Haci Siñansa Saludabel Bo Moda Di Biba [Translator: The Following Article Is Based On Talk No. 13 Of The “Divine Teaching” District Convention.]
“Debocion piadoso ta beneficioso pa tur cos.”—1 TIMOTEO 4:8.
MAYORIA hende lo ta unbes di acuerdo cu bon salú ta un dje posesionnan mas precioso den bida. Nan ta dedicá un gran parti di tempu i placa pa tene nan mes físicamente saludabel i haci sigur cu nan ta ricibí atencion médico apropiado ora nan tin mester di dje. Na Merca, por ehempel, e gastunan anual di cuido di salú p’e aña reciente tabata mas cu US$900 mil miyon. Esei ta hiba na hopi mas cu US$3.000 pa aña pa cada homber, muher i mucha den e pais ei, i e gastu pa cabes den otro nacionnan desaroyá ta mas o ménos igual.
2 Kico tur e gastamentu di tempu, energia i placa a trece? Siguramente ningun hende lo nenga cu, por lo general, nos tin facilidadnan i provisionnan médico hopi mas avansá awe cu na cualkier otro tempu den historia. Sin embargo, esaki no ta traducí su mes automáticamente den bibamentu saludabel. En realidad, den un discurso cu a describí proposicion di un programa pa cuido di salú pa Merca, e presidente dje pais a mustra cu ademas dje “gastunan enorme di violencia den e pais aki,” habitantenan di Merca “tin promedionan mas haltu di AIDS, di humamentu i bebementu excesivo, di embaraso di tiener, di baby cu ta nace bou di peso” cu cualkier otro nacion desaroyá. Su conclusion? “Nos mester cambia nos moda di biba si nos realmente kier yega di ta un dia saludabel como pueblo.”—Galatio 6:7, 8.
Un Moda di Biba Saludabel
3 Den e promé siglo, e griegonan tabata conocí pa nan dedicacion na mehoracion di condicion físico, musculá curpa i competencia atlético. Considerando e antecedencia aki, apostel Pablo a ser inspirá pa skirbi n’e hóben Timoteo: “Entrenamentu corporal ta beneficioso pa un poco; pero debocion piadoso ta beneficioso pa tur cos, pasobra e ta encerá promesa dje bida awor i di esun pa bini.” (1 Timoteo 4:8) Pues, Pablo tabata mustrando loke hende awe ta reconociendo, esta, cu percuracion médico of físico no ta garantisá un berdadero moda di biba saludabel. Pero Pablo ta sigurá nos cu loke ta indispensabel ta pa cultivá bienestar spiritual i debocion piadoso.
4 Un curso asina ta beneficioso p’e “bida awor” pasobra e ta percurá un proteccion contra tur e cosnan perhudicial cu hende malbado, of esnan cu tin solamente “un forma [of, aparencia] di debocion piadoso,” ta hinca nan mes aden. (2 Timoteo 3:5; Proverbio 23:29, 30; Lucas 15:11-16; 1 Corintio 6:18; 1 Timoteo 6:9, 10) Esnan cu ta permití debocion piadoso moldea nan bida tin un respet saludabel pa Dios su leynan i rekisitonan, i esei ta motivá nan pa haci Dios su siñansa saludabel nan moda di biba. Un curso asina ta duna nan salú spiritual i físico, satisfaccion i felicidad. I nan ta “atesorando pa nan mes cu siguridad un fundeshi excelente p’e futuro, pa nan por haña un gara firme riba e berdadero bida.”—1 Timoteo 6:19.
5 Siendo cu un bida guiá p’e siñansa saludabel di Dios ta trece tal bendicionnan awor i den futuro, nos mester sa den práctica con nos por haci Dios su siñansa saludabel nos moda di biba. Apostel Pablo a duna e contesta den su carta na Tito. Nos lo tuma nota special dje segundo capítulo dje buki ei, caminda el a instruí Tito pa “sigui papia e cosnan cu ta apropiado pa siñansa saludabel.” Siguramente nos tur, hóben i bieu, homber i muher, por beneficiá for di tal “siñansa saludabel” awe.—Tito 1:4, 5; 2:1.
Conseho pa Hombernan di Edad
6 Promé, Pablo tabatin algun conseho p’e hombernan di edad den e congregacion. Por fabor lesa Tito 2:2. “E hombernan di edad,” como grupo, ta ser onrá i considerá como ehempelnan di fe i lealtad. (Levítico 19:32; Proverbio 16:31) Debí na esaki, otronan kisas ta preferá pa no duna conseho of sugerencia na hombernan di edad riba asuntunan cu no ta asina extremadamente serio. (Job 32:6, 7; 1 Timoteo 5:1) P’esei, ta un bondad di parti di Pablo pa dirigí su mes n’e hombernan di edad promé, i lo ta bon pa nan tuma e palabranan di Pablo na pechu i pa haci sigur cu nan, mescos cu Pablo, ta digno di imitacion.—1 Corintio 11:1; Filipense 3:17.
