E Punto Di Bista Biblico

Celibato Ta un Rekisito pa Ministernan Cristian?

CELIBATO ta, den e sentido estricto dje palabra, e estado di no ta casá. Sin embargo, segun The New Encyclopædia Britannica, e término ta “ser usá generalmente en coneccion cu e papel cu un hende célibe ta hunga como funcionario, specialista of deboto religioso.” E término “célibe” ta referí na “esnan pa ken e estado di soltero ta e resultado di un voto sagrado of acto di renunciamentu of di un creencia cu esei ta preferibel pa un persona debí na su posicion religioso of e grado di su debocion religioso.”

Un caminda den pasado cierto religionnan prominente a adoptá celibato como rekisito pa nan ministernan. Sin embargo, no tin ningun otro religion den cristiandad unda celibato a bira e característica mas importante cu den catolicismo. Awe, tin bastante controversia riba e celibato católico. The Wilson Quarterly a remarcá cu “estudio tras estudio hací den e décadanan mas recien a saca na cla cu celibato obligatorio, un rekisito pa pastornan católico desde siglo 12, ta e motibu fundamental dje problema cu e iglesia tin pa reclutá i keda cu pastor.” Segun e sociólogo Richard A. Schoenherr, “e peso completo di historia i cambio social ta bayendo contra e concepto di permití hombernan soltero so entre e sacerdocio católico.” Kico ta e punto di bista bíblico en cuanto celibato?

Matrimonio of Solteria?

Atrabes di historia tabatin cantidad di hende homber i muher deboto, den hopi diferente religion, cu a scoge pa keda soltero. Di con? Den hopi caso tabata pa motibu cu nan a kere cu cosnan carnal i material tabata “e asiento di maldad.” Esaki a fomentá e filosofia di cu bo por ta spiritualmente puru solamente dor di abstené for di tur actividad sexual. Sin embargo, esaki no ta loke Bijbel ta bisa. Den Bijbel, matrimonio ta ser mirá como un don limpi i sagrado for di Dios. E relato di Génesis dje creacion ta describí matrimonio claramente como “bon” den bista di Dios i ta obvio cu e no ta un strobansa pa por tin un relacion spiritualmente puru cu Dios.—Génesis 1:26-28, 31; 2:18, 22-24; mira tambe Proverbionan 5:15-19.

Apostel Pedro i otro sirbidónan aprobá di Dios cu tabata den posicion di autoridad den e congregacion cristian di promé siglo tabata hombernan casá. (Mateo 8:14; Echonan 18:2; 21:8, 9; 1 Corintionan 9:5) Esaki ta bira cla for dje instruccionnan cu apostel Pablo a duna Timoteo en cuanto nombramentu di superintendente, of “obispu” den e congregacion. E ta skirbi: “Un obispu mester ta liber di reproche, esposo di un solo casá.” (Letternan cursivo di nos; 1 Timoteo 3:2, Revised Standard Version, Edicion Católico) Ripará cu no tin ningun indicacion cu den un manera of otro tabata inapropiado pa “un obispu” ta casá. E único cos cu Pablo a indicá ta cu “un obispu” no mag ta un polígamo; si e ta casá, e mag tin solamente un esposa. De echo, Cyclopedia of Biblical, Theological, and Ecclesiastical Literature, di McClintock i Strong, ta concluí: “No tin ningun pasashi den T[estament] N[obo] cu por ser interpretá bou di mandamentu dje Evangelio como un prohibicion pa clero casa.”

Aunke Bijbel ta papia hopi bon di matrimonio, ta sigur cu e no ta condená solteria si un hende scoge esei boluntariamente. Bijbel ta recomend’é como un curso deseabel pa algun hende. (1 Corintionan 7:7, 8) Jesucristo a bisa cu algun hende homber i hende muher ta scoge deliberadamente e curso di solteria. (Mateo 19:12) Di con? No pasobra cu matrimonio tin algu inherentemente impuru cu lo stroba nan progreso spiritual. Nan ta scoge e curso aki simplemente pa por enfocá nan esfuersonan riba haci Dios su boluntad durante un tempu cu nan a percibí como urgente.

Loke A Hiba na Celibato Obligatorio

Pero cos a cambia den e siglonan despues di Cristo su tempu. Durante e promé tres siglonan di nos Era Comun, “tabatin tantu pastor casá como soltero,” segun David Rice, un frater dje órden dominicano, kende a laga sacerdocio pa casa. E tempu ei, esnan cu a profesá di ta cristian a cuminsá ser influenciá pa loke un escritor religioso a describí como un “mescla di ideanan griego i bíblico,” cu a producí un punto di bista trocí di sex i matrimonio.

Claro cu algun a keda soltero simplemente “pa haña pleno libertad pa dedicá [nan mes] n’e obra dje reino di Dios.” Sin embargo, otronan a ser motivá mas tantu dor di filosofianan pagano cu nan a adoptá. The New Encyclopædia Britannica ta bisa: “Un creencia cu relacion sexual tabata contaminante i incompatibel cu santidad a lanta [den e iglesia cu a profesá di ta cristian] como e motivacion dominante p’e práctica di celibato.”

Segun Rice, den siglo cuater, iglesia “a prohibí un pastor casá di tin relacion sexual e anochi promé cu e sacrificio di comunion of ecaristia.” Ora e iglesia a introducí e ecaristia tur dia, esei a nificá cu pastornan mester a abstené di relacion sexual permanentemente. Cu tempu nan a prohibí e pastornan di casa mes. Asina celibato a bira algu obligatorio pa ken cu kier a bira un pastor di iglesia.

Apostel Pablo a spierta contra precis un desaroyo asina. El a skirbi: “Spirito ta bisa expresamente, ku den último temponan algun lo nenga nan fé, pasobra ku nan lo tende na spiritonan di error i doctrinanan demoníaco . . . E hendenan aki ta desaprobá matrimonio.”—1 Timoteo 4:1, 3, Testament Nobo di Nos Senjor Hesu-Cristo.

Jesucristo a bisa: “Sabiduria ta ser probá hustu dor di su obranan.” (Mateo 11:19) E bobedad di a desviá for dje normanan di Dios a ser probá dor di su obranan of consecuencianan. Autor David Rice a entrevistá hopi pastor rond mundu riba e tópico di celibato obligatorio. Algun cu el a papia cuné, a bisa: “Bo ta keda pastor, ta haci tur bon cu bo por, i a la bes ta probechá discretamente di muhernan deboto cu ta admirá bo i cu ta cla pa haci nan mes sexualmente disponibel na bo.”

Citando Mateo 7:20, Rice ta declará: “ ‘Na nan frutanan boso lo reconocé nan,’ Jesus a bisa.” Anto e ta comentá riba e tragedia cu a resultá dor di celibato forsá: “E frutanan di celibato obligatorio ta e miles dje hombernan ei cu ta hiba un bida dòbel, miles di muher cu ta hiba un bida destrosá, miles di mucha nengá pa nan tatanan pastor, pa no papia mes dje pastornan cu ta cana rond cu sintimentunan heridá.”

Un matrimonio onorabel ta un bendicion di Dios. Celibato forsá a resultá di ta spiritualmente dañino. Di otro banda, solteria scogé boluntariamente, maske e no ta esencial pa santidad of salbacion, a resultá di ta un estilo di bida recompensador i spiritualmente satisfaciente pa algun.—Mateo 19:12.

[Plachi na página 28]

Life