Siña e Sekreto di Keda Kontentu ku Loke Bo Tin
Den un karta animante na e kristiannan di Filípos, apòstel Pablo a skirbi: “Mi a siña di ta kontentu den ki sirkunstansia ku mi haña mi aden. . . . Den kualkier i den tur sirkunstansia mi a siña e sekreto di ta barika yen i di pasa hamber, tantu di tin abundansia komo di pasa nesesidat.”—Filipensenan 4:11, 12.
Pablo tabata kontentu ku loke e tabatin. Kiko tabata su sekreto? Teniendo kuenta ku e kosto di bida haltu i e instabilidat ekonómiko di nos tempu, sigur lo ta bon pa kristiannan berdadero siña kon nan por keda kontentu ku loke nan tin pa asina nan por keda enfoká riba nan sirbishi na Dios.
MAS promé den su karta, Pablo a deskribí e karera eksitoso ku ántes e tabatin. El a bisa: “Si algun otro hende ta kere di por pone konfiansa den e karni, ami muchu mas: sirkunsidá riba e di ocho dia, di e nashon di Israel, di e tribu di Benyamin, un hebreo di hebreonan; enkuanto lei, un fariseo; enkuanto selo, un persiguidó di iglesia; enkuanto e hustisia ku tin den lei, sin kulpa.” (Filipensenan 3:4-6) Ademas, komo un hudiu fanátiko, Pablo a haña outoridat i tambe respaldo serka e saserdotenan prinsipal na Yerúsalèm. Tur esaki a indiká ku den futuro lo e tabatin poder i prestigio riba tereno polítiko, religioso i sin duda tambe finansieramente den e sistema hudiu.—Echonan 26:10, 12.
Sin embargo, ora Pablo a bira un predikadó kristian seloso, kosnan a kambia drástikamente. Pa kousa di e bon nobo e tabata dispuesto pa bandoná su karera eksitoso i tur loke anteriormente tabata importante. (Filipensenan 3:7, 8) Kon e mester a perkurá pa su mes awor? Lo el a risibí un salario komo predikadó? Kon e por a satisfasé su nesesidatnan personal?
Pablo a efektuá su ministerio sin risibí pago. P’esei, p’e no tabata un karga pa esnan ku e tabata sirbi, el a djòin Akila i Prisila den e trabou di traha tènt ora e tabata na Korinto, i tambe el a hasi otro kosnan pa sostené su mes. (Echonan 18:1-3; 1 Tesalonisensenan 2:9; 2 Tesalonisensenan 3:8-10) Pablo a hasi tres biahe largu komo misionero, i tambe el a biaha pa bishitá e kongregashonnan ku tabatin mester di un bishita. Dor ku e tabata kompletamente okupá ku e sirbishi di Dios, e no tabatin muchu pertinensia material. Normalmente e rumannan tabata perkurá pa su nesesidatnan. Pero debí na sirkunstansianan difísil a yega di sosodé ku el a hañ’é den nesesidat. (2 Korintionan 11:27; Filipensenan 4:15-18) Tòg, nunka Pablo a keha tokante su situashon penoso, ni e no a kudishá loke otronan tabatin. E tabata dispuesto i kontentu pa traha na benefisio di su kompañeronan kristian. De echo, ta Pablo ta esun ku a sita e palabranan bon konosí di Hesus: “Ta mas bendishoná pa duna ku pa risibí.” Esta un ekselente ehèmpel pa nos!—Echonan 20:33-35.
Kiko Kier Men Kontentá Bo Mes ku Loke Bo Tin
E faktor prinsipal ku a kontribuí na Pablo su felisidat i satisfakshon ta e echo ku e tabata kontentu ku loke e tabatin. Kiko esei ta nifiká? Ku palabranan simpel, e ta nifiká keda kontentu ku e kosnan básiko. Relashoná ku esaki, Pablo a bisa su kompañero di sirbishi Timoteo: “Ma di bèrdat, santidat akompañá pa kontentamentu [“keda kontentu ku loke bo tin,” NW] ta di gran ganashi. Pasobra nos no a trese nada den mundu, i nos no por hiba nada for di dje tampoko. I si nos tin kuminda i paña pa bisti, ku esakinan nos mester ta kontentu.”—1 Timoteo 6:6-8.
Tuma nota ku Pablo a relashoná kontentamentu ku santidat òf deboshon na Dios. El a rekonosé ku berdadero felisidat no ta bini dor di pertinensianan material òf rikesa, sino dor di deboshon na Dios, ku ta nifiká pone e sirbishi na Dios na promé lugá. Pa Pablo, “kuminda i paña pa bisti” tabata simplemente medionan pa yud’é sigui ku su deboshon na Dios. Pues Pablo por a keda kontentu ku loke e tabatin dor di dependé riba Yehova, sin importá ki sirkunstansia e haña su mes aden.
Hopi hende awe ta tur na ansha i infelis pasobra nan no konosé e sekreto aki òf nan ta ignor’é. En bes di siña kontentá nan ku loke nan tin, nan ta preferá di pone nan konfiansa den plaka i loke plaka por kumpra. E industria di propaganda i medionan di komunikashon ta laga hende sinti ku nan no ta felis si nan no por disponé mesora di e produkto- i aparatonan di mas moderno i karu. Konsekuentemente, hopi di nan ta bira víktima di e korementu tras di plaka i kosnan material. En bes di haña felisidat i satisfakshon, nan ta “kai den tentashon i den trampa i den hopi deseonan loko i dañino, kuanan ta hundi hende den ruina i destrukshon.”—1 Timoteo 6:9, 10.
