Bon Aparensia

BO APARENSIA ta bisa hopi kos di bo. Ounke Yehova ta wak loke tin den bo kurason, hende en general ta saka nan konklushon basá riba e “aparensia di pafó.” (1 Sam. 16:7) Ora bo ta limpi i na òrdu, otro hende probablemente lo konkluí ku bo ta respetá bo mes, i nan lo ta mas dispuesto na skucha bo. E echo ku bo ta apropiadamente bistí lo duna tambe un bon impreshon di e organisashon ku bo ta representá i lo tin un bon efekto riba e opinion ku bo oyentenan tin di e Dios ku bo ta adorá.

Prinsipionan Ku Nos Por Apliká. Beibel no ta duna hopi regla tokante aparensia. Pero sí e ta duna prinsipionan balansá ku por yuda nos tuma desishonnan sabí. Básikamente nos ta “hasi tur [kos] pa e gloria di Dios.” (1 Kor. 10:31) Kua ta e prinsipionan ku tin di haber ku nos aparensia?

Na promé lugá, Beibel ta animá nos pa sòru pa nos kurpa i nos paña ta limpi. Den e Lei ku Yehova a duna Israel di pasado, tabatin rekisitonan relashoná ku limpiesa. Por ehèmpel, e saserdotenan ku mester a rindi sirbishi mester a baña i laba nan pañanan na sierto okashonnan spesífiko. (Lev. 16:4, 24, 26, 28) Kristiannan no ta bou di e Lei di Moises, pero e prinsipionan inkorporá den dje sí ta válido ainda. (Huan 13:10; Rev. 19:8) Spesialmente ora nos ta bai reunion òf ta sali den sirbishi di vèlt, nos kurpa, nos aliento i nos paña mester ta limpi, pa no resultá ku nos presensia ta desagradabel pa otro hende. E rumannan ku ta duna diskurso òf ta hasi demostrashon dilanti e kongregashon mester ta un bon ehèmpel den esaki. Si nos kuida nos aparensia nos ta mustra rèspèt pa Yehova i pa su organisashon.

Na di dos lugá, Beibel ta animá nos pa ta desente i moderá. Apòstel Pablo a hasi un yamada na muhénan kristian pa “dòrna nan mes . . . desente i moderá, no ku kabei tur na flègtu i oro òf pèrla òf bistí kostoso, sino mas bien . . . manera ta pas pa muhénan ku ta teme Dios.” (1 Tim. 2:9, 10) Hende hòmber tambe mester ta desente i moderá den nan manera di bisti i peña.

Un persona desente no kier ofendé otro hende innesesariamente ni hala demasiado atenshon na su mes. Sano huisio ta yuda nos ser moderá i diskreto. Un persona ku ta desplegá e kualidatnan aki i ta respetá e normanan di Dios, ta un persona balansá. Pero esaki no kier men ku bo no por bisti na un manera atraktivo, mas bien e ta enfatisá e importansia di skohe nos pañanan ku prudensia i evitá modanan di bisti i estilo di kabei ekstrabagante. (1 Huan 2:16) Nos mester apliká e prinsipionan aki sea ku nos ta na reunion, den sirbishi di vèlt òf partisipando den kualkier otro aktividat. Asta nos pañanan kasual, paña di tur dia, mester ta desente i moderá. Na skol òf na trabou, nos lo tin oportunidat pa duna testimonio informal. Ounke kisas nos lo no ta bistí manera ora nos ta bai reunion i asamblea, nos bistí mester ta na òrdu, limpi i desente.

Klaru ku nos tur no ta bisti meskos i esei no ta e idea tampoko. Kada hende tin su smak, i no tin nada malu den esaki. Pero semper nos mester sigui e prinsipionan di Beibel.

Apòstel Pedro a mustra ku loke ta mas importante ku estilo di kabei i paña ta “e persona skondí di e kurason.” (1 Ped. 3:3, 4) Ora nos kurason ta yen di amor, goso, pas, bondat i un fe bon fundá, e kualidatnan aki lo bira pa nos manera un bistí spiritual ku di bèrdat ta onra Dios.

Na di tres lugá, Beibel ta urgi nos pa wak si nos aparensia ta apropiá. Promé Timoteo 2:9 ta papia di “bistí apropiá” [òf “bon areglá” NW]. Ounke apòstel Pablo tabata referí na paña di hende muhé, e mesun prinsipio ta konta pa hende hòmber tambe. Algu ku ta bon areglá i apropiá ta limpi i na òrdu. Sin importá nos posishon ekonómiko, nos aparensia por ta na òrdu.

Un di e promé aspektonan di nos aparensia ku hende ta ripará ta nos kabei. E mester ta limpi i bon areglá. Nos estilo di kabei tin hopi di haber ku e kustumbernan lokal i loke naturalesa a duna nos. Apòstel Pablo su konseho tokante estilo di kabei ku nos ta haña na 1 Korintionan 11:14 i 15, evidentemente a tene kuenta ku e dos faktornan aki. Sin embargo, ora un persona su estilo di kabei ta duna e impreshon ku e kier purba parse un persona di e sekso opuesto, esaki ta algu ku ta na konflikto ku prinsipionan bíbliko.—Deu. 22:5.