7 E hombernan cristian di edad mester ta, na promé lugá, moderá den custumber.” Aunke e palabra original por referí n’e custumber di bebementu (“sobrio,” Kingdom Interlinear), e tin tambe e nificacion di ser atento, cu mente cla, of manteniendo sentido. (2 Timoteo 4:5; 1 Pedro 1:13) Pues, sea ta den bebementu of den otro cosnan, e hombernan di edad mester ta moderá, no duná na exceso of extremonan.
8 Anto, tambe nan mester ta “serio” i “di sano huicio.” Normalmente, edad ta haci un hende serio, dignificá i merecedor di respet. Sin embargo, algun por tin tendencia di ta demasiado serio, birando intolerante dje camindanan enérgico di hubentud. (Proverbio 20:29) Ta p’esei “serio” ta ser balansá cu “di sano huicio.” E hombernan di edad mester mantené e seriedad cu ta cuadra cu e edad, ma na mésun tempu ser balansá, teniendo control completo di nan sintimentu i impulsonan.
9 Finalmente, hombernan di edad mester ta “saludabel den fe, den amor, den awante.” Hopi biaha den su skirbimentunan, Pablo a mencioná fe i amor huntu cu speransa. (1 Corintio 13:13; 1 Tesalonicense 1:3; 5:8) Aki el a reemplasá “speransa” cu “awante.” Talbes ta pasobra e sintimentu di conformá por slip drenta fácilmente segun cu edad ta avansando. (Eclesiastés 12:1) Sin embargo, manera Jesus a señalá, “esun cu a wanta te n’e fin ta esun cu lo ser salbá.” (Mateo 24:13) Ademas, esnan di edad ta ehempelnan digno pa sobrá hende no simplemente debí na nan edad of experencia sino debí na nan fuerte cualidadnan spiritual—fe, amor i awante.
Pa e Muhernan di Edad
10 Despues Pablo a dirigí su atencion n’e muhernan di edad den e congregacion. Por fabor lesa Tito 2:3. “E muhernan di edad” ta e miembronan mas bieu entre e muhernan den e congregacion, incluyendo esposa “dje hombernan di edad” i mamanan i abuelanan di otro miembronan. Como tal, nan por tin bastante influencia, pa bon of pa malu. Ta p’esei Pablo a introducí su palabranan cu “igualmente,” nificando cu “e muhernan di edad” tambe tin cierto responsabilidad pa cumpli cuné pa asina hunga nan papel den e congregacion.
11 Promé, “laga e muhernan di edad ser reverente den conducta,” Pablo a bisa. “Conducta” ta e expresion exterior djafó di un persona su actitud i personalidad interior, manera ta ser reflehá den tantu conducta como aparencia. (Mateo 12:34, 35) Kico, anto, mester ta e actitud of personalidad di un muher cristian di edad? Den un solo palabra, “reverente.” Esaki ta ser traducí for di un palabra griego cu kier men “loke ta apropiado den personanan, accionnan of cosnan consagrá na Dios.” Esaki siguramente ta conseho apropiado en bista dje influencia cu nan tin riba otronan, specialmente riba e muhernan mas hóben den e congregacion.—1 Timoteo 2:9, 10.
12 Despues ta bini dos característica negativo: “no calumniador, ni sclabisá na muchu biña.” Ta interesante cu e dosnan ei ta ser agrupá huntu. “Den tempu antiguo, tempu biña tabata e único bibida,” profesor E. F. Scott ta observá, “tabata na nan fiestanan chikitu di biña cu e muhernan bieu tabata tornu e personalidad di nan bisiñanan na pida pida.” Hende muher generalmente ta mas interesá den nan próhimo hende cu hende homber, loke ta encomendabel. Sin embargo, interes por degenerá den redu i asta calumnia, specialmente ora bibida ta los e lenga. (Proverbio 23:33) Siguramente, tur hende cu ta siguiendo tras di un moda di biba saludabel, hende homber i muher, ta haci bon pa vigilá contra e trampa aki.
13 Pa usa e tempu disponibel den un manera constructivo, muhernan di edad ta ser animá pa ta “maestronan di loke ta bon.” Un otro caminda, Pablo a duna instruccion claro cu hende muher no mester ta maestro den e congregacion. (1 Corintio 14:34; 1 Timoteo 2:12) Sin embargo, esaki no ta prevení nan di impartí conocimentu precioso di Dios cu nan famia di cas i n’e público. (2 Timoteo 1:5; 3:14, 15) Tambe nan por ta un bon influencia dor di ta cristiannan ehemplar p’e muhernan mas hóben den e congregacion, manera e siguiente versículonan ta mustra.
