Keda Positivo Maske Bo Matrimonio No Ta Bai Bon

“Mi ta duna instrukshon na hende kasá—ma no ami sino Señor.”—1 KOR. 7:10.

 1. Kon kristiannan ta mira matrimonio, i dikon?

ORA kristiannan kasa, nan ta hasi un voto dilanti di Dios, i esaki ta algu masha serio. (Ekl. 5:4-6) Den un sentido, ta Yehova, Esun ku a originá matrimonio, ta “uni [esnan ku kasa] bou di un yugo.” (Mar. 10:9) Pues, no ta importá kiko leinan di un pais ta bisa; pa Dios, parehanan kasá ta uní bou di un yugo. P’esei, sirbidónan di Yehova mester mira matrimonio komo un union permanente, sea ku nan a kasa promé òf despues ku nan a bira Testigu.

 2. Ki preguntanan nos lo trata den e artíkulo akí?

² Matrimonio por ta un fuente di gran goso. Pero, kiko un pareha kasá por hasi si nan no ta felis? Nan por drecha nan matrimonio? Ki yudansa tin pa matrimonionan ku ta na peliger?

BO MATRIMONIO TA UN FUENTE DI GOSO ÒF DI TRISTESA?

3, 4. Kiko por pasa si nos tuma mal desishon ora nos ke kasa?

³ Parehanan kristian ku tin un matrimonio eksitoso ta felis, i nan union ta duna gloria na Yehova. Pero ora un matrimonio no ta bai bon, esaki por kousa hopi tristesa i doló. P’esei, ta sabí pa un ruman ku tin pensá di kasa sigui Dios su guia pa asina su matrimonio por tin un bon komienso. Dikon? Pasobra si e tuma mal desishon, esaki por hiba na desepshon i tristesa. Por ehèmpel, algun hóben ta kuminsá namorá siendo ku nan no ta kla pa asumí e responsabilidatnan ku matrimonio ta trese kuné. Algun ruman ta kore kasa ku hende ku nan a konosé via Internet i despues ta haña nan den un matrimonio infelis. Otronan ta kasa despues di a kometé piká serio durante namoramentu, i kisas nan ta kuminsá nan matrimonio ku poko rèspèt pa otro.

⁴ Otronan no ta kasa “den Señor” i hopi biaha ta sufri e konsekuensianan doloroso ku un famia dividí pa motibu di religion ta trese kuné. (1 Kor. 7:39) Si bo ta den e situashon ei, resa pidi Yehova pordoná bo i yuda bo. Yehova no ta kita e konsekuensianan di piká; pero si e persona ta realmente arepentí, Yehova ta yud’é perseverá bou di prueba. (Sal. 130:1-4) Pues, hasi tur bo esfuerso pa agradá Dios awor i pa semper, i ‘e goso di Yehova lo fortalesé bo.’—Neh. 8:10.

ORA E MATRIMONIO TA NA PELIGER

 5. Ora un persona tin problema matrimonial i ta infelis, ki klase di pensamentu e mester evitá?

⁵ Un persona ku tin hopi problema matrimonial i ku ta infelis kisas ta puntra su mes: ‘Ta bale la pena salba e matrimonio akí?’ Podisé e ta pensa: ‘Mare mi por a drei oloshi bèk i kasa ku un otro persona!’ Soñando ku e supuesto benefisionan ku lo e disfrutá di dje si e bandoná su kasá, kisas e ta bisa: ‘Lo mi ta liber atrobe! Pakiko no divorsiá? Anto si mi no tin base bíbliko mes pa divorsiá, mi por separá i disfrutá di bida atrobe.’ Pero na lugá di pensa asina i imaginá kon kos lo por tabata, un kristian mester hasi esfuerso pa mehorá su situashon aktual, buskando Yehova su guia i siguié.

 6. Kiko Hesus tabata ke men ku e palabranan na Mateo 19:9?

⁶ No ta tur kristian ku divorsiá ta liber pa kasa atrobe. Hesus a bisa: “Mi ta bisa boso ku ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon—ta kometé adulterio.” (Mat. 19:9) “Fornikashon” ta enserá adulterio i otro piká seksual serio. P’esei ta masha importante pa un kristian ku tin pensá di divorsiá—si no ta pa motibu di fornikashon—resa pidi Yehova su guia.

 7. Kiko hende lo por pensa ora un pareha kristian su matrimonio frakasá?

⁷ Ora un matrimonio terminá den divorsio òf separashon, esei por ta un indikashon ku un persona ta spiritualmente débil. Apòstel Pablo a hasi e pregunta serio akí: “Si un hòmber no sa kon pa dirigí su mes kas, kon lo e por kuida e kongregashon di Dios?” (1 Tim. 3:5) De echo, ora un pareha kristian su matrimonio frakasá, hende lo por pensa ku e pareha ei no ta praktiká loke nan ta prediká.—Rom. 2:21-24.

