Carisma—Elogio na Hende of Gloria na Dios?

“UN GOBERNANTE mester sobresalí riba su súbditonan no solamente dor di ser realmente mihó cu nan, sino cu e mester tin tambe un tipo di encanto riba nan,” segun Jenofonte, un famoso general griego. Awe, hopi lo yama un “encanto” asina carisma.

Naturalmente, no ta tur gobernante humano tin carisma. Pero esnan cu tiné ta usa nan abilidad pa inspirá debocion i pa manipulá masa di hende pa nan propio finnan. Kisas e ehempel recien mas notorio tabata Adolf Hitler. William L. Shirer ta skirbi den su buki The Rise and Fall of the Third Reich: “[Na 1933], pa mayoria aleman, Hitler tabatin—of lo a asumí brevemente—e aura di un lider berdaderamente carismático. P’e siguiente diesdos añanan turbulento, nan lo a siguié ciegamente como si fuera e tabata poseé un huicio divino.”

Historia religioso tambe ta yen di lidernan carismático cu a inspirá hende pa ta deboto na nan, pero cu a trece desaster riba nan siguidónan. Jesus a spierta: “Tene cuidou pa ningun hende gaña boso, pasobra hopi hende lo bini den mi nomber, bisando: ‘Ami ta e Cristo,’ i nan lo gaña hopi hende.” (Mateo 24:4, 5, Phillips) Cristonan carismático falsu no a aparecé solamente den e promé siglo. Durante añanan ’70, Jim Jones a proclamá su mes como e “mesías dje Tempel di Pueblo.” Nan a describié como “un pastor carismático” cu “un poder straño riba hende,” i na 1978 el a instigá un dje mayor suicidionan masal di historia.a

Claramente, carisma por ta un don peligroso. Sin embargo, Bijbel ta papia tocante un otro tipo di don, of donnan, cu ta bini for di Dios disponibel pa tur p’e beneficio di tur. E palabra griego p’e don aki ta khaʹri·sma, i e ta aparecé 17 biaha den Bijbel. Un erudito griego ta definié como ‘un don grátis i inmerecí, algu duná na un hende cu no a traha p’e ni no ta merec’é, algu cu ta bini for dje gracia di Dios i cu un hende hamas lo por a alcansá of poseé debí na su mes esfuerso.’

P’esei for dje punto di bista bíblico, khaʹri·sma ta un don ricibí, danki na Dios su bondad inmerecí. Kico ta algun dje donnan aki cu Dios a duna nos bondadosamente? I con nos por usa nan pa trece alabansa na dje? Laga nos considerá tres dje donnan di gracia aki.

Bida Eterno

E mayor don di tur ta indudablemente e don di bida eterno. Pablo a skirbi n’e congregacion romano: “E salario cu picá ta paga ta morto, pero e don [khaʹri·sma] cu Dios ta duna ta bida eterno mediante Cristo Jesus nos Señor.” (Romanonan 6:23) Ta bon pa mencioná cu e “salario” (morto) ta algu cu nos a gana, aunke inboluntariamente, dor di nos naturalesa pecaminoso. Di otro banda, e bida eterno cu Dios ta haci disponibel ta algu totalmente inmerecí cu nos hamas lo por gana riba nos propio méritonan.

Nos mester atesorá i compartí e don di bida eterno. Nos por yuda hende conocé Jehova, sirbié i asina ser faborecí cu e don di bida eterno. Revelacion 22:17 ta bisa: “E spiritu i e bruid ta sigui bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida grátis.”

Con nos por guia otronan n’e awa aki cu ta duna bida? Principalmente dor di usa Bijbel eficasmente den nos ministerio. Ta cierto cu den algun parti di mundu, hende rara bes sa lesa of pensa tocante cosnan spiritual; no obstante, semper tin oportunidad pa ‘spierta orea’ di un hende. (Isaías 50:4) Relacioná cu esaki, nos por tin confiansa den e forsa motivador di Bijbel, “pasobra e palabra di Dios ta bibu i ta ehercé poder.” (Hebreonan 4:12) Sea ta e sabiduria práctico di Bijbel, e consuelo i speransa cu e ta ofrecé, of ta su splicacion tocante e propósito di bida, e Palabra di Dios por toca e curason i pone hende riba e caminda pa bida.—2 Timoteo 3:16, 17.