Pa e Muhernan Hóben
14 Animando e muhernan di edad pa ta “maestronan di loke ta bon,” Pablo a mencioná particularmente e muhernan mas hóben. Por fabor lesa Tito 2:4, 5. Aunke hopi dje informacion ta drei rond di asuntunan doméstico, muhernan cristian mas hóben no mester bai den extremo, permitiendo preocupacionnan material dominá nan bida. Mas bien, nan mester ta “di sano huicio, decente, . . . bon,” i riba tur cos, cla pa sostené e areglo di hefatura cristian, “pa hende no zundra e palabra di Dios.”
15 Awe, e esena di famia a cambia considerablemente for di loke e tabata den Pablo su dia. Hopi famia ta dividí en cuanto religion fe, i otronan tin solamente un mayor. Asta den e asina yamá famianan tradicional (cu tata, mama i yunan bibando den e mésun cas), cu mas frecuencia e esposa of mama no ta un ama di cas tempu completo. Tur esaki ta pone un presion i responsabilidad tremendo riba muhernan cristian hóben, pero esaki no ta libra nan di nan obligacionnan bíblico. P’esei, ta un gran placer pa mira hopi fiel muhernan hóben trahando duru pa balansá nan hopi debernan i tog logra pone interesnan di Reino promé, algun asta siendo den e ministerio di tempu completo como pionero auxiliar of regular. (Mateo 6:33) Berdaderamente nan merecé encomendacion!
Pa e Hombernan Hóben
16 Despues Pablo a pasa p’e hombernan mas hóben, incluyendo Tito. Por fabor lesa Tito 2:6-8. En bista dje conducta iresponsabel i destructivo di hopi dje hóbennan djawe—humamentu, abusu di droga i alcohol, sex ilegal i otro empeño mundano, manera deportenan brutu i música i entretenimentu degradá—esaki en berdad ta conseho oportuno pa hóbennan cristian cu kier sigui un moda di biba saludabel i satisfaciente.
17 Na contraste cu e hóbennan di mundu, un homber cristian hóben mester ta “di sano huicio” i “un ehempel di obranan excelente.” Pablo a splica cu un mente sano i maduro ta ser ganá, no dor di esnan cu simplemente ta studia, sino dor di esnan cu “mediante uso tin nan facultadnan perceptivo entrená pa distinguí tantu bon i malu.” (Hebreo 5:14) Ki maraviyoso ta pa mira hende hóben ofreciendo nan tempu i energia boluntariamente pa tene un participacion completo den e hopi debernan den e congregacion cristian, en bes di desperdiciá nan fortalesa hubenil den empeñonan egoista! Haciendo asina, nan, mescos cu Tito, por bira ehempel di “obranan excelente” den e congregacion cristian.—1 Timoteo 4:12.
18 E hombernan mas hóben ta ser recordá cu nan mester ta “mustrando incorupcion den [nan] siñansa, seriedad, papiamentu saludabel cu no por ser condená.” Siñansa cu ta ‘incorumpí’ mester ta basá sólidamente rib’e Palabra di Dios; p’esei, e hombernan mas hóben mester ta studiantenan diligente di Bijbel. Mescos cu e hombernan di edad, e hombernan mas hóben tambe mester ta serio. Nan mester reconocé cu siendo un minister dje Palabra di Dios ta un responsabilidad serio, i p’esei nan mester “comportá den un manera digno dje bon nobo.” (Filipense 1:27) Di igual manera nan papiamentu mester ta “saludabel” i di tal manera cu e “no por ser condená” pa asina nan no duna causa pa keho cerca opositornan.—2 Corintio 6:3; 1 Pedro 2:12, 15.
Pa Esclabonan i Criánan
19 Finalmente, Pablo a dirigí su mes na esnan cu ta den servicio di otro hende. Por fabor lesa Tito 2:9, 10. No hopi di nos awe ta esclabo of criánan, pero hopi sí ta empleado i trahadornan cu ta duna servicio na otronan. Pues, e principionan cu Pablo a enumerá ta aplicá mescos awe.
