Keda Vigilá Meskos ku Hesus
“Keda vigilá i hasi orashon.”—MAT. 26:41.
1, 2. (a) Ki preguntanan por surgi enkuanto Hesus su ehèmpel komo un persona ku a keda vigilá? (b) Hende imperfekto por imitá e ehèmpel perfekto di Hesus? Ilustrá.
‘HENDE por keda vigilá meskos ku Hesus?’ Abo a yega di hasi bo mes e pregunta ei? Kasi sigur bo ta pensa ku esei ta imposibel pasobra Hesus tabata un hòmber perfekto! Ademas, tabatin okashonnan ku Hesus por a mira adelantá kiko lo a sosodé míles di aña den futuro. Siendo ku esei tabata e kaso, lo bo por puntra: ‘Hesus tabatin motibu pa keda vigilá?’ (Mat. 24:37-39; Heb. 4:15) Ora nos haña kontesta pa e preguntanan ei, nos por komprondé dikon ta importante i urgente pa nos keda vigilá awe. Pues, laga nos ban trata nan.
2 Un hende imperfekto por imitá un ehèmpel perfekto? Sí, meskos ku un studiante por siña for di e ehèmpel di un bon maestro. Imaginá bo e siguiente situashon: Un hòmber ta siña tira flecha pa promé biaha. Komo ku despues di su promé lès, e no ta logra tira su flechanan di tal manera ku nan ta alkansá e blanko, e ta sigui tuma lès i ta sigui purba. Pa e por mehorá, e ta wak bon kon su instruktor, un eksperto den tiramentu di flecha, ta tira su flechanan. E ta wak kon e instruktor ta para, kon e ta pone su mannan i kon e ta usa su dedenan riba e liña di e bog. Tiki-tiki e studiante desididu akí ta komprondé kuantu tenshon e tin ku pone riba e liña. E ta siña tambe ku e tin ku tene kuenta ku bientu i ta sigui hasi esfuerso. Segun ku e ta imitá su instruktor, e ta logra tira su flechanan mas i mas serka di e blanko. Di mes manera, nos tin ku sigui hasi esfuerso pa mehorá nos kualidatnan kristian. Kon? Nos mester sigui e instrukshonnan di Hesus i imitá su ehèmpel perfekto.
3. (a) Kon Hesus a indiká ku e mester a keda vigilá? (b) Kiko nos lo trata den e artíkulo akí?
3 Awor, Hesus realmente tabatin motibu pa keda vigilá? Sí. Pensa riba e último anochi ku e tabata riba tera. El a urgi su fiel apòstelnan: “Keda lantá huntu ku mi.” Kaba el a bisa nan: “Keda vigilá i hasi orashon kontinuamente pa boso no kai den tentashon.” (Mat. 26:38, 41) Hesus semper a keda vigilá. Pero durante e oranan difísil ei, e kier a keda aun mas vigilá i mas tantu posibel den kontakto ku su Tata selestial. I e tabata sa ku su disipelnan tambe mester a keda alerta meskos kuné—no e ora ei so, sino den futuro tambe. P’esei, laga nos ban wak awor dikon Hesus ke pa nos tambe keda vigilá. Despues di esei, nos lo analisá tres manera ku nos por keda vigilá den nos bida diario meskos ku Hesus.
DIKON HESUS KE PA NOS KEDA VIGILÁ?
4. Dikon nos tin ku keda vigilá?
4 Ku poko palabra, Hesus ke pa nos keda vigilá pasobra aunke nos sa hopi kos enkuanto futuro, nos no sa tur kos. Awor kiko di Hesus? Ora e tabata riba tera, e tabata sa tur kos enkuanto futuro? Nò, humildemente el a rekonosé: “Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so.” (Mat. 24:36) Pues, e tempu ei, Hesus, “e Yu,” no tabata sa presis ki dia e fin di e mundu malbado akí lo bini. Kiko di nos awe? Nos tampoko no sa presis ta ki dia Yehova lo manda su Yu pa kaba ku e mundu malbado akí. Si nos tabata sa, nos lo no tin nodi di keda vigilá, no ta bèrdat? Pero manera Hesus a bisa, e fin lo bini diripiente. Pues, nos tin ku keda vigilá.—Lesa Mateo 24:43.
5, 6. (a) Kon loke nos sa tokante futuro i Dios su propósito ta yuda nos keda vigilá? (b) Dikon loke nos sa tokante Satanas mester hasi nos mas determiná pa keda vigilá?
