto pronóstico a indicá kico e futuro di Timoteo lo ta. (1 Timoteo 1:18) Na armonia cu e indicacion ei, Pablo i e ancianonan dje congregacion a pone nan man riba e hóben. Di e manera ei, nan a apart’é pa un sirbishi special, i e apostel a scog’é como su compañero misionero.—1 Timoteo 4:14; 2 Timoteo 1:6.

Ya cu su tata tabata un griego no-creyente, Timoteo no tabata circuncidá. Naturalmente, esaki no tabata un rekisito cristian. Sin embargo, pa eliminá un piedra di trompecá p’e hudiunan cu nan lo a bai bishitá, Timoteo a someté su mes n’e procedura doloroso aki.—Echonan 16:3.

Promé cu esei, nan a considerá Timoteo di ta hudiu? Algun erudito ta pretendé cu segun autoridadnan rabínico, “den un matrimonio entre dos diferente rasa, e mama a determiná e státus dje yu i no su tata.” Esei ta nificá cu “un muher hudiu ta haña yu hudiu.” Tog, escritor Shaye Cohen ta cuestioná si tal “ley rabínico relacioná cu státus di persona tabata existí caba den e promé siglo E.C.,” i si hudiunan na Asia Menor tabata siguié. Despues di considerá evidencianan atrabes di historia, el a yega n’e conclusion cu ora homber gentil a casa cu muher israelita, “tabata considerá yunan dje matrimonionan ei como israelita, solamente si e famia tabata biba entre e israelitanan. E mama a determiná e liña di desendencia ora nan tabata den pais dje mama. Ora e muher israelita a muda bai afó pa djoin su esposo gentil, hende tabata considerá su yunan como gentil.” En todo caso, e echo cu Timoteo tabatin mayornan di diferente rasa, mester tabata un bentaha den e trabou di predicá. Lo e no tabatin problema pa anda cu hudiu ni gentil, i kisas esei asta a yud’é vence e diferencia entre e dos gruponan aki.

Pablo su bishita na Listra a marca un punto crucial den bida di Timoteo. E hóben su disposicion boluntario pa sigui e guia di spiritu santu i cooperá humildemente cu ancianonan cristian a dun’é privilegionan di sirbishi i hopi bendicion. Sea cu el a realisá esei e tempu ei of no, bou di direccion di Pablo, Timoteo lo a ser usá despues den asignacionnan teocrático importante cu a hib’é leu fo’i cas te na Roma, capital dje imperio.

Timoteo A Promové Interesnan di Reino

Nos tin solamente un registro parcial dje actividadnan di Timoteo, pero el a biaha hopi pa promové interesnan di Reino. Durante Timoteo su promé biahe huntu cu Pablo i Sílas na 50 E.C., el a pasa dor di Asia Menor i a bai te den Europa. Einan, el a participá den campañanan di predicá na Filípos, Tesalónica i Berea. Despues cu Pablo mester a muda bai Aténas debí na oposicion, Timoteo cu Sílas a keda na Berea pa atendé e grupo di disipel cu nan a forma einan. (Echonan 16:6–17:14) Despues, Pablo a manda Timoteo bai Tesalónica pa fortalecé e congregacion nobo cu tabatin einan. Timoteo a trece bon noticia tocante progreso dje congregacion ora el a topa Pablo na Corinto.—Echonan 18:5; 1 Tesalonicensenan 3:1-7.

E Scritura no ta bisa cuantu tempu Timoteo a keda huntu cu e corintionan. (2 Corintionan 1:19) Sin embargo, probablemente rond di aña 55 E.C., Pablo a pensa pa mand’é bek cerca nan pasobra el a ricibí noticianan perturbador tocante nan situacion. (1 Corintionan 4:17; 16:10) Despues, Pablo a manda Timoteo huntu cu Erasto for di Efeso pa Macedonia. I ora Pablo a skirbi e congregacion romano for di Corinto, Timoteo tabata huntu cuné atrobe.—Echonan 19:22; Romanonan 16:21.

Timoteo i otronan a bandoná Corinto huntu cu Pablo ora cu el a sali pa bai Jerusalem, i nan a compañá e apostel por lo ménos te na Tróas. No ta conocí si Timoteo a sigui bai te na Jerusalem. Pero den e introduccionnan di tres carta cu Pablo a skirbi for di prizon na Roma, rond di añanan 60 pa 61 E.C., e ta mencioná Timoteo su nomber.a (Echonan 20:4; Filipensenan 1:1; Colosensenan 1:1; Filemon 1) Pablo tabata planea pa manda Timoteo for di Roma pa Filípos. (Filipensenan 2:19) I despues cu Pablo a sali for di prizon, Timoteo a keda na Efeso riba indicacion dje apostel.—1 Timoteo 1:3.

Ya cu biahamentu den promé siglo no tabata fácil ni confortabel, e disposicion boluntario di Timoteo pa haci hopi biahe na fabor dje congregacionnan tabata realmente encomendabel. (Mira e cuadro den E Toren di Vigilancia di 15 di augustus 1996, página 29.) Considerá djis un di su biahenan cu lo e mester a haci i loke esaki ta conta nos tocante Timoteo.