20 Pa “ta den sumision na nan doñonan den tur cos” ta nificá cu empleadonan cristian mester mustra nan doñonan di trabou i supervisornan debido respet. (Colosense 3:22) Tambe nan mester tin e reputacion di ta trahadornan onesto, dunando un dia di trabou completo como loke nan debe nan doño di trabou. I nan mester mantené e norma haltu di conducta cristian na nan lugánan di trabou sin importá e conducta di otronan ei. Tur esaki ta “pa nan por dorna e siñansa di nos Salbador, Dios, den tur cos.” Cuantu biaha nos ta tende tocante e resultadonan felis ora observadornan sincero ta respondé n’e berdad debí n’e conducta excelente di nan coleganan of empleadonan Testigo! Esaki ta un recompensa cu Jehova ta otorgá esnan cu ta sigui su siñansa saludabel asta na nan lugá di empleo.—Efesio 6:7, 8.
Un Pueblo Hací Limpi
21 E siñansa saludabel cu Pablo a splica no ta simplemente algun código di principio ético of idea moral cu nos por consultá cuné ora nos ta deseá. Pablo a pasa na splica e propósito di dje. Por fabor lesa Tito 2:11, 12. Debí na su amor i bondad inmerecí pa nos, Jehova Dios a percurá e siñansa saludabel pa nos por siña hiba un bida cu propósito i satisfaciente den e tempu crítico i peligroso aki. Bo ta dispuesto pa aceptá i haci e siñansa saludabel bo moda di biba? Haciendo esei lo nificá bo salbacion.
22 Mas cu esei, haciendo e siñansa saludabel nos moda di biba ta duna nos un privilegio único awor i un speransa felis pa futuro. Por fabor lesa Tito 2:13, 14. En berdad, haciendo e siñansa saludabel nos moda di biba ta apartá nos for dje mundu corumpí i muribundo como un pueblo hací limpi. E palabranan di Pablo ta paralelo cu e recordatorionan di Moises n’e yunan di Israel na Sínai: “En cuanto Jehova, . . . lo e poné bo na haltu riba tur e otro nacionnan cu el a traha, resultando den alabansa i reputacion i bunitesa, miéntras bo ta demostrá di ta un pueblo santu pa Jehova bo Dios, net manera el a primintí.”—Deuteronomio 26:18, 19.
23 Laga nos semper atesorá e privilegio di ser Jehova su pueblo hací limpi dor di haci siñansa saludabel nos moda di biba! Semper sea alerto pa rechasá cualkier forma di maldad i deseo mundano, pues permaneciendo limpi i apto pa Jehova usa den e obra grandioso cu e ta efectuando awe.—Colosense 1:10.
[Study Questions]
1, 2. Te na ki grado hende ta interesá den nan salú, i cu ki resultado?
3. En bista dje cultura griego di antigua, ki conseho Pablo a ofrecé?
4. Ki ta e beneficionan di debocion piadoso?
5. Ki instruccionnan Pablo a duna den e segundo capítulo di su carta na Tito?
6. Ki conseho Pablo a ofrecé pa “e hombernan di edad,” i pakico e tabata un bondad di su parti pa haci esei?
7, 8. (a) Kico ser “moderá den custumber” ta encerá? (b) Pakico ser “serio” mester ser balansá cu ser “di sano huicio”?
9. Pakico e hombernan di edad mester ta saludabel den fe i amor i specialmente den awante?
10. Ki conseho Pablo ta duna pa “e muhernan di edad” den e congregacion?
11. Kico ta conducta reverente?
12. Ki maluso dje lenga tur hende mester evitá?
13. Den ki maneranan muhernan di edad por ta maestronan?
14. Con muhernan cristian mas hóben por mustra balansa den percurá pa nan debernan?
15. Pakico hopi dje muhernan mas hóben den e congregacionnan merecé encomendacion?
16. Ki conseho Pablo tabatin pa e hombernan mas hóben, i pakico esaki ta oportuno?
17. Con un homber mas hóben por bira “di sano huicio” i un “ehempel di obranan excelente”?
18. Kico ta nificá ser incorumpí den siñansa, serio den accion i saludabel den papiamentu?
19, 20. Con esnan den servicio di otro hende por “dorna e siñansa di nos Salbador, Dios”?
21. Pakico Jehova a percurá e siñansa saludabel, i con nos mester reaccioná?
22, 23. Ki bendicionnan nos ta cosechá dor di haci siñansa saludabel nos moda di biba?
[Caption on page 18]
Hopi hende awe ta aplicando e conseho na Tito 2:2-4
[Caption on page 22]
Bo Ta Corda?
◻ Pakico debocion piadoso ta beneficioso pa tur cos?
◻ Con hombernan i muhernan cristian di edad por sigui tras di siñansa saludabel como un moda di biba?
◻ Ki siñansa saludabel Pablo tabatin pa hombernan i muhernan mas hóben den e congregacion?
◻ Ki privilegio i bendicion por ta di nos si nos haci siñansa saludabel nos moda di biba?