5 Di otro banda, Hesus tabata sa kosnan maravioso enkuanto futuro ku mayoria di hende rònt di dje no tabata sa. Kiko di nos? Aunke nos no sa mes tantu ku Hesus, for di loke el a siña hende, nos a haña sa hopi tokante e Reino di Dios i loke esaki lo logra den futuro. Ora nos wak rònt di nos, sea na skol, na trabou òf den e teritorio kaminda nos ta prediká, kiko nos ta ripará? Wèl, ku mayoria di hende no sa e bèrdatnan maravioso akí. Anto esei ta un otro motibu pa keda vigilá. Meskos ku Hesus, semper nos mester ta alerta pa probechá di tur oportunidat ku presentá pa kompartí loke nos sa tokante e Reino di Dios. Nos no ke pèrdè niun di e oportunidatnan balioso ei, pasobra bida di hende ta den wega!—1 Tim. 4:16.
6 Hesus tabata sa tambe ku Satanas tabata desididu pa lag’é kai den tentashon, pa persiguié i pon’é kibra su integridat. Esei ta un otro motibu pakiko Hesus a keda vigilá. E enemigu kruel ei semper a keda alerta i tabata buska “un otro momento oportuno” pa pone Hesus na prueba. (Luk. 4:13) Hesus semper a keda vigilá pasobra e tabata kier ta prepará pa kualke prueba, sea ta tentashon, oposishon òf persekushon. Nos ta den e mesun situashon. Nos sa ku ainda Satanas ta “manera un leon ku ta grita, buskando ken e por habraká.” Ta p’esei, e Palabra di Dios ta konsehá tur kristian: “Mantené boso sano huisio i sea alerta.” (1 Ped. 5:8) Pero kon nos por hasi esei?
ORASHON TA YUDA NOS KEDA ALERTA
7, 8. Ki konseho Hesus a duna enkuanto orashon, i ki ehèmpel e mes a pone?
7 Segun Beibel, pa nos keda alerta, òf vigilá, i asina protehá nos relashon ku Yehova, orashon ta masha importante. (Kol. 4:2; 1 Ped. 4:7) Djis despues ku Hesus a pidi su disipelnan pa keda lantá huntu kuné, el a bisa nan: “Keda vigilá i hasi orashon kontinuamente pa boso no kai den tentashon.” (Mat. 26:41) E konseho ei a konta solamente pa Hesus i su disipelnan, kendenan tabata pasando den momentonan difísil? Nò, e ta un konseho ku nos tambe mester sigui tur dia.
8 Anto Hesus mes a mustra kon importante orashon ta. Podisé bo ta kòrda ku el a yega di pasa henter un anochi hasiendo orashon na su Tata. Laga nos purba visualisá e esena. (Lesa Lukas 6:12 i 13.) Ta lènte i probablemente Hesus ta serka di Kapernaum, e stat di piskadó, na Galilea. Ora ta kuminsá bira nochi, Hesus ta subi un di e serunan for di kua e tin un bista riba Laman di Galilea. Segun ku e paisahe ta bira mas i mas skur, probablemente e ta mira algun lus di lampi di zeta ta bria na Kapernaum i den e pueblonan den bisindario. Pero unabes ku Hesus kuminsá hasi orashon na Yehova, e no ta laga nada distra’é. Minüt- i oranan ta pasa. E no ta ripará mes ku e lusnan ta paga un tras di otro, ku luna ta sali ni e no ta tende e zonido di e bestianan ku ta move den bisindario. Probablemente e ta hasiendo orashon enkuanto un desishon importante ku e tin ku tuma; e tin ku skohe 12 apòstel. Siguramente Hesus lo a deshogá su kurason serka su Tata i a kont’é tur loke e tabata pensa i tur loke tabata preokup’é tokante kada disipel i a pidié guia i sabiduria.
9. Kiko nos por siña for di e echo ku Hesus a hasi orashon henter anochi?
9 Kiko nos por siña for di e ehèmpel di Hesus? Ku nos orashonnan mester dura oranan largu? Nò, pasobra relashoná ku su disipelnan, e mes a atmití bondadosamente: “Ta klaru ku e spiritu tin e boluntat, ma e karni ta débil.” (Mat. 26:41) No opstante, nos por imitá Hesus. Kon? Un manera ta di konsultá ku nos Tata selestial promé ku nos tuma kualke desishon ku por tin efekto riba nos, nos famia i nos rumannan den fe. Ademas, nos por hasi orashon pa nos rumannan den kongregashon. Kòrda tambe ku nos orashonnan mester ta di kurason i no un ripitishon di sierto ekspreshonnan fiho. Ripará tambe ku Hesus a tuma tempu pa papia den privá ku su Tata. Den e mundu okupá i anshá ku nos ta biba awe, ta masha fásil pa lubidá di hasi e kosnan di mas importante. Pa nos keda alerta, nos tin ku tuma sufisiente tempu pa hasi orashon di kurason i den privá. (Mat. 6:6, 7) I esei lo yuda nos hala mas serka Yehova, i nos lo hasi tur loke ta nesesario pa fortifiká nos relashon kuné i evitá tur loke por daña e relashon ei.—Sal. 25:14.
