Practicá Birtud den un Mundu Yen di Bicio

“Sigui haci tur cos liber di kehamentu i pleitamentu, pa boso por yega di ta liber di culpa i inocente, yunan di Dios sin mancha meimei di un generacion trocí i perverso.”—FILIPENSENAN 2:14, 15.

 1, 2. Pakico Dios a exigí pa exterminá e cananeonan?

JEHOVA su mandamentunan no ta laga espacio pa comprometé. E israelitanan tabata cla pa drenta e Tera Primintí ora profeta Moises a bisa nan: “Sin falta bo mester entregá nan completamente na destruccion, e hititanan i e amoreonan, e cananeonan i e perizitanan, e heveonan i e hebuseonan, net manera Jehova bo Dios a mandá bo.”—Deuteronomio 7:2; 20:17.

² Siendo cu Jehova ta un Dios misericordioso, pakico el a exigí pa exterminá e habitantenan di Canan? (Exodo 34:6) Un motibu tabata ‘pa e cananeonan no siña Israel haci segun tur e cosnan detestabel cu nan a haci na nan diosnan i asina peca contra Jehova Dios.’ (Deuteronomio 20:18) Tambe Moises a bisa: “Ta pa e maldad dje nacionnan aki cu Jehova ta bai expulsá nan for di dilanti bo.” (Deuteronomio 9:4) E cananeonan tabata e personificacion mes di bicio. Perversidad sexual i idolatria tabata e seyo di nan adoracion. (Exodo 23:24; 34:12, 13; Númeronan 33:52; Deuteronomio 7:5) Incesto, sodomia i actonan sexual cu bestia tabata ‘e caminda dje tera di Canan.’ (Levítico 18:3-25) Muchanan inocente a ser sacrificá cruelmente na dios falsu. (Deuteronomio 18:9-12) Nada straño cu Jehova a husga cu e existencia so caba dje nacionnan aki tabata un menasa p’e bienestar físico, moral i spiritual di su pueblo!—Exodo 34:14-16.

 3. Dor cu e israelitanan no a ehecutá e ordunan di Dios completamente relacioná cu e habitantenan di Canan, kico tabata e resultado?

³ Pa motibu cu e ordunan di Dios no a ser ehecutá completamente, hopi habitante di Canan a keda biba ei despues cu Israel a conkistá e Tera Primintí. (Huesnan 1:19-21) Cu tempu, Israel a sinti e influencia sutil dje cananeonan, te cu Bijbel por a bisa: “Nan [e israelitanan] a sigui rechasá [Jehova] su disposicionnan reglamentario i su pacto cu el a cera cu nan antepasadonan i su recordatorionan cu cua el a spierta nan, i nan a bai sigui ídolonan bano i a bira bano nan mes, asta imitando e nacionnan cu tabata tur rond di nan di cua Jehova a manda nan pa no haci mescos cu nan.” (2 Reynan 17:15) Sí, den transcurso di añanan hopi israelita a practicá net e bicionan cu a pone Dios manda pa exterminá e cananeonan—idolatria, excesonan sexual i asta sacrificio di mucha!—Huesnan 10:6; 2 Reynan 17:17; Jeremías 13:27.

 4, 5. (a) Kico a sosodé cu Israel i Huda infiel? (b) Ki spiertamentu Filipensenan 2:14, 15 ta duna, i ki preguntanan ta lanta?

⁴ P’esei profeta Oséas a declará: “Tende e palabra di Jehova, O yunan di Israel, pasobra Jehova tin un caso hudicial cu e habitantenan dje tera, pasobra no tin berdad ni bondad amoroso ni conocimentu di Dios den e tera. Tin e pronunciacion di maldicionnan i práctica di engaño i asesinato i robo i cometementu di adulterio cu a dal aden, i actonan di dramamentu di sanger a topa otro actonan di dramamentu di sanger. P’e motibu ei e tera lo ta di luto i tur habitante den dje lo tin cu desvanecé cu e bestia salbahe di campo i cu e criatura buladó di shelu, i asta e piscánan di laman mes lo ser recogé den morto.” (Oséas 4:1-3) Na 740 P.E.C., e reino corupto di Israel den nort a ser conkistá dor di Asiria. Algu mas cu un siglo despues, e reino infiel di Huda den zuid a ser conkistá dor di Babilonia.

⁵ E sucesonan aki ta ilustrá con peligroso por ta pa permití bicio dominá nos bida. Dios ta aborecé perversidad i lo no toler’é entre su pueblo. (1 Pedro 1:14-16) Ta cierto cu nos ta biba den e “mal sistema di cosnan actual,” den un mundu cu ta birando mas i mas corupto. (Galationan 1:4; 2 Timoteo 3:13) Tog, e Palabra di Dios ta exhortá tur cristian pa sigui actua den un manera cu nan ta “liber di culpa i inocente, yunan di Dios sin mancha meimei di un generacion trocí i perverso, entre cua [nan] ta briya como iluminadónan den e mundu.” (Filipensenan 2:14, 15) Pero con nos por practicá birtud den un mundu yen di bicio? Ta realmente posibel pa haci esei?

