Yehova Ta Libra Esun Afligí

“Hopi ta e aflikshonnan di e hustu, ma SEÑOR ta libr’é for di nan tur.”​—SALMO 34:19.

1, 2. Ki problema un kristian fiel a konfrontá, i dikon nos lo por haña nos ku sintimentunan similar?

UN MUCHA muhé ku yama Keikoa tin mas ku 20 aña komo Testigu di Yehova. El a sirbi pa un periodo komo un proklamadó di Reino di tempu kompletu, un pionero regular. E tabatin masha apresio pa e privilegio ei. Sin embargo, no muchu tempu pasá sintimentunan di desesperashon i isolashon a poderá di Keiko. “Mi tabata yora so,” el a konta. Pa kombatí su pensamentunan negativo, Keiko a bai dediká mas tempu na estudio personal. El a bisa: “Pero tòg, mi no por a trese kambio den mi manera di pensa. Mi tabata asina deprimí ku mi kier a muri.”

² Abo a yega di lucha ku sintimentunan similar di desesperashon? Komo un Testigu di Yehova, bo tin masha hopi motibu pa alegrá pasobra deboshon na Dios “ta kontené promesa pa e bida presente i pa esun ku ta bin.” (1 Timoteo 4:8) Bo ta biba aktualmente den un paradeis spiritual! Pero akaso esei ta nifiká ku bo ta protehá di tur sufrimentu òf aflikshon? Definitivamente ku nò! Beibel ta bisa: “Hopi ta e aflikshonnan di e hustu.” (Salmo 34:19) Esaki no ta un sorpresa, pasobra “henter mundu ta bou di kontròl di e malbado,” Satanas e Diabel. (1 Juan 5:19) Den un manera òf otro, nos tur ta eksperensiá e efektonan di Diabel su kontròl riba e mundu aki.—Efesionan 6:12.

E Efektonan di Aflikshon

 3. Duna algun ehèmpel bíbliko di sirbidónan di Dios ku a eksperensiá hopi sufrimentu i tristesa.

³ Sufrimentu òf tristesa prolongá por laga nos kuminsá mira tur kos skur. (Proverbionan 15:15) Konsiderá e hòmber rekto Jòb. Durante un eksperensia teribel, Jòb di: “Hende ku a nase di muhé ta biba poko dia i ta yen di problema.” (Jòb 14:1) Jòb su goso a disparsé. Pa un tempu, el a asta pensa ku Yehova a bandon’é. (Jòb 29:1-5) Jòb no tabata e úniko sirbidó di Dios ku a eksperensiá sufrimentu físiko i mental intenso. Beibel ta konta nos ku Ana tabatin “amargura di alma” debí ku e no tabatin yu. (1 Samuel 1:9-11) Un situashon den famia tabata tormentá Rebeka, i el a bisa: “Mi ta fadá di mi bida.” (Génesis 27:46) Ora ku David a reflekshoná riba su erornan, el a bisa: “Henter dia mi a kana rònt tristu.” (Salmo 38:6, NW) E par di ehèmpelnan aki mes ta mustra bon kla ku den e era prekristian tabatin hende hòmber i hende muhé temeroso di Dios ku a pasa dor di periodonan di hopi sufrimentu i tristesa.

 4. Dikon no ta un sorpresa ku tin personanan deprimí entre kristiannan djawe?

⁴ Kiko di kristiannan? Apòstel Pablo a haña ku ta nesesario pa bisa e tesalonisensenan pa “enkurashá esnan ku ta falta ánimo.” (1 Tesalonisensenan 5:14) Un buki di referensia ta deklará ku e palabra griego tradusí komo “esnan ku ta falta ánimo” por referí na esnan “ku temporalmente ta ser aplastá pa e preshon di bida.” E palabranan di Pablo ta indiká ku algun kristian ungí pa spiritu santu den e kongregashon ei na Tesalónika tabata abatí òf deprimí. Awe tambe tin personanan deprimí entre kristiannan. Pero dikon nan ta deprimí? Laga nos konsiderá tres kos ku hopi biaha ta e kousa.

Nos Naturalesa Pekaminoso Por Hasi Nos Hopi Tristu

5, 6. Ki konsuelo nos por saka for di Romanonan 7:22-25?

⁵ Distinto for di personanan korupto ku ‘a pèrdè tur heful,’ pa kristiannan berdadero nan estado pekaminoso ta un kos doloroso. (Efesionan 4:19) Kisas nan ta sinti meskos ku Pablo, kende a skirbi: “Segun e hende interior mi ta deleitá mi mes den e lei di Dios, ma den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi prezu di e lei di piká, kual ta den mi miembronan.” Kaba Pablo a sklama: “Hende miserabel ku mi ta!”—Romanonan 7:22-24.

