“Cosnan Deseabel” Ta Yenando e Cas di Jehova

“Lo mi [Jehova] sagudí tur e nacionnan, i e cosnan deseabel di tur e nacionnan tin cu drenta paden; i lo mi yena e cas aki cu gloria.”—AGEO 2:7.

 1. Den un momento di emergencia, di con nos ta pensa riba nos sernan kerí promé?

CUA ta e cosnan deseabel cu tin den bo cas? Bo tin mueble luhoso, un computer super-moderno, un auto nobo den bo garashi? Asta si bo tin tur e cosnan aki, lo bo no ta di acuerdo cu e cosnan mas precioso den bo cas ta e hendenan, e miembronan di bo famia? Imaginá bo cu riba un anochi holó di huma ta lanta bo. Bo cas ta na candela, i bo tin djis algun minuut pa bo scapa! Kico ta bo promé preocupacion? Bo mueblenan? Bo computer? Bo auto? Mas bien, lo bo no pensa promé riba bo sernan kerí? Claro cu sí, pasobra hende tin mas balor cu obheto.

 2. Kico e creacion di Jehova ta incluí, i cua aspecto di dje Jesus tabata mas encariñá cuné?

² Awor pensa riba Jehova Dios i su Yu, Jesucristo. Jehova ta “Esun cu a traha shelu i tera i laman i tur loke tin den nan.” (Echonan 4:24) Su Yu, e “obrero maestro,” tabata e agente pa medio di ken Jehova a traha tur otro cos. (Proverbionan 8:30, 31; Juan 1:3; Colosensenan 1:15-17) Sin duda, tantu Jehova como Jesus ta balorá tur cos creá. (Compará cu Génesis 1:31.) Pero segun bo, ki aspecto di creacion tin mas nificacion pa nan, cos of hende? Den su rol di sabiduria personificá, Jesus ta declará: “E cosnan cu ami tabatin cariño p’e tabata e yunan di hende,” of manera Beibel na papiamentu koriente ta traducié, Jesus tabata “enkantá ku e rasa humano.”

 3. Cua profecia Jehova a expresá pa medio di Ageo?

³ Ta indiscutibel cu Jehova ta balorá hende masha tantu. Nos por haña un indicacion di esaki den e palabranan profético cu el a papia na aña 520 P.E.C. via su profeta Ageo. Jehova a declará: “Lo mi sagudí tur e nacionnan, i e cosnan deseabel di tur e nacionnan mester drenta paden; i lo mi yena e cas aki cu gloria. . . . Mas grandi e gloria dje cas mas despues aki lo bira cu esun dje anterior.”—Ageo 2:7, 9.

 4, 5. (a) Pakico lo no ta razonabel pa concluí cu e expresion “cosnan deseabel” ta referí na e splendor di cosnan material? (b) Con lo bo definí “cosnan deseabel,” i pakico?

⁴ Ki “cosnan deseabel” lo a yena e cas di Jehova i hib’é na un gloria sin precedente? Artículonan luhoso i decoracion exkisito? Oro, plata i piedra precioso? Esei no ta masha razonabel. Corda cu e tempel anterior, inaugurá rond di cincu siglo promé, tabata un structura colosal di miles di miyones di florin!a Sin duda Jehova lo no a spera pa e grupito relativamente chikitu aki di hudiu repatriá construí un tempel cu lo surpasá e tempel di Sálomon den splendor di cosnan material!

⁵ Kico anto ta e “cosnan deseabel” cu lo a yena e cas di Jehova? Ta bisto cu nan mester ta hende. Pasobra, loke ta haci Jehova su curason alegrá no ta plata i oro sino hende cu ta sirbié motivá pa amor. (Proverbionan 27:11; 1 Corintionan 10:26) Sí, Jehova ta balorá tur hende homber, muher i mucha cu ta ador’é di un forma aceptabel. (Juan 4:23, 24) Nan ta “cosnan deseabel,” i nan ta muchu mas precioso pa Jehova cu tur e cosnan fini cu a dorna e tempel di Sálomon.

