Sigui Dilanti pa Yega na Madures—‘E Gran Dia di Yehova Ta Serka’
“Laga nos sigui dilanti pa yega na madures.”—HEB. 6:1.
1, 2. Kon e kristiannan di siglo ún den Yerusalèm i Hudea a haña un oportunidat pa “hui bai na e serunan”?
ORA Hesus tabata riba tera, su disipelnan a aserk’é i a puntr’é: “Kiko lo ta e señal di bo presensia i dje konklushon dje sistema di kosnan?” E promé kumplimentu di e profesia ku Hesus a duna nan komo kontesta pa nan pregunta a tuma lugá den siglo ún. Hesus a papia di algu inusual ku tabata bai sosodé i ku lo a indiká ku e fin tabata masha serka. Asina ku e suseso a tuma lugá ‘esnan ku tabata na Hudea mester a kuminsá hui bai na e serunan.’ (Mat. 24:1-3, NW, 15-22) E disipelnan di Hesus lo a rekonosé e señal i sigui su instrukshonnan?
2 Kasi tres dékada despues, na aña 61 di nos era, apòstel Pablo a skirbi un mensahe franko na e kristiannan hebreo ku tabata biba na Yerusalèm i den bisindario pa korigí un punto di bista robes ku nan tabatin. Pablo i su rumannan den fe no tabata sa ku mas o ménos un sinku aña despues nan lo a mira e señal ku lo a marka komienso di un “gran tribulashon.” (Mat. 24:21) Na aña 66 di nos era, Sestio Galo i su ehérsito romano tabata a punto di gana un bataya kontra Yerusalèm. Pero diripiente nan a retirá i e kristiannan a haña un oportunidat pa hui pa skapa nan bida.
3. Ki konseho Pablo a duna e kristiannan hebreo, i dikon?
3 E kristiannan ei mester a diserní ku loke tabata pasando tabata kumplimentu di Hesus su palabranan, i ku nan mester a hui. Sinembargo, algun kristian a bira “floho pa tende.” Nan tabata manera beibi spiritual ku tabatin mester di “lechi.” (Lesa Hebreonan 5:11-13.) Asta algun ku a kana den e kaminda di e bèrdat pa dékadanan a kuminsá “alehá for di e Dios bibu.” (Heb. 3:12) Tin di nan tabatin “kustumber” di falta e reunionnan kristian nèt durante un tempu ku “e dia [kalamitoso tabata] yegando serka.” (Heb. 10:24, 25) Apropiadamente, Pablo a konsehá nan, bisando: “Lagando e siñansa elemental tokante di e Kristu, laga nos sigui dilanti pa yega na madures.”—Heb. 6:1.
4. Dikon ta importante pa nos keda alerta pa mira kumplimentu di profesia, i kiko por yuda nos hasi esei?
4 Nos ta bibando durante e tempu di e kumplimentu final di Hesus su profesia. ‘E gran dia di Yehova,’ esta, e dia ku Dios lo pone un fin na henter e sistema di Satanas, “ta serka.” (Sof. 1:14) Mas ku nunka, nos mester keda alerta pa mira kumplimentu di profesia bíbliko i pa mantené un relashon fuerte ku Yehova. (1 Ped. 5:8) Nos realmente ta hasiendo esei? Madures kristian ta yuda nos keda konsiente di e tempu den kua nos ta bibando.
Loke Madures Kristian Ta Enserá
5, 6. (a) Kiko madures spiritual ta enserá? (b) Pa nos sigui dilanti pa yega na madures, nos tin ku hasi esfuerso den ki dos área?
5 Pablo no solamente a animá e kristiannan hebreo di promé siglo pa sigui dilanti pa yega na madures, sino tambe el a bisa nan loke madures spiritual ta enserá. (Lesa Hebreonan 5:14.) “Hende madurá” no ta keda satisfecho ku “lechi” so. Nan ta kome “kuminda sólido” tambe. P’esei, nan konosé tantu e kosnan “elemental” komo kosnan ‘profundo’ di e bèrdat. (1 Kor. 2:10) Ademas, dor di práktika, esta dor di apliká loke nan sa, nan ta entrená nan mente pa diserní loke ta bon i loke ta malu. Ora nan tin ku tuma un desishon, e entrenamentu akí ta yuda nan diserní kua prinsipionan bíbliko ta enbolbí i kon pa apliká nan.
