“Hasi Hustisia” Kanando ku Dios

1-3. (a) Pakiko nos tin un obligashon ku Yehova? (b) Kiko nos Reskatadó amoroso ta pidi bèk for di nos?

IMAGINÁ ku bo ta riba un barku ku ta senk. Nèt ora bo pensa ku tur speransa a kaba un reskatadó ta yega i hiba bo na un lugá sigur. Bo ta sinti un gran alivio ora e persona ku a reskatá bo saka bo for di peliger i bisa bo: “Awor bo ta sano i salvo”! Lo bo no tin un obligashon moral ku e persona ei? Literalmente, bo debe bo bida na dje.

² Den sierto sentido, esaki ta ilustrá loke Yehova a hasi pa nos. Nos sigur tin un obligashon kuné. Al fin i al kabo, ta é a perkurá e reskate, i esei a hasi posibel pa nos ser librá for di e gara di piká i morto. Nos ta sinti nos sano i salvo pasobra nos sa ku tanten nos ehersé fe den e sakrifisio presioso ei, nos pikánan ta ser pordoná, i nos futuro eterno ta garantisá. (1 Juan 1:7; 4:9) Manera nos a mira den Kapítulo 14, e reskate ta un manifestashon supremo di e amor i hustisia di Yehova. Kon nos mester reakshoná na esaki?

³ Ta bon pa konsiderá kiko nos Reskatadó amoroso mes ta pidi bèk for di nos. Yehova a bisa pa medio di profeta Mikeas: “El a bisa bo, O hende, loke ta bon; i kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?” (Mikeas 6:8) Ripará ku un di e kosnan ku Yehova ta pidi bèk for di nos ta pa nos “hasi hustisia.” Kon nos por kumpli ku e rekisito aki?

 4. Kon nos por sa ku Yehova ta spera pa nos biba na armonia ku su normanan hustu?

⁴ Yehova ta spera pa nos biba segun su normanan di loke ta bon i malu. Siendo ku su normanan ta hustu, nos ta buska hustisia ora nos ta armonisá nos bida ku nan. “Siña di hasi bon, buska huisio,” segun Isaias 1:17. E Palabra di Dios ta animá nos seriamente pa “buska hustisia.” (Sofonias 2:3) Tambe e ta urgi nos pa “bisti e hende [“personalidat,” NW] nobo, ku a wòrdu kreá segun Dios den hustisia i santidat berdadero.” (Efesionan 4:24) Berdadero hustisia no ta laga lugá pa violensia, impuresa i inmoralidat, pasobra e kosnan aki ta bai kontra loke ta santu.—Salmo 11:5; Efesionan 5:3-5.

5, 6. (a) Pakiko no ta un karga pa nos kumpli ku Yehova su normanan? (b) Kon Beibel ta mustra ku buskamentu di hustisia ta un proseso kontinuo?

⁵ Ta un karga pa nos biba segun e normanan hustu di Yehova? Nò. Un kurason ku ta sinti su mes atraí na Yehova no ta haña su rekisitonan un karga. Pa motibu ku nos ta stima nos Dios i tur loke e ta representá, nos kier biba den un forma ku ta agrad’é. (1 Juan 5:3) Kòrda ku Yehova “ta stima hustisia.” (Salmo 11:7) P’esei si nos berdaderamente kier imitá su hustisia, nos mester stima loke Yehova ta stima i odia loke e ta odia.—Salmo 97:10.

⁶ No ta fásil pa nos komo hende imperfekto buska hustisia. Nos tin ku kita e personalidat bieu ku su práktikanan pekaminoso i bisti esun nobo. Beibel ta bisa ku e personalidat nobo ta “wòrdu renobá” pa medio di konosementu eksakto. (Kolosensenan 3:9, 10) E palabranan “wòrdu renobá” ta indiká ku bistimentu di e personalidat nobo ta un proseso kontinuo, unu ku ta rekerí esfuerso diligente. Maske kuantu nos lucha pa hasi loke ta korekto, ta yega momentunan ku nos naturalesa pekaminoso ta pone nos trompeká den pensamentu, palabra i akshon.—Romanonan 7:14-20; Santiago 3:2.

