Siñanza Divino Contra Siñanza Di Demoño
“Algun lo cai for dje fe, prestando atencion na expresion inspirá engañoso i siñanza di demoño.”—1 TIMOTEO 4:1.
IMAGINÁBO cu bo ta pasa henter bo bida den un zona di gera. Con bo bida lo tá si bo ta bai drumi scuchando e sonido di tiramento di scopet i manece tendiendo e sonido di cañón? Infelizmente, den algun parti di mundo, ta asina cu hende realmente ta biba. Pero, den un sentido spiritual, tur hende cristian ta biba asina. Nan ta den un bataya grandi cu a ser bringá pa mas cu 6.000 aña i den nos tempo el a intensificá. Cua gera a sigi pa siglonan? E bataya di berdad contra mentira, di siñanza divino contra siñanza di demoño. No ta un exageracion pa yama e bataya—of por lo menos e accion di un participante principal—e conflicto di mas cruel i mas fatal den e historia di humanidad.
2 Apóstol Pablo a menciona e dos banda dje conflicto ora el a skirbi na Timoteo: “E expresion inspirá ta bisa definitivamente cu den periodo di tempo despues algun lo cai for dje fe, prestando atencion na expresion inspirá engañoso i siñanza di demoño.” (1 Timoteo 4:1) Tuma nota di cu e siñanza di demoño lo tin influencia specialmente den “periodo di tempo despues.” Mirá desde e tempo di Pablo, nos ta biba den tal tempo. Tuma nota, també, di loke ta opone e siñanza di demoño, esta “e fe.” Den e texto, “e fe” ta representa siñanza divino, fundá ariba declaracion divino cu Dios a inspira cu e Bijbel ta contene. Tal fe ta duna bida. E ta siña hende cristian pa haci e boluntad di Dios. E ta e berdad cu ta hiba na bida eterna.—Juan 3:16; 6:40.
3 Ken cu ta cai for dje fe no ta obtene bida eterna. Nan ta víctima dje gera. Ki un resultado trágico si bo ta permiti siñanza di demoño desviábo! (Mateo 24:24) Con nos como hende individual por evita di ser víctima? Door di rechaza totalmente tal siñanza gañador, locual Satanás e Diabel, “e gobernante di demoño,” ta usa pa cumpli cu su propósito. (Mateo 12:24) Ta keda bisto cu e siñanza di Satanás ta mentira, siendo cu Satanás ta “tata di mentira.” (Juan 8:44) Considera ki aptamente el a usa mentira pa desviá nos promé mayornan.
Siñanza di demoño desenmascará
4 Tal suceso ta pará skirbí den e Bijbel den Génesis 3:1-5. Usando un colebra, Satanás a yega cerca e hende muher, Eva, i a puntré: “Ta realmente cierto cu Dios a bisa cu boso no mag come di tur palu den e hofi?” E pregunta ta parce inocente, pero lezé di nobo. “Ta realmente cierto?” Satanás a expresa sorpresa, como si el a puntra, ‘Pakico Dios a bisa tal cos?’
5 Den su inocencia, Eva a indica cu esei tabata cierto. Eva a conoce e siñanza divino tocante e asunto, di cu Dios a bisa Adam cu nan lo muri si nan come dje palu di conocimento di bon i malu. (Génesis 2:16, 17) Ta parce cu e pregunta di Satanás a lanta e interés di Eva, di manera cu el a scucha ora Satanás a presenta e punto principal di su argumento: “Anto e colebra a bisa e muher: ‘Boso positivamente lo no muri.’ ” Ki un cos malu pa bisa! Satanás a acusa Jehova, e Dios dje berdad, e Dios di amor, e Creador, di papia mentira cu Su yiunan terrenal!—Salmo 31:5; 1 Juan 4:16; Revelacion 4:11.
6 Pero, Satanás a sigi papia. El a bisa: “Pasobra Dios sa cu net riba e dia cu boso come di dje boso wowo mester habri i boso mester ser manera Dios, conociendo bon i malu.” Segun Satanás, Jehova Dios—cu a percura asina abundantemente pa nos promé mayornan—kier a kita algo maraviyoso foi nan. E kier a prevenínan di ser manera e diosnan. Asina, Satanás a desafiá e husticia di Dios. Además, el a promove cumplimento cu bo mes deseo i ignora deliberadamente e ley di Dios, bisando cu desobedencia ta beneficioso. En efecto, Satanás tabata desafiá e soberanía di Dios riba Su mes creacion, bisando falsamente cu Dios no tin derecho di pone límite pa loke hende ta haci.
