Hisa Mannan Leal den Oracion
“Mi ta deseá pa den tur lugá e hombernan ocupá nan mes cu oracion, hisando mannan leal, liber di rabia i debate.”—1 TIMOTEO 2:8.
1, 2. (a) Con 1 Timoteo 2:8 ta aplicá na oracion cu ta enbolbé Jehova su pueblo? (b) Kico nos lo bai considerá awor?
JEHOVA ta spera di su pueblo pa nan ta leal na dje i na otro. Apostel Pablo a conectá lealtad cu oracion ora el a skirbi: “Mi ta deseá pa den tur lugá e hombernan ocupá nan mes cu oracion, hisando mannan leal, liber di rabia i debate.” (1 Timoteo 2:8) Aparentemente, Pablo tabata referí na oracion público “den tur lugá” caminda cristiannan a reuní huntu. Ken mester a representá e pueblo di Dios den oracion na reunionnan di congregacion? Solamente hombernan santu, hustu i cu respet profundo pa Dios, kendenan a cumpli cuidadosamente cu tur deber bíblico pa cu Dios. (Eclesiástes 12:13, 14) Nan mester tabata spiritualmente i moralmente limpi i, sin e menor duda, completamente dedicá na Jehova Dios.
2 Foral ancianonan di congregacion mester ‘hisa mannan leal den oracion.’ Nan oracionnan sincero mediante Jesucristo ta desplegá lealtad na Dios i ta yuda nan evitá debate i explosionnan di rabia. Realmente, cualkier homber cu tin e privilegio di representá e congregacion cristian den oracion público mester ta liber di rabia, malicia i deslealtad na Jehova i na su organisacion. (Santiago 1:19, 20) Ki guia mas Bijbel ta duna esnan cu tin e privilegio di representá otronan den oracion público? I cua ta algun principio bíblico cu nos mester aplicá den nos oracionnan privá i di famia?
Pensa Adelantá Riba Oracion
3, 4. (a) Pakico ta beneficioso pa pensa adelantá riba kico pa bisa den oracion público? (b) Kico e Scritura ta indicá relacioná cu largura di oracion?
3 Si a pidi nos haci un oracion público, probablemente nos lo tin chens di pensa maske ta un tiki adelantá riba nos oracion. Esei lo por permití nos mencioná asuntunan apropiado i importante sin haci un oracion largu sin pia ni cabes. Claro cu nos por haci nos oracionnan privá na bos haltu tambe. Nan por ta con largu cu nos kier. Jesus a pasa henter un anochi haciendo oracion promé cu el a scoge su 12 apostelnan. Pero, ora el a instituí e Memorial di su morto, aparentemente su oracionnan riba e pan i biña tabata basta corticu. (Marco 14:22-24; Lucas 6:12-16) I nos sa cu asta Jesus su oracionnan corticu tabata completamente aceptabel pa Dios.
4 Suponé cu nos haña e privilegio di representá un famia den oracion promé cu come. Un oracion asina lo por ta basta corticu. Pero loke sea nos bisa mester incluí un expresion di gratitud p’e cuminda. Si nos ta haciendo oracion público promé of despues di un reunion cristian, nos no tin nodi haci un oracion largu i mencioná hopi punto. Jesus a criticá e escribanan cu ‘a haci oracion largu como pretexto.’ (Lucas 20:46, 47) Un persona leal na Dios lo no kier haci esei nunca. Pero, tin biaha un oracion público un tiki mas largu por ta apropiado. Por ehempel, un anciano asigná pa haci e oracion final na un asamblea mester pensa adelantá riba dje i lo por deseá di mencioná vários punto. Tog, asta un oracion asina no mag di ta demasiado largu.
Acercá Dios cu Respet Profundo
5. (a) Kico nos mester tene na mente ora di haci oracion público? (b) Pakico nos mester haci oracion den un manera digno i respetuoso?
