Awor Ku Nos “A Siña Konosé Dios,” Kiko Nos Tin ku Hasi?

 1. Dikon un piloto ta chèk su avion promé ku e inisiá un vuelo?

PROMÉ ku un piloto inisiá un vuelo, e tin un lista di mas ku 30 kos ku e mester chèk na e avion. Si e piloto no hasi e kontrol akí bon, e riesgo pa un aksidente trágiko ta mas grandi. Awor, ken spesialmente tin ku hasi un chekeo asina tur biaha? Sí, pilotonan eksperensiá. Dikon? Pasobra pilotonan ku hopi eksperensia fásilmente por bira negligente i keda sin kontrolá tur loke nan mester kontrolá.

 2. Ki kontrol kristiannan tin ku hasi?

² Meskos ku un piloto ku ta pensa riba siguridat, nos tambe tin un lista di kos ku nos mester kontrolá pa hasi sigur ku nos fe ta keda fuerte asta den tempu difísil. Sea ku nos ta resien batisá òf tin hopi aña den e bèrdat, nos mester sigui saminá nos mes pa wak kon fuerte nos fe i nos deboshon na Dios ta. Si nos no ta hasi esaki regularmente i na un manera diligente, nos por sufri daño spiritual. Beibel ta spièrta nos: “Laga esun ku ta kere ku e ta pará, tene kuidou pa e no kai.”—1 Kor. 10:12.

 3. Kiko e kristiannan na Galasia mester a hasi?

³ Tuma por ehèmpel e kristiannan na Galasia. Nan mester a kontrolá nan fe i balorá e libertat spiritual ku nan tabatin. Dikon? Wèl, Hesus, pa medio di su sakrifisio, a habri kaminda pa esnan ku pone fe den dje por siña konosé Dios na un otro manera: Hende por a bira yu di Dios! (Gal. 4:9) Pa e kristiannan na Galasia por a permanesé den e relashon spesial akí ku Dios, nan mester a rechasá siñansanan di algun kristian hudiu ku tabata pretendé ku hende mester a kumpli ku e Lei di Moises tambe. Pero Dios no tabata usa e Lei ei mas. Ademas, kristiannan no hudiu nunka tabata bou di Lei. P’esei, tantu e kristiannan hudiu komo esnan no hudiu mester a hasi progreso den e bèrdat. Esei a enserá ku nan mester a rekonosé ku Dios no tabata eksigí mas pa hende kumpli ku Lei di Moises pa haña su aprobashon.

4, 5. Ki konseho Pablo a duna e galationan, i dikon esaki ta importante pa nos?

⁴ Apòstel Pablo su konseho na e galationan tabatin e propósito akí: Pa spièrta tur kristian, tantu den pasado komo awor, pa no bandoná e bèrdatnan balioso di Beibel i bai bèk na e kosnan ku nan a laga atras. Sí, Yehova a inspirá apòstel Pablo pa enkurashá e kongregashon di Galasia i tur otro kristian pa para firme den e bèrdat.

⁵ P’esei, ta bon pa nos tur kòrda kon nos a ser librá for di sklabitut den sentido spiritual i bira Testigu di Yehova. E siguiente preguntanan por yuda bo: Bo ta kòrda e pasonan ku bo a dal pa kualifiká pa boutismo? Bo ta kòrda kon bo a siña konosé Dios i kon bo a sinti bo ora bo a bira konosí pa Dios?

 6. Ki lista di chekeo nos lo analisá?

⁶ Básikamente, nos tur a dal nuebe paso pa bira Testigu. (Wak e kuadro “Pasonan Ku Ta Hiba na Boutismo i Mas Progreso.”) Nos por konsiderá e pasonan akí komo puntonan ku nos mester chèk regularmente pa por para firme den e bèrdat i resistí kualke deseo pa bolbe na e kosnan di mundu. Sí, meskos ku un piloto ta usa un lista di chekeo pa chèk su avion bon pa e por tin un vuelo safe, nos tambe mester hasi un chekeo spiritual regularmente pa nos por keda fiel den nos sirbishi na Dios.

 7. Ki patronchi nos tin ku sigui, i dikon?

⁷ Kada bes ku un piloto tin ku hasi un vuelo, e lista di chekeo ta kòrd’é di e rutina ku e tin ku sigui. Nos tambe mester saminá nos mes regularmente pa wak nos progreso spiritual. Pablo a skirbi Timoteo: “Sigui pega na e patronchi di palabra sano ku bo a tende for di mi, i hasi esei ku e fe i amor ku e union ku Kristu Hesus ta trese kuné.” (2 Tim. 1:13) Nos ta haña e ‘palabranan sano’ ei den e Palabra di Dios. (1 Tim. 6:3) Meskos ku un skèts di un artista ta duna nos un idea di algu, ‘e patronchi di e bèrdat’ ta duna nos un idea general di loke Yehova ta rekerí di nos. P’esei, laga nos analisá e pasonan ku a hiba nos na boutismo i wak si nos ta sigui e patronchi di e bèrdat kuidadosamente.