6 Pablo a skirbi: “Nos mester paga muchu mas atenshon na loke nos a tende, pa nos no apartá nos for di e kaminda.” (Heb. 2:1) Nos por haña nos ta apartá for di e fe sin ripará. Nos por evitá di pasa den e eksperensia akí dor di “paga muchu mas atenshon” durante nos estudio di Beibel, sea na kas òf durante reunionnan kristian. Pues, ta importante pa kada un di nos puntra nos mes: ‘Ainda mi ta alimentá mi mes solamente ku e kosnan elemental? Mi ta hasi kos na un manera mekániko òf rutinario den e bèrdat, i no di henter mi kurason? Kon mi por hasi berdadero progreso spiritual?’ Pa nos sigui dilanti pa yega na madures nos tin ku hasi esfuerso den por lo ménos dos área. Nos mester konosé e Palabra di Dios bon i nos mester siña obedensia.
Konosé e Palabra Bon
7. Kiko ta e benefisio di konosé e Palabra di Dios mas mihó?
7 Apòstel Pablo a skirbi: “Tur ku ta partisipá di lechi no konosé e palabra di hustisia, pasobra e ta un beibi.” (Heb. 5:13, NW) Pa nos alkansá madures, nos mester konosé e palabra di Dios bon, esta, su mensahe pa nos. Siendo ku e mensahe akí ta den su Palabra, e Beibel, nos mester ta bon studiante di e Skritura i e publikashonnan di “e esklabo fiel i prudente.” (Mat. 24:45-47) Si nos ta apsorbá Dios su pensamentu di e forma akí, esaki ta yuda nos entrená nos mente. Konsiderá e ehèmpel di un kristian ku yama Astrid.a El a bisa: “E rekordatorio ku tabatin e efekto di mas grandi riba mi bida ta esun di lesa Beibel regularmente. Mi a dura mas o ménos dos aña pa kaba di lesa henter e Beibel, pero ta parse ku mi tabata siña konosé mi Kreador pa promé biaha. Mi a siña tokante su kamindanan, loke e ta gusta i loke e no ta gusta, kuantu poder e tin i tokante e profundidat di su sabiduria. Mi lesamentu di Beibel tur dia a sostené mi durante algun di e periodonan di mas difísil di mi bida.”
8. Ki influensia e Palabra di Dios por tene riba nos?
8 Ora nos ta lesa un porshon di e Palabra di Dios regularmente, su mensahe por ‘penetrá den nos kurason.’ (Lesa Hebreonan 4:12.) Lesamentu di Beibel por moldia nos i Yehova ta keda mas kontentu ku nos. Bo mester hasi ahuste personal pa bo tin mas tempu pa lesa Beibel i meditá riba loke e ta bisa?
9, 10. Kiko siña konosé e Palabra di Dios ta enserá? Duna un ehèmpel.
9 Konosé Beibel ta enserá mas ku djis sa loke e ta bisa so. E beibinan spiritual den tempu di Pablo probablemente tabatin un sierto grado di konosementu di e Palabra inspirá di Dios. Sinembargo, nan no a apliká loke nan sa pa mira e bon resultado ku e ta duna. Debí ku nan no a laga e mensahe di Beibel guia nan pa tuma bon desishon den nan bida, e personanan akí no a konosé e mensahe.
10 Siña konosé e Palabra di Dios ta enserá sabi loke e ta bisa i pone e konosementu ei na práktika. E eksperensia di e ruman muhé Kyle ta mustra kon un hende por hasi esei. Kyle tabatin un diskushon fuerte ku un di su koleganan di trabou. Kiko el a hasi pa solushoná e asuntu? El a splika: “Mesora e teksto di Romanonan 12:18 a bini na mi mente, e ta bisa: ‘Asina leu ku ta dependé di boso, sea na pas ku tur hende.’ P’esei mi a puntra mi kolega si nos por a papia despues di trabou.” E kòmbersashon a bai masha bon mes, i e kolega di trabou a keda impreshoná kon Kyle a atendé e asuntu. Kyle a bisa: “Kos no por bai robes nunka si nos apliká prinsipionan di Beibel.”