 8. Kiko mester ta bayendo robes si un pareha kristian disidí di separá òf divorsiá?

⁸ Ora un pareha kristian ta plania pa separá òf divorsiá sin base bíbliko, mester tin algu robes ku nan relashon ku Yehova. Aparentemente un di nan òf podisé niun di dos no ta apliká prinsipio bíbliko. Si nan tabata ‘konfia den Yehova ku henter nan kurason,’ nan lo no tabatin motibu pa pensa ku nan no por salba nan matrimonio.—Lesa Proverbionan 3:5, 6.

 9. Kon algun kristian a ser bendishoná debí na nan esfuerso i pasenshi pa salba nan matrimonio?

⁹ Hopi matrimonio ku tabata a punto di kibra, ku tempu, a resultá masha eksitoso. Kristiannan ku tin problema matrimonial pero ku no ta purá pa bandoná nan kasá hopi biaha ta kosechá bon resultado. Tuma por ehèmpel un famia ku ta dividí pa motibu di religion. Apòstel Pedro a skirbi: “Boso, esposanan, sea sumiso na boso esposo, ya ku si tin algun ku no ta obedesé e palabra, boso por gana nan na e fe pa medio di boso kondukta sin papia ni un pia di palabra, komo ku nan ta testigu di boso kondukta puru kompañá pa rèspèt profundo.” (1 Ped. 3:1, 2) Sí, debí na e ekselente kondukta di su kasá, esun ku no ta Testigu por aseptá adorashon berdadero. Di e manera ei, e ruman ta salba su matrimonio, duna onor na Yehova i henter e famia ta benefisiá.

10, 11. Ki problemanan inesperá por surgi den un matrimonio, pero kiko un kristian por ta sigur di dje?

¹⁰ Mayoria di kristian ta skohe pa kasa ku un Testigu pasobra nan ke agradá Yehova. Asina mes kosnan por kambia na un manera ku nan no a spera. Podisé e esposo òf e esposa ta hañ’é ku problema emoshonal serio. Òf ku tempu, ún di nan por stòp di prediká i bira inaktivo. Wak kiko a pasa ku Linda,a un publikadó zeloso i un bon mama. Linda a para mira kon su kasa a desviá for di e bèrdat i ser ekspulsá sin ku e por a hasi nada. Den un situashon asina un kristian por pensa ku su matrimonio no tin sentido mas. Pero kiko e por hasi?

¹¹ Kisas bo ta puntra bo mes: ‘Mi mester sigui hasi esfuerso pa salba mi matrimonio maske kiko ku pasa?’ Wèl, ningun hende no por ni mester tuma e desishon ei pa bo. Sinembargo, tin motibunan bálido pa keda positivo i no entregá maske bo matrimonio ta na peliger. Kristiannan ku pa motibu di nan konsenshi ta keda ku nan kasá apesar di problema matrimonial ta presioso den bista di Dios. (Lesa 1 Pedro 2:19, 20.) I pa medio di su Palabra i spiritu santu, Yehova lo yuda kristiannan ku ta hasi esfuerso sinsero pa fortalesé nan matrimonio.

NAN TA KLA PA YUDA

12. Kiko ansianonan lo pensa si nos buska nan yudansa?

¹² Si bo tin problema matrimonial, no vasilá pa buska yudansa serka kristiannan maduro. Ansianonan ta sirbi komo wardadó den kongregashon i ta kla pa yuda ku konseho bíbliko. (Echo. 20:28; Sant. 5:14, 15) No pensa ku abo i bo kasá lo pèrdè rèspèt di e ansianonan si boso papia ku nan tokante un problema matrimonial serio i pidi nan yudansa. Al kontrario, nan lo haña mas apresio i rèspèt pa boso pasobra nan ta mira ku boso ke agradá Dios di bèrdat.

13. Ki konseho nos ta haña na 1 Korintionan 7:10-16?

¹³ Ora kristiannan ku no ta kasá ku Testigu di Yehova aserká ansianonan pa yudansa, ansianonan ta referí na konsehonan manera esun akí di Pablo: “Mi ta duna instrukshon na hende kasá—ma no ami sino Señor—ku un esposa no mester separá di su esposo; pero si e separá tòg, lag’é keda sin kasa, òf si no, lag’é hasi bon ku su esposo; i un esposo no mester bai laga su esposa. . . . Pasobra, esposa, kon bo por sa ku lo bo no salba bo esposo? Òf esposo, kon bo por sa ku lo bo no salba bo esposa?” (1 Kor. 7:10-16) Ta realmente un bendishon ora un kasá ku no ta Testigu bira un sirbidó di Yehova.

14, 15. Ki ora un ruman por separá di su kasá, pero dikon ta importante pa e hasi orashon tokante e asuntu i saminá su sintimentunan onestamente?

¹⁴ Awor, bou di ki sirkunstansianan un esposa kristian tin mag di “separá” di su esposo? Wèl, algun ruman ta skohe pa separá pasobra nan kasá ta nenga di perkurá materialmente pa e famia. Otronan ta separá debí na maltrato físiko severo òf pasobra nan kasá ta pone ku nan no por sirbi Dios.

¹⁵ E desishon pa separá òf nò ta un desishon personal. No opstante, kristiannan mester hasi orashon tokante e asuntu i saminá nan sintimentunan onestamente. Por ehèmpel, ta e kasá ku no ta Testigu ta e úniko responsabel pa e echo ku e ruman no por sirbi Yehova? Òf e ruman mes tambe ta responsabel pa e echo ku e no ta studia su Beibel, bai su reunionnan i sirbishi riba un base regular?