 6. Ki propósito Dios su antiguo tempel a sirbi?

⁶ Apesar di oposicion sin misericordia, nan a completá e tempel na aña 515 P.E.C. Te n’e tempu di Jesus su sacrificio, e tempel na Jerusalem a keda e centro di adoracion puru pa hopi “cosnan deseabel,” cu a consistí di hudiunan natural i prosélitonan no-hudiu. Pero, manera nos lo mira, e tempel a representá algu hopi mas grandioso.

Un Cumplimentu den Promé Siglo

 7. (a) Kico Dios su antiguo tempel na Jerusalem a prefigurá? (b) Describí e cosnan cu e sumo sacerdote a haci riba e Dia di Expiacion.

⁷ E tempel na Jerusalem a prefigurá un areglo di adoracion mayor: Dios su tempel spiritual, cu Jehova a establecé na aña 29 E.C. cu Jesus como Sumo Sacerdote. (Hebreonan 5:4-10; 9:11, 12) Considerá un paralelo entre e debernan dje sumo sacerdote di Israel i e accionnan di Jesus. Tur aña riba Dia di Expiacion, e sumo sacerdote a bai n’e altar den e patio di tempel anto ofrecé un toro pa expiá e picánan dje sacerdotenan. Despues, e tabata drenta e tempel cu sanger dje toro, pasa dor dje portanan cu a separá e patio for dje Lugá Santu, i despues dor dje cortina cu a separá e Lugá Santu for dje Santísimo. Ora el a drenta e Santísimo, e sacerdote tabata spat e sanger dilanti e arca di pacto. Despues, segun e mésun procedura, e tabata ofrecé un chubat’i cabritu pa expiá p’e 12 tribunan no-sacerdotal di Israel. (Levítico 16:5-15) Ki relacion tin entre e ceremonia aki i Dios su tempel spiritual?

 8. (a) Den ki sentido Jesus a ser ofrecé for di aña 29 E.C. padilanti? (b) Ki relacion special Jesus tabatin cu Jehova durante henter su ministerio riba tera?

⁸ Básicamente, Jesus a ser ofrecé riba e altar di Dios su boluntad ora el a bautisá na aña 29 E.C. i Dios a ungié cu su spiritu santu. (Lucas 3:21, 22) Sí, e evento aki a marca comienso di un curso di bida sacrificial pa Jesus cu a dura tres aña i mei. (Hebreonan 10:5-10) Durante e periodo ei, Jesus a gosa di un relacion cu Dios di un yu engendrá pa spiritu. Otro sernan humano no por a comprendé e posicion único aki completamente, cu Jesus tabatin cerca su Tata celestial. Ta como si fuera un cortina a tapa nan wowo di dicernimentu, mescos cu un cortina a tapa e Lugá Santu for di bista di esnan cu tabata den patio dje tabernáculo.—Exodo 40:28.

 9. Di con Jesus no por a drenta shelu como ser humano, i con a resolvé e situacion aki?

⁹ Apesar cu e tabata un Yu ungí di Dios, e homber Jesus no por a obtené bida den shelu. Di con no? Dor cu carni i sanger no por heredá Dios su Reino celestial. (1 Corintionan 15:44, 50) Ya cu Jesus su carni humano tabata un barera, e cortina cu a separá e Lugá Santu for dje Santísimo den Dios su antiguo tempel tabata un símbolo apropiado p’e. (Hebreonan 10:20) Pero tres dia despues di su morto, Dios a resucitá Jesus como un spiritu. (1 Pedro 3:18) E ora ei e por a drenta e kamber Santísimo di Dios su tempel spiritual, esta shelu mes. Esei mes ta loke a pasa. Pablo ta skirbi: “Cristo a drenta, no den un lugá santu [refiriendo evidentemente na e Santísimo] cu man a traha, cu ta un copia dje realidad, sino den shelu mes, awor pa presentá dilanti dje persona di Dios pa nos.”—Hebreonan 9:24.