Lus Riba Timoteo Su Personalidad

Timoteo tabata huntu cu Pablo na Roma ora cu e apostel den prizon a skirbi e cristiannan cu tabata sufri persecucion na Filípos i a bisa nan: “Mi ta spera den Señor Jesus pa manda Timoteo pronto cerca boso, pa mi por ta un alma alegre ora mi yega na sa dje cosnan cu tin di haber cu boso. Pasobra mi no tin ningun otro cu un disposicion manera esun di dje, kende berdaderamente ta atendé na e cosnan cu ta pertenecé na boso. Pasobra tur e otronan ta busca nan mes interes, no esnan di Cristo Jesus. Pero boso conocé e prueba cu el a duna di su mes, cu manera un yu cu un tata el a sirbi como esclabo cu mi p’e adelanto dje bon nobo.”—Filipensenan 1:1, 13, 28-30; 2:19-22.

E palabranan ei a enfatisá Timoteo su interes den su compañeronan creyente. A ménos cu el a bai cu boto, un biahe asina a exigí p’e cana 40 dia na pia for di Roma te na Filípos, crusa un parti chikitu di laman Adriático i bolbe cana 40 dia pa bin Roma bek. Timoteo tabata dispuesto pa haci tur esei pa sirbi su rumannan.

Aunke Timoteo a biaha hopi, tabatin bes cu su salú no tabata bon. Evidentemente e tabatin cierto problema cu stoma i el a experenciá “casonan frecuente di malesa.” (1 Timoteo 5:23) Tog el a traha duru na fabor dje bon nobo. No ta nada straño cu Pablo tabatin un relacion asina cerá cuné!

Aparentemente, Timoteo a bin reflehá e personalidad di Pablo dor cu e tabata bou di tutela dje apostel i nan a pasa hopi cos huntu. P’esei, Pablo por a bis’é: “Bo a sigui cu sumo cuidou mi siñansa, mi moda di anda den bida, mi propósito, mi fe, mi gran pacenshi, mi amor, mi awante, mi persecucion, mi sufrimentu, e sorto di cosnan cu a pasa mi na Antiokia, na Iconio, na Listra, e sorto di persecucion cu mi a soportá.” Timoteo a yora cu Pablo i a traha duru manera un catibu na su lado pa promové interesnan di Reino, i Pablo a haci oracion p’e.—2 Timoteo 1:3, 4; 3:10, 11.

Pablo a animá Timoteo pa ‘no laga ningun hende nunca menospreciá su hubentud.’ Kisas esaki ta indicá cu Timoteo tabata un poco tímido i a vacilá pa mustra su autoridad. (1 Timoteo 4:12; 1 Corintionan 16:10, 11) Sin embargo, e por a sirbi su so, i cu confiansa Pablo por a mand’é pa cumpli cu misionnan responsabel. (1 Tesalonicensenan 3:1, 2) Ora Pablo a ripará cu e congregacion na Efeso tabatin mester di supervision teocrático firme, el a urgi Timoteo pa keda einan i “manda cierto hende pa no siña otro doctrina.” (1 Timoteo 1:3) Aunke nan a confia Timoteo cu hopi responsabilidad, tog e tabata modesto. I maske e por tabata un poco tímido, e tabatin curashi. Por ehempel, el a bai Roma pa yuda Pablo, kende tabata den prizon pa motibu di su fe. De facto, Timoteo mes a bai cerá pa algun tempu, i probablemente pa mésun motibu.—Hebreonan 13:23.

Sin duda, Timoteo a siña hopi for di Pablo. E echo cu e apostel a skirbié dos carta inspirá dor di Dios, cu nos ta haña den e Scritura Griego Cristian, ta duna testimonio amplio dje aprecio cu e apostel tabatin pa su colaboradó. Rond di aña 65 E.C., ora Pablo a realisá cu su morto como un mártir por a yega cualkier momento, el a yama Timoteo pa bini un biaha mas cerca dje. (2 Timoteo 4:6, 9) E Scritura no ta bisa si Timoteo a logra mira Pablo promé cu nan a ehecutá e apostel.

Haci Bo Mes Disponibel!

Nos por siña hopi for di Timoteo su excelente ehempel. Su asociacion cu Pablo a benefici’é mashá, i el a desaroyá for di un hóben tímido pa bira un superintendente. Hóbennan cristian, homber i muher, por saca hopi beneficio awe for di un asociacion similar. I si nan haci e sirbishi di Jehova nan carera, nan lo tin un abundancia di trabou balioso pa haci. (1 Corintionan 15:58) Nan por bira pionero, esta predicadó di tempu completo, den nan mes congregacion of nan por bai sirbi caminda e necesidad pa proclamadónan di Reino ta mas grandi. Entre e hopi posibilidadnan, tin e trabou di misionero den otro pais of sirbi n’e sede mundial di Sociedad Watch Tower of na un di su sucursalnan. I naturalmente, dor di duna un sirbishi di henter alma na Jehova, tur cristian por manifestá e mésun spiritu cu Timoteo a desplegá.

Bo ta deseá di sigui crece spiritualmente i pa ta útil den e organisacion di Jehova den cualkier posicion cu e por considerá apropiado? Anto haci manera Timoteo. Tantu cu ta posibel, haci bo mes disponibel. Ken sa ki futuro privilegionan di sirbishi lo por habri pa bo?

[Nota]

[Plachi na página 31]

“Mi no tin ningun otro cu un disposicion manera esun di dje”