Capitulo 11

Esakinan Ta e Último Dianan!

 1. Pakico hopi hende ta sinti nan mes un poco confundí ora nan contemplá e esena di mundu, pero na unda por haña un splicacion confiabel dje sucesonan di mundu?

CON nos mundu turbulento a yega te n’e grado aki? Unda nos ta bayendo? Bo a yega di puntra bo mes preguntanan asina? Hopi hende ta sinti nan un poco confundí ora nan mira e situacion dje mundu. Realidadnan manera guera, malesa, i crímen ta haci hende puntra nan mes kico e futuro lo trece. Lidernan di gobierno ta ofrecé poco speransa. Sin embargo, un splicacion confiabel dje dianan angustioso aki ta disponibel for di Dios den su Palabra. E Bijbel cu confiansa ta yuda nos mira unda nos ta den e coriente di tempu. E ta mustra nos cu nos ta den “e último dianan” dje sistema di cosnan actual.—2 Timoteo 3:1.

 2. Cua pregunta e disipelnan di Jesus a puntr’é i con el a contestá?

² Considerá, por ehempel, e contesta cu Jesus a duna na algun pregunta cu su disipelnan a haci’é. Tres dia promé cu Jesus a muri, nan a puntr’é: “Kico lo ta e señal di bo presencia i dje conclusion dje sistema di cosnan?”a (Mateo 24:3) Contestando, Jesus a conta di suceso i situacionnan specífico di mundu cu lo demostrá claramente cu e sistema malbado aki a drenta den su último dianan.

 3. Pakico condicionnan riba tera a bira pió ora Jesus a cuminsá goberná?

³ Manera a ser mustrá den e capítulo anterior, cronologia bíblico ta hiba na e conclusion cu e Reino di Dios ya caba a cuminsá goberná. Pero con esei por ta? E situacion a bira mas malu, i no mihó. Realmente, esaki ta un indicacion fuerte cu e Reino di Dios a cuminsá goberná. Pakico asina? Wel, Salmo 110:2 ta informá nos cu pa un tempu Jesus lo goberná ‘meimei di su enemigunan.’ En berdad, su promé accion como Rey celestial tabata pa tira Satanas i su demoñonan abou den becindario dje tera. (Revelacion 12:9) Kico tabata e efecto? Tabata net loke Revelacion 12:12 a profetisá: “Ai dje tera i dje laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” Nos ta bibando awor den e “tempu corticu” ei.

 4. Cua ta algun rasgo dje último dianan i kico nan ta indicá? (Mira e cuadro.)

⁴ P’esei, no ta un sorpresa cu ora nan a puntra Jesus kico lo ta e señal di su presencia i di conclusion dje sistema di cosnan, su contesta a laga hende keda pensativo. Vários componente dje señal ta ser hañá den e cuadro na página 102. Manera bo por mira, e apostelnan cristian Pablo, Pedro i Juan a proveé nos cu mas detaye relacioná cu e último dianan. Ta cierto cu mayoria rasgo dje señal i dje último dianan ta enbolbé situacionnan angustioso. Sin embargo, e cumplimentu dje profecianan aki mester convencé nos cu e sistema malbado aki ta cerca di su fin. Laga nos examiná djacerca algun dje rasgonan principal dje último dianan.

DJE ULTIMO DIANAN

 5, 6. Con profecianan tocante guera i hamber ta ser cumplí?

⁵ “Nacion lo lanta contra nacion i reino contra reino.” (Mateo 24:7; Revelacion 6:4) Escritor Ernest Hemingway a yama Guera Mundial I “e matansa di mas grandi, cruel, i mal manehá cu a yega di tuma lugá riba tera.” Segun e buki The World in the Crucible—1914-1919, esaki tabata “un alcanse nobo di guera, e promé guera total den e experencia di humanidad. Su duracion, intensidad, i escala a surpasá cualkier cos anteriormente conocí of generalmente sperá.” Anto despues a bini Guera Mundial II, cu a resultá di ta hopi mas destructivo cu Guera Mundial I. E profesor di historia Hugh Thomas ta bisa, “E siglo binti a ser dominá pa metrayur, tanki di guera, avion di bombardeo B-52, e bom nuclear i, finalmente, e misil. El a ser marcá dor di gueranan mas sangriente i destructivo cu esnan di cualkier otro época.” Ta cierto cu hopi a ser papiá tocante desarmamentu despues cu e Guera Friu a terminá. Tog, un raport a calculá cu despues dje reduccion proponé, un 10.000 pa 20.000 misil nuclear explosivo lo keda—mas cu 900 biaha e capacidad di arma usá durante Guera Mundial II.