Nan A Siña e Sekreto
Ta realmente posibel pa haña felisidat i satisfakshon awendia dor di hiba un bida di kontentamentu i deboshon na Dios? Sí, ta posibel. De echo, awendia tin miónes di hende ta biba presisamente asina. Nan a siña e sekreto pa keda kontentu ku e kosnan material ku nan tin. Nan ta Testigunan di Yehova ku a dediká nan mes na Dios, i ku ta hasi su boluntat i ta siña hende tur kaminda e propósito di Dios.
Konsiderá por ehèmpel esnan ku a ofresé nan mes pa ser entrená i mandá komo misionero na paisnan deskonosí pa prediká e evangelio di e Reino di Dios. (Mateo 24:14) Hopi bes e kondishonnan di bida den e paisnan ku nan ta bai no ta mes avansá ku loke nan a kustumbrá kuné. Por ehèmpel, ora e misioneronan a yega un pais na Asia na prinsipio di 1947, ainda e efektonan di guera tabata bisto, i masha poko kas tabatin koriente. Den hopi pais, e misioneronan a bin topa ku mester a laba paña un pa un na washi òf riba baranka den riu en bes di usa wasmashin eléktriko. Pero ta e bèrdat nan a bin siña e pueblo, pues nan a adaptá nan mes na e sirkunstansianan lokal i a okupá nan mes ku e sirbishi.
Otronan a kuminsá traha den e sirbishi di tempu kompleto òf a muda bai áreanan kaminda e bon nobo no a ser prediká ainda. Adulfo a traha komo un predikadó di tempu kompleto pa mas ku 50 aña na vários parti di Mexico. El a bisa: “Meskos ku apòstel Pablo, ami ku mi kasá a siña adaptá nos mes na e sirkunstansianan di bida. Por ehèmpel, un di e kongregashonnan ku nos a bishitá tabata hopi leu for di stat òf plasa. Komo kuminda, nan tabata kontentá nan mes ku un tortiya ku un tiki res, salu i un kòpi kòfi. Esei tabata tur loke nan tabatin pa kome, tres tortiya pa dia. Pues nos a siña biba meskos ku nos rumannan. Mi a disfrutá di vários eksperensia manera esaki durante e 54 añanan ku mi tin ta sirbi Yehova den sirbishi di tempu kompleto.”
Florentino ta kòrda kon e ku su famia mester a adaptá nan mes na sirkunstansianan difísil. Kòrdando e promé añanan di su bida, e ta bisa: “Mi tata tabata un komersiante próspero. E tabatin hopi tereno. Ainda mi ta kòrda e tonbank ku nos tabatin den nos tienda. E tabatin un lachi di mas o ménos 50 sèntimeter hanchu, 20 sèntimeter haltu i partí den kuater. Eiden nos tabata warda e sènnan ku nos risibí durante dia. Na final di dia semper e tabata asina yen di sèn lòs i di papel ku kasi nan tabata basha afó.
Anto diripiente, nos a haña nos den problema finansiero i nos a sali di abundansia i kai den pobresa. Fuera di nos kas, nos a pèrdè tur kos. Ademas, un di mi ruman hòmbernan a haña un aksidente i a keda paralisá di su sintura bai abou. Nada no tabata meskos mas. Pa un tempu mi tabata traha komo bendedó di fruta i karni. Tambe mi tabata kosechá katuna, dreifi i alfalfa, i mi tabata muha kunuku. Algun hende tabata yama mi hèndimèn. Hopi bes mi mama tabata konsolá nos dor di bisa ku nos tin e bèrdat, un rikesa spiritual ku masha poko hende tabatin. Pues mi a siña kiko kier men biba den abundansia i tambe ku un tiki òf nada mes. Awor ku mi a sirbi Yehova tempu kompleto pa mas o ménos 25 aña, mi por bisa ku semper mi tabatin e goso di sa ku mi a skohe e mihó manera di biba, esta, sirbi Yehova tempu kompleto.”
Beibel ta bisa nos enfátikamente ku “e mundu aki den su forma aktual ta pasando.” Ta p’esei e ta urgi nos: “[Laga] esnan ku ta regosihá, [ser] komo si fuera nan no a regosihá; i esnan ku ta kumpra, komo si fuera nan no tabatin nada; i esnan ku ta hasi uso di e kosnan di mundu, komo si fuera nan no a hasi uso kompleto di nan.”—1 Korintionan 7:29-31.
P’esei awor ta tempu pa bo analisá e manera ku bo ta biba. Si bo no ta hende di hopi rekurso, tene kuidou pa bo no bira amargá ni envidiá otronan. Di otro banda, sin importá kuantu kos material bo tin, ta sabí pa bo duna nan e debido lugá den bo bida pa nan no bira bo doño. I manera apòstel Pablo a spièrta, fiha bo speransa no “riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.” Si bo ta hasi esei, bo tambe por bisa ku bo a siña e sekreto di keda kontentu ku loke bo tin.—1 Timoteo 6:17-19.
[Plachi na página 9]
Pablo a traha ku su propio man p’e no bira un karga pa otro hende
[Plachi na página 10]
Míles di hende ta hañando felisidat den un bida di “santidat akompañá pa kontentamentu”