Kico Tur Esaki Ta Nificá?

SI BO mester analisá normanan moral den añanan recien, lo bo mira un tendencia bon cla. Sin ningun duda, mas i mas norma moral ta bai perdí cerca un creciente cantidad di hende. Kico ta e berdadero nificacion di esaki?

Esaki ta nificá, manera algun hende ta pretendé, cu nos civilisacion completo i henter humanidad ta condená na fracaso i cu destruccion ta cerca? Of e cambionan ei ta djis un parti dje proceso normal di historia, esta, cu tin un tempu bon i un tempu malu?

Esei ta loke hopi hende ta kere. Nan ta considerá e colapso moral di nos tempu como djis un tendencia, un dje hopinan cu a bini i bai atrabes di historia. Nan tin pleno confiansa cu e tendencia general lo bira bek cu tempu i cu normanan moral haltu lo regresá. Nan tin rason?

“E Ultimo Dianan”

Laga nos considerá e echonan den lus di un buki cu pa siglonan tabata un autoridad ampliamente aceptá riba cuestionnan moral, esta, e Palabra di Dios, Bijbel. Ta masha iluminador pa compará e mundu djawe cu e descripcion profético cu Bijbel ta duna dje época mas crucial den historia humano. Awor aki ta e tempu cu Bijbel ta yama “e último dianan” of “e conclusion dje sistema di cosnan.” (2 Timoteo 3:1; Mateo 24:3) Manera e expresionnan aki ta implicá, e periodo aki lo marca e fin definitivo di un época i e comienso di un época nobo.

E Palabra di Dios a profetisá cu e último dianan lo ta marcá pa “tempu crítico, duru pa trata cuné.” Pa yuda observadónan atento identificá e último dianan, Bijbel ta duna un cantidad di detaye cu huntu ta duna un descripcion cla, esta un señal componí, dje periodo di tempu único aki.

Mal Característicanan den Hende

Tuma nota di un dje rasgonan dje señal aki cu ta prominente awe: ‘Hende lo tin un forma di debocion piadoso pero resultando falsu na su poder.’ (2 Timoteo 3:2, 5) Ningun otro periodo den historia ta caracterisá pa un seglarisacion asina potente i cabal. Na tur parti hende a rechasá Dios como e único autoridad, i mayoria hende no ta aceptá Bijbel como e único fuente di berdad. Claro cu ainda religion ta existí, pero hopi di nan tin poco influencia. Nan ta djis un capa.

Bijbel ta mencioná un otro rasgo dje señal: “Hende lo ta . . . sin dominio propio, feros,” i “debí na e aumento di maldad, e amor di mayoria lo fria.” (2 Timoteo 3:2, 3; Mateo 24:12) E palabra griego traducí como “feros” ta nificá, entre otro cosnan, “falta di simpatia i sintimentu humano.” Awe, muchanan mas i mas chikitu ta demostrá di ta “feros” i nan ta cometé crímennan cada bes mas violento.

Ademas, e desaroyonan rápido riba tereno técnico i económico, i e golosidad cu nan a trece, a pone mas i mas hende bandoná balornan bieu. Sin tene cuenta cu otro hende, nan ta usa cualkier medio disponibel, asta medionan desonesto, pa gara mas tantu posibel pa satisfacé nan deseonan egoista. E tremendo aumento den weganan di placa ta un otro evidencia di egoismo, i e estadísticanan di crímen dje último décadanan aki ta indicá esaki bon cla.

Un rasgo cu ta prevalecé foral den nos tempu ta esaki: “Hende lo ta . . . stimadó di placer mas bien cu stimadó di Dios.” (2 Timoteo 3:2, 4) Un ehempel di esaki ta cu hende kier placer sensual, pero nan no kier e responsabilidad di biba cu un solo partner matrimonial henter nan bida. E resultado ta un ola di famianan kibrá, yunan infelis i cu no ta sinti nan parti di un famia, mayornan soltero i malesanan transmití sexualmente.

Un otro aspecto dje señal ta cu “hende lo ta stimadó di nan mes, stimadó di placa.” (2 Timoteo 3:2) Segun e revista aleman Die Zeit, “e motor tras dje sistema [económico djawe] ta egoismo.” Mas cu nunca promé, corementu tras di placa ta e cos mas importante den bida di hopi hende. Den e actividad egoista aki, hende ta pasa otro balornan por haltu.

Sucesonan Mundial

Ademas di describí e colapso den balornan humano, Bijbel a profetisá tambe cu e último dianan lo ta marcá pa cambionan extraordinario cu lo afectá e famia humano. Por ehempel, Bijbel ta bisa cu “nacion lo lanta contra nacion, i reino contra reino; i lo tin temblornan grandi, i den un lugá tras di otro pestilencia i scarcedad di cuminda.”—Lucas 21:10, 11.