10. Kico Jesus a haci ora el a bolbe na shelu?

¹⁰ Den shelu, Jesus a ‘spat e sanger’ di su sacrificio dor di presentá e balor rescatador di su sanger na Jehova. Pero Jesus a haci mas. Poco promé cu su morto, el a bisa su siguidónan: “Mi ta bai pa prepará un lugá pa boso. Tambe, si mi ta bai mi caminda i prepará un lugá pa boso, mi ta bini atrobe i lo mi ricibí boso na cas cerca mi mes, pa unda cu mi ta boso tambe por ta.” (Juan 14:2, 3) Pues dor di haña entrada den e Santísimo, esta shelu, Jesus a habri caminda pa otronan por haci mescos. (Hebreonan 6:19, 20) E individuonan aki, cu ta 144.000 na cantidad, lo sirbi como sub-sacerdote den Dios su areglo di tempel spiritual. (Revelacion 7:4; 14:1; 20:6) Mescos cu promé e sumo sacerdote di Israel a hiba sanger dje toro den e Santísimo pa expiá e picánan dje sacerdotenan, e balor di Jesus su sanger dramá a ser aplicá promé na e 144.000 sub-sacerdotenan.b

“Cosnan Deseabel” di Tempu Moderno

11. Na fabor di ken e sumo sacerdote di Israel a ofrecé un chubat’i cabritu, i kico esaki a prefigurá?

¹¹ Parce cu pa aña 1935, e recogementu general dje ungínan tabata completo.c Pero Jehova no a caba di glorificá su cas ainda. No, tabatin mas ‘cos deseabel’ pa drent’é. Corda cu e sumo sacerdote di Israel a ofrecé dos bestia, un toro p’e picánan dje sacerdotenan i un chubat’i cabritu p’e picánan dje tribunan no-sacerdotal. Si e sacerdotenan a representá e ungínan cu lo ta cu Jesus den e Reino celestial, ken e tribunan no-sacerdotal a representá? Nos ta haña e contesta den e palabranan di Jesus registrá na Juan 10:16: “Mi tin otro carnénan, cu no ta dje curá aki; eseinan tambe mi tin cu trece, i nan lo scucha mi bos, i nan lo bira un solo tou, un solo wardador.” Pues, e sanger dramá di Jesus ta beneficiá dos grupo di hende: di promé, e cristiannan cu tin speransa di reina cu Jesus den shelu, i di dos, esnan cu tin prospecto di biba pa semper riba e tera transformá den un paradijs. Evidentemente, ta e di dos grupo aki e “cosnan deseabel” dje profecia di Ageo ta representá.—Mikéas 4:1, 2; 1 Juan 2:1, 2.

12. Den ki sentido hopi ‘cos deseabel’ ta ser atraí na Dios su cas awe?

¹² Ainda e “cosnan deseabel” aki ta yenando e cas di Jehova. Den añanan recien, restriccion a kita den Oost Europa, algun parti di Africa i na otro paisnan, di manera cu e bon nobo di Dios su Reino establecí por a florecé den teritorionan cu te n’e momento ei no a ser alcansá. Segun cu esnan deseabel ta drenta Dios su areglo di tempel, nan na nan turno ta haci un esfuerso pa haci mas disipel, manera Jesus a manda. (Mateo 28:19, 20) Den e trabou ei nan ta topa hopi hende, hóben i bieu, cu tin e potencial di bira “cosnan deseabel” cu lo glorificá e cas di Jehova. Considerá djis un par di ehempel di e manera cu esaki ta tumando lugá.

13. Con un mucha muher chikitu na Bolivia a mustra su celo pa plama e mensahe di Reino?

¹³ Na Bolivia, un mucha muher di cincu aña criá dor di mayornan Testigo a pidi su yufrou di scol pa permitié falta scol durante e siman di bishita dje superintendente di circuito. Pakico? E kier a participá den e ministerio durante henter e siman aki di actividad special. Su mayornan a keda sorprendí, pero nan tabata contentu cu e tabatin un actitud asina excelente. Awor e mucha aki ta conducí cincu studio di Bijbel, i algun dje studiantenan aki ta asistí na reunionnan cristian. Asta el a yega di trece su yufrou di scol na Salon di Reino. Kisas cu tempu algun di su studiantenan di Bijbel lo proba di ta “cosnan deseabel” cu lo glorificá e cas di Jehova.