5 Ora nos ta haci oracion público, nos mester corda cu nos no ta papiando cu hende. Mas bien, nos ta criaturanan pecaminoso cu ta haci súplica na e Señor Soberano Jehova. (Salmo 8:3-5, 9; 73:28) P’esei nos mester manifestá temor reverencial di desagrad’é dor di loke nos ta bisa i e manera con nos ta bis’é. (Proverbionan 1:7) Salmista David a canta: “Pa loke ta ami, den e abundancia di bo bondad amoroso lo mi drenta den bo cas, lo mi buig den direccion di bo tempel santu den temor di bo.” (Salmo 5:7) Si nos tin e actitud ei, con nos lo expresá nos mes ora pidi nos haci un oracion público na un reunion di Testigo di Jehova? Wel, si nos ta papiando cu un rey humano, nos lo haci esei cu respet i dignidad. Nos oracionnan lo no mester ta asta mas digno i respetuoso siendo cu nos ta resa na Jehova, e “Rey di eternidad”? (Revelacion 15:3) Pues, ora nos ta haci oracion, nos lo evitá di bisa cosnan manera: “Mòru, Jehova,” “Nos ta manda bo nos cumindamentu,” of “Pasa un bon dia.” E Scritura ta mustra cu Jesucristo, Dios su Yu unigénito, nunca a dirigí su mes na su Tata celestial den e manera ei.
6. Kico nos mester tene na mente ora nos ta “acercá e trono di bondad inmerecí”?
6 Pablo a bisa: “Laga nos acercá e trono di bondad inmerecí cu frankesa di expresion.” (Hebreonan 4:16) Nos por acercá Jehova cu “frankesa di expresion,” apesar di nos condicion pecaminoso, pa motibu di nos fe den e sacrificio di rescate di Jesucristo. (Echonan 10:42, 43; 20:20, 21) Pero, e “frankesa di expresion” ei no kier men cu nos ta combersá informalmente cu Dios; ni nos no mag bisa cosnan irespetuoso na dje. Si nos kier pa nos oracionnan público agradá Jehova, nos mester haci nan cu debido respet i dignidad, i lo ta inapropiado pa usa nan pa haci anuncio, consehá otronan of reprendé un auditorio formalmente.
Haci Oracion cu un Spiritu Humilde
7. Con Sálomon a desplegá humildad ora el a haci oracion n’e dedicacion dje tempel di Jehova?
7 Sea nos ta haci oracion público of den privá, un principio bíblico importante pa tene na mente ta cu nos mester desplegá un actitud humilde den nos oracionnan. (2 Crónicanan 7:13, 14) Rey Sálomon a manifestá humildad den su oracion público n’e dedicacion dje tempel di Jehova na Jerusalem. Sálomon a caba di completá un dje edificionan mas mahestuoso cu a yega di ser construí riba tera. Tog, el a resa humildemente: “Di berdad Dios lo biba riba tera? Mira! Shelu, sí, e shelu di shelunan, mes no por contené bo; cuantu ménos anto, e cas aki cu mi a construí!”—1 Reynan 8:27.
8. Mencioná algun manera den cua nos ta mustra humildad den oracion público.
8 Mescos cu Sálomon, nos mester ta humilde ora di representá otronan den oracion público. Aunke nos mester evitá di zona manera nos ta masha santu, nos por mustra humildad cu nos tono di bos. Oracion humilde no ta presumido ni exagerá. Nan ta hala atencion, no n’e persona cu ta haciendo oracion, sino na Esun na ken e oracion ta dirigí. (Mateo 6:5) Tambe nos ta mustra humildad dor di loke nos ta bisa den oracion. Si nos ta resa humildemente, nos lo no papia manera ta exigí nos ta exigí Dios p’e haci cierto cosnan na nos manera. Mas bien, nos lo suplicá Jehova p’e obra na armonia cu su boluntad sagrado. E salmista a duna e ehempel dje actitud corecto ora el a roga: “Ai, pues, Jehova, salba, sí, por fabor! Ai, pues, Jehova, duna éxito, sí, por fabor!”—Salmo 118:25; Lucas 18:9-14.