 7. Kon nos tin ku mira rekaidanan den nos esfuerso pa buska hustisia?

⁷ Kon nos tin ku mira rekaidanan den nos esfuerso pa buska hustisia? Klaru ku nos no kier minimisá e seriedat di piká. Na mesun tempu, nos no mester entregá nunka, pensando ku nos fayonan ta hasi nos indigno pa sirbi Yehova. Nos Dios miserikòrdioso a hasi areglo pa esnan ku ta repentí di kurason rekobrá su fabor. Pensa riba e palabranan alentador di apòstel Juan: “Mi yu chikitunan, mi ta skirbi boso e kosnan aki pa boso no hasi piká.” Pero el a agregá mesora den un forma realista: “I si un hende hasi piká [pa motibu di imperfekshon heredá], nos tin un abogado serka e Tata, Hesukristu.” (1 Juan 2:1) Sí, Yehova a perkurá e sakrifisio di reskate di Hesus pa nos por sirbié di un manera aseptabel apesar di nos naturalesa pekaminoso. Esei no ta impulsá nos pa hasi nos bèst pa agradá Yehova?

8, 9. Kon e proklamashon di e bon nobo ta demostrá e hustisia di Yehova?

⁸ Nos por ehersé hustisia—de echo imitá e hustisia di Dios—dor di hasi nos máksimo esfuerso pa prediká e bon nobo di e Reino di Dios na otro hende. Ki konekshon tin entre e hustisia di Yehova i e bon nobo?

⁹ Yehova lo no pone fin n’e mundu malbado aki sin laga duna un spièrtamentu promé. Den su profesia tokante loke lo tuma lugá den e tempu di fin, Hesus a bisa: “E evangelio mester wòrdu prediká promé na tur nashon.” (Marko 13:10; Mateo 24:3) E palabra “promé” den e frase ei ta indiká ku despues di e predikashon mundial lo sigui otro susesonan. E susesonan ei ta inkluí e tribulashon grandi profetisá ku lo nifiká destrukshon di e malbadonan. Esei na su turno lo habri kaminda pa un hustu mundu nobo. (Mateo 24:14, 21, 22) Definitivamente lo no tin niun base pa akusá Yehova di a kometé un inhustisia kontra e malbadonan. Dor di laga duna e spièrtamentu, Yehova ta dunando e personanan ei oportunidat amplio pa kambia i asina evitá destrukshon.—Jonas 3:1-10.

10, 11. Kon nos predikashon di e bon nobo ta un refleho di e hustisia di Dios?

¹⁰ Kon nos predikashon di e bon nobo ta un refleho di e hustisia di Dios? Na promé lugá, ta hustu pa nos hasi loke ta na nos alkanse pa yuda otro hende haña salbashon. Pensa atrobe riba e ilustrashon di un barku ku ta senk for di kua nos ta ser reskatá. Unabes bo ta safe den e boto salbabida, sin duda lo bo kier yuda otro hende ku ainda ta den awa. Meskos tambe, nos tin un obligashon ku esnan ku ainda ta luchando den e “awanan” di e mundu malbado aki. Ounke hopi ta rechasá nos mensahe, tanten ku Yehova ta sigui tene pasenshi ku hende, nos tin e responsabilidat di duna nan e oportunidat pa “bin na repentimentu” i asina haña e oportunidat di risibí salbashon.—2 Pedro 3:9.

¹¹ Ora nos ta prediká e bon nobo na tur hende ku nos topa, nos ta manifestá hustisia den un otro manera importante: Nos ta mustra ku nos ta imparsial. Kòrda ku “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echonan 10:34, 35) Si nos kier imitá Su hustisia, nos no mester tin prehuisio. Mas bien, nos mester kompartí e bon nobo ku otro hende sin importá nan rasa, nivel sosial òf rekurso finansiero. Asina nos ta duna tur hende ku lo skucha un oportunidat pa tende i respondé n’e bon nobo.—Romanonan 10:11-13.

12, 13. (a) Pakiko nos no mester ta lihé pa husga otro hende? (b) Kiko ta e nifikashon di Hesus su konseho pa “no husga” i “no kondená”? (Mira tambe e nota na pia di página.)

¹² Tambe nos por hasi hustisia dor di trata otro hende manera Yehova ta trata nos. Ta masha fásil pa husga otro hende, kritiká nan fayonan i kuestioná nan intenshonnan. Pero kua di nos lo kier pa Yehova skudriñá nos intenshonnan i fayonan sin tene piedat di nos? No ta asina Yehova ta trata ku nos. E salmista a remarká: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) Nos no ta gradisidu ku nos Dios hustu i miserikòrdioso no ta konsentrá riba nos foutnan? (Salmo 103:8-10) Kon nos anto mester trata otro hende?