⁶ “Lo tin scarcedad di cuminda.” (Mateo 24:7; Revelacion 6:5, 6, 8) For di 1914 tabatin por lo ménos 20 caso di hamber grandi. Areanan afligí ta incluí entre otro Bangladesh, Burundi, Cambodia, China, Etiopia, Grecia, India, Nigeria, Ruanda, Rusia, Somalia, i Sudan. Pero hamber no semper ta ser causá dor di falta di cuminda. “E mundu su suministro di cuminda durante décadanan recien a crece mas lihé cu su poblacion,” un grupo di científico i economista agrícola a concluí. “Pero debí cu por lo ménos 800 miyon hende ta den pobresa extremo, . . . nan ta incapas pa cumpra suficiente dje abundancia pa libra nan mes for dje malnutricion crónico.” Den otro casonan metementu político ta enbolbí. Dr. Abdelgalil Elmekki dje Universidad di Toronto ta cita dos ehempel den cua miles di hende tabata muriendo di hamber miéntras nan paisnan tabata exportando cantidadnan inmenso di cuminda. E gobiernonan tabata parce hopi mas preocupá cu ganamentu di placa stranhero pa financiá nan gueranan cu pa alimentá nan ciudadanonan. Cua tabata Dr. Elmekki su conclusion? Hamber hopi biaha ta “un asuntu di distribucion i strategia di gobierno.”

 7. Cua ta e realidad tocante pest awe?

⁷ “Pest.” (Lucas 21:11; Revelacion 6:8) E griep spañó di 1918-19 a exigí por lo ménos 21 miyon bida. A. A. Hoehling a skirbi den The Great Epidemic, “Nunca den historia e mundu a ser atacá dor di un asesino cu a mata asina tantu ser humano asina lihé.” Awe, pest ta aumentá incontrolablemente. Tur aña, cancer ta mata cincu miyon hende, malesanan cu ta causa diarea ta exigí bida di mas cu tres miyon criatura i mucha, i tuberculósis ta causa morto di tres miyon hende. Infeccionnan respiratorio, principalmente pulmonia, pa aña ta mata 3.5 miyon mucha bou di cincu aña di edad. I un asombroso cantidad di 2.5 mil miyon hende—mitar dje poblacion di mundu—ta sufri di enfermedadnan cu ta ser causá dor cu no tin suficiente awa of awa ta contaminá i deficiencia di higiena. E epidemia di AIDS ta percurá un recordatorio mas cu hende, apesar di su logronan médico significativo, ta incapas pa caba cu pest.

 8. Con hendenan ta demostrá di ta “stimador di placa”?

⁸ “Hende lo ta . . . stimador di placa.” (2 Timoteo 3:2) Den paisnan rond mundu, hende ta parce di tin un deseo insaciabel pa mas rikesa. “Exito” hopi biaha ta ser midí n’e tamaño di un persona su salario, “logronan” hopi biaha ta ser midí na cuantu propiedad un persona tin. “Materialismo lo sigui ta un dje forsanan stimulante dje sociedad mericano . . . i un creciente forsa importante den otro mercadonan principal tambe,” e vicepresidente di un agencia publicitario a declará. Esaki ta sosodiendo caminda bo ta biba?

 9. Kico por ser bisá tocante e desobedencia na mayornan cu a ser profetisá?

⁹ “Desobediente na mayornan.” (2 Timoteo 3:2) Awendia mayornan, maestronan, i otronan ta experenciá personalmente cu hopi mucha ta sin respet i desobediente. Algun dje hóbennan aki sea ta reaccionando asina n’e mal conducta di nan mayornan of ta imitando e conducta ei. Un cantidad aumentante di mucha ta perdiendo fe den—i ta rebeldiando contra—scol, ley, religion, i nan mayornan. Un maestro di scol cu hopi aña di experencia a bisa, “E tendencia ta cu nan ta parce di tin masha poco respet pa cualkier cos.” Sin embargo, felismente hopi mucha temeroso di Dios ta ehemplar den nan comportacion.

10, 11. Ki evidencia tin cu hende ta feros i ta falta cariño natural?