KEDA ALERTA DEN E TRABOU DI PREDIKÁ
10. Ki ehèmpel ta mustra ku Hesus a keda alerta i a probechá di tur oportunidat pa duna testimonio?
10 Hesus a keda alerta segun ku e tabata hasi e trabou ku Yehova a dun’é. Tin sierto trabounan ku ta permití hende pensa riba otro kos segun ku nan ta traha sin ku esaki tin konsekuensia serio. Sinembargo, hopi trabou ta eksigí pleno atenshon i pa e trahadó ta alerta. I e trabou di prediká sigur ta ún di nan. Hesus semper tabata alerta den su sirbishi na Dios i tabata buska oportunidat pa kompartí e bon notisia. Por ehèmpel, na un okashon ora e i su disipelnan a yega e stat Sikar despues ku nan a kana henter mainta, su disipelnan a bai kumpra kuminda. Hesus sí a keda atras na e pos di e stat pa sosegá. Ma el a keda alerta i a mira un oportunidat pa duna testimonio. Ta asina ku un muhé samaritano a bin saka awa n’e pos. Awor, Hesus por a disidí di drumi un ratu òf bini ku èksküs pa evitá un kòmbersashon. Ma e no a hasi esei; mas bien, el a kuminsá kòmbersá ku e señora i a dun’é un bon testimonio ku despues tabatin efekto riba bida di hopi hende den e stat ei. (Huan 4:4-26, 39-42) Nos por hasi mas esfuerso pa imitá Hesus? Nos por ta mas alerta i probechá di tur oportunidat pa kompartí e bon notisia ku hende ku nos ta topa tur dia?
11, 12. (a) Kiko Hesus a bisa e hendenan ku kier a kita su atenshon for di su trabou? (b) Kon Hesus a demostrá ku e tabata un persona balansá?
11 Na algun okashon tabatin hende, ku bon intenshon, ku a purba di kita Hesus su atenshon for di su trabou. Na Kapernaum, por ehèmpel, e hendenan a keda asina konmoví ku Hesus su milagernan ku nan tabata kier a ten’é serka nan. I esei ta komprendibel. Sinembargo, Hesus tabatin e asignashon pa prediká na tur “e karnénan pèrdí di e kas di Israel” i no den un stat so. (Mat. 15:24) P’esei el a bisa e hendenan ei: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:40-44) Ta bisto anto ku e kos di mas importante den bida di Hesus tabata e trabou di prediká i di siña hende. I e no a laga nada strob’é di kumpli ku esei.
12 Pero el a enfoká asina tantu riba su trabou ku el a bira un fanátiko òf un persona ku a priva su mes di tur plaser? Òf e tabata asina okupá den su sirbishi ku e no tabata konsiente di e otro nesesidatnan di hende? Nò, el a pone un ehèmpel perfekto komo un persona balansá. El a disfrutá di bida i a pasa momentonan plasentero huntu ku su amigunan. Ademas, e tabatin apresio pa hende; el a mustra interes den nan nesesidat- i problemanan i a mustra kariño pa mucha.—Lesa Marko 10:13-16.
13. Kon nos por keda vigilá i balansá den nos trabou di prediká meskos ku Hesus?
13 Kon nos por hasi esfuerso pa ta balansá meskos ku Hesus segun ku nos ta keda vigilá? Nos no ta laga e mundu akí kita nos atenshon for di nos trabou. Asta amigu- i famianan ku bon intenshon kisas ta urgi nos pa baha man den sirbishi òf pa hiba un bida ku segun nan ta normal. Pero si nos ta imitá Hesus, nos ta konsiderá nos sirbishi mes importante ku kuminda. (Huan 4:34) Dikon? Pasobra nos trabou ta fortifiká nos relashon ku Yehova i ta duna nos goso. No opstante, nunka nos ke ta personanan desbalansá ku ta hustu den nan mes bista òf ku ta priva nan mes di tur plaser. Meskos ku Hesus, nos ke ta felis i balansá, sirbiendo “e Dios felis.”—1 Tim. 1:11.
