Ocupá cu obra morto of den e sirbishi di Jehova Dios?

“SORRY, pero mi ta ocupá.” Esei ta un palabra cu Testigo di Jehova ta tende ora nan ta predica públicamente e bon nobo dje Reino. (Mateo 24:14) I aunque tin bez cu ora hende ta bisa “Mi ta ocupá” esei ta solamente un despedida conbeniente, e berdad tá cu hopi hende sí ta ocupá. Nan ta casi hogá den e “ansha dje sistema di cosnan aki”​—⁠e presion di gana nan pan, paga gasto, bai i bin di trabao, cria yiu, cuida cas, auto, i otro propiedad.​—⁠Mateo 13:⁠22.

Sin embargo, aunque hende en berdad ta ocupá, mashá poco di nan ta ocupá cu obra cu ta berdaderamente fructífero of productivo. Ta manera e homber sabí Salomón a skirbi: “Kico hende ta yega di haya pa tur nan trabao duro i pe esfuerzo di nan curazón cu locual nan ta traha duro bao di solo? Pa tur nan dianan nan ocupacion ta nifica dolor i shagrinamento, també durante anochi nan curazón simplemente no ta sosega. Esei també ta simple banidad.”​—⁠Eclesiastés 2:​22, 23.

E Bijbel també ta yama tal actividad inútil “obra morto.” (Hebreo 9:14) Obra asina ta domina bo bida? Esei mester ta un preocupacion grandi pa bo como un cristian, pasobra Dios ta “paga cada un segun nan obra.” (Salmo 62:12) I siendo cu “e tempo cu ta keda ta reducí,” nos mester ta specialmente preocupá pa nos no malgastá tempo cu obra cu ta morto. (1 Corintio 7:29) Pero, exactamente cua obra ta morto? Con nos mester consideránan? I con nos por keda sigur cu nos ta ocupá cu obra cu ta di berdadero balor?

Identificacion di obra morto

Den Hebreo 6:​1, 2, Pablo a skirbi: “P’es motibo, awor cu nos a progresá for dje doctrina primario tocante Cristo, láganos forza padilanti te na madurez, sin pone un fundeshi di nobo, esta, arrepentimento di obra morto, i fe pa cu Dios, e siñanza di bautismo i ponimento di man, e resureccion di hende morto i e huicio eterno.” Ripará cu e “doctrina primario” ta inclui “arrepentimento di obra morto.” Como hende cristian, lector di Pablo a arrepenti caba di tal obra morto. Di ki manera?

Promé cu nan a acepta Cristo, algun hende dje promé siglo a ocupánan den ‘obra morto di carni,’ esta, “fornicacion, impureza, conducta inmoral, idolatría, práctica di spiritismo,” i otro malecho. (Galatio 5:​19-21) Desenfrená, tal obra por a resulta den nan morto spiritual. Pero, misericordiosamente tal hende cristian a apartá for di nan camina di destruccion, a arrepenti, i tabata “labá limpi.” Asina nan a disfruta di un relacion limpi cu Jehova Dios.​—⁠1 Corintio 6:​9-11.

Sin embargo, tur hende cristian no tabatin cu arrepenti di obra cu tabata malu of inmoral. E carta di Pablo tabata dirigí principalmente na creyente hudío, hopi di locual, sin duda, a pega estrictamente ne Ley di Moisés promé cu nan a acepta Cristo. Pues, nan tabatin cu arrepenti di cua obra morto? Siguramente no tabata malu ora nan a celebra ceremonia i a cumpli cu requisito di dieta dje Ley. E Ley no tabata “santo i husto i bon”? (Romano 7:12) Sí, pero den Romano 10:​2, 3 Pablo a bisa tocante hudío: “Mi ta duna testimonio di nan cu nan tin un celo pa Dios; pero no segun conocimento exacto; pasobra, door di no conoce e husticia di Dios sino buscando di establece nan mes husticia, nan no a someténan ne husticia di Dios.”

Sí, hudío den error a kere cu door di sigi e Ley escrupulosamente, nan por a gana salbacion. Pero, Pablo a splica cu “hende ta ser declará husto, no debí na obra di ley, sino solamente mediante fe pa cu Cristo Jesús.” (Galatio 2:16) Despues dje percuracion dje sacrificio di rescate di Cristo, obra di Ley​—⁠apesar di nan piedad i nobleza​—⁠tabata obra morto i di ningun balor pa gana salbacion. Pues, hudío di curazón recto a busca e fabor di Dios arrepentiendo di tal obra morto i bautizando pa simboliza nan arrepentimento.​—⁠Echo 2:⁠38.