7 Cu e palabra ei di Satanás, e siñanza di demoño a presenta. Tal siñanza perverso ainda ta promove principio perverso similar. Mescos cu el a haci den e hofi di Eden, Satanás, hunto cu otro spiritu rebelde cu a uni cuné, ta sigi desafiá e derecho di Dios di establece ley pa goberna accion di hende. Ainda e ta desafiá e soberanía di Jehova i ta purba di influenciá hende pa desobedece nan Tata celestial.—1 Juan 3:8, 10.
8 Den e promé confrontacion den e bataya entre siñanza divino i siñanza di demoño, Adam i Eva a tuma un decision incorrecto i a perde nan speranza di bida eterna. (Génesis 3:19) Cu e pasamento di tempo i cu e comienzo di degeneracion di nan curpa, a keda ampliamente confirmá pa nan en cuanto ken a gaña i ken a papia e berdad ayá den Eden. Sin embargo, cientos di aña promé cu nan a muri den un sentido fisical, nan a bira e promé víctima den e bataya entre e berdad i mentira ora nan tabata cortá for di nan Creador, e Fuente di bida. Esei tabata ora nan a muri den un sentido spiritual.—Salmo 36:9; compara cu Efesio 2:1.
Siñanza di demoño awe
9 Den e buki di Revelacion, apóstol Juan tabata hibá bao di inspiracion te ne “dia di Señor,” locual a cuminza na 1914. (Revelacion 1:10) Ne tempo ei Satanás i su demoñonan tabata sacá for di cielo te ne becindario dje tera—un derota grandi pe opositor di nos Magnífico Creador. Su boz no a sona mas den cielo haciendo acusacion constante contra sirbidor di Jehova Dios. (Revelacion 12:10) Pero, cua progreso e siñanza di demoño a haci riba tera desde Eden? E relato ta bisa: “E dragón grandi a wordu tirá abao, e colebra original, esun yamá Diabel i Satanás, cu ta gaña tur e tera habitá.” (Revelacion 12:9) E mundo henter a sucumbi na mentira di Satanás! No ta straño cu Satanás ta ser yamá “gobernante di mundo”!—Juan 12:31; 16:11.
10 Satanás a admiti su derota despues di su sacamento for di cielo? Di ningun manera! El a keda determiná di sigi batayá contra siñanza divino i esnan cu ta sigié. Despues di su tiramento for di cielo, Satanás a sigi su gera: “E dragón [Satanás] a rabia cu e muher, i a bai pa haci gera contra e resto di su simía, cu ta warda e mandamentonan di Dios i tin e trabao di duna testimonio di Jesús.”—Revelacion 12:17.
11 Además di bringa contra e sirbidor di Dios, Satanás ta yena mundo cu su propaganda, forzando pa mantene su gara di humanidad. Den un vision di apóstol Juan den Revelacion riba e dia di Señor, el a mira tres bestia salbahe cu a representa Satanás simbólicamente, su organizacion político terrenal, i e poder mundial dominante di nos tempo. Dori a sali for di boca di nan tres. Kico nan a simboliza? Juan a skirbi: “Nan realmente ta expresion inspirá di demoño i ta haci siñal, i ta sali pa bai cerca rey di tur e tera habitá, pa reunínan hunto pe gera dje gran dia di Dios Todopoderoso.” (Revelacion 16:14) Claramente, siñanza di demoño ta mashá activo den mundo. Satanás i su demoñonan ta sigi bringa contra siñanza divino, i nan lo sigi haci esei te cu Jesucristo, e Rey Mesiánico, usando forza ta pone fin na dje.—Revelacion 20:2.
Identificacion di siñanza di demoño
12 Hende temeroso di Dios por resisti siñanza di demoño? Di tur manera, pa dos motibo. Di promé, pasobra siñanza divino ta mas fuerte; i di dos, pasobra Jehova a desenmascará estrategia di Satanás pa nos por resisti nan. Manera apóstol Pablo a bisa, “nos no ta ignorante di su inventonan.” (2 Corintio 2:11) Nos sa cu Satanás ta usa persecucion como un arma pa cumpli cu su propósito. (2 Timoteo 3:12) Pero, cu hopi mas astucia, e ta purba di influenciá e mente i curazón di hende cu ta sirbi Dios. El a desviá Eva i a hinca deseo malu den su curazón. E ta purba e mesun cos awe. Pablo a skirbi na hende corintio: “Mi tin miedu cu di algun manera, mescos cu e colebra a seduci Eva usando astucia, boso mente por ta corrumpí i alehá dje sinceridad i limpieza cu ta debí na Cristo.” (2 Corintio 11:3) Considera con el a corrumpi e pensamento di humanidad en general.