Cu excepcion di siglo 20, no tabatin ningun otro periodo den historia caminda asina tantu hende tabata enbolbí den asina tantu catástrofe cu a sagudí mundu durante un lapso di tempu asina corticu. Por ehempel, hopi mas cu 100 miyon hende a ser matá den guera durante e tempu ei, un cifra cu ta hopi biaha mas tantu cu e cantidad di víctimanan di guera di vários siglo anterior contá huntu. Siglo 20 a duna nos dos guera asina distinto for di cualkier otro guera cu a yama nan guera mundial. Conflictonan mundial manera eseinan no a sosodé nunca promé.

Un Poder Malbado Tras dje Sistema

Tambe Bijbel ta revelá e existencia di un criatura spiritual poderoso i malbado, “esun yamá Diabel i Satanas,” kende su propósito ta pa desviá hende for di balornan berdadero i hinca nan den corupcion moral. Bijbel ta bisa cu durante e último dianan, el a baha na tera, “teniendo gran rabia, sabiendo cu e tin un periodo di tempu corticu.”—Revelacion 12:9, 12.

Bijbel ta describí Diabel como “e gobernante dje autoridad di aire, e spiritu cu awor ta obra den e yunan di desobedencia.” (Efesionan 2:2) Esaki ta implicá cu Diabel ta ehercé un influencia poderoso riba hopi hende, por lo general sin cu nan ta ripará, mescos cu nos kisas no ta ripará si tin un contaminacion invisibel den aire.

Por ehempel, nos por mira Satanas su influencia den hopi medionan moderno di comunicacion: video, cine, television, Internet, propaganda, buki, revista i korant. Hopi informacion, foral esnan cu ta enfocá riba hóbennan inconciente, ta yen di tendencianan extremo i repugnante, manera racismo, ocultismo, inmoralidad i violencia sadístico.

Hopi hende sincero a keda impresioná cu e similaridadnan entre e descripcion cu Bijbel ta duna dje último dianan i e circunstancianan existente den nos mundu djawe. Ta cierto cu promé cu siglo 20 tabatin algun suceso den historia cu na un grado limitá a parce di cumpli cu e descripcion den Bijbel dje último dianan. Pero ta solamente durante siglo 20, i awor siglo 21, nos por mira tur e rasgonan dje señal.

E Epoca Nobo Binidero

Ni esnan cu ta kere cu humanidad lo ser destruí ni esnan cu ta pretendé cu cos lo sigui bai manera semper, no tin rason. Mas bien, Bijbel ta mustra bon cla cu e sociedad mundial actual cu ta dominá e tera lo ser remplasá pa algu completamente nobo.

Despues cu Jesus a mencioná un cantidad di rasgo dje señal dje último dianan, e di: “Asina tambe boso, ora boso mira e cosnan aki sosodé, sa cu e reino di Dios ta cerca.” (Lucas 21:31) Dios su Reino celestial tabata e tema principal di Jesus su predicacion. (Mateo 6:9, 10) I Dios a nombra Jesus como e Rey dje Reino aki, cua ta un gobiernu cu pronto lo reina riba henter e tera.—Lucas 8:1; Revelacion 11:15; 20:1-6.

Na fin dje último dianan, Dios su Reino celestial den man di Cristo lo bai eliminá tur su enemigunan—Diabel i esnan cu ta apoy’é—i remplasá e actual sociedad cu ta moralmente bankrut cu un hustu mundu nobo. (Daniel 2:44) Den e mundu nobo ei, hende di curason sincero lo disfrutá di bida eterno riba un tera transformá den paradijs.—Lucas 23:43; 2 Pedro 3:13; Revelacion 21:3, 4.

Hende cu ta odia e colapso moral djawe i ta dicerní cu e señal componí dje último dianan ta cumpliendo den sucesonan actual por anticipá un futuro magnífico. Pa esaki nos ta gradicí Dios Todopoderoso, esun cu ta interesá den nos como hende i cu tin un propósito glorioso pa su creacion, e tera.—Salmo 37:10, 11, 29; 1 Pedro 5:6, 7.

Testigonan di Jehova ta invitá bo pa siña mas tocante nos amoroso Creador i e prospecto di biba den un mundu moralmente limpi, cu e ta ofrecé na tur hende cu ta busca esei. Manera Bijbel ta bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

[Plachinan na página 10]

Hende di curason sincero lo disfrutá di bida eterno riba un tera paradísico