E Mundu Romano Yen di Bicio

 6. Pakico no tabata fácil pa cristiannan di promé siglo practicá birtud?

⁶ Pa cristiannan di promé siglo no tabata fácil pa practicá birtud pasobra bicio tabata presente den tur aspecto dje sociedad romano. E filósofo romano Seneca a bisa di su contemporáneonan: “Hende ta lucha den un rivalidad poderoso di maldad. Tur dia e deseo pa haci malu ta mas grandi, e temor pa haci malu ta ménos.” El a compará e sociedad romano cu “un comunidad di bestia salbahe.” No ta un sorpresa, anto, cu pa entretenimentu e romanonan a sali en busca di competencianan sadístico di gladiador i funcionnan teatral obseno.

 7. Con Pablo a describí e bicionan cu tabata comun entre hopi hende den e promé siglo E.C.?

⁷ Apostel Pablo por tabatin na mente e conducta degradá di hende den e promé siglo ora el a skirbi: “Dios a entregá nan na apetit sexual bergonsoso, pasobra tantu nan hende muher a cambia e uso natural di nan mes na loke ta contrario cu naturalesa; i di igual manera asta e hombernan a bandoná uso natural di hende muher i a bira violentamente cendí den nan deseo sexual un pa otro, homber cu homber, obrando loke ta obseno i ricibiendo den nan mes e recompensa completo, cu tabata debí na nan pa nan eror.” (Romanonan 1:26, 27) Determiná pa sigui tras di deseonan carnal impuru, e sociedad romano a bira inundá cu bicio.

 8. Con mucha tabata ser explotá hopi biaha den e sociedad griego i romano?

⁸ Historia no ta specificá e grado di homosexualidad entre e romanonan. Sin embargo, no tin duda cu nan a ser influenciá dor di nan predecesornan griego, entre cua homosexualidad a ser practicá ampliamente. Tabata un custumber pa hombernan di mas edad corumpí mucha homber yong, tumando nan bou di nan cuido den un relacion di alumno-maestro cu hopi biaha a hiba e hobencitonan den conducta sexual perverso. Indudablemente, Satanas i su demoñonan tabata tras di tal bicio i abusu di mucha.—Joël 3:3; Hudas 6, 7.

 9, 10. (a) Den ki manera 1 Corintionan 6:9, 10 a condená vários clase di bicio? (b) Kico tabata e antecedente di algun persona den e congregacion corintio, i ki cambio a tuma lugá den nan caso?

⁹ Skirbiendo bou di inspiracion divino, Pablo a bisa cristiannan na Corinto: “Kico! Boso no sa cu personanan inhustu lo no heredá e reino di Dios? No sea gañá. Ni fornicadó, ni idólatra, ni adúltero, ni homber wardá pa propósito innatural, ni homber cu ta drumi cu homber, ni ladron, ni haragan, ni buraché, ni zundradó, ni estafadó lo heredá e reino di Dios. I tog esei ta loke algun di boso tabata. Pero boso a ser labá limpi, pero boso a ser santificá, pero boso a ser declará hustu den e nomber di nos Señor Jesucristo i cu e spiritu di nos Dios.”—1 Corintionan 6:9-11.

¹⁰ Asina, Pablo su carta inspirá a condená inmoralidad sexual, bisando cu ‘fornicadónan’ lo no “heredá e reino di Dios.” Sin embargo, despues di a mencioná un cantidad di bicio, Pablo a bisa: “Esei ta loke algun di boso tabata. Pero boso a ser labá limpi.” Cu yudansa di Dios tabata posibel pa malechornan bira limpi den su bista.

11. Con a bai cu e cristiannan dje promé siglo den e ambiente malbado di nan tempu?

¹¹ Sí, birtud cristian a prosperá asta den e mundu yen di bicio dje promé siglo. Creyentenan a ser ‘transformá dor di rehací nan mente.’ (Romanonan 12:2) Nan a bandoná nan “manera di anda anterior” i a ser ‘hací nobo den e forsa cu ta impulsá nan mente.’ Asina nan a hui for dje bicionan dje mundu i a “bisti e personalidad nobo cu a ser creá segun e boluntad di Dios den berdadero husticia i lealtad.”—Efesionan 4:22-24.