Siña Obedensia
11. Kiko ta mustra ku obedensia bou di sirkunstansianan difísil no ta fásil?
11 No ta tur ora ta fásil pa nos apliká loke nos a siña for di e Skritura, prinsipalmente bou di sirkunstansianan difísil. Por ehèmpel, djis despues ku Yehova a liberá e yunan di Israel for di sklabitut na Egipto, nan a kuminsá “pleita ku Moisés” i a sigui “pone SEÑOR na prueba.” Dikon e israelitanan a pleita ku Moisés? Pasobra nan no tabatin awa pa bebe. (Eks. 17:1-4) Ménos ku dos luna despues di a drenta den un pakto ku Dios i despues ku nan a bai di akuerdo pa kumpli ku “tur e palabranan ku SEÑOR a papia,” nan a violá su lei dor di kometé idolatria. (Eks. 24:3, 12-18; 32:1, 2, 7-9) Ta pa motibu ku Moisés a dura asina tantu tempu riba Seru Horèb pa risibí instrukshon nan a haña miedu? Anteriormente e israelitanan a gana e bataya kontra e amalekitanan ora ku Moisés a tene su mannan na laira. Kisas nan a pensa ku e amalekitanan lo ataká atrobe i ku nan lo ta indefenso sin Moisés su presensia? (Eks. 17:8-16) Esei ta posibel, pero sea kual sea e kaso, e israelitanan ‘no tabata kier a obedesé.’ (Echo. 7:39-41) Pablo a urgi e kristiannan pa “ta diligente” pa nan no haña nan ta “sigui e mesun ehèmpel di desobedensia” ku e israelitanan a mustra na momento ku nan tabatin miedu di drenta e Tera Primintí.—Heb. 4:3, 11.
12. Kon Hesus a siña obedensia, i ku ki benefisio?
12 Pa nos alkansá madures, nos tin ku hasi nos máksimo esfuerso pa obedesé Yehova. Manera e ehèmpel di Hesukristu ta mustra, hopi bes un hende ta siña obedensia pa motibu di e kosnan ku e ta sufri. (Lesa Hebreonan 5:8 i 9.) Promé ku Hesus a bini na tera, e tabata obediente na su Tata. Sinembargo, pa el a hasi e boluntat di su Tata riba tera a enserá ku e mester a pasa den doló físiko i angustia mental. Mediante su obedensia bou di sirkunstansia masha difísil, Hesus “a wòrdu hasí perfekto” pa e posishon nobo ku Dios tabatin na mente p’e, esta pa e bira Rei i Sumo Saserdote.
13. Kiko ta indiká ku nos a siña obedensia?
13 Kiko di nos? Nos ta determiná pa obedesé Yehova asta ora nos ta enfrentá problemanan ku ta kousa angustia? (Lesa 1 Pedro 1:6 i 7.) Dios su konseho pa loke ta trata moralidat, onestidat, uso di lenga, lesamentu i estudio personal di e Skritura, asistensia na e reunionnan kristian i partisipashon den e trabou di prediká ta masha kla. (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Nos ta obediente na Yehova den e asuntunan akí asta bou di sirkunstansia difísil? Nos obedensia ta un indikashon ku nos a alkansá madures.
Dikon Madures Kristian Ta Benefisioso?
14. Duna un ehèmpel ku ta mustra kon ora un hende alkansá madures esei por sirbi komo un protekshon.
14 Ora un kristian tin su mente debidamente entrená pa diserní loke ta bon i loke ta malu den un mundu ku a ‘pèrdè tur klase di heful,’ esaki ta sirbi komo un berdadero protekshon p’e. (Efe. 4:19) Konsiderá e ehèmpel di un ruman hòmber ku yama James, kende regularmente ta lesa publikashonnan bíbliko i ta balorá nan mashá. El a haña un trabou kaminda tur su koleganan tabata hende muhé. James a bisa: “Maske tabata bisto ku mayoria di nan no tabatin ningun klase di sentido moral, tabatin un kolega sí ku a parse di ta un persona respetabel i a mustra interes den e bèrdat bíbliko. Pero, un dia ku nos dos so tabata traha den un kamber, el a kuminsá brasa mi i sunchi mi. Mi a pensa ku ta un wega pero tabata masha difísil pa par’é. Mesora mi a kòrda un eksperensia den E Toren di Vigilansia tokante un ruman hòmber ku a hañ’é ku un tentashon similar na su trabou. E artíkulo ei a usa e ehèmpel di Hosé i e esposa di Potifar.b Sin tarda mi a push’é kita for di mi kurpa, i el a sali kore bai.” (Gén. 39:7-12) James tabata kontentu ku nada mas no a pasa i ku el a keda ku un bon konsenshi.—1 Tim. 1:5.