¹³ Si nos komprondé ku e hustisia di Dios ta miserikòrdioso, nos lo no ta lihé pa husga otro den asuntunan ku realmente no ta toka nos òf ku ta di menor importansia. Den Hesus su Sermon Riba Seru, el a duna e spièrtamentu: “No husga, pa boso no wòrdu husgá.” (Mateo 7:1) Segun e relato di Lukas, Hesus a agregá: “No kondená, i boso lo no wòrdu kondená.”a (Lukas 6:37) Hesus a mustra ku e ta konsiente ku hende imperfekto tin tendensia di husga. Kualkier un di su oyentenan ku tabatin e kustumber di husga otro severamente mester a stòp di hasi esei.

14. Pa ki motibunan nos tin ku stòp di husga otro hende?

¹⁴ Pakiko nos tin ku stòp di husga otro? Wèl, na promé lugá, pasobra nos outoridat ta limitá. Disipel Santiago ta rekordá nos: “Tin solamente un dunadó di lei i hues,” i esei ta Yehova. Pues Santiago ta hasi e pregunta penetrante: “Ta ken abo ta ku bo ta husga bo próhimo?” (Santiago 4:12; Romanonan 14:1-4) Ademas, nos naturalesa pekaminoso por pone ku fásilmente nos ta bai husga na un manera inhustu. Hopi aktitut i motivashon—manera prehuisio, sintimentu di ofensa, yalusí i ser hustu den nos mes bista—por pone nos saka konklushon robes di nos próhimo. Nos tin mas limitashonnan, i ora nos pensa riba nan, nos ta mira ku nos no mester ta muchu lihé pa buska fout serka otro hende. Nos no por lesa kurason di otro hende, ni nos no por konosé tur nan sirkunstansianan personal. Ken nos ta anto pa atribuí mal intenshon na nos rumannan den fe òf pa kritiká e esfuersonan ku nan ta hasi pa sirbi Dios? Ta muchu mas mihó pa imitá Yehova dor di buska e bon den nos rumannan en bes di konsentrá riba nan fayonan!

15. Pa ki tipo di palabra i trato no tin lugá den e pueblo di Dios i pakiko?

¹⁵ Kiko di miembronan di famia? Lamentablemente, den e mundu djawe, nèt e lugá ku mester ta un refugio di pas ta kaminda tin biaha hende ta husga otro mas pisá ku nunka: e ambiente di kas. Hopi bes nos ta tende di esposonan, esposanan òf mayornan ku ta “kondená” miembronan di nan famia ku un avalancha konstante di palabranan insolente òf maltrato físiko. Pero den e pueblo di Dios sí no tin lugá pa palabranan kruel, sarkasmo amargo ni agreshon físiko. (Efesionan 4:29, 31; 5:33; 6:4) E konseho di Hesus pa stòp di husga i stòp di kondená ta konta pa ora nos ta na kas tambe. Kòrda ku hasi hustisia ta enserá trata otro hende manera Yehova ta trata nos. I hamas nos Dios ta trata nos na un manera severo òf kruel. Mas bien, e “ta yen di kompashon” pa esnan ku ta stim’é. (Santiago 5:11) Ki un bunita ehèmpel pa nos imitá!

16, 17. (a) Kiko Yehova ta spera di ansianonan? (b) Kiko mester hasi ora un pekadó no mustra repentimentu sinsero, i pakiko?

¹⁶ Nos tur tin e responsabilidat pa hasi hustisia, ma foral ansianonan den e kongregashon kristian tin e responsabilidat aki. Tuma nota di e deskripshon profétiko ku Isaias a duna di “prensnan,” òf ansianonan: “Mira, un rei lo reina ku hustisia, i prensnan lo goberná ku huisio.” (Isaias 32:1) Sí, Yehova ta spera pa ansianonan sirbi konforme hustisia. Kon nan por hasi esaki?

¹⁷ E hòmbernan spiritualmente kapasitá aki ta bon konsiente ku hustisia ta eksigí pa mantené e kongregashon limpi. Tin biaha ansianonan ta haña nan ta husga kasonan di malecho serio. Ora nan ta hasi esei, nan ta kòrda ku ki ora ku ta posibel hustisia divino ta buska pa ekstendé miserikòrdia. Pues, nan ta purba guia e pekadó na repentimentu. Pero kiko mester hasi si e pekadó no demostrá repentimentu sinsero apesar di esfuerso pa yud’é? Den hustisia perfekto e Palabra di Yehova ta manda pa tuma e siguiente medida firme: “Saka e hòmber malbado for di meimei di boso.” Esei ta nifiká ekspuls’é for di e kongregashon. (1 Korintionan 5:11-13; 2 Juan 9-11) Ta duel e ansianonan ora nan tin ku tuma un akshon asina, pero nan ta rekonosé ku esaki ta nesesario pa salbaguardiá e limpiesa moral i spiritual di e kongregashon. Asina mes, nan ta spera ku un dia e pekadó lo bini bèk na su sano huisio i regresá n’e kongregashon.—Lukas 15:17, 18.