Ademas, literatura basá riba Bijbel por yuda nos bisa “Bin!” Profeta Isaías a predicí cu durante e tempu aki di scuridad spiritual, “Jehova lo briya” riba su pueblo. (Isaías 60:2) Publicacionnan di Sociedad Watch Tower ta reflehá e bendicion aki for di Jehova, i tur aña nan ta guia miles di hende na Jehova, e Fuente di iluminacion spiritual. E publicacionnan di Watch Tower no ta duna prominencia na personanan individual. Manera e introduccion di E Toren di Vigilancia ta splica, “e propósito di E Toren di Vigilancia ta di halsa Jehova Dios como Señor Soberano di universo. . . . E ta animá hende pa ehercé fe den Dios su Rey, Jesucristo, cu ta reinando awor, kende su sanger dramá ta habri caminda pa humanidad gana bida eterno.”

Un minister cristian di tempu completo, cu pa hopi aña tabatin éxito notabel den su ministerio, ta comentá riba e balor di E Toren di Vigilancia i Spierta! den yuda hende hala cerca Dios: “Ora mi studiantenan di Bijbel cuminsá lesa i disfrutá di E Toren di Vigilancia i Spierta!, nan ta progresá rápidamente. Mi ta mira e revistanan como un yudansa sumamente balioso den yuda hende conocé Jehova.”

Privilegionan di Sirbishi

Timoteo tabata un disipel cristian cu a ricibí un otro don cu a merecé atencion special. Apostel Pablo a bis’é: “No descuidá e don [khaʹri·sma] den bo cu a ser duná na bo mediante un pronosticacion i ora e cuerpo di anciano a pone nan man riba bo.” (1 Timoteo 4:14) Kico e don aki tabata? El a enbolbé Timoteo su nombramentu como un superintendente biahero, un privilegio di sirbishi cu e mester a atendé na un manera responsabel. Den e mésun pasashi, Pablo a exhortá Timoteo: “Sigui aplicá bo mes na lesamentu público, na exhortacion, na siñamentu. Presta atencion constante na bo mes i na bo siñansa. Persistí den e cosnan aki, pasobra haciendo esaki lo bo salba tantu bo mes como esnan cu ta scuchá bo.”—1 Timoteo 4:13, 16.

Awe ancianonan tambe tin cu atesorá nan privilegionan di sirbishi. Manera Pablo ta mustra, un manera cu nan por haci esaki ta dor di ‘presta atencion na nan siñansa.’ En bes di imitá lidernan carismático mundano, nan ta dirigí atencion na Dios, no na nan mes. Jesus, nan Ehempel, tabata un maestro sobresaliente kende sin duda tabatin un personalidad magnético, pero humildemente el a duna gloria na su Tata. El a declará: “Loke mi ta siña no ta di mi, sino ta pertenecé na esun cu a mandá mi.”—Juan 5:41; 7:16.

Jesus a glorificá su Tata celestial dor di usa e Palabra di Dios como e autoridad pa su siñansa. (Mateo 19:4-6; 22:31, 32, 37-40) Pablo di igual manera a enfatisá e necesidad pa superintendentenan ‘tene firmemente n’e palabra fiel pa loke ta toca nan arte di siña.’ (Tito 1:9) Dor di basa nan discursonan firmemente riba e Scritura, ancianonan, en efecto, lo ta bisando mescos cu Jesus: “E cosnan cu mi ta bisa boso mi no ta papia nan di mi mes.”—Juan 14:10.

Con ancianonan por ‘tene firmemente n’e palabra fiel’? Dor di basa nan discurso i partinan di reunion riba e Palabra di Dios, splicando i enfatisando e textonan cu nan ta usa. Ilustracionnan dramático of anécdotanan chistoso, specialmente ora exagerá nan, por distraí e auditorio for dje Palabra di Dios i hala atencion n’e orador su mes abilidad. E versículonan di Bijbel, di otro banda, ta loke lo alcansá e curason i motivá e auditorio. (Salmo 19:7-9; 119:40; compará cu Lucas 24:32.) Discursonan asina ta hala ménos atencion na hende i ta duna mas gloria na Dios.

