Di Bèrdat Hesus A Muri pa Mi?

DEN Beibel nos ta lesa tokante diferente sirbidó fiel di Dios ku tabatin e “mesun sintimentunan ku nos.” (Sant. 5:17) Por ehèmpel, nos por komprondé bon bon kiko Pablo tabata ke men ora el a bisa na Romanonan 7:21-24: “Ora mi ta deseá di hasi loke ta korekto, loke ta malu ta den mi. . . . Pober di mi!” Tin biaha, nos imperfekshonnan ta pone ku nos ta sinti nos desanimá. Pero, ta masha animante pa sa ku Pablo, un hòmber fiel, tambe a sinti su mes asina.

Pablo a ekspresá otro sintimentu tambe. Ku konvikshon el a bisa: “E Yu di Dios . . . a stima mi i a entregá su mes pa mi.” (Gal. 2:20) Abo tambe tin e ‘mesun sintimentu’ ei? Kisas no tur ora.

Si bo ta sinti ku bo no ta bal nada debí na bo pikánan di pasado, kisas ta duru pa aseptá ku Yehova ta stima bo i a pordoná bo. Esei por pone ku ta mas difísil pa bo mira e sakrifisio di Hesus komo un regalo duná na abo. Di bèrdat Hesus ke pa bo mira e reskate komo un regalo? Kiko por yuda bo mir’é komo un regalo?

Hesus ke pa kada un di nos mira su sakrifisio komo un regalo personal. Kon bo por tin sigur di esei? Imaginá e esena deskribí na Lukas 23:39-43. Un hòmber ta kologá na staka banda di Hesus. E ta atmití ku el a hasi algu malu. Lo mester tabata algu grave, sino lo e no a haña kastigu di morto riba staka. Tur desesperá el a roga Hesus: “Kòrda riba mi ora bo drenta bo Reino.”

Kiko Hesus a hasi? Ku hopi doló el a bira su kabes pa wak e kriminal den su wowo. Den tur Hesus su agonia, e ta smail i ta trankilisá e hòmber bisando: “Di bèrdat mi ta bisa bo awe: Lo bo ta ku mi den Paradeis.” Hesus por a djis kòrda e hòmber ku e Yu di hende a bini “pa duna su alma komo reskate a kambio di hopi hende.” (Mat. 20:28) En bes di esei, Hesus tabata bondadoso i a hala atenshon na e echo ku su sakrifisio lo a yuda e hòmber ei personalmente. Hesus tabata masha amabel i a usa e pronòmbernan personal “bo” i “mi.” Anto Hesus a menshoná un benefisio personal di su sakrifisio: e hòmber por a biba den Paradeis riba tera.

Pues, Hesus tabata ke pa e hòmber ei komprondé bon kla ku su sakrifisio tabata konta p’e tambe. Si Hesus tabata deseá esei pa un kriminal ku no a haña chèns di sirbi Dios, kuantu mas e ta deseá esei pa un kristian batisá ku ta sirbiendo Dios. Pero, kiko por yuda bo aseptá ku di bèrdat Kristu a muri pa bo apesar di bo pikánan di pasado?

Loke a influensiá e manera ku Pablo a mira Hesus su sakrifisio tabata su asignashon pa prediká. Pablo a bisa: “Mi ta gradisidu na Kristu Hesus, nos Señor, kende a duna mi poder, pasobra el a konsiderá mi fiel i p’esei a asigná mi na su sirbishi, aunke ántes mi tabata un blasfemadó, un persiguidó i un hòmber arogante i ònbeskòp.” (1 Tim. 1:12-14) E echo ku Pablo a risibí e asignashon ei a konvens’é di Hesus su miserikòrdia, amor i konfiansa. Hesus tambe a duna kada un di nos un asignashon pa prediká. (Mat. 28:19, 20) E asignashon ei por konvensé nos meskos ku Pablo?

Albert, kende resientemente a bolbe serka Yehova despues di kasi 34 aña ekspulsá, a bisa: “Mi pikánan ta semper mi dilanti. Pero, ora mi ta den sirbishi, mi ta sinti meskos ku apòstel Pablo: personalmente mi a haña un asignashon for di Hesus. Esei ta laga mi sinti mas felis i mas positivo di mi mes, mi bida i mi futuro.”—Sal. 51:3.

Allan, kende tabata un kriminal masha violento promé ku el a siña e bèrdat, a bisa: “Ainda mi ta pensa riba tur e daño ku mi a kousa. Tin biaha, esei ta hasi mi deprimí. Pero, mi ta gradisí Yehova ku e ta permití un pekadó manera mi hiba e bon notisia na otro hende. Ora mi mira kon nan ta reakshoná riba e bon notisia, mi ta kòrda kon bon i amoroso Yehova ta. Mi ta sinti ku e ta usa mi pa yuda hende ku e mesun pasado ku mi.”

Bo asignashon pa prediká por yuda bo enfoká bo energia riba pensa i hasi kos positivo. Tambe e ta konvensé bo di Hesus su miserikòrdia, amor i konfiansa.

Miéntras nos ta biba den e mundu malbado akí, kisas nos kurason lo sigui kondená nos pa nos erornan di pasado. Kiko por yuda nos vense e sintimentunan ei?

Jean, kende regularmente tin sintimentu di kulpa debí ku el a hiba un bida dòbel na hóben, a bisa: “Mi ta gusta e teksto ku ta bisa ku ‘Dios ta mas grandi ku nos kurason.’” (1 Huan 3:19, 20) Ora bo ta tristu debí na bo erornan di pasado, kòrda ku Yehova i Hesus ta komprondé bo imperfekshonnan mihó ku bo mes. Kòrda tambe ku amorosamente nan a perkurá e reskate pa hende imperfekto ku ta arepentí.—1 Tim. 1:15.

Bo tambe por trankilisá bo kurason ku e bèrdat bunita ei. P’esei, tuma tempu pa meditá riba e manera ku Hesus a trata hende imperfekto i hasi bo esfuerso pa kumpli ku e asignashon ku el a duna bo. Si bo hasi esei, bo por bisa meskos ku Pablo: Hesus a “stima mi i a entregá su mes pa mi.”