⁶ Abo a yega di sinti manera Pablo? No ta malu ora bo ta profundamente konsiente di bo imperfekshonnan, pasobra esaki por yuda bo realisá e gravedat di bo piká i por fortalesé bo determinashon pa keda leu for di maldat. Pero bo no tin nodi ta konstantemente tristu i afligí debí na bo faltanan. Pablo a agregá na su palabranan di aflikshon ku nos a kaba di sita ariba: “Mi ta duna gradisimentu na Dios dor di Hesukristu, nos Señor!” (Romanonan 7:25) Sí, Pablo tabatin e konfiansa ku e sanger ku Hesus a drama lo por a libr’é di piká heredá.—Romanonan 5:18.

 7. Kiko por yuda un persona pa e no ta muchu tristu debí na su tendensianan pekaminoso?

⁷ Si bo ta sinti bo aplastá dor di bo naturalesa pekaminoso, bo por haña konsuelo den e palabranan di apòstel Juan. El a skirbi: “Si un hende hasi piká, nos tin un abogado serka e Tata, Hesukristu, e hustu; i e mes ta e propisiashon [“sakrifisio di rekonsiliashon,” NW] pa nos pikánan, i no pa di nos so, ma tambe pa esnan di henter mundu.” (1 Juan 2:1, 2) Si bo ta sinti bo hopi tristu debí na bo tendensianan pekaminoso, kòrda semper ku Hesus a muri pa pekadó, no pa hende perfekto. De echo, “tur a peka i ta falta e gloria di Dios.”—Romanonan 3:23.

8, 9. Dikon nos mester rechasá pensamentunan ku ta pone nos kondená nos mes?

⁸ Sin embargo, suponé ku den pasado bo a kometé un piká grave. Sin duda bo a akudí na Yehova den orashon tokante e asuntu, podisé hopi biaha. Bo a haña yudansa spiritual serka ansianonan kristian. (Santiago 5:14, 15) Bo a demostrá berdadero repentimentu i p’esei bo a keda un parti di e kongregashon. Òf podisé pa un tempu bo a bandoná Dios su organisashon, pero despues bo a repentí i a bolbe haña un posishon limpi. Den kualke un di e situashonnan ei, bo piká ku bo a kometé den pasado por bin na bo mente i hasi bo hopi tristu. Si esei sosodé, kòrda ku Yehova ta pordoná “abundantemente” e personanan ku repentí di bèrdat. (Isaias 55:7) Ademas, e no ke pa bo sinti bo totalmente kondená. Ta Satanas ke pa bo sinti asina. (2 Korintionan 2:7, 10, 11) Diabel lo ser destruí pasobra e meresé esei, pero e ke pa abo sinti ku bo ta meresé e mesun huisio kuné. (Revelashon 20:10) No laga Satanas su kòmplòt pa destruí bo fe logra su meta. (Efesionan 6:11) Mas bien, “resistié” den esaki, meskos ku bo ta resistié den otro kosnan.—1 Pedro 5:9.

⁹ Na Revelashon 12:10, Beibel ta yama Satanas “e akusadó di nos rumannan,” esta, di kristiannan ungí. E “ta akusá nan di dia i anochi” dilanti di Dios. Ora bo reflekshoná riba e versíkulo ei bo por mira ku Satanas, e akusadó falsu, lo keda kontentu si abo mester akusá i kondená bo mes, ounke ku Yehova mes no ta hasi esei. (1 Juan 3:19-22) Pakiko lo bo keda tormentá bo mes te na e grado ku bo ta sinti ku lo bo ke ‘give up’? No laga Satanas destruí bo relashon ku Dios. Nunka laga Diabel siega bo pa e echo ku Yehova ta ‘yen di kompashon i grasia, no ta rabia lihé i ta abundá den miserikòrdia.’—Eksodo 34:6.

Nos Limitashonnan Por Desanimá Nos

10. Den ki maneranan nos limitashonnan lo por desanimá nos?

¹⁰ Tin algun kristian ta sinti nan desanimá debí na e manera ku nan limitashonnan ta afektá nan sirbishi na Dios. Esei ta bo kaso? Kisas un malesa grave, edat avansá òf otro sirkunstansianan ta stroba bo di dediká e mesun tantu tempu na e ministerio ku bo tabata dediká na ántes. Ta bèrdat ku kristiannan ta haña e animashon pa kumpra tempu pa dediká na Dios su sirbishi. (Efesionan 5:15, 16) Pero kiko si limitashonnan legítimo ta stroba bo di hasi mas den e ministerio i esaki ta desanimá bo?