¹⁰ “Feros.” (2 Timoteo 3:3) E palabra griego traducí “feros” ta nificá ‘brabu, salbahe, faltando simpatia i sintimentu humano.’ Ki bon esaki ta describí hopi burdugu cu ta cometé violencia awe! Un editorial a bisa, “Bida ta asina traumático, asina yená cu horor sangriente cu bo mester tin un stoma di heru pa lesa e noticia di tur dia.” Un agente di siguridad di edificio a remarcá cu ta parce cu hopi hóben ta nenga di considerá e consecuencianan di nan accion. El a bisa: “Tin un sintimentu di, ‘Mi no sa di mañan. Lo mi haña loke mi kier awe.’ ”

¹¹ “Sin cariño natural.” (2 Timoteo 3:3) E frase aki ta ser traducí for di un palabra griego nificando “sin curason, inhumano” i indicando un “falta di cariño natural i di famia.” (The New International Dictionary of New Testament Theology) Sí, cariño hopi bes ta falta net den e ambiente den cua e mester florecé—na cas. Informenan di maltrato di compañeronan di matrimonio, muchanan, i asta di mayornan di edad a bira perturbadoramente comun. Un tim di investigador a comentá: “Violencia humano—sea cu e ta un boftá of un pushá, un hincá of un tiramentu—ta sosodé mas frecuentemente den e círculo di famia cu cualkier otro caminda den nos sociedad.”

12. Pakico por ser bisá cu hende tin solamente un aparencia di debocion piadoso?

¹² “Teniendo un forma di debocion piadoso pero resultando falsu na su poder.” (2 Timoteo 3:5) E Bijbel tin e poder pa cambia bida pa mas mihó. (Efesionan 4:22-24) Sin embargo, hopi hende awe ta usa nan religion como un capa tras di cua nan ta haci actividadnan inhustu cu ta desagradá Dios. Gañamentu, hortamentu, i mal conducta sexual hopi bes ta ser pasá por haltu dor dje lidernan religioso. Hopi religion ta predicá amor, pero ta apoyá guera. Un editorial den e revista India Today ta remarcá, “Den nomber dje Creador Supremo, sernan humano a cometé e atrocidadnan di mas abominabel contra nan próhimo.” En realidad, e dos conflictonan mas sangriente di tempu recien—Guera Mundial I i II—a originá den curason di cristiandad.

13. Ki evidencia tin cu e tera ta ser ruiná?

¹³ “Ruinando e tera.” (Revelacion 11:18) Mas cu 1.600 científico, incluyendo 104 ganador di premio Nobel, for di henter mundu a aprobá un spiertamentu, publicá dor dje Union di Científico Preocupá (Union of Concerned Scientists of UCS), cu a declará: “Sernan humano i e medio ambiente ta riba un curso di un choke. . . . No ta keda mas cu un par di década promé cu nos perde e oportunidad pa prevení e desasternan menasante di sosodé.” E raport a bisa cu hende su prácticanan cu ta pone bida na peliger “lo por cambia e mundu di tal manera cu lo e ta incapas pa sostené bida den e forma cu nos conocé.” Gastamentu di ozon, contaminacion di awa, rosamentu di mondi, perdementu di tera productivo, i e extincion di hopi especie di animal i mata a ser mencioná como problemanan urgente cu merecé atencion. E UCS a bisa, “Nos metementu den e funcionnan interdependiente di bida, por iniciá un efecto di alcanse amplio, incluyendo e colapso di sistemanan biológico kende nan procesonan dinámico nos no ta comprendé perfectamente.”

14. Con lo bo por proba cu Mateo 24:14 ta ser cumplí den nos tempu?

¹⁴ “E bon nobo aki dje reino lo ser predicá den tur e tera habitá.” (Mateo 24:14) Jesus a profetisá cu e bon nobo dje Reino lo ser predicá rond mundu, pa un testimonio na tur nacion. Cu yudansa i bendicion divino, miyones di Testigo di Jehova ta dedicando miles di miyones di ora na e predicacion aki i e trabou di haci disipel. (Mateo 28:19, 20) Sí, e Testigonan ta realisá cu nan lo ta culpabel di sanger si nan no declará e bon nobo. (Ezekiel 3:18, 19) Pero nan ta keda contentu cu cada aña miles di hende ta respondé cu gratitud na e mensahe di Reino i ta tuma nan posicion como cristiannan berdadero, esta, como Testigonan di Jehova. Ta un privilegio incalculabel pa sirbi Jehova i asina plama e conocimentu di Dios. I despues cu e bon nobo aki ta ser predicá den tur e tera habitá, e fin dje sistema malbado aki lo bini.