E Mundu Djawe Yen di Bicio

12. Ki cambio a tuma lugá rond mundu desde 1914?

¹² Kico di nos tempu? E mundu den cua nos ta biba ta mas yená cu bicio cu nunca. Specialmente desde 1914 tabatin un decadencia moral rond mundu. (2 Timoteo 3:1-5) Rechasando ideanan tradicional tocante birtud, moralidad, bon reputacion i ética, hopi hende a bira egocéntrico den nan manera di pensa i ta “mas ayá di tur sentido moral.” (Efesionan 4:19) E revista Newsweek a bisa: “Nos ta biba den un era di relativismo moral,” agregando cu e clima moral prevalente “a reducí tur concepto di loke ta bon i malu na un asuntu di gustu personal, preferencia emocional of opcion cultural.”

13. (a) Con hopi dje entretenimentu djawe ta promové bicio? (b) Ki mal efecto entretenimentu inapropiado por tin riba individuonan?

¹³ Mescos cu den e promé siglo, entretenimentu decadente ta comun awe. Television, radio, película i video ta percurá un suministro constante di material cu ta contené sexualidad. Bicio a infiltrá asta den netwerk di computer. Segun un estudio cu un universidad a publicá, awor pornografia riba computer ta “un dje aplicacionnan recreativo mas grandi (si no ta esun di mas grandi) di usuarionan di netwerk di computer.” Kico ta e efecto di tur esaki? Un columnista di corant ta bisa: “Ora dramamentu di sanger i violencia i sex barata ta saturá nos cultura popular, nos ta custumbrá cu sanger i violencia i sex barata. Nos ta perde heful. Perversidad ta bira cada bes mas tolerabel pasobra cada bes ménos cos ta shok nos.”—Compará cu 1 Timoteo 4:1, 2.

14, 15. Ki evidencia tin cu moralidad sexual a deteriorá rond mundu?

¹⁴ Considerá e informe aki den The New York Times: “Loke lo a ser considerá escandaloso 25 aña pasá awor a bira un areglo aceptabel di biba huntu sin casa. E cantidad di parehanan cu ta scoge pa biba huntu en bes di casa a subi cu 80 porciento [na Merca] entre 1980 i 1991.” Esaki no ta djis un fenómeno norteamericano. E revista Asiaweek ta informá: “Un debate cultural ta tumando lugá den paisnan rond parti di [Asia]. E cuestion ta libertad sexual versus balornan tradicional, i e presionnan pa cambio ta creciendo constantemente.” Estadísticanan den hopi pais ta mustra cu cada bes mas hende ta aceptá adulterio i sex promé cu matrimonio.

¹⁵ Bijbel a predicí cu actividad satánico lo ta intenso den nos tempu. (Revelacion 12:12) P’esei, no mester sorprendé nos anto cu bicio ta prevalente den un forma alarmante. Por ehempel, e explotacion sexual di mucha a alcansá proporcionnan epidémico.a E organisacion di Nacionnan Uní cu ta manehá fondo pa mucha (UNICEF) ta informá cu “explotacion sexual pa propósitonan comercial ta dañando mucha den prácticamente tur pais di mundu.” Tur aña “segun informe mas cu 1 miyon mucha rond mundu ta ser forsá pa drenta prostitucion di mucha, traficá i bendí pa propósitonan sexual, i usá den produccion di pornografia di mucha.” Homosexualidad tambe ta comun, miéntras cu hopi biaha algun político i lider religioso ta hiba e delantera den promov’é como un “estilo di bida alternativo.”

Rechasando e Mundu Su Bicionan

16. Ki posicion Testigonan di Jehova ta tuma relacioná cu moralidad sexual?

¹⁶ Testigonan di Jehova no ta di acuerdo cu esnan cu ta respaldá normanan permisivo di moralidad sexual. Tito 2:11, 12 ta bisa: “E bondad inmerecí di Dios cu ta trece salbacion na tur sorto di hende a ser manifestá, instruyendo nos pa rechasá maldad i deseonan mundano i biba cu sano huicio i husticia i debocion piadoso den e sistema actual di cosnan aki.” Sí, nos ta cultivá un berdadero odio, un repugnancia, contra bicionan manera sex promé cu matrimonio, adulterio i actonan homosexual.b (Romanonan 12:9; Efesionan 5:3-5) Pablo a duna e spiertamentu aki: “Laga tur hende cu ta nombra e nomber di Jehova renunciá inhusticia.”—2 Timoteo 2:19.

17. Con cristiannan berdadero ta mira e uso di bebida alcohólico?

¹⁷ Cristiannan berdadero ta rechasá e mundu su punto di bista di bicionan aparentemente menor. Por ehempel, hopi hende awe ta mira abusu di alcohol cu un humor irónico. Pero e pueblo di Jehova ta tuma e conseho di Efesionan 5:18 na pechu: “No bira burachi cu biña, den cua tin corupcion, sino sigui yena boso cu spiritu.” Si un cristian ta scoge pa bebe, e ta haci esei cu moderacion.—Proverbionan 23:29-32.