Kico nos ta siña di esei? Cu obra morto por inclui mas cu malecho of inmoralidad; nan ta encerra cualkier obra cu ta spiritualmente morto, bano, of infructífero. Pero, tur hende cristian no ta arrepenti di tal obra morto promé cu nan bautismo? Berdad, pero algun hende cristian dje promé siglo a bolbe cai den conducta inmoral. (1 Corintio 5:⁠1) I den cristian hudío, tabatin un tendencia di bolbe ne práctica di obra morto dje Ley di Moisés. Pablo tabatin cu haci hende asina corda pa no bolbe na obra morto.​—⁠Galatio 4:21; 5:⁠1.

Vigilando contra obra morto

P’sei, e pueblo di Jehova Dios djawe mester tene cuidao pa no cai den laz di obra morto. Nos ta ser atacá na casi tur banda pa presion pa haci compromiso moralmente, pa ser desonrado, i pa participa den echo di mal conducta sexual. Lastimosamente, miles di hende cristian tur aña ta sucumbi na tal presion i, si nan no ta arrepenti, nan ta ser scomulgá for dje congregacion cristian. Awor, mas cu nunca, anto, hende cristian tin cu sigi e conseho di Pablo den Efesio 4:​22-24: “Kita e personalidad bieu cu ta conforma cu boso moda di anda di antes i cu ta ser corrumpi conforme cu su deseo engañoso; pero . . . boso mester ta hací nobo den e forza cu ta impulsa boso mente, i mester bisti e personalidad nobo cu a wordu creá conforme cu e boluntad di Dios den berdadero husticia i lealtad.”

Naturalmente, cristian efesio na locual Pablo a skirbi a bisti e personalidad nobo caba te na un grado grandi. Pero, Pablo a yúdanan comprende cu e hacimento di esei tabata un proceso continuo! Sin esfuerzo continuo, deseo engañoso cu ta persisti como un influencia corruptivo por hiba hende cristian bek na obra morto. Mescos ta cierto di nos den e dia djawe. Nos tin cu lucha constantemente pa bisti e personalidad nobo, sin permiti ningun inclinacion cu nos a acumula den nos moda di biba bieu manché. Nos tin cu evita​—⁠odia​—⁠cualkier forma di mal obra di carni. E salmista a conseha: “Ai, boso stimador di Jehova, odia loke ta malu.”​—⁠Salmo 97:⁠10.

Encomendablemente, e mayoría grandi dje pueblo di Jehova Dios djawe ta sigi e conseho i ta keda moralmente limpi. Pero, algun a desvia debí na obra cu di nan mes no ta necesariamente malu pero cu últimamente ta bano i infructífero. Por ehempel, idea pa ganamento di placa i acumulacion di cosnan material a hiba algun. Pero e Bijbel ta adverti: “Esnan cu ta keda determiná di ser ricu ta cai den tentacion i laz i hopi deseo irrazonabel i perhudicial, cu ta tira hende den destruccion i ruina.” (1 Timoteo 6:⁠9) Pa otro hende, educacion seglar a resulta di ser un laz. En berdad, un cierto nivel di educacion seglar por ta necesario pa obtene empleo. Pero, den nan sigimento tras di educacion mundano moderno cu ta ocupá hopi tempo, algun a perhudica nan mes spiritualmente.

Sí, tal bez hopi obra di nan mes no ta moralmente malu. Pero, no obstante, nan ta morto si nan realmente no ta ampliá nos bida awor of gana fabor pa nos cerca Jehova Dios. Obra asina ta ocupa tempo i ta exigi energía pero no ta produci beneficio spiritual, ningun refrescamento duradero.​—⁠Compara cu Eclesiastés 2:⁠11.

Sin duda bo ta haci hopi esfuerzo pa keda ocupá den actividad spiritual cu ta bale la pena. Pero, ta útil pa scudriña bo mes regularmente. De bez en cuando, bo por haci bo mes pregunta tal como: ‘Mi participacion den e sirbishi i mi asistencia na reunion ta empeorando door cu mi a acepta trabao seglar innecesario?’ ‘Mi tin tempo pa recreo pero poco tempo pa estudio personal i di famía?’ ‘Mi ta dedica hopi tempo i energía atendiendo na posesion material pero no ta atende na hende pober den e congregacion, tal como esnan enfermo i di mayor edad?’ Contesta pa tal pregunta por revela un necesidad di bo parti pa duna mas prioridad na obra spiritual.