13 Papiando cu Eva, Satanás a acusa Jehova di gañamento i a bisa cu hende por bira manera e diosnan si nan desobedece nan Creador. E estado pecaminoso di humanidad djawe ta duna prueba cu Satanás ta mentiroso i no Jehova Dios. Hende djawe no ta dios! Pero, despues dje promé mentira, Satanás a inventa mas mentira. El a introduci e idea di cu alma humano ta spiritu cu no por muri nunca. Asina el a tenta humanidad cu e posibilidad di ser manera dios di otro manera. Anto, basá riba tal doctrina falso, el a promove e siñanza di candela di fiernu, purgatorio, spiritismo, i adoracion di spiritu di un antepasado. Tal mentira ainda ta tene cientos di miyones di hende den esclabitud.—Deuteronomio 18:9-13.
14 Naturalmente, loke Jehova Dios a bisa Adam tabata e berdad. Adam sí a muri ora el a peca contra Dios. (Génesis 5:5) Ora Adam i su desendientenan a muri, nan a bira alma morto, inconsiente i inactivo. (Génesis 2:7; Eclesiastés 9:5, 10; Ezekiel 18:4) Ya cu nan ta hereda picá for di Adam, tur alma humano ta muri. (Romano 5:12) Sin embargo, ayá den Eden, Jehova Dios a priminti e binimento di un simía cu lo combati obra di e Diabel. (Génesis 3:15) E Simía ta Jesucristo, e Yiu unigénito di Dios. Jesús a muri sin picá, i su bida sacrificá a bira e rescate pa cumpra hende for di nan estado muribundo. Hende cu den obedencia ta eherce fe den Jesús tin e oportunidad di recibi e bida eterna cu Adam a perde.—Juan 3:36; Romano 6:23; 1 Timoteo 2:5, 6.
15 E rescate, i no un idea neblinoso di cu alma ta spiritu cu no ta muri nunca, ta e berdadero speranza pa humanidad. Esei ta un siñanza divino. Esei ta e berdad. Esei també ta un demonstracion maraviyoso dje amor i sabiduría di Jehova Dios. (Juan 3:16) Ki agradicido nos mester keda di siña tal berdad i di ser libertá for di siñanza di demoño den tal asunto!—Juan 8:32.
16 Cu su mentira den e hofi di Eden, Satanás a anima Adam i Eva pa aspira pa bira independiente di Dios i asina depende di nan mes sabiduría. Awe, nos ta mira e resultado di largu alcance di esei den e crimen, dificultad económico, gera, i desigualdad na escala grandi cu ta existi den e mundo djawe. No ta straño cu e Bijbel ta bisa: “E sabiduría di mundo ta bobedad cerca Dios”! (1 Corintio 3:19) No obstante, e mayoría di hende den nan bobedad ta prefera di sufri en bez di presta atencion ne siñanza di Jehova Dios. (Salmo 14:1-3; 107:17) Hende cristian, cu a acepta e siñanza divino, ta evita di cai den tal trampa.
17 Pablo a skirbi na Timoteo: “Ai Timoteo, warda loke ta ser confiá na bo, apartando for di papiamento bano cu ta viola loke ta santo i for di contradiccion di loke ta ser yamá ‘conocimento’ falsamente. Pasobra den nan desplegue di tal conocimento algun a desviá for dje fe.” (1 Timoteo 6:20, 21) Tal “conocimento” també ta representa siñanza di demoño. Den e tempo di Pablo, probablemente el a referi na idea apóstata cu algun hende den e congregacion tabata promove. (2 Timoteo 2:16-18) Despues, loke tabata yamá conocimento falsamente, tal como gnosticismo i filosofía griego, a corrumpi e congregacion. Den e mundo djawe, ateísmo, agnosticismo, teoría di evolucion, i alta crítica dje Bijbel ta ehempel di loke ta yamá conocimento falsamente, pasobra nan ta idea no bíblico cu hende apóstata djawe ta promove. E fruta di loke ta yama conocimento falsamente ta ser mirá den e degradacion moral, i e plamamento na tur parti di falta di respet pa autoridad, e falta di onradez, i e egoísmo cu ta caracterizá e sistema di cosnan di Satanás.
Sigi siñanza divino
18 Aunque Satanás ta yenando mundo cu siñanza di demoño desde e tempo di Eden, semper tabatin algun hende cu a busca siñanza divino. Tal hende ta na cantidad di miyones di hende awe. Nan ta inclui e resto di cristian ungí cu tin e speranza sigur di reina cu Jesús den su Reino celestial i e aumentante multitud grandi di “otro carné” cu tin e speranza di hereda e dominio terrenal dje Reino. (Mateo 25:34; Juan 10:16; Revelacion 7:3, 9) Awe, eseinan ta reuní den un organizacion mundial na locual e palabra di Isaías ta aplica: “Tur bo yiunan lo ser hende siñá pa Jehova, i e paz di bo yiunan lo ser abundante.”—Isaías 54:13.