Haci Oracion di Curason
9. Ki conseho excelente cu Jesus a duna, nos ta haña na Mateo 6:7, i con nos por aplik’é?
9 Si nos kier pa nos oracionnan público of privá agradá Jehova, nan tin cu sali di curason. Pues, nos lo no djis ripití un fórmula di oracion bes tras bes sin pensa kico nos ta bisando. Den su Sermon Riba Ceru, Jesus a consehá: “Ora di haci oracion, no bisa e mésun cosnan bes tras bes, mescos cu e hendenan dje nacionnan ta haci, pasobra nan ta imaginá [ekibocadamente] cu dor di nan uso di hopi palabra nan lo ser tendé.” Cu otro palabra, Jesus a bisa: “No papia pa papia; no expresá ripiticionnan bashí.”—Mateo 6:7; nota na pia di página.
10. Pakico ta apropiado pa haci oracion tocante e mésun asuntu mas cu un biaha?
10 Claro cu kisas nos tin cu haci oracion tocante e mésun asuntu bes tras bes. Esei no ta malu pasobra Jesus a urgi: “Sigui pidi, i lo duna na boso; sigui busca, i boso lo haña; sigui bati, i lo habri pa boso.” (Mateo 7:7) Tal bes mester di un Salon di Reino nobo pa motibu cu Jehova ta haci e trabou di predicacion local prosperá. (Isaías 60:22) Lo ta corecto pa sigui mencioná e necesidad aki ora di haci oracion den privá of ora di haci oracion público na reunionnan di Jehova su pueblo. Esei lo no nificá cu nos ta ‘expresando ripiticion bashí.’
Corda Gradicí i Alabá Dios
11. Con Filipensenan 4:6, 7 ta aplicá na oracion privá i público?
11 Hopi hende ta haci oracion solamente pa pidi algu, pero nos amor pa Jehova Dios mester impulsá nos pa dun’é gradicimentu i alabansa tantu den oracion privá como público. Pablo a skirbi: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) Sí, ademas di súplica i peticion, nos mester expresá gratitud na Jehova pa bendicionnan spiritual i material. (Proverbionan 10:22) E salmista a canta: “Ofrecé gradicimentu como bo sacrificio na Dios, i paga bo votonan n’e Haltísimo.” (Salmo 50:14) I den un melodia di David den forma di oracion el a usa e palabranan conmovedor aki: “Lo mi alabá e nomber di Dios cu cantica, i lo mi engrandec’é cu gradicimentu.” (Salmo 69:30) Nos no mester haci mescos den oracion público i privá?
12. Den ki manera Salmo 100:4, 5 ta cumpliendo awe, i p’esei kico nos por gradicí i alabá Dios p’e?
12 E salmista a canta en cuanto Dios: “Drenta den su portanan cu gradicimentu, den su pationan cu alabansa. Duna gradicimentu na dje, bendicioná su nomber. Pasobra Jehova ta bon; su bondad amoroso ta pa tempu indefiní, i su fieldad di generacion pa generacion.” (Salmo 100:4, 5) Awe, hende di tur nacion ta drentando e pationan di Jehova su santuario, i pa esaki nos por dun’é alabansa i gradicimentu. Bo ta expresá gratitud na Dios p’e Salon di Reino local i ta demostrá bo aprecio dor di reuní ei regularmente huntu cu esnan cu ta stim’é? Ora bo ta einan, bo ta hisa bo bos cu entusiasmo den canticanan di alabansa i di gratitud na nos Tata celestial amoroso?
Nunca Sinti Bergwensa di Haci Oracion
13. Ki ehempel bíblico ta mustra cu nos mester haci súplica na Jehova asta si nos ta sinti nos indigno pa motibu di culpa?