Keda ocupa den e sirbishi di Jehova Dios

Manera 1 Corintio 15:58 ta bisa, tin “basta pa haci den e trabao di Señor.” Principalmente tin e trabao di predica e Reino i haci disípel. Den 2 Timoteo 4:​5, Pablo a urgi: “Haci e predicacion dje Bon Nobo bo ofishi, den e sirbishi cabal.” (Jerusalem Bible) Anciano i sirbidor ministerial també tin hopi pa haci atendiendo na necesidad dje tao. (1 Timoteo 3:​1, 5, 13; 1 Pedro 5:⁠2) Cabez di famía​—⁠hopi di locual ta mayornan soltero​—⁠també tin responsabilidad pisá cuidando nan famía i yudando nan yiunan crece den nan relacion cu Dios. Tin bez cu tal obra por cansa hende of caba cu nan. Pero, leu di ser obra morto, nan ta duna berdadero satisfaccion!

E problema tá: Con hende por haya tempo pa haci tur obra asina cu ta bale la pena? Disiplina propio i organizacion personal ta necesario. Den 1 Corintio 9:​26, 27, Pablo a skirbi: “E manera cu mi ta corre no ta insigur; e manera cu mi ta dirigi golpi ta di no dal den laira; pero mi ta domina mi curpa i ta hibé como esclabo, pa, despues cu mi predica na otronan, mi mes no bira desaprobá di algun manera.” Un manera pa aplica e principio dje texto ta di regularmente examina bo rutina personal i moda di biba. Bo por wel descubri cu bo por elimina varios cos innecesario cu ta malgasta bo tempo i energía.

Por ehempel, hopi di bo energía i tempo ta ser dedicá na wakmento di TV, na recreo, na lezamento mundano, of hobby? Segun un artículo den e curant The New York ­Times, adulto mediano na América ta dedica “un poco mas cu 30 ora pa siman” na wakmento di TV. Siguramente tanto tempo por ta dedica na algo mihor! Esposa di un superintendente biahero a informa: “Mi casi a elimina tur loke ta malgasta mi tempo, tal como wakmento di television.” I e resultado? E por a leza e enciclopedia bíblica di dos volumen Insight on the Scriptures completamente!

Abo també por tin cu considera te na ki grado bo por simplifica bo moda di biba. Segun Salomón: “Dushi ta e soño di hende sirbiendo, maske ta poco of ta hopi cu e ta come; pero e abundancia cu ta pertenece na hende ricu no ta lagué drumi.” (Eclesiastés 5:12) Hopi di bo tempo i energía ta dedica na cuidamento di posesion material innecesario? Realmente, mientras mas cosnan nos tin, mas cos nos tin cu mantene, segura, drecha, i proteha. No por ta pa bo probecho si bo simplemente a librábo di cierto pertenencia?

Trahamento di un orario realista ta un otro manera pa bo haci mihor uso di bo tempo. Un orario asina mester tuma na cuenta bo necesidad di descanso of recreo. Pero interés spiritual mester ta duná prioridad. Tempo mester ta apartá pa asisti na tur reunion di congregacion riba un base di regularidad. També, bo por determina di antemano cua dia of anochi bo por dedica ne trabao di evangeliza. Cu planeamento cuidadoso, bo por asta aumenta bo parti den e sirbishi, kizás sirbiendo como un pionero auxiliar de bez en cuando. Pero, sea sigur di planea tempo pa estudio personal i cu e famía, incluyendo preparacion cabal pa reunion. Door di ser prepará, bo lo no solamente saca mas probecho for di reunion sino també ser den un mihor posicion pa “estimula na amor i bon obra” cu bo comentario.​—⁠Hebreo 10:⁠24.

Hayamento di tempo pa estudio por exigi pa bo haci sacrificio. Por ehempel, famía di Betel rond di mundo ta lanta temprán tur maínta pa haci consideracion dje texto diario. Ta posibel pa bo cumpra un poco tempo tur maínta pa estudio personal? E salmista a bisa: “Mi a lanta temprán, madrugá, pa mi por sclama pa ayudo. Mi a spera bo ­palabra.” (Salmo 119:147) Naturalmente, pa bo lanta madrugá, bo tin cu pone un ora razonabel pa bo bai drumí pa bo cuminza e sigiente dia bon i descansá.

E beneficio di keda ocupá den e sirbishi di Jehova Dios

Teniendo “basta pa haci den e trabao di Señor” sí ta exigi planeamento, disiplina, i sacrifico propio. Pero, bo por disfruta di beneficio incontable como resultado. Pues, keda ocupá den e sirbishi di Jehova Dios i no den obra bano of morto cu ta resulta solamente den banidad i dolor. Pasobra ta door di obra asina cu bo ta manifesta fe, ta gana e aprobacion di Dios, i, pa caba, e recompensa di bida eterna!

[Plachi na página 28]

Trahamento di orario realista ta yuda hende cristian usa nan tempo mas sabiamente