Filemon i Onésimo​—Uní den Hermandad Cristian

UN DI apostel Pablo su cartanan inspirá pa Dios, ta trata cu un problema delicado cu a enbolbé dos homber. Un tabata Filemon i e otro tabata Onésimo. Ken e hombernan aki tabata? Kico a pone Pablo mustra interes den nan situacion?

Filemon, na ken e carta tabata dirigí, a biba na Colósas, Asia Menor. Distinto di hopi otro cristian den e mésun área ei, Filemon tabata conocé Pablo, como cu el a aceptá e bon nobo debí n’e actividad di predicá dje apostel. (Colosensenan 1:1; 2:1) Pablo tabata conoc’é como un ‘colaboradó stimá.’ Filemon tabata un ehempel di fe i amor. E tabata hospitalario i tabata un fuente di refrescamentu pa su compañeronan cristian. Aparentemente Filemon tabata un homber bon pará, ya cu su cas tabata suficiente grandi pa tene e reunionnan dje congregacion local. Tin hende ta pensa cu Apfia i Arkipo, dos otro persona mencioná den Pablo su carta, por tabata Filemon su casá i yu homber. Tambe Filemon tabatin por lo ménos un catibu, Onésimo.—Filemon 1, 2, 5, 7, 19b, 22.

Un Fugitivo na Roma

E Scritura no ta conta nos con bini Onésimo tabata 1.400 kilometer leu for di cas cerca Pablo na Roma, caminda el a skirbi e carta na Filemon rond di 61 E.C. Pero Pablo a bisa Filemon: “Si [Onésimo] a hací bo cualkier inhusticia of ta deb’é bo cualkier cos, pone esaki riba mi cuenta.” (Filemon 18) E palabranan aki ta mustra cla cu Onésimo tabatin problema cu su doño, Filemon. Pablo a skirbi su carta cu e meta di reconciliá nan dos.

Tin hende ta pensa cu Onésimo a bira un fugitivo despues di a horta Filemon p’e por a financiá su huida pa Roma. Ei lo e tabatin intencion di disparcé entre e masanan di hende.a Den e mundu griego-romano, catibunan fugitivo tabata un problema grandi, no solamente pa doñonan di catibu, sino tambe pa e administracion público. Nan ta bisa cu Roma mes tabata “notorio como e refugio acustumbrá” pa catibunan fugitivo.

Con Pablo a topa Onésimo? Bijbel no ta bisa nos. Sin embargo, ora e novedad di libertad a mengua, probablemente Onésimo a realisá cu el a hinca su mes den un situacion sumamente precario. Den e stad di Roma, tabatin un cuerpo special di polis cu a busca esclabonan fugitivo, pasobra nan crímen di a hui, tabata un dje ofensanan mas serio conocí bou di ley di antigwedad. Segun Gerhard Friedrich: “Nan tabatin custumber di marca catibunan fugitivo cu nan gara cu heru cayente den nan frenta. Hopi bes a torturá nan . . . , tira nan pa bestia den circo, of a crucificá nan pa descurashá otro catibunan di imitá nan ehempel.” Friedrich ta indicá cu probablemente, despues cu e placa hortá a caba laga Onésimo i el a busca caminda di sconde of un trabou sin por a haña, el a pidi Pablo, di ken el a tende den cas di Filemon, pa intervení p’e.

Otronan ta kere cu deliberadamente Onésimo a hui bai cerca un dje amigunan di su doño, sperando cu mediante e persona ei su influencia, lo e por drecha relacion cu su doño kende tabatin motibu pa ta rabiá cuné pa un of otro asuntu. Fuentenan histórico ta indicá cu esei tabata “un recurso comun cu catibunan den problema a usa hopi.” Si ta asina, e ora ei “tin mas probabilidad,” segun erudito Brian Rapske, cu Onésimo a cometé su ladronicia, “pa facilitá su yegada dilanti e mediadó Pablo, cu como parti di un plan pa hui.”

Pablo Ta Duna un Man

Loke sea tabata e motibu p’e huida, evidentemente Onésimo a busca Pablo su yudansa pa reconciliá cu su doño rabiá. Esei a causa un problema pa Pablo. At’é cu un ex-catibu incrédulo cu tabata un fugitivo criminal. E apostel mester purba yud’é dor di persuadí un amigu cristian pa no ehercé su derecho legal di duna castigu severo? Kico Pablo mester a haci?

Pa ora Pablo a skirbi Filemon, e fugitivo aparentemente tabatin basta tempu cerca e apostel. Suficiente tempu a pasa pa Pablo por bisa cu Onésimo a bira un ‘ruman stimá.’ (Colosensenan 4:9) “Mi ta consehá bo tocante mi yu, pa ken mi a bira un tata miéntras mi ta den cadena di prizon,” Pablo a bisa di su mes relacion spiritual cu Onésimo. Di tur e posibel resultadonan di Pablo su intervencion, esaki mester tabata esun cu Filemon ménos a spera. E apostel a bisa cu e esclabo cu ántes tabata “inútil” tabata regresá como un ruman cristian. Awor Onésimo lo ta “probechoso,” of “útil,” cumpliendo asina cu e nificacion di su nomber.—Filemon 1, 10-12.