15. Kon madures por fortalesé nos kurason?
15 Madures ta benefisioso tambe pasobra e ta fortifiká nos kurason i ta yuda nos pa no “wòrdu hibá p’aki p’aya dor di tur sorto di siñansa straño.” (Lesa Hebreonan 13:9.) Ora nos ta hasi esfuerso pa progresá spiritualmente, nos mente ta keda enfoká riba kosnan ku “ta importante di bèrdè.” (Fil. 1:9, 10, BPK) Di e manera ei nos ta haña mas apresio pa Dios i pa tur loke el a perkurá pa nos benefisio. (Rom. 3:24) Un kristian ku ta ‘madurá den su pensamentu’ ta haña e klase di apresio ei i ta gosa di un relashon íntimo ku Yehova.—1 Kor. 14:20.
16. Kiko a yuda un ruman muhé ‘fortalesé su kurason’?
16 Un ruman muhé ku yama Louise a atmití ku pa un tempu despues di su boutismo, e tabata preokupá primeramente tokante e impreshon ku otro hende ta haña di dje. El a bisa: “Mi no tabata hasi nada malu, pero mi no tabatin un deseo fuerte di kurason pa sirbi Yehova. Mi a realisá ku mi mester a hasi algun kambio pa mi sinti ku mi tabata duna tur loke mi por na Yehova. E kambio di mas grandi ku mi a hasi ta di ador’é ku henter mi alma.” Hasiendo e esfuerso ei, Louise a ‘fortalesé su kurason,’ i esei a resultá di ta masha benefisioso ora el a hañ’é ku problema ku su salú. (Sant. 5:8) Louise a bisa: “Mi tabatin un lucha pisá ku mi salú, pero mi a realmente hala serka Yehova.”
“Bira Obedesidu di Kurason”
17. Dikon obedensia tabata masha importante den e promé siglo?
17 Pablo su konseho pa sigui “dilanti pa yega na madures” a salba bida di e kristiannan di promé siglo ku tabata biba den Yerusalèm i Hudea. E kristiannan ku a hasi kaso di su konseho tabatin e disernimentu spiritual profundo pa rekonosé e señal ku Hesus a duna nan pa nan “hui bai na e serunan.” Ora nan a mira “e abominashon di desolashon . . . para den e lugá santu,” es desir, ora nan a mira e ehérsito romano rondoná Yerusalèm i a drenta den e stat, nan tabata sa ku ta ora pa hui. (Mat. 24:15, 16) Siguiendo Hesus su spièrtamentu profétiko, e kristiannan a hui for di Yerusalèm promé ku su destrukshon i, segun e historiadó hudiu Eusebio, nan a establesé nan mes na e stat di Pela den e region di seru di Galaad. Di e manera ei, nan a evitá e desaster di mas grandi den historia registrá di Yerusalèm.
18, 19. (a) Dikon obedensia ta asina importante den nos tempu? (b) Kiko nos ta bai trata den e siguiente artíkulo?
18 Ora nos hasi esfuerso pa alkansá madures nos ta siña obedensia, i na su turno obedensia lo yuda nos sobrebibí ora nos eksperensiá e mayor kumplimentu di Hesus su profesia ku “lo tin un gran tribulashon” na un eskala inigualabel. (Mat. 24:21) Nos lo obedesé kualke instrukshon urgente ku nos haña for di ‘e mayordomo fiel i prudente’? (Luk. 12:42) Ta masha importante pa siña “bira obedesidu di kurason”!—Rom. 6:17.
19 Pa nos por alkansá madures nos mester entrená nos mente. Nos por logra esei dor di hasi esfuerso pa konosé e Palabra di Dios mas mihó i dor di siña obedensia. Hóbennan ku ta hasi esfuerso pa alkansá madures kristian ta haña nan ku desafionan úniko. E siguiente artíkulo ta mustra kon nan por trata ku e desafionan ei na un manera eksitoso.
[Nota]
a A kambia algun nòmber.
b Wak e artíkulo “Fortifiká pa Bisa Nò na Malecho,” den E Toren di Vigilansia di 1 di òktober 1999.
Kiko Bo A Siña?
• Kiko madures spiritual ta enserá, i kon nos por alkans’é?
• Kon importante ta pa nos konosé e Palabra di Dios si nos ke alkansá madures?
• Kon nos por siña obedensia?
• Den ki maneranan madures ta benefisiá nos?
[Plachi na página 12]
Dor di apliká konseho bíbliko, nos lo por trata ku problema na un manera madurá
[Plachi na página 14]
Sigui Hesus su konseho a nifiká bida pa e kristiannan di promé siglo