14. Na Korea, con e perseverancia di un ruman muher cerca un hende cu no a parce interesá, a ser recompensá?

¹⁴ Wardando na un stacion di trein, un hende muher cristian na Korea a acercá un alumno cu tabata scucha música cu un headphone. El a puntr’é: “Bo tin un religion?” E hóben a contestá: “Mi no ta interesá den ningun religion.” E ruman muher no a entregá. “Cu tempu,” el a sigui, “un hende lo por kier scoge un religion. Pero si e no sa nada di religion, kisas lo e scoge esun robes.” E hóben su cara a cambia, i el a cuminsá scucha nos ruman muher cu interes. E ruman a ofrec’é e buki Ta Existí un Creador Cu Ta Interesá den Bo? i el a bis’é cu e publicacion aki lo ta un gran yudansa ora e tempu yega pa e scoge un religion. El a aceptá e buki cu smak. E siman siguiente el a cuminsá studia Bijbel cu Testigonan di Jehova, i awor e ta asistí na tur e reunionnan di congregacion.

15. Con un mucha muher na Hapon ta cuminsá studio di Bijbel, i ki recompensa tabatin pa su esfuersonan?

¹⁵ Na Hapon, Megumi di 12 aña ta considerá su scol un veld productivo pa predicá i siña otronan. El a asta logra cuminsá hopi studio di Bijbel. Con Megumi ta hacié? Dor cu e ta lesa Bijbel of prepará pa reunion durante pausa, hopi bes su compañeronan di klas ta puntr’é kico e ta haci. Algun di nan ta puntra Megumi di con e no ta participá den cierto actividadnan di klas. Megumi ta contestá nan preguntanan anto e ta bisa nan cu Dios tin un nomber. Hopi bes esaki ta lanta interes di su scuchadónan. Despues e ta ofrecé nan un studio di Bijbel. Awor Megumi ta conducí 20 studio di Bijbel, 18 di nan cu su compañeronan di klas.

16. Con un ruman homber na Camerun por a cuminsá studio di Bijbel cu un par di hende di un grupo cu kier a cherch’é?

¹⁶ Na Camerun, un grupo di ocho homber trahando na un sitio di construccion a yama un ruman homber cu tabata ofrecé literatura bíblico na hende riba caya. Pa nan por a chercha e ruman, nan a puntr’é di con e no a kere den Trinidad, fiernu di candela ni inmortalidad di alma. Usando Bijbel, nos ruman a contestá nan preguntanan. Como resultado, tres di nan a aceptá pa studia Bijbel. Un di nan, Daniel, a cuminsá asistí n’e reunionnan, i asta el a destruí tur su cosnan cu tabatin di haci cu spiritismo. (Revelacion 21:8) Den ménos cu un aña el a bautisá.

17. Con algun ruman na El Salvador a usa nan ingenio pa predicá na un homber cu na promé instante no kier a tende e mensahe di Reino?

¹⁷ Na El Salvador, un homber tabata mara su cachó brabu dilanti su porta di cas ki ora cu e mira Testigonan den su bario. E homber tabata warda e Testigonan sigui cana bai, p’e hinca e cachó bek den cas. Nunca e rumannan no a logra papia cuné. P’esei, un dia nan a purba un otro táctica. Dor cu nan tabata sa cu e homber por a scucha nan, nan a dicidí di predicá n’e cachó. Nan a yega n’e cas, cumindá e cachó, i bis’é con contentu nan tabata di por a papia cuné. Nan a papia tocante e dia cu tera lo bira un paradijs, ora ningun hende lo no ta rabiá, sí, asta bestia lo ta pacífico. Despues nan a yama e cachó ayó cortesmente, i nan a sigui nan caminda. Pa nan gran sorpresa, e doño di cas a sali i disculpá su mes cu nunca e no a duna e Testigonan un chens pa papia cuné. El a tuma e revistanan, i nan a cuminsá un studio di Bijbel. Awor e homber aki ta nos ruman, un dje “cosnan deseabel”!

