E Palabra di Yehova Ta Bibu

Puntonan Sobresaliente di e Kartanan na Tito, na Filemon i na e Hebreonan

POKO despues ku apòstel Pablo a sali liber for di su promé enkarselashon na Roma na aña 61 di nos era, el a bishitá e isla di Kreta. Ora el a tuma nota di e kondishon spiritual di e kongregashonnan einan, el a laga Tito keda pa fortalesé nan. Mas despues, probablemente for di Masedonia, Pablo a skirbi Tito un karta pa gui’é den su debernan i pa indiká ku Tito su trabou tabatin su apoyo.

Anteriormente, poko promé ku el a sali liber na aña 61, Pablo a skirbi un karta na Filemon, un ruman kristian ku tabata biba na Kolosas. E karta tabata un apelashon personal na un amigu.

Rònt di aña 61 Pablo a skirbi un karta tambe na e kreyentenan hebreo na Hudea. Den e karta ei el a mustra e superioridat di kristianismo riba e sistema hudiu. Tur e tres kartanan akí ta kontené konseho balioso pa nos.​—Heb. 4:12.

KEDA SANO DEN FE

(Tito 1:1–3:15)

Despues di a duna Tito guia enkuanto kon pa “nombra ansianonan na tur stat,” Pablo a konseh’é p’e sigui “reprendé [hende rebelde] severamente pa nan por ta sano den fe.” Tambe el a spièrta tur hende den e kongregashonnan na Kreta “pa renunsiá impiedat i deseonan mundano i pa biba huisioso.”​—Tito 1:​5, 10-13; 2:12.

Pablo a duna mas konseho pa yuda e rumannan na Kreta mantené un bon salú spiritual. El a duna Tito instrukshon pa “evitá kontroversianan bobo . . . i diskushonnan tokante di Lei.”​—Tito 3:9.

Kontesta Riba Pregunta Bíbliko:

1:15​—Den ki sentido “tur kos” por ta ‘puru pa esnan ku ta puru,’ pero kontaminá “pa esnan ku ta kontaminá i ku ta inkrédulo”? Pa nos haña sa e kontesta nos mester komprondé kiko Pablo tabata ke men ku “tur kos.” E no tabata papia di kosnan ku e Palabra di Dios ta kondená direktamente, sino di asuntunan ku e Skritura ta laga na kada kreyente pa tuma su propio desishon a base di su konsenshi. Pa un persona kende su manera di pensa ta na armonia ku e normanan di Dios, e kosnan ei ta limpi. Pero den kaso di un hende kende su manera di pensa ta trosí i su konsenshi ta kontaminá, tur kos ta kontaminá.a

3:5​—Den ki sentido kristiannan ungí ‘a salba pa medio di un labamentu’ i a haña “renobashon pa medio di spiritu santu”? Nan ‘a salba pa medio di un labamentu’ den e sentido ku Dios a laba, òf purifiká, nan ku e sanger di Hesus a base di e mérito di e sakrifisio di reskate. Nan a haña “renobashon pa medio di spiritu santu” pasobra komo yunan di Dios engendrá pa spiritu, nan a bira “un kriatura nobo.”​—2 Kor. 5:17.

Lès pa Nos:

1:​10-13; 2:15. Superintendentenan kristian mester mustra kurashi i korigí kosnan ku ta robes den kongregashon.

2:​3-5. Meskos ku den promé siglo, ruman muhénan kristian awe mester “ta reverente den nan komportashon, no kalumniadó, ni sklabisá na biña, siñando loke ta bon.” Asina nan por ta efektivo ora ku den privá nan ta instruí “e muhénan hóben” den kongregashon.

3:​8, 14. Ta “bon i di probecho” pa nos fiha nos mente riba “hasi bon obranan,” pasobra esei ta yuda nos duna fruta den e sirbishi di Dios i ta tene nos separá for di e mundu malbado.

SUPLIKÁ “PA KOUSA DI AMOR”

(Flm. 1-25)

Pablo a elogiá Filemon pasobra e tabata un ehèmpel den mustra ‘amor i fe.’ E echo ku e tabata un fuente di refreskamentu pa otro rumannan kristian, a duna Pablo “gran goso i konsuelo.”​—Flm. 4, 5, 7.