19 Siendo siñá pa Jehova kier men mas cu conoce doctrina berdadero—aunque esei ta importante. Jehova Dios ta instruínos con pa biba, con pa aplica siñanza divino na nos bida personal. Por ehempel, nos ta resisti egoísmo, inmoralidad, i e spiritu di independencia cu ta tanto desenfrená den e mundo rond di nos. Nos ta reconoce e sigimento cruel tras di riqueza di mundo como loke e tá, esta, fatal. (Santiago 5:1-3) Nos nunca ta lubida e siñanza divino expresá den e palabra di apóstol Juan: “No stima ni mundo ni loke ta den mundo. Si hende ta stima mundo, e amor dje Tata no ta den dje.”—1 Juan 2:15.
20 Efecto di siñanza di demoño riba su víctima ta ser mirá den e palabra di Pablo dirigí na hende corintio: “[Satanás] a ciega e mente di hende no creyente, pe iluminacion dje glorioso bon nobo tocante Cristo, cu ta imagen di Dios, no iluminánan.” (2 Corintio 4:4) Satanás kier ciega berdadero cristian di igual manera també. Ayá den Eden, el a usa un colebra pa desviá un sirbidor di Dios. Awe, e ta usa película i programa violento of inmoral di television. E ta usa radio, literatura, i música. Un arma fuerte na su disposicion ta mal asociacion. (Proverbio 4:14; 28:7; 29:3) Semper reconoce tal cosnan pa loke nan tá —invento i siñanza di demoño.
21 No lubida, e palabra di Satanás papiá cu Eva tabata mentira; e palabra di Jehova Dios a resulta di ser e berdad. Desde e tempo di promé ayá, e mesun cos a resulta di ser e caso. Semper prueba a ser duná cu Satanás ta mentiroso, i sin falta e siñanza divino ta berdad. (Romano 3:4) Si nos ta sigi e Palabra di Dios, nos semper lo sali victorioso den e bataya entre e berdad i mentira. (2 Corintio 10:4, 5) Pues, láganos keda determiná di rechaza tur siñanza di demoño. Dje manera ei nos por wanta te ne tempo ora e gera entre e berdad i falsedad ta caba. E berdad lo gana. Satanás lo no existi mas, i hende lo tende solamente siñanza divino riba tera.—Isaías 11:9.
[Study Questions]
1. Hende cristian ta den cua bataya?
2. (a) Segun Pablo, cua dos banda ta na oposicion cu otro? (b) Kico Pablo kier men cu “e fe”?
3. (a) Kico ta sosode víctima den e bataya entre berdad i mentira? (b) Ken ta apoya siñanza di demoño?
4, 5. Satanás a bisa Eva cua mentira, i pakico esei tabata tanto perverso?
6. Con Satanás a desafiá e husticia i soberanía di Jehova?
7. Na ki tempo hende a tende siñanza di demoño pe promé bez, i con nan ta similar den e dia djawe?
8. Kico Adam i Eva a perde den Eden, pero con Jehova Dios a resulta di ser berdadero?
9. Ki efectivo tabata siñanza di demoño através dje siglonan?
10, 11. Di ki manera Satanás i su demoñonan ta activo awe?
12. (a) Pakico ta posibel pa resisti e siñanza dje demoñonan? (b) Con Satanás ta haci esfuerzo pa cumpli cu su propósito pa cu sirbidor di Dios?
13. Satanás a papia cua mentira cu humanidad desde Eden?
14, 15. Kico ta e berdad tocante morto i e speranza di hende pe futuro?
16. Menciona algun resultado di largu alcance ora hende ta sigi nan mes sabiduría.
17. Kico Satanás ta promove cu ta ser “yamá conocimento falsamente”, i kico ta fruta di dje?
18. Ken ta busca siñanza divino awe?
19. Siñamento di Jehova Dios ta inclui kico?
20, 21. (a) Kico Satanás ta usa den su esfuerzo pa ciega hende? (b) Hende cu ta sigi siñanza divino ta recibi cua bendicion?
[Caption on page 9]
Siñanza di demoño a presenta pe promé bez den e hofi di Eden
[Caption on page 10]
E siñanza divino tocante e rescate i e Reino ta ofrece e único speranza pa humanidad
[Caption on page 13]
Bo por splica?
◻ Na ki tempo hende a tende siñanza di demoño pe promé bez?
◻ Menciona algun mentira cu Satanás i su demoñonan ta promove.
◻ Di ki manera Satanás ta extremamente activo awe?
◻ Kico Satanás ta usa pa promove siñanza di demoño?
◻ Cua bendicion ta pertenece na hende cu ta sigi siñanza divino?