REACCIONA NA E EVIDENCIA

15. Con e sistema malbado actual lo terminá?

¹⁵ Con e sistema aki lo terminá? E Bijbel ta profetisá un “tribulacion grandi” cu lo cuminsá cu un atake di elementonan político dje mundu aki riba “Babilonia e Grandi” e imperio mundial di religion falsu. (Mateo 24:21; Revelacion 17:5, 16) Jesus a bisa cu durante e periodo aki ‘solo lo bira scur, i luna lo no duna su lus, i e streanan lo cai for di cielu, i e podernan di cielu lo ser sagudí.’ (Mateo 24:29) Esaki kisas ta indicá fenómenonan celestial literal. Di tur manera, e lusnan briyante dje mundu religioso lo ser exponé i eliminá. Anto Satanas, yamá “Gog dje tera di Magog,” lo usa hendenan corupto pa haci un atake dicididu riba Jehova su pueblo. Pero Satanas lo no tin éxito, pasobra Dios lo bini pa salba nan. (Ezekiel 38:1, 2, 14-23) “E tribulacion grandi” lo alcansá su culminacion na Armagedon, “e guera dje gran dia di Dios Todopoderoso.” Lo e eliminá delaster un marca di Satanas su organisacion terenal, habriendo e caminda pa bendicionnan sin fin basha riba humanidad sobrebibiente.—Revelacion 7:9, 14; 11:15; 16:14, 16; 21:3, 4.

16. Con nos sa cu e rasgonan profetisá p’e último dianan ta aplicá na nos tempu?

¹⁶ Riba nan mes, algun rasgo dje profecianan cu ta describí e último dianan por parce di ta aplicabel na otro periodonan di historia. Pero ora combiná nan, e evidencianan profetisá ta señalá na nos dia. Pa ilustrá: E liñanan cu ta forma un persona su “fingerprint” ta forma un patronchi cu no por pertenecé na ningun otro individuo. Di manera similar, e último dianan tin na mes patronchi di marcanan, of sosodementunan. Esaki ta forma un “fingerprint” cu no por pertenecé na ningun otro periodo di tempu. Ora nan ser considerá huntu cu e indicacionnan bíblico cu Dios su Reino celestial ta gobernando awor, e evidencia ta percurá un base sólido pa concluí cu esakinan ta en berdad e último dianan. Ademas, tin prueba claro for dje Scritura cu e sistema malbado actual pronto lo ser destruí.

17. Kico e conocimentu cu esakinan ta e último dianan mester motivá nos pa haci?

¹⁷ Con lo bo reaccioná na e evidencia cu esakinan ta e último dianan? Considerá esaki: Si un tormenta feros i destructivo ta biniendo, nos ta tuma medidanan di precaucion sin tarda. Wel, loke e Bijbel ta profetisá pa e sistema actual aki mester motivá nos na accion. (Mateo 16:1-3) Nos por mira claramente cu nos ta bibando den e último dianan dje sistema di mundu aki. Esaki mester motivá nos pa haci cualkier ahuste cu ta necesario pa gana Dios su fabor. (2 Pedro 3:3, 10-12) Refiriendo na su mes como e agente pa salbacion, Jesus ta zona e yamada urgente: “Presta atencion na boso mes pa boso curason nunca yega di ta cargá cu comementu di mas i bebementu di mas i ansiedadnan di bida, i di ripiente e dia ei yega instantáneamente riba boso manera un las. Pasobra lo e bini riba tur esnan bibando riba e cara dje tera. Keda lanta, anto, na tur momento haciendo súplica pa boso por logra scapa di tur e cosnan aki cu ta destiná pa sosodé, i para dilanti e Yu di hende.”—Lucas 21:34-36.

[Nota]

TEST BO CONOCIMENTU

Kico e Bijbel a profetisá tocante e desaroyonan mundial na cuminsamentu dje reinado di Cristo?

Cua ta algun rasgo dje último dianan?

Kico ta convencé bo cu esakinan ta e último dianan?

[Kuadro na página 102]

ALGUN RASGO DJE ÚLTIMO DIANAN

• Guera manera nunca bisto.—Mateo 24:7; Revelacion 6:4.

• Hamber.—Mateo 24:7; Revelacion 6:5, 6, 8.

• Pest.—Lucas 21:11; Revelacion 6:8.

• Aumento di maldad.—Mateo 24:12.

• Ruinamentu dje tera.—Revelacion 11:18.

• Temblornan.—Mateo 24:7.

• Tempu crítico, duru pa trata cuné.—2 Timoteo 3:1.

• Amor excesivo pa placa.—2 Timoteo 3:2.

• Desobedencia na mayornan.—2 Timoteo 3:2.

• Falta di cariño natural.—2 Timoteo 3:3.

• Stimando placer mas bien cu Dios.—2 Timoteo 3:4.

• Falta di dominio propio.—2 Timoteo 3:3.

• Sin amor pa bondad.—2 Timoteo 3:3.

• No tumando nota dje peliger menasante.—Mateo 24:39.

• Bofonadornan ta rechasá prueba dje último dianan.—2 Pedro 3:3, 4.

• Predicacion mundial dje Reino di Dios.—Mateo 24:14.

[Plachi di henter página 101]