Poniendo un bon ehèmpel pa tur superintendente, Pablo no a dun’é un òrdu den e asuntu delikado tokante Onésimo, pero mas bien a suplik’é “pa kousa di amor.” El a bisa Filemon: “Teniendo konfiansa den bo obedensia, mi ta skirbi bo, komo ku mi sa ku lo bo hasi asta mas ku loke mi ta bisa.”​—Flm. 8, 9, 21.

Kontesta Riba Pregunta Bíbliko:

10, 11, 18​—Den ki sentido Onésimo ku un tempu tabata “inútil” a bira “útil”? Onésimo tabata un esklabo rebelde ku a hui for di Filemon su kas na Kolosas i a bai Roma. Ademas, Onésimo probablemente a hòrta su doño pa e por a finansiá e biahe ei di 1.400 kilometer. Pues en bèrdat e tabata inútil pa Filemon. Sinembargo, na Roma, Pablo a yuda Onésimo bira un kristian. Awor ku el a bira un ruman spiritual, e esklabo akí ku anteriormente tabata “inútil” a bira “útil.”

15, 16​—Dikon Pablo no a pidi Filemon pa duna Onésimo su libertat? Pablo kier a pega estriktamente na su enkargo di ‘prediká e reino di Dios i siña e hendenan enkuanto Señor Hesukristu.’ P’esei, el a skohe pa no mete den kuestionnan sosial, manera por ehèmpel e asuntu di sklabitut.​—Echo. 28:31.

Lès pa Nos:

2. Filemon a pone su kas disponibel pa reunionnan kristian. Ta un privilegio di por tin e reunion pa sirbishi di vèlt na nos kas.​—Rom. 16:5; Kol. 4:15.

4-7. Nos mester tuma e inisiativa pa elogiá rumannan ku ta ehemplar den mustra fe i amor.

15, 16. Nos no mester bira demasiado anshá i preokupá pa motibu di desaroyonan desfaborabel den bida. Pasobra e resultado al final por ta benefisioso, manera den kaso di Onésimo.

21. Pablo a ferwagt ku Filemon ta pordoná Onésimo. Asina ta ser ferwagt di nos tambe ku nos ta pordoná un ruman ku por a ofendé nos.​—Mat. 6:14.

“SIGUI DILANTI PA YEGA NA MADURES”

(Heb. 1:​1–13:25)

Pa duna prueba ku fe den e sakrifisio di Hesus ta superior na obranan di Lei, Pablo a destaká e kualidatnan sobresaliente di e Fundadó di kristianismo, di su saserdosio, di su sakrifisio i di e aliansa nobo. (Heb. 3:​1-3; 7:1-3, 22; 8:6; 9:​11-14, 25, 26) E konosementu akí siguramente a yuda e kristiannan hebreo trata ku e persekushon ku nan tabata sufri na man di e hudiunan. Pablo a urgi su rumannan hebreo pa “sigui dilanti pa yega na madures.”​—Heb. 6:1.

Kon importante fe ta pa un kristian? Pablo a skirbi: “Sin fe ta imposibel pa agradá [Dios].” El a animá e hebreonan: “Ku perseveransia laga nos kore e kareda ku ta poní nos dilanti,” hasiendo esei den fe.​—Heb. 11:6; 12:1.

Kontesta Riba Pregunta Bíbliko:

2:​14, 15​—E echo ku Satanas tin “poder riba morto” [òf, “e medio pa kousa morto,” NW], ta indiká ku e por kousa morto prematuro di ken ku e ke? Nò, esei no ta asina. Sinembargo, for di komienso di Satanas su rumbo di maldat den Edén, su mentiranan a kousa morto pasobra Adam a peka i a pasa piká i morto na henter e famia humano. (Rom. 5:12) Ademas, Satanas su agentenan riba tera a persiguí sirbidónan di Dios te na morto, meskos ku nan a hasi ku Hesus. Pero esei no ke men ku Satanas tin poder sin límite pa mata ken ku e ke. Si tabata asina, sin duda lo el a kaba ku e adoradónan di Yehova masha tempu. Yehova ta protehá su pueblo komo grupo i no ta permití Satanas eksterminá nan. Asta si Dios permití algun di nos muri bou di atake di Satanas, nos por tin e konfiansa ku Dios lo anulá kualke daño ku nos sufri.