Onésimo a bira masha útil p’e apostel encarcelá. De facto, Pablo lo a ten’é cerca dje, pero fuera di ta ilegal, esaki lo tabata un violacion dje derechonan di Filemon. (Filemon 13, 14) Den un otro carta, skirbí rond di mésun tempu n’e congregacion cu a reuní den cas di Filemon, Pablo a referí na Onésimo como “mi ruman fiel i stimá, cu ta for di boso.” Esaki ta indicá cu Onésimo ya caba a duna prueba di ta digno di confiansa.—Colosensenan 4:7-9.b

Pablo a encurashá Filemon pa ricibí Onésimo cu bondad, pero e no a usa autoridad apostólico pa mand’é haci esei of pa libra su catibu. Debí na nan amistad i amor mutuo, Pablo tabatin sigur cu Filemon lo “haci asta mas” di loke el a pidié. (Filemon 21) Kico “asta mas” por a nificá Pablo no ta specificá, pasobra ta Filemon so tabatin derecho di dicidí kico pa haci cu Onésimo. Algun hende a interpretá e palabranan di Pablo como un peticion silencioso pa ‘manda e fugitivo bek di manera cu lo e por a sigui yuda Pablo manera el a cuminsá haci caba.’

Filemon a aceptá Pablo su súplica na fabor di Onésimo? Casi sigur cu sí, aunke tal bes esaki no tabata na agrado di otro doñonan di catibu di Colósas, cu lo a preferá di mira Onésimo haña un bon castigu pa asina descurashá nan propio catibunan di imitá su ehempel.

Onésimo—Un Homber Transformá

Di tur manera, Onésimo a regresá Colósas cu un personalidad nobo. Cu su manera di pensa transformá dor dje poder dje bon nobo, el a bira indudablemente un miembro fiel dje congregacion cristian den e stad ei. Scritura no ta revelá si Filemon cu tempu a haci Onésimo homber liber. Sin embargo, desde un punto di bista spiritual e ex-fugitivo a bira un homber liber. (Compará cu 1 Corintionan 7:22.) Transformacionnan similar ta sosodé awe. Ora hende aplicá principionan bíblico den nan bida, nan situacion i personalidad ta cambia. Esnan cu un tempu hende a considerá inútil pa sociedad ta haña yudansa pa bira ciudadanonan ehemplar.c

Ki un diferencia combertimentu n’e fe berdadero a haci! Aunke e Onésimo di ántes por tabata “inútil” pa Filemon, e Onésimo nobo sin duda a cumpli cu su nomber di ta un persona “probechoso.” I siguramente tabata un bendicion cu Filemon i Onésimo a bira uní den hermandad cristian.

[Nota]

[Kuadro na página 30]

Catibunan Bou di Ley Romano

Bou di ley romano cu tabata na vigor den promé siglo E.C., un catibu tabata completamente n’e misericordia di su doño su antohonan, pasion i beis. Segun comentarista Gerhard Friedrich: “Fundamentalmente i hurídicamente, e catibu no tabata un persona, sino un obheto cu su doño por a usa libremente. . . . A pon’[é] n’e mésun nivel cu animalnan doméstico i hermentnan i e no tabatin ningun consideracion cerca ley civil.” Un catibu no por a busca ningun compensacion legal pa inhusticianan cu el a sufri. Básicamente, e mester a djis cumpli cu e ordunan di su doño. No tabatin límite n’e castigunan cu un doño rabiá por a imponé. Asta pa un ofensa menor, e doño a ehercé e poder di bida i morto.*

Aunke hende ricu por tabatin vários shen catibu, asta un famia di cas relativamente modesto por tabatin dos of tres. Segun erudito John Barclay: “E tareanan cu catibunan doméstico a efectuá tabata sumamente variá. Nos ta haña catibu tenedó di lugá, koki, waiter, limpiadó, mensahero, baby-sitter, mama di lechi i criá personal pa tur tipo di trabou, pa no papia mes dje vários profesionalnan cu lo bo por haña den casnan mas grandi i mas ricu. . . . Den términonan práctico, e calidad di bida di un catibu doméstico a dependé masha hopi dje caracter dje doño i esei por tabata probechoso of perhudicial: biba cerca un doño cruel por a resultá den sufri un escala sin límite di cos malu, pero un doño bondadoso i generoso por a haci bida algu soportabel i tambe pa tene speransa aden. Tin ehempelnan famoso di trato cruel registrá den literatura clásico, pero tambe tin hopi obra skirbí cu ta duna testimonio dje calor di amistad entre algun doño i nan catibu.”

*Tocante sclabitud den e pueblo di Dios di antigwedad, mira Perspicacia para comprender las Escrituras, publicá dor di Watchtower Bible and Tract Society of New York, Inc., Volúmen 1, página 831-3 [na ingles, Volúmen 2, página 977-9].