Un otro manera cu ancianonan por bira maestronan mas eficas ta dor di siña un for di otro. Mescos cu Pablo a yuda Timoteo, asina un anciano por asistí un otro. “Heru cu heru mes ta haci otro skerpi. Asina un hende ta haci e cara di un otro skerpi.” (Proverbionan 27:17; Filipensenan 2:3) Ancianonan ta saca beneficio ora nan ta compartí idea i sugerencianan. Un anciano recien nombrá a splica: “Un anciano experenciá a tuma tempu pa mustrá mi con e ta hinca un discurso público den otro. Den su preparacion, el a incluí preguntanan retórico, ilustracionnan, ehempelnan of experencianan corticu i tambe pasashinan di Bijbel cu el a investigá cuidadosamente. Mi a siña for di dje con pa agregá variedad na mi discursonan afin di evitá di expresá mi mes na un manera secu i monótono.”

Nos tur cu ta disfrutá di privilegionan di sirbishi, sea nos ta anciano, sirbidó ministerial of pionero, tin cu atesorá nos don. Djis promé cu su morto, Pablo a corda Timoteo ‘pa rebibá manera candela e don [khaʹri·sma] di Dios cu tabata den dje,’ cu den caso di Timoteo a enbolbé algun don special di spiritu. (2 Timoteo 1:6) Den casnan israelita, hopi biaha candela tabata djis carbon cayente. Tabata posibel pa ‘rebibá nan’ pa producí vlam i mas cayente. Asina nos ta ser animá pa hinca nos curason i energia den nos partinan, rebibando manera un candela cualkier don spiritual cu a ser confiá na nos.

Donnan Spiritual cu Mester Compartí

Pablo su amor pa su rumannan na Roma a impuls’é pa skirbi: “Mi ta anhelá di mira boso, pa mi compartí cu boso algun don [khaʹri·sma] spiritual pa boso por ta hací firme; of, mas bien, pa por tin un intercambio di estímulo entre boso, dor di cada un mediante e fe di e otro, tantu di boso como di mi.” (Romanonan 1:11, 12) Pablo a considerá nos abilidad pa fortificá fe di otro rumannan dor di papia cu nan como un don spiritual. E intercambio di e donnan spiritual ei lo a resultá den edificacion di fe i den estímulo mutuo.

I esaki siguramente ta necesario. Den e sistema malbado aki den cua nos ta biba, nos tur ta haña nos bou di stres den un of otro manera. Sin embargo, un intercambio regular di estímulo por yuda nos perseverá. E idea di intercambio—tantu duna como ricibí—ta importante pa mantené fortalesa spiritual. Ta cierto cu nos tur mester di animacion de bes en cuando, pero nos tur por edificá otro tambe.

Si nos ta alerto pa ripará compañeronan creyente cu ta desanimá, nos lo ‘por consolá esnan cu ta den cualkier clase di tribulacion cu e consuelo cu cua nos mes ta ser consolá dor di Dios.’ (2 Corintionan 1:3-5) E palabra griego pa consuelo (pa·raʹkle·sis) ta nificá literalmente “un yamada na bo banda.” Si, ora ta necesario, nos ta den banda pa ofrecé un man na nos ruman homber of muher, sin duda nos mes lo ricibí e mésun sosten amoroso ora nos ta den necesidad.—Eclesiástes 4:9, 10; compará cu Echonan 9:36-41.

Di gran beneficio tambe ta e bishitanan di pastoreo amoroso dje ancianonan. Aunke tin ocasionnan ora ta haci bishita pa duna conseho bíblico riba un asuntu cu ta rekerí atencion, mayoria bishita di pastoreo ta ocasionnan pa animacion, pa ‘consolá curason.’ (Colosensenan 2:2) Ora superintendentenan ta haci e bishitanan fortalecedor di fe ei, nan realmente ta compartiendo un don spiritual. Mescos cu Pablo, nan lo haña e forma único aki di duna algu como recompensador, i nan lo desaroyá un ‘anhelo’ pa nan rumannan.—Romanonan 1:11.