18. Kiko ansianonan ta tene na mente ora nan ta ofresé nan rumannan konseho basá riba Beibel?

¹⁸ Sirbi konforme hustisia ta enserá tambe ofresé konseho basá riba Beibel ora esei ta nesesario. Klaru ku ansianonan no ta kana buska fout den nan rumannan, ni probechá di kada okashon pa korigí esakinan. Pero por ta un ruman den fe ta “dal un paso robes promé ku e realisá esei.” Ansianonan lo kòrda ku hustisia divino no ta ni kruel ni sin heful, i esei lo motivá nan pa “trata na reahustá e hòmber ei ku un spiritu di suavedat.” (Galationan 6:1, NW) P’esei, ansianonan lo no zundra un ruman ku a faya, ni papia brutu kuné. Mas bien, ora un hende risibí konseho duná ku amor, esei ta lanta su ánimo. Asta ora e ansianonan duna un reprendementu nesesario—splikando frankamente kiko ta e konsekuensianan di un proseder imprudente—nan ta tene na mente ku e ruman ku a faya ta un karné di e tou di Yehova.b (Lukas 15:7) E chèns di reahustá e ruman ku a faya ta mas grandi ora ku e sinti ku a trat’é ku kariño i amor na momentu di konseh’é i reprend’é.

19. Ki desishonnan ansianonan tin ku tuma, i riba kiko nan tin ku basa e desishonnan ei?

¹⁹ Hopi bes ansianonan tin ku tuma desishonnan ku tin di haber ku nan rumannan den fe. Por ehèmpel, nan ta reuní kada tantu tempu pa analisá kua ta e ruman hòmbernan den e kongregashon ku tin e kualifikashonnan pa wòrdu rekomendá komo ansiano òf sirbidó ministerial. E ansianonan sa ku ta importante pa nan ta imparsial. Nan ta basa nan rekomendashonnan riba e rekisitonan di Dios, i no djis riba preferensia personal. Den e forma ei nan ta aktua “sin prehuisio, sin hasi nada ku parsialidat.”—1 Timoteo 5:21.

20, 21. (a) Kiko ansianonan ta purba di ta, i pakiko? (b) Kiko ansianonan por hasi pa yuda “esnan ku ta falta ánimo”?

²⁰ Ansianonan ta atministrá hustisia divino den otro maneranan tambe. Despues ku Isaias a profetisá ku ansianonan lo sirbi “ku hustisia,” el a sigui bisa: “Kada un lo ta manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isaias 32:2) P’esei ansianonan ta purba di ta un fuente di konsuelo i di refreskamentu pa nan rumannan.

²¹ Awe, ku tur e problemanan ku tin tendensia di deprimí hende, hopi ta esnan ku tin mester di animashon. Ansianonan, kiko boso por hasi pa yuda “esnan ku ta falta ánimo”? (1 Tesalonisensenan 5:14) Skucha nan ku empatia. (Santiago 1:19) Kisas nan kier pa un hende ku nan ta konfia tende e “ansha” ku nan tin den nan kurason. (Proverbionan 12:25) Garantisá nan ku nan ta personanan hopi kerí i stimá, i ku den bista di tantu Yehova komo nan rumannan nan tin hopi balor. (1 Pedro 1:22; 5:6, 7) Ademas, boso por hasi orashon huntu ku nan i pa nan. Ora nan tende un ansiano hasi un orashon di kurason na fabor di nan, esei lo por duna nan un gran konsuelo. (Santiago 5:14, 15) E Dios di hustisia lo no keda sin tuma nota di boso esfuersonan amoroso pa yuda esnan ku ta falta ánimo.

22. Den ki maneranan nos por imitá e hustisia di Yehova, i ku ki resultado?

²² Sí, nos ta hala mas i mas serka Yehova dor di imitá su hustisia! Ora nos ta pega na su normanan hustu, ora nos ta kompartí e bon nobo ku ta hiba na salbashon i ora nos ta enfoká riba loke ta bon den otro hende en bes di buska nan fayonan, nos ta desplegando hustisia divino. I boso, ansianonan, kada bes ku boso protehá e puresa di e kongregashon, ofresé konseho edifikante di Beibel, tuma desishonnan imparsial i animá esnan deprimí, boso ta reflehando hustisia divino. Ki kontentu Yehova ta keda ora e wak for di shelu i mira su sirbidónan hasi nan bèst pa “hasi hustisia” kanando ku nan Dios!