11. Kon Pablo su konseho ku tin pará skirbí na Galationan 6:4 ta benefisiá nos?

¹¹ Beibel ta urgi nos pa no bira floho, pa no flakia, sino pa ta “imitadónan di esnan ku pa medio di fe i pasenshi ta heredá e promesanan.” (Hebreonan 6:12) Nos por hasi esaki solamente si nos analisá nan ekselente ehèmpel i trata na imitá nan fe. Sin embargo, nos lo no benefisiá si nos kompará nos mes den un manera negativo ku otro hende i konkluí ku nada ku nos hasi ta sufisiente bon. P’esei ta bon pa nos apliká Pablo su konseho: “Laga kada un duna prueba di loke su mes trabou ta, i e ora ei lo e tin motibu pa alegrá enkuanto su mes so, i no na komparashon ku e otro persona.”—Galationan 6:4, NW.

12. Dikon nos por alegrá den e sirbishi ku nos ta rindi na Yehova?

¹² Kristiannan tin bon motibu pa alegrá, asta ora problemanan grave di salú ta limitá nan. Beibel ta sigurá nos: “Dios no ta inhustu pa lubidá boso trabou i e amor ku boso a mustra pa su nòmber.” (Hebreonan 6:10) Kisas sirkunstansianan fuera di bo kontròl a pone ku ta difísil pa bo hasi mesun tantu den Yehova su sirbishi ku bo tabata hasi na ántes. Sin embargo, ku Yehova su poder, lo bo por partisipá mas plenamente den sierto aspektonan di e ministerio kristian, manera por ehèmpel predikashon via telefòn i via karta. Bo por tin sigur ku Yehova Dios lo bendishoná bo sirbishi hasí di henter bo alma i e amor ku bo ta demostrá p’e i pa bo próhimo.—Mateo 22:36-40.

“Tempunan Trabahoso” Por Deskurashá Nos

13, 14. (a) Den ki maneranan e “tempunan trabahoso” aki por kousa nos aflikshon? (b) Kon falta di amor ta bisto awe?

¹³ Ounke nos ta anhelá bida den Dios su hustu mundu nobo, na e momentonan aki nos ta biba den “tempunan trabahoso.” (2 Timoteo 3:1) Un kos ku ta konsolá nos ta di sa ku e susesonan angustioso ku ta tumando lugá awe ta indiká ku nos liberashon ta hopi serka. Sin embargo, situashonnan rònt di nos ta afektá nos. Por ehèmpel, kiko si bo ta sin empleo? Trabou kisas ta skars, i segun ku lunanan ta pasa, lo bo por kuminsá puntra bo mes si akaso Yehova ta mira den ki situashon penoso bo ta òf si e ta tende bo orashonnan. Òf podisé bo a bira víktima di diskriminashon òf kualke otro forma di inhustisia. Asta djis lesa e titularnan di korant por laga bo sinti manera e hòmber hustu Lòt, kende tabata sinti su mes “oprimí” (“tormentá,” BPK) pa e komportashon inmoral di e hendenan rònt di dje.—2 Pedro 2:7.

¹⁴ Tin un aspekto en partikular di e último dianan ku nos no por pasa por haltu. Beibel a profetisá ku hopi hende lo ta “sin amor.” (2 Timoteo 3:3) Den hopi kas tin masha tiki amor entre miembronan di famia. De echo, e buki Family Violence (Violensia den Famia) ta bisa: “Evidensia ta indiká ku tin hopi mas chèns ku un hende lo ser matá, ataká físikamente òf abusá emoshonalmente òf seksualmente pa un miembro di famia ku pa kualke otro hende.” E buki a sigui bisa: “Kaminda hende lo mester sinti nan mes stimá i safe, pa algun adulto i mucha, ta e lugá di mas peligroso di tur.” Personanan ku a biba den un mal ambiente di kas asina, lo por eksperensiá kisas añanan despues ansiedat i desesperashon. Kiko si esei ta bo kaso?

15. Kon Yehova su amor ta superior na e amor di kualke hende?

¹⁵ Salmista David a kanta: “Maske mi tata i mi mama bandoná mi, SEÑOR lo rekohé mi.” (Salmo 27:10) Ki un gran konsuelo pa sa ku Yehova su amor ta surpasá e amor di kualke mayor humano! Pa doloroso ku e rechaso, maltrato òf abandono di un mayor por ta, esei no tin influensia riba e amor ku Yehova tin pa bo. (Romanonan 8:38, 39) Kòrda ku Dios ta hala esnan ku ta stim’é pa bin serka dje. (Juan 3:16; 6:44) No ta importá kon hende a trata bo, bo Tata selestial stimá bo!