16. Dikon kristiannan no ta purá pa divorsiá?

¹⁶ Nos ta balorá nos relashon ku Dios i ta respetá matrimonio komo su regalo; p’esei nos no ta purá pa divorsiá. Komo sirbidó di Yehova, nos ke santifiká su nòmber santu. P’esei, nunka nos lo kibra nos matrimonio djis pa kasa ku otro hende.—Yer. 17:9; Mal. 2:13-16.

17. Ki ora nos por bisa ku Dios a yama kristiannan kasá pa biba na pas?

¹⁷ Un kristian ku ta kasá ku un persona ku no ta Testigu mester hasi tur loke e por pa mantené su matrimonio. Pero si su kasá disidí di separá òf divorsiá tòg apesar di tur e esfuersonan ku e ruman ta hasi pa keda kasá, e ruman no mester sintié kulpabel. Pablo a skirbi: “Si e kasá ku no ta kreyente disidí di bai, lag’é bai; . . . un ruman hòmber òf un ruman muhé no ta bou di obligashon di keda kuné, pasobra Dios a yama boso pa biba na pas.”—1 Kor. 7:15.b

KONFIA DEN YEHOVA

18. Ki benefisionan un ruman por risibí aunke e no logra salba su matrimonio despues di hopi esfuerso?

¹⁸ Ora di trata ku kualke problema matrimonial, resa pidi Yehova yuda bo perseverá i konfia plenamente den dje. (Lesa Salmo 27:14.c) Wak kon a bai ku Linda, kende nos a menshoná anteriormente. Pa añanan largu, el a hasi esfuerso pa salba su matrimonio. Pero apesar di esei, nan a divorsiá. Linda ta sinti ku tur su esfuerso tabata pòrnada? El a bisa: “Apsolutamente! E esfuersonan ku mi a hasi tabata un bon testimonio pa otro hende. I mi konsenshi ta trankil. Mi mayor bendishon ta ku e añanan ei a yuda nos yu muhé keda firme den e bèrdat. Awor e ta un Testigu di Yehova masha zeloso.”

19. Kiko lo por ta e resultado ora un persona hasi esfuerso pa salba su matrimonio?

¹⁹ Un ruman muhé ku yama Marilyn ta masha kontentu ku el a konfia den Dios i a hasi èkstra esfuerso pa salba su matrimonio. El a bisa: ‘Mi tabatin gana di separá di mi kasá pasobra mi tabata haña ku e no tabata perkurá materialmente pa mi i ku e tabata stroba mi di sirbi Yehova. Un tempu, e tabata ansiano. Pero el a enbolbé su mes den negoshi ku no a kumbinié i ku a pone ku e tabata falta hopi reunion. Nos a asta stòp di komuniká ku otro. Despues mi a realisá ku ta e atake terorista ku a tuma lugá den nos siudat a spantá mi asina tantu ku mi no kier a komuniká ku otro hende. Pues mi tambe a kontribuí na nos problemanan. Nos a kuminsá komuniká ku otro atrobe, hasi nos estudio di famia i asistí regularmente na nos reunionnan. E ansianonan tabata masha bondadoso i a yuda nos bon. Nos matrimonio a kuminsá haña bida atrobe i, ku tempu, mi kasá a bolbe kualifiká pa risibí privilegio den kongregashon. Nos a pasa den un eksperensia amargo, pero e tabatin un final felis.’

20, 21. Kiko mester ta nos determinashon relashoná ku matrimonio?

²⁰ Sea ku nos ta soltero òf kasá, laga nos semper perseverá i konfia den Yehova. Ora nos tin problema matrimonial, nos mester hasi nos máksimo esfuerso pa resolvé nan, pasobra nos “no ta dos mas, sino ún karni.” (Mat. 19:6) I si nos famia ta dividí pa motibu di religion, laga nos perseverá apesar di difikultat. Asina nos por tin e goso di gana nos kasá den e bèrdat.

²¹ Sí, sea kual sea nos situashon, nos kondukta semper mester ta un testimonio pa personanan ku no ta forma parti di e kongregashon kristian. Pues, si nos matrimonio ta na peliger, laga nos hasi orashon intenso, analisá nos motibunan, meditá riba e Skritura i buska yudansa di e ansianonan. Pero loke ta mas importante, laga nos ta determiná pa agradá Yehova den tur kos i pa demostrá ku nos realmente ta balorá matrimonio komo un maravioso regalo di Dios.

[Nota]

[Komentario na página 20]

Hopi bes, kristiannan ku no ta purá pa divorsiá òf separá ta risibí bendishon

[Komentario na página 22]

Semper konfia den Yehova i pidié yuda bo perseverá

[Plachi na página 19]

Yehova ta bendishoná kristiannan ku ta hasi esfuerso sinsero pa fortalesé nan matrimonio

[Plachi na página 21]

E kongregashon kristian por ta un fuente di konsuelo i yudansa spiritual