Esaki tabata cierto den e caso di un anciano na Spaña, cu ta conta e siguiente experencia: “Ricardo, un hobencito di 11 aña, a parce di tin poco interes den e reunionnan i den e congregacion en general. P’esei mi a pidi e mayornan di Ricardo permit pa bishitá nan yu homber, algu cu nan a aceptá mesora. Nan tabata biba den e cerunan na mas o ménos un ora di distancia den auto for di mi cas. Ricardo evidentemente tabata contentu pa mira e interes cu mi a mustra den dje, i el a respondé mesora. No a tarda muchu cu el a bira un publicadó no-bautisá i un miembro activo dje congregacion. Su timides a ser reemplasá pa un personalidad mas contentu i habrí. Vários persona den e congregacion a puntra: ‘Kico a pasa cu Ricardo?’ Nan a parce di ripar’é pa promé biaha. Refleccionando riba e bishita di pastoreo crucial ei, mi ta sinti cu ami a beneficiá mas cu Ricardo mes. Ora e drenta Salon di Reino, su cara ta briya, i e ta core bin cumindá mi. Tabata un goso pa mira su progreso spiritual.”

Sin duda, bishitanan di pastoreo, manera esaki, ta ser ricamente bendicioná. Bishitanan asina ta na armonia cu e súplica di Jesus: “Pastoreá mi carné chikitunan.” (Juan 21:16) Naturalmente, ancianonan no ta e úniconan cu por compartí donnan spiritual asina. Tur persona den e congregacion por incitá otronan na amor i obranan excelente. (Hebreonan 10:23, 24) Mescos cu hende cu ta subiendo un ceru ta mará huntu, asina lasonan spiritual ta uni nos huntu. Inevitablemente, loke nos ta haci i bisa ta afectá otronan. Un remarke skerpi of crítica fuerte por debilitá e lasonan cu ta uni nos. (Efesionan 4:29; Santiago 3:8) Di otro banda, palabranan di animacion bon scogé i asistencia amoroso por yuda nos rumannan superá nan dificultadnan. Den e manera aki nos lo ta compartiendo donnan spiritual di balor duradero.—Proverbionan 12:25.

Reflehando e Gloria di Dios den un Midí Mas Completo

Ta claro cu tur cristian tin un midí di carisma. Nos a ricibí e speransa preciosísimo di bida eterno. Tambe nos tin donnan spiritual cu nos por compartí cu otro. I nos por haci esfuerso pa inspirá of motivá otronan pa alcansá metanan corecto. Algun tin donnan adicional den forma di privilegionan di sirbishi. Tur e donnan aki ta prueba dje bondad inmerecí di Dios. I siendo cu cualkier don cu nos por tin ta algu cu nos a ricibí for di Dios, nos siguramente no tin motibu di gaba.—1 Corintionan 4:7.

Como cristiannan, nos ta haci bon di puntra nos mes: ‘Lo mi usa cualkier midí di carisma cu mi por tin pa trece gloria na Jehova, e Dunador di “tur bon don i tur regalo perfecto”? (Santiago 1:17) Lo mi imitá Jesus i sirbi otronan segun mi abilidad i circunstancianan?’

Apostel Pedro ta resumí nos responsabilidad en coneccion cu esaki: “Na e porcion cu e don [khaʹri·sma] cu cada un a ricibí, us’é pa sirbi otro como mayordomonan excelente dje bondad inmerecí di Dios expresá den vários manera. Si un hende ta papia, lagu’é papia como si fuera tabata declaracionnan sagrado di Dios; si un hende ta sirbi, lagu’é sirbi como dependiendo dje forsa cu Dios ta suministrá; di manera cu den tur cos Dios por ser glorificá mediante Jesucristo.”—1 Pedro 4:10, 11.

[Nota]

[Rekonosementu pa Potrèt na página 23]

Corbis-Bettmann

UPI/Corbis-Bettmann