KEDA VIGILÁ DURANTE PRUEBA
14. Ki tendensia nos tin ku resistí ora nos ta konfrontá prueba, i dikon?
14 Manera nos a mira kaba, ora Hesus tabata bou di prueba severo, el a urgí su disipelnan pa keda vigilá. (Lesa Marko 14:37.) Ora nos haña nos den situashon difísil, ta masha importante pa nos imitá Hesus su ehèmpel. Pero ora hende ta bou di prueba, hopi di nan ta lubidá un bèrdat masha importante; e ta asina importante ku e buki di Proverbionan ta menshon’é dos bes: “Tin un kaminda ku ta parse bon den bista di hende, ma su fin ta e kaminda di morto.” (Pro. 14:12; 16:25) Pues, si nos dependé riba nos mes pensamentu, spesialmente ora nos ta konfrontá problema serio, tin hopi chèns ku nos ta pone nos mes i esnan ku nos ta stima den peliger.
15. Ki tentashon un kabes di famia ku ta lucha pa perkurá pa su famia por hañ’é kuné?
15 Un kabes di famia, por ehèmpel, por tin difikultat pa perkurá materialmente pa “e hendenan di su kas.” (1 Tim. 5:8) Lo e por haña gana di aseptá un trabou aunke esaki lo por strob’é di asistí regularmente na su reunionnan kristian, dirigí su adorashon komo famia òf partisipá den sirbishi. Si e ta dependé únikamente riba su pensamentunan, esei por parse un desishon hustifiká, asta korekto. Sinembargo, un desishon asina por pon’é daña su relashon ku Yehova i asta bandoná e kongregashon kristian. Pues ta muchu mas mihó pa sigui e konseho di Proverbionan 3:5 i 6! Einan Sálomon a bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”
16. (a) Riba ken su sabiduria Hesus a dependé, i kiko esaki ta siña nos? (b) Kon hopi kabes di famia ta imitá Hesus su ehèmpel durante tempu difísil?
16 Ora Hesus tabata bou di prueba, deliberadamente e no a dependé riba su mes komprondementu. Djis pensa riba esei! E hòmber di mas sabí ku a yega di biba riba tera a skohe pa no dependé riba su mes sabiduria. Por ehèmpel, ora Satanas a purba hinka Hesus den tentashon, bes tras bes el a kontest’é ku e frase akí: “Ta pará skirbí.” (Mat. 4:4, 7, 10) El a dependé riba e sabiduria di su Tata pa resistí tentashon i asina a mustra humildat, un kualidat ku Satanas no tin i ku e ta despresiá. Kiko di nos? Nos ta hasi meskos ku Hesus? Un kabes di famia ku ta keda vigilá meskos ku Hesus semper ta sigui e guia di e Palabra di Dios, spesialmente den tempu difísil. I esei ta loke míles di kabes di famia ta hasi rònt mundu. Konsistentemente nan ta pone e Reino di Dios i adorashon berdadero na promé lugá den nan bida, asta promé ku kosnan material. Di e manera ei, nan ta duna nan famia lo mihó. I Yehova, na su turno, ta bendishoná e esfuerso ku nan ta hasi pa perkurá pa nan nesesidatnan material, manera su Palabra ta primintí.—Mat. 6:33.
17. Kiko ta motivá bo pa keda vigilá meskos ku Hesus?
17 No tin duda, Hesus a pone e mihó ehèmpel pa nos; si nos ke keda vigilá, nos tin ku imit’é. Su ehèmpel ta práktiko, bon pa nos i por asta salba bida. No lubidá ku Satanas su deseo di mas grandi ta pa bo pega soño i bira débil den sentido spiritual, i asina pèrdè bo zelo pa adorá Yehova i kibra bo integridat. (1 Tes. 5:6) No dun’é chèns di kumpli ku su deseo! Keda vigilá meskos ku Hesus—tuma tempu pa hasi orashon, sea alerta den sirbishi i dependé riba e sabiduria di Dios ora di trata ku prueba. Asina, lo bo ta felis i lo bo disfrutá di un bida ku propósito i satisfasiente asta den e último dianan di e mundu akí ku ta serka di yega na su fin. Ademas, si bo keda vigilá, ora Hesus bini pa trese fin na e mundu akí, lo e haña bo alerta i aktivo, hasiendo e boluntat di su Tata. I Yehova lo ta kontentu pa rekompensá bo pasobra bo a keda fiel i leal na dje.—Rev. 16:15.
[Plachi na página 16]
Hesus a duna e muhé na e pos testimonio. Ki oportunidat abo ta probechá di dje pa prediká tur dia?
[Plachi na página 17]
Si bo ta perkurá pa bo famia den sentido spiritual, bo ta demostrá ku bo ta alerta