8, 9. (a) Dikon nos mester sigui atkerí konosementu i oumentá nos fe? (b) Dikon ta importante pa sigui hasi progreso spiritual, i dikon esaki ta un proseso kontinuo? Ilustrá.

⁸ E promé kos ku nos a hasi ta atkerí konosementu. Esaki a hiba na e di dos punto riba nos lista di chekeo ku ta kultivá fe. Pero nos mester sigui progresá den tur dos área. (2 Tes. 1:3) Pa nos progresá, òf krese, den sentido spiritual nos tin ku hasi vários kambio. E verbo “krese” ta nifiká oumentá, bira mas grandi. Pues, despues di boutismo, nos mester sigui traha duru pa progresá spiritualmente i no keda pará un kaminda.

⁹ Nos por kompará nos progreso spiritual ku kresementu di un palu literal. Un palu por krese bira masha grandi, foral si su raisnan ta profundamente òf bon ankrá den tera. Por ehèmpel, algun palu di seda di Líbano por krese te na haltura di un edifisio di 12 piso. E palunan akí tin rais fuerte ku ta bai profundo, i nan tronkon por tin un hanchura di mas o ménos 12 meter. (Kant. 5:15) Na kuminsamentu, un palu asina ta krese masha lihé. Pero despues, su kresementu no ta asina notabel mas. Sinembargo segun ku aña ta pasa, e tronkon ta bira mas i mas diki i e raisnan ta bai mas profundo i mas leu, di manera ku e palu ta bira mas stabil. Nos por bisa meskos di kresementu, òf progreso, spiritual. Kisas, ora nos a kuminsá studia Beibel, nos a progresá masha lihé i a batisá. E rumannan den kongregashon a keda masha kontentu ora nan a mira kon nos a progresá. Kisas nos ta asta kualifiká pa sirbi komo pionero òf pa risibí otro privilegio. Pero segun ku añanan ta pasa, kisas nos progreso no ta asina bisto mas. Sinembargo, nos mester sigui oumentá nos fe i konosementu te ora nos bira “kompletamente desaroyá, alkansando e pleno estatura di Kristu.” (Efe. 4:13) Pues, nos ta manera un planchi ku ta krese bira un palu grandi i fuerte, esta, un kristian maduro.

10. Dikon asta kristiannan maduro mester sigui hasi progreso?

¹⁰ Pero nos kresementu no mester yega te ei. Nos mester sigui atkerí konosementu i oumentá nos fe. Di e manera ei, nos ta bira manera palu ku raisnan bon ankrá den e Palabra di Dios. (Pro. 12:3) Tin hopi ruman den e kongregashon kristian ku ta sigui progresá asina. Por ehèmpel, un ruman hòmber ku tin mas ku 30 aña ta sirbi komo ansiano a indiká ku ainda e ta hasi progreso. El a bisa: “Mi a haña muchu mas apresio pa Beibel. Konstantemente, mi ta siña maneranan nobo ku mi por apliká lei- i prinsipionan di Beibel. Mi goso den sirbishi tambe ta sigui oumentá.”

11. Kon nos por siña konosé Yehova mihó atraves di tempu?

¹¹ Un otro kos ku nos mester hasi pa progresá spiritualmente ta hala mas serka Yehova. E ke pa nos mir’é komo nos Tata i Amigu i pa nos sinti nos stimá i protehá, meskos ku un mucha ta sintié ora e ta den brasa di su mayornan òf manera nos sa sinti nos den kompania di un bon amigu. Pero manera bo por komprondé, bo no ta haña un amistat íntimo asina ku Yehova di un dia pa otro. Ta rekerí tempu i esfuerso pa siña konosé Yehova i stim’é. P’esei, ta masha importante pa nos apartá tempu pa lesa Beibel tur dia. Ademas, nos mester hasi esfuerso pa lesa tur edishon di E Toren di Vigilansia i ¡Despertad! i e otro publikashonnan di e esklabo fiel.

12. Kiko mas nos tin ku hasi pa Yehova rekonosé nos komo su amigu?

¹² Orashon i bon kompania tambe ta yuda Dios su amigunan progresá spiritualmente. (Lesa Malakías 3:16.) Beibel ta bisa ku Yehova “su orea ta habrí pa nan súplika.” (1 Ped. 3:12) Sí, meskos ku un tata amoroso, Yehova ta presta atenshon na nos súplikanan pa yudansa. P’esei, nos mester “perseverá den orashon.” (Rom. 12:12) Sin Dios su yudansa, nos no por sigui disfrutá di su amistat. Dikon? Pasobra riba nos mes, nos lo no por resistí e preshonnan di e mundu malbado akí. Si nos no sigui perseverá den orashon, nos lo no haña e forsa ku Dios ta kla pa duna nos. P’esei, konta ku bo