13 Asta si nos ta sinti nos indigno pa motibu di culpa, nos mester acudí na Dios den súplica sincero. Ora e hudiunan a peca dor di tuma esposanan stranhero, Esdras a hinca rudia, a habri su plant’i mannan leal na Dios, i a resa humildemente: “O mi Dios, di berdad mi ta sinti bergwensa i bochorno pa hisa mi cara na bo, o mi Dios, pasobra nos erornan mes a multiplicá riba nos cabes i nos culpabilidad a bira grandi, asta te na shelu. Desde e dianan di nos antepasadonan te n’e dia aki nos tabata den gran culpabilidad . . . I despues di tur loke a bini riba nos dor di nos mal accionnan i nos gran culpabilidad—pasobra abo mes, o nos Dios, a calculá nos eror ménos di loke e ta, i bo a duna nos esnan cu a scapa, manera esakinan—nos lo bai kibra bo mandamentunan atrobe i forma aliansa matrimonial cu e pueblonan dje cosnan detestabel aki? Lo bo no rabia cu nos te n’e límite di manera cu ningun hende lo no keda, ni ningun lo no scapa? O Jehova, e Dios di Israel, bo ta hustu, pasobra nos a keda manera un pueblo cu a scapa, manera riba e dia aki. Aki nos ta dilanti bo den nos culpabilidad, pasobra ta imposibel pa para dilanti bo pa causa di esaki.”—Esdras 9:1-15; Deuteronomio 7:3, 4.
14. Manera a ser demostrá den tempu di Esdras, kico ta necesario pa Dios por pordoná nos?
14 Pa Dios pordoná nos, nos tin cu confesá na dje i compañá esei cu repentimentu i “frutanan cu ta pas cu repentimentu.” (Lucas 3:8; Job 42:1-6; Isaías 66:2) Den tempu di Esdras, un actitud repentí a bai compañá cu un esfuerso pa corigí e malu dor di manda e esposanan stranhero bai. (Esdras 10:44; compará cu 2 Corintionan 7:8-13.) Si nos kier pa Dios pordoná nos pa malecho serio, laga nos haci confesion den oracion humilde i producí fruta cu ta pas cu repentimentu. Un spiritu repentí i un deseo pa corigí e malu tambe lo impulsá nos pa busca e yudansa spiritual di anciano cristian.—Santiago 5:13-15.
Saca Consuelo for di Oracion
15. Con e experencia di Hana ta mustra cu nos por haña consuelo den oracion?
15 Ora nos curason ta pena pa un of otro motibu, nos por haña consuelo den oracion. (Salmo 51:17; Proverbionan 15:13) Esei tabata e caso cu Hana, un persona leal. El a biba den e tempu cu famia grandi tabata comun den Israel, pero e no tabatin yu. Su casá, Elcana, tabatin yu homber i yu muher cu su otro esposa, Penina, kende tabata tenta Hana pasobra esaki tabata steril. Hana a haci oracion sincero i a primintí cu si Dios bendicion’é cu un yu, ‘lo e dun’é na Jehova tur e dianan dje yu su bida.’ Consolá pa su oracion i p’e palabranan di Sumo Sacerdote Eli, Hana “su cara no a bolbe mustra preocupacion mas pa su propio situacion.” El a duna lus na un yu homber cu el a yama Samuel. Mas despues, el a entregu’é p’e sirbi n’e santuario di Jehova. (1 Samuel 1:9-28) Gradicidu pa Dios su bondad amoroso pa cuné, el a ofrecé un oracion di gradicimentu, unu cu a alabá Jehova como esun sin igual. (1 Samuel 2:1-10) Mescos cu Hana, nos por saca consuelo for di oracion, cu e confiansa cu Dios ta contestá tur peticion cu ta na armonia cu su boluntad. Ora nos ta habri nos curason na dje, laga nos no “mustra preocupacion mas pa [nos] propio situacion,” pasobra lo e eliminá nos carga of lo e duna nos e forsa pa soport’é.—Salmo 55:22.