Pa hende hòmber por tin un aparensia na òrdu kisas e mester ta feitá, i den paisnan kaminda nan ta konsiderá mustashi komo algu ku ta ekspresá dignidat, su mustashi mester ta nèchi kòrtá.

Na di kuater lugá, nos aparensia no mester reflehá amor pa mundu ni pa su kamindanan. Apòstel Huan a spièrta: “No stima mundu, ni e kosnan ku tin den mundu.” (1 Huan 2:15-17) Mundu tin hopi deseo pekaminoso. Entre nan Huan ta menshoná e deseo di karni i e orguyo di bida, es desir, broma ku bo poseshonnan. Tambe e Skritura ta hala atenshon na e spiritu di rebeldia i di desobedensia na outoridat. (Pro. 17:11; Efe. 2:2) Hopi bes hende ta ekspresá e deseo- i aktitutnan aki ku nan forma di bisti i peña. P’esei nan aparensia ta inmoderá, sèksi, demasiado buyá, deskuidá, kon-ku-ta òf slòns. Komo sirbidó di Yehova, nos ta evitá modanan ku no ta reflehá e personalidat kristian.

En bes di imitá mundu, sigui e bon ehèmpel di hòmber- i muhénan spiritualmente madurá den e kongregashon kristian. Yònkumannan ku ta deseá di duna diskurso públiko un dia, por opservá e manera di bisti di e rumannan ku ya ta hasi esei. Nos tur por siña for di e ehèmpel di personanan ku tin hopi aña ta partisipá fielmente den sirbishi di vèlt.—1 Tim. 4:12; 1 Ped. 5:2, 3.

Na di sinku lugá, ora di disidí kiko ta apropiá, nos tin ku kòrda ku “ni Kristu no a agradá su mes.” (Rom. 15:3) Hesus su interes prinsipal tabata p’e kumpli ku e boluntat di Dios. Tambe Hesus tabata mas interesá den yuda hende ku den su komodidat personal. Kiko nos lo hasi si sierto estilo di paña òf kabei ta forma un barera entre nos i e hendenan kaminda nos ta sirbi awor? Nos lo tuma un desishon sabí si nos imitá e humildat ku Kristu a mustra. Apòstel Pablo a ekspresá e prinsipio aki: “Nos no ta duna motibu di ofensa den nada.” (2 Kor. 6:3) Pa e motibu ei kisas nos lo por legumai un estilo di kabei òf un paña ku ta lanta prehuisio den mente di e hendenan ku nos kier prediká na dje.

Postura. Bon aparensia ta enserá tambe e postura korekto. Klaru ku nos no ta para ni kana meskos ku otro, i tampoko nos no ta purba sigui un sierto patronchi den e asuntu aki. Sin embargo, ta bon pa ripará ku den Beibel, para i kana règt ta duna e idea di dignidat personal i optimismo. (Lev. 26:13; Luk. 21:28) Pero ta di komprondé ku algun ruman ku a traha añanan largu di bùk òf ku tin edat avansá òf malesa, lo no por para règt mas. Òf nan tin ku lèn riba algu pa wanta nan kurpa. Sin embargo, ta rekomendabel pa esnan ku sí por para rasonablemente règt ora nan ta papia ku otro hende, pa nan hasié, ya asina nan no ta duna e impreshon ku nan no tin kunes òf ku nan ta pidiendo despensa pa e yamada urgente ku nan ta hasi riba e ouditorio. Asina tambe, maske no ta malu pa de bes en kuando un oradó pone su man riba e stènt, por lo general su ouditorio lo haña un impreshon mas positivo si e no lèn riba dje.

Kosnan di Uso Mester Ta na Òrdu. No ta nos aparensia so mester ta limpi i bon areglá, sino tambe nos publikashonnan i otro artíkulonan ku nos ta usa den sirbishi mester ta limpi, na òrdu i den bon kondishon.

Tuma por ehèmpel bo Beibel. No ta posibel pa nos tur haña un Beibel nobo ora esun ku nos tin gasta. No opstante, maske kuantu tempu nos tin nos Beibel, mester ta bisto ku nos ta trat’é ku kuidou.

Ounke tin hopi manera pa drecha nos tas di sirbishi, semper e mester ta na òrdu. Bo a yega di mira papel kai for di un Beibel ora ku un publikadó tabata prepará pa lesa un teksto pa e doño di kas òf kisas ora ku un ruman tabata dunando un diskurso na e kongregashon? Esei a kita bo atenshon, no ta asina? Si papel den Beibel ta kita hende su atenshon, anto kisas bo tin ku pone nan un otro kaminda pa bo kosnan di sirbishi ta representabel. Tene kuenta tambe ku den algun kultura ta un gran falta di rèspèt pa pone Beibel òf otro literatura religioso riba flur.

Bon aparensia mester ta algu importante pa nos. Pero tambe e ta influensiá kon otro hende ta mira nos. I mas ku tur kos, nos ta paga bon tinu na esei pasobra nos kier “dòrna e doktrina di Dios nos Salbador den tur kos.”—Tito 2:10.