Stimulá na Akshon

ANSIANONAN kristian mester por “eksortá ku doktrina sano.” (Tito 1:9) Tin biaha nan tin ku hasi esaki bou di sirkunstansianan hopi difísil. Komo ku ta importante pa nan hasié na armonia ku instrukshon bíbliko, ansianonan tin ku hasi kaso di e konseho: “Okupá bo mes ku . . . eksortashon.” (1 Tim. 4:13) Ounke e lès aki ta destiná prinsipalmente pa ansianonan i esnan ku ta purba alkansá e privilegio aki, e mesun instrukshonnan aki ta konta tambe pa ora mayornan ta stimulá nan yunan na sierto akshon òf ora esnan ku ta kondusí studio di Beibel kier stimulá nan studiantenan pa aktua.

Situashonnan Ku Ta Rekerí Esei. Pa nos por determiná ki ora un eksortashon ta nesesario, ta bon pa nos analisá algun situashon menshoná den Beibel den kua e disipelnan di Hesus a eksortá òf stimulá otronan pa aktua. Apòstel Pedro a hasi un yamada riba ansianonan pa kumpli ku nan responsabilidat komo wardadó di e tou di Dios. (1 Ped. 5:1, 2) Pablo a konsehá Tito pa stimulá hòmbernan hóben “pa ta huisioso.” (Tito 2:6) Tambe el a pidi kompañeronan kristian pa “papia e mesun kos” i pa evitá esnan ku ta purba kousa divishon entre e rumannan. (1 Kor. 1:10; Rom. 16:17; Fil. 4:2) Ounke Pablo a elogiá miembronan di e kongregashon di Tesalónika pa e bon kosnan ku nan tabata hasi, el a enfatisá ku nan mester a apliká e instrukshon ku nan a risibí na un mayor grado. (1 Tes. 4:1, 10) Pedro a roga su kompañeronan kristian pa ‘apstené di pashonnan karnal.’ (1 Ped. 2:11) En bista di e influensia di hòmbernan malbado ku tabata entregá nan mes na un bida inmoral, Hudas a stimulá su rumannan pa “lucha seriamente pa e fe.” (Hudas 3, 4) Kristiannan en general a ser konsehá pa enkurashá otro ya asina e engaño di piká no ta pone ningun di nan bira duru. (Heb. 3:13) Por último, Pedro a stimulá hudiunan ku ainda no a pone fe den Hesus ku e palabranan: “Skapa for di e generashon pèrvèrso aki!”—Echo. 2:40.

Kua ta e kualidatnan nesesario pa bo por stimulá hende pa aktua den e situashonnan menshoná ei? Kon e persona por hasi su yamada urgente sin resultá dominante òf severo?

“A Base di Amor.” Si ora nos ta stimulá un hende pa aktua nos no hasié “a base di amor,” e eksortashon por zona severo. (Flm. 9, BPK) Ta bèrdat ku ora hende tin ku aktua ku urgensia, e oradó su manera di papia mester reflehá esei; si su stèm ta muchu suave lo e por duna e impreshon di ta pidiendo despensa pa loke e ta bisa. Pero maske e ta papia ku urgensia e mester ekspresá su mes ku sinseridat i sintimentu, pasobra konseho duná ku un tono kariñoso tin mas chèns di motivá e ouditorio. Pablo, refiriendo na su mes i na su kompañeronan, a bisa e tesalonisensenan: “Boso sa kon nos tabata eksortá . . . kada un di boso, manera un tata [ta hasi ku] su mes yunan.” (1 Tes. 2:11) Meskos ku amor a motivá e superintendentenan kristian ei pa roga nan rumannan, asina tambe laga berdadero interes motivá bo ora bo ta papia ku bo oyentenan.

Papia ku takto. No provoká esnan ku bo kier stimulá na akshon. Pero tampoko no keda sin bisa nan “henter e propósito di Dios.” (Echo. 20:27) Personanan gradisidu lo no sinti nan ofendí ni lo no stima bo ménos pasobra bo a stimulá nan bondadosamente pa hasi loke ta korekto.—Sal. 141:5.

Hopi bes ta bon pa elogiá e rumannan na un manera sinsero i spesífiko, promé ku bo duna nan un eksortashon. Pensa riba e bon kosnan ku bo rumannan ta hasi, kosnan ku sin duda ta agradá Yehova, manera e fe ku nan ta mustra den nan labor, e amor ku ta motivá nan pa hasi esfuerso i nan perseveransia den situashonnan difísil. (1 Tes. 1:2-8; 2 Tes. 1:3-5) Esaki lo yuda bo rumannan mira ku bo ta komprondé nan i apresiá nan, i esei lo hasi nan mas habrí pa e konseho ku bo ta bai duna nan.

“Ku Hopi Pasenshi.” Pa stimulá hende na akshon bo mester hasié “ku hopi pasenshi.” (2 Tim. 4:2) Kiko esei ta enserá? Entre otro, soportá kos malu òf provokashon ku pasenshi. Un persona ku tin hopi pasenshi no ta pèrdè e speransa ku su oyentenan lo pone na práktika loke e ta bisa nan. Si bo tin e aktitut aki ora bo ta stimulá bo oyentenan pa aktua, nan lo no pensa ku bo ta spera lo pió di nan. E konfiansa ku bo tin ku bo rumannan kier hasi nan bèst pa sirbi Yehova, lo motivá nan pa hasi lo korekto.—Heb. 6:9.

“Ku Doktrina Sano.” Kon un ansiano por “eksortá ku doktrina sano”? Dor di “tene firme na e palabra fiel ku ta segun e siñansa.” (Tito 1:9) En bes di ekspresá bo opinionnan personal, laga e forsa di bo animashon sali for di e Palabra di Dios. Laga Beibel determiná kiko bo tin ku bisa. Menshoná un pa un e benefisionan di sigui e konseho ku Beibel ta duna riba e asuntu en kuestion. Kòrda bon riba e konsekuensianan di desobedesé e Palabra di Dios (tantu esnan aktual komo den futuro), i usa nan pa konvensé bo ouditorio di e nesesidat pa aktua korektamente.

Hasi sigur ku bo ta splika bo ouditorio bon kla kiko nan mester hasi i den ki manera, i ku bo rasonamentu ta firmemente basá riba Beibel. Si e Skritura ta permití un grado di libertat den un sierto desishon, splika te na unda e límitenan ta yega. Anto den bo konklushon, hasi un yamada final ku lo pone bo ouditorio bira mas desididu pa aktua.

Ku “Derecho di Papia Libremente.” Pa bo por stimulá hende na akshon, bo mester tin frankesa di ekspreshon, es desir, “derecho di papia libremente.” (1 Tim. 3:13, BPK) Kiko ta duna un persona e derecho di papia libremente? E echo ku su “ehèmpel den bon obra” ta na armonia ku loke e ta animá e rumannan pa hasi. (Tito 2:6, 7; 1 Ped. 5:3) Ora esaki ta e kaso, e oyentenan lo ripará ku e oradó no ta pidi nan hasi kos ku e mes no ta hasi. Nan lo mira ku nan por imitá su fe, meskos ku e ta purba imitá Kristu.—1 Kor. 11:1; Fil. 3:17.

Ora nos ta stimulá hende na akshon ku un spiritu di amor i basá riba e Palabra di Dios, nos por logra hopi benefisio. Esnan ku tin e tarea di duna tal eksortashon mester hasi tur nan esfuerso pa hasié bon.—Rom. 12:8.