16. Manera e caso di Jacob a ilustrá, pakico nos mester haci oracion ora nos tin miedu of ansiedad?
16 Si un situacion ta causa temor, dolor di curason of ansiedad, laga nos no keda sin acudí na Dios den oracion pa consuelo. (Salmo 55:1-4) Jacob tabatin miedu ora e tabata cerca di topa su ruman Esau, cu ken e no tabatin un bon relacion mas. Sin embargo, Jacob a pidi den oracion: “O Dios di mi tata Abraham i Dios di mi tata Isaac, o Jehova, abo cu ta bisa mi: ‘Bolbe na bo tera i na bo parientenan i ami sigur lo trata bo bon,’ mi no ta digno di tur e bondad amoroso i di tur e fieldad cu bo a ehercé pa cu bo sirbidó, pasobra cu mi staf so mi a crusa e Jordan aki i awor mi a bira dos campamentu. Libra mi, mi ta roga bo, for di man di mi ruman, for di man di Esau, pasobra mi tin miedu di dje, cu e por bini i sigur atacá mi, mama huntu cu yu. I abo, abo a bisa: ‘Sin duda lo mi trata bo bon i lo mi forma bo simia manera santu di laman, cu no por ser contá di hopi cu nan ta.’” (Génesis 32:9-12) Esau no a atacá Jacob ni esnan den su compania. Asina Jehova en berdad a ‘trata Jacob bon’ n’e ocasion ei.
17. Na armonia cu Salmo 119:52, con oracion por duna nos consuelo ora nos ta bou di prueba severo?
17 Durante nos súplicanan, nos por haña consuelo dor di corda cosnan cu e Palabra di Dios ta bisa. Den e salmo di mas largu—un bunita oracion cu acompañamentu musical—kisas tabata Prins Ezekías cu a canta: “Mi a corda bo decisionnan hudicial desde tempu indefiní, o Jehova, i mi ta haña consuelo pa mi mes.” (Salmo 119:52) Den oracion humilde ora nos ta bou di prueba severo, nos por corda un principio of ley di Bijbel cu por yuda nos sigui un curso cu ta resultá den e garantia consolador cu nos ta agradando nos Tata celestial.
Hende Leal Ta Perseverá den Oracion
18. Pakico nos por bisa cu ‘tur persona leal lo haci oracion na Dios’?
18 Tur persona cu ta leal na Jehova Dios lo “perseverá den oracion.” (Romanonan 12:12) Den Salmo 32, cu David a componé posiblemente despues cu el a peca cu Bat-seba, el a describí su agonia dor di a keda sin busca pordon i e alivio cu repentimentu i confesion na Dios a trece p’e. Anto David a canta: “Debí na esaki [pa motibu cu Jehova su pordon ta disponibel na esnan cu ta berdaderamente repentí] tur persona leal lo haci oracion na bo solamente na un tempu cu por haña bo.”—Salmo 32:6.
19. Pakico nos mester hisa mannan leal den oracion?
19 Si nos ta apreciá nos relacion cu Jehova Dios, nos lo resa pidi pa su misericordia a base di Jesus su sacrificio di rescate. Cu fe, nos por acercá e trono di bondad inmerecí cu frankesa di expresion pa obtené misericordia i yudansa oportuno. (Hebreonan 4:16) Pero tin asina hopi motibu pa haci oracion! P’esei, laga nos “haci oracion sin stop”—hopi bes cu palabranan di alabansa i gratitud sincero na Dios. (1 Tesalonicensenan 5:17) Dia i anochi, laga nos hisa mannan leal den oracion.
Con Lo Bo Contestá?
◻ Ki beneficio tin den pensa adelantá riba kico pa bisa den oracion público?
◻ Pakico nos mester haci oracion den un manera digno i respetuoso?
◻ Ki spiritu nos mester desplegá ora di haci oracion?
◻ Ora di haci oracion, pakico nos mester corda gradicí i alabá Dios?
◻ Con Bijbel ta mustra cu nos por saca consuelo for di oracion?
[Plachi na página 17]
Rey Sálomon a manifestá humildad den su oracion público n’e dedicacion dje tempel di Jehova
[Plachi na página 18]
Mescos cu Hana, bo por saca consuelo for di oracion