4:​9-11​—Kon nos ta “drenta den [Dios] su sosiegu”? Na final di e seis dianan di kreashon, Dios a sosegá di su obranan di kreashon ku e konfiansa ku su propósito relashoná ku tera i humanidat lo a kumpli. (Gén. 1:28; 2:​2, 3) Nos ta “drenta den e sosiegu ei” dor di stòp di hasi obranan pa hustifiká nos mes i dor di aseptá e sakrifisio di reskate ku Dios a perkurá pa nos salbashon. Ora nos ta pone fe den Yehova i obedientemente ta sigui su Yu en bes di sigui tras di interesnan egoista, nos ta disfrutá di bendishonnan refreskante i trankilisante tur dia.​—Mat. 11:​28-30.

11:​10, 13-16​—Ta kua “stat” Abraham tabata buska òf spera? Esaki no tabata un stat literal sino simbóliko. Abraham tabata spera “Yerusalèm selestial,” ku a konsistí di Kristu Hesus i su 144.000 ko-gobernantenan. Beibel ta referí na e ko-gobernantenan akí den nan gloria selestial komo “e stat santu, Yerusalèm Nobo.” (Heb. 12:22; Rev. 14:1; 21:2) Abraham tabata spera ansiosamente di por biba bou di gobernashon di e Reino di Dios.

12:2​—Kiko tabata ‘e goso poní dilanti di Hesus’ pa kua el a soportá e staka di tormento? Esei tabata e goso di mira loke su ministerio lo a logra, entre otro, santifikashon di e nòmber di Yehova, vindikashon di Dios su soberania i reskate di e famia humano for di morto. Ademas, Hesus a antisipá e rekompensa di goberná komo Rei i di sirbi komo Sumo Saserdote pa benefisio di humanidat.

13:20​—Dikon Pablo a papia di e pakto òf aliansa nobo komo algu “eterno”? Pa tres motibu: (1) Nunka lo e ser remplasá, (2) su resultadonan ta permanente i (3) e “otro karnénan” lo sigui benefisiá di e areglo di e aliansa nobo despues di Armagedón.​—Juan 10:16.

Lès pa Nos:

5:14. Nos mester ta studiantenan diligente di e Palabra di Dios, Beibel, i apliká loke nos ta siña for di dje. No tin ningun otro manera pa nos por tin nos “mente entrená pa diserní loke ta bon i loke ta malu.”​—1 Kor. 2:10.

6:​17-19. Si nos speransa ta firmemente basá riba Dios su promesa i loke el a hura, esei lo yuda nos pa sigui kana sin stòp den e kaminda di e bèrdat.

12:​3, 4. En bes di “kansa i pèrdè ánimo” debí na pruebanan chikí òf oposishon ku nos por ta konfrontá, nos mester progresá na madures i mehorá nos kapasidat di wanta prueba. Nos mester ta determiná pa resistí “te na e punto di drama sanger,” esta, te na morto.​—Heb. 10:​36-39.

12:​13-15. Nos no mester permití un “rais di amargura,” ni kualke hende den kongregashon ku ta kritiká e manera ku kosnan ta ser hasí, stroba nos di ‘traha bereanan stret pa nos pia.’

12:​26-28. E “kosnan ku a wòrdu kreá” pa otro man ku no ta di Dios—henter e sistema aktual di kosnan, asta e “shelu” malbado—lo ser sagudí i keda eliminá. Ora esei sosodé, ta solamente “e kosnan ku no por wòrdu sagudí,” esta, e Reino i su apoyadónan, lo keda. Pues, ta masha importante anto pa nos proklamá e Reino ku entusiasmo i biba segun su prinsipionan!

13:​7, 17. Si nos tene na mente e konseho akí pa ta obediente i sumiso na e superintendentenan den kongregashon, esei lo yuda nos manifestá un aktitut di koperá.

[Nota]