“No Tene Miedu”

18. Ki retonan hopi cristian ta enfrentá, pero con Jehova ta mira su adoradónan?

¹⁸ Abo ta participando den e trabou vital aki di predicá e Reino i haci disipel? Si ta asina, bo ta berdaderamente privilegiá. Sí, ta pa medio dje trabou aki Jehova ta atraé e “cosnan deseabel” pa drenta su cas. (Juan 6:44) Ta berdad cu de bes en cuando bo por bira un poco cansá of desanimá. Tin bes cu algun hende, asta algun sirbidó fiel di Jehova, ta lucha cu sintimentunan di inutilidad. Pero, no entregá! Jehova ta considerá cada un di su adoradónan como deseabel, i e ta sumamente interesá den bo salbacion.—2 Pedro 3:9.

19. Cua animacion Jehova a duna pa medio di Ageo, i con e palabranan aki por ta un fuente di fortalesa pa nos?

¹⁹ Ora cu nos sinti nos desanimá, sea dor di oposicion of otro circunstancia desagradabel, Jehova su palabranan na e hudiunan repatriá por ta un fuente di fortalesa. Na Ageo 2:4-6 nos ta lesa: “‘Pero awor sea fuerte, o Zorobabel,’ ta e expresion di Jehova, ‘i sea fuerte, o Hosué, yu di Jehózadak e sumo sacerdote. I sea fuerte, boso tur, hende dje tera,’ ta e expresion di Jehova, ‘i traha. Pasobra mi ta cu boso,’ ta e expresion di Jehova di ehércitonan. ‘Corda riba e cos cu mi a cumbiní cu boso ora boso a sali for di Egipto, i ora mi spiritu tabata pará meimei di boso. No tene miedu.’ Pasobra esaki ta loke Jehova di ehércitonan a bisa: ‘Un biaha mas—ta pa poco tempu—i mi ta bai sagudí shelu i tera i laman i suela secu.’” Nota con Jehova no ta djis urgi nos pa ta fuerte, sino cu e ta duna nos e medio tambe pa haña fortalesa. Con? Wak e palabranan trankilisante aki: “Mi ta cu boso.” Nos fe ta ser fortalecé masha ora nos realisá cu sin importá ki obstáculo nos enfrentá, Jehova ta cu nos!—Romanonan 8:31.

20. Den ki sentido gloria sin precedente ta yena e cas di Jehova awe?

²⁰ Sin duda Jehova a proba cu e ta cu su pueblo. Sí, ta net manera el a declará via su profeta Ageo: “Mas grandi e gloria dje cas mas despues aki lo bira cu esun dje anterior . . . I den e lugá aki lo mi duna pas.” (Ageo 2:9) Berdad, e gloria di mas grandi awendia ta den Jehova su tempel spiritual. Cientos di miles ta basha bai na adoracion berdadero tur aña. Nan ta ser bon alimentá spiritualmente, i asta den e mundu turbulento aki nan ta gosa di un pas cu lo ser surpasá solamente den Dios su mundu nobo.—Isaías 9:6, 7; Lucas 12:42.

21. Ki determinacion nos mester tin?

²¹ Pronto Jehova lo sagudí e nacionnan na Armagedon. (Revelacion 16:14, 16) P’esei, laga nos usa e tempu cu a keda pa yuda salba mas bida. Laga nos ta fuerte, i cu pleno confiansa den Jehova. Laga nos sea determiná pa sigui adorá na su gran tempel spiritual, i yen’é cu mas “cosnan deseabel” te ora Jehova bisa cu nos trabou ta cla.

[Nota]

Bo Ta Corda?

• Kico ta mas precioso pa Jehova cu cos material?

• Cua dos grupo di hende ta beneficiá dje sanger dramá di Jesus?

• Ken ta e “cosnan deseabel” cu mester a yena e cas di Jehova cu gloria?

• Ki evidencia nos tin cu e profecia di Ageo ta cumpliendo awe?

[Diagram na página 16]

(Pa e teksto den su formato kompleto, wak e publikashon)

Bo conocé e nificacion simbólico di Jehova su antiguo tempel?

Santísimo

Cortina

Lugá Santu

Porch

Altar

Patio

[Plachi na página 17]

E sumo sacerdote tabata ofrecé un toro p’e picánan dje sacerdotenan i un chubat’i cabritu p’e picánan dje tribunan no-sacerdotal di Israel

[Plachi na página 18]

E obra mundial di predicá e Reino ta atraé multitud di hende n’e cas di Jehova