Pasonan Práktiko pa Aliviá un Estado Deprimí

16, 17. Ora ku un persona ta sintié deprimí, kiko e por hasi pa konserbá su fortalesa spiritual?

¹⁶ Bo por dal pasonan práktiko pa trata ku un estado deprimí. Por ehèmpel, partisipá plenamente den aktividatnan kristian. Meditá riba e Palabra di Dios, spesialmente ora ku desanimashon ta parse aplastante. E salmista a kanta: “Si mi lo a bisa: ‘Mi pia ta slep,’ bo miserikòrdia, o SEÑOR, lo sostené mi. Den e multitut di mi preokupashonnan den mi, bo konsuelonan ta alegrá mi alma.” (Salmo 94:18, 19) Lesamentu regular di Beibel lo yuda yena bo mente ku palabranan di konsuelo i pensamentunan edifikante.

¹⁷ Orashon tambe ta masha importante. Asta si bo no por ekspresá plenamente ku palabra bo sintimentunan di mas profundo, Yehova sa kiko bo ta purba di bisa. (Romanonan 8:26, 27) E salmista a duna e siguransa aki: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.”—Salmo 55:22.

18. Menshoná algun paso práktiko ku un persona deprimí por dal?

¹⁸ Tin kristian ta eksperensiá desesperashon debí na formanan severo di depreshon.b Si esei ta e kaso ku bo, purba enfoká un parti di bo atenshon riba Dios su mundu nobo i riba e tempu ku “ningun habitante lo no bisa: ‘Mi ta malu.’” (Isaias 33:24) Si bo sintimentunan negativo ta parse mas ku djis un depreshon temporal, lo ta sabí pa buska yudansa profeshonal. (Mateo 9:12) Tambe ta importante pa bo kuida bo mes físikamente. Un dieta saludabel i un poko ehersisio lo por ta útil. Hasi sigur ku bo ta haña e sosiegu nesesario. No keda lantá te lat ta wak televishon, i evitá formanan di rekreo ku ta agotá bo físikamente i emoshonalmente. Mas ku tur kos, sigui partisipá den obranan ku ta agradá Dios! Ounke ainda no ta tempu pa Yehova “seka tur lágrima,” lo e yuda bo perseverá.—Revelashon 21:4; 1 Korintionan 10:13.

Bibando “bou di e Man Poderoso di Dios”

19. Kiko Yehova ta primintí esnan ku ta afligí?

¹⁹ Beibel ta sigurá nos ku maske e aflikshonnan di e hustu ta hopi, Yehova “ta libr’é for di nan tur.” (Salmo 34:19) Kon Dios ta hasi esaki? Ora ku apòstel Pablo a pidi bes tras bes den orashon p’e ser librá di su “sumpiña den karni,” Yehova a bis’é: “Mi poder ta wòrdu hasí perfekto den debilidat.” (2 Korintionan 12:7-9) Kiko Yehova a primintí Pablo, i kiko e ta primintí bo? No un kurashon inmediato, sino e poder pa perseverá.

20. Apesar di nos pruebanan, 1 Pedro 5:6 i 7 ta sigurá nos di kiko?

²⁰ Apòstel Pedro a skirbi: “Humiá boso mes . . . bou di e man poderoso di Dios, pa e por halsa boso na e tempu apropiá, tirando tur boso preokupashon riba dje, pasobra e ta perkurá pa boso.” (1 Pedro 5:6, 7) Komo ku Yehova ta interesá den bo i ta perkurá pa bo, lo e no bandoná bo. Lo e sostené bo apesar di e pruebanan ku bo ta pasa aden. Tene na mente ku kristiannan fiel ta “bou di e man poderoso di Dios.” Segun ku nos ta sirbi Yehova, e ta duna nos e fortalesa pa perseverá. Si nos keda fiel na dje, nada no por kousa nos daño spiritual permanente. P’esei, laga nos mantené nos integridat na Yehova di manera ku nos por disfrutá di bida eterno den su mundu nobo primintí i mira e dia ora ku di bèrdat lo el a libra esun afligí permanentemente!

[Nota]

Bo Ta Kòrda?

• Dikon aflikshon ta afektá asta sirbidónan di Yehova?

• Kua ta algun faktor ku por pone algun hende den e pueblo di Dios sinti nan deprimí?

• Kon Yehova ta yuda nos trata ku nos ansiedatnan?

• Den ki manera nos ta “bou di e man poderoso di Dios”?

[Plachinan na página 25]

Apesar di prueba, e pueblo di Yehova tin motibu pa alegrá

[Plachi na página 28]

Prediká via telefòn ta un manera pa duna Yehova lo mihó ku bo tin