18. Con principionan di Bijbel ta guia Jehova su sirbidónan den nan trato cu miembronan di famia?

¹⁸ Como sirbidónan di Jehova, nos ta rechasá tambe e punto di bista di algun persona den e mundu cu ta haña ta aceptabel pa grita nan casá i yunan of zundra nan cu palabranan ofensivo. Cu un determinacion pa sigui tras di un curso birtuoso, esposo i esposanan cristian ta traha huntu pa aplicá Pablo su conseho: “Boso kita tur amargura malicioso i furia i rabia i griteria i abla ofensivo for di boso, huntu cu tur maldad. Mas bien, bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.”—Efesionan 4:31, 32.

19. Te na ki grado bicio ta prevalecé den e mundu di comercio?

¹⁹ Desonestidad, fraude, gañamentu, tácticanan comercial baho i hortamentu tambe ta comun awe. Un artículo den e revista comercial CFO ta informá: “Un encuesta di 4.000 trahadó . . . a saca na cla cu 31 porciento di esnan encuestá tabata testigo di ‘mal conducta serio’ durante e aña anterior.” E mal conducta ei a encerá gañamentu, falsificacion di registronan, intimidacion sexual i ladronicia. Si nos kier keda moralmente limpi den bista di Jehova, nos tin cu evitá conducta asina i ser onesto den nos tratonan financiero.—Mikéas 6:10, 11.

20. Pakico cristiannan mester ta liber di “amor pa placa”?

²⁰ Considerá loke a sosodé cu un homber cu a kere cu lo e bai tin mas tempu p’e sirbishi di Dios si e haci un ganashi brutu den un aventura financiero. El a atraé otronan den un plan di inversion dor di exagerá mashá e ganashinan cu nan por a saca. Ora esakinan no a materialisá, el a bira asina desesperá pa compensá e inmenso pérdidanan cu tabatin, cu el a horta placa cu a ser confiá na dje. Pa motibu di su accionnan i actitud no repentí, el a ser expulsá for dje congregacion cristian. En berdad, e siguiente spiertamentu bíblico ta cierto: “Esnan cu ta determiná di bira ricu ta cai den tentacion i un las i hopi deseo insensato i perhudicial, cu ta tira hende den destruccion i ruina. Pasobra amor pa placa ta rais di tur sorto di cos perhudicial, i percurando pa realisá e amor aki algun a ser desviá for dje fe i a hinca nan mes tur caminda cu hopi dolor.”—1 Timoteo 6:9, 10.

21. Ki conducta ta comun entre hende cu tin poder den e mundu, pero con esnan cu tin posicion di responsabilidad den e congregacion cristian mester comportá nan mes?

²¹ Hende mundano cu tin poder i influencia hopi biaha ta falta birtud i ta demostrá e berdad dje dicho, ‘Poder ta corumpí.’ (Eclesiástes 8:9) Den algun pais, soborno i otro formanan di corupcion ta comun entre hues, polis i políticonan. Sin embargo, esnan cu ta hiba delantera den e congregacion cristian mester ta birtuoso i no mag dominá riba otronan. (Lucas 22:25, 26) Ancianonan i tambe sirbidónan ministerial, no ta sirbi “pa amor pa ganashi desonesto.” Nan mester protehá nan mes contra cualkier intento pa pervertí of influenciá nan sano huicio cu e posibilidad di enrikesé nan mes.—1 Pedro 5:2; Exodo 23:8; Proverbionan 17:23; 1 Timoteo 5:21.

22. Kico e siguiente artículo lo trata cuné?

²² Por lo general, cristiannan ta enfrentando cu éxito e desafio djawe di practicá birtud den nos mundu yen di bicio. Sin embargo, birtud ta enbolbé mas cu simplemente evitá maldad. E siguiente artículo lo considerá kico cultivá birtud realmente ta rekerí.

[Nota]

Puntonan pa Repaso

◻ Pakico Jehova a ordená pa exterminá e cananeonan?

◻ Ki bicionan tabata comun den e promé siglo, i con a bai cu e cristiannan den e ambiente ei?

◻ Ki evidencia tin cu mundu ta testigo di un deterioro moral mundial desde 1914?

◻ Ki bicionan comun e pueblo di Jehova mester rechasá?

[Plachi na página 9]

Cristiannan di promé siglo a practicá birtud, maske nan a biba den un mundu yen di bicio

[Plachi na página 10]

Bicio a infiltrá asta den netwerk di computer, dunando hopi hóben i otronan acceso na material pornográfico

[Plachi na página 12]

Cristiannan tin cu practicá birtud, i no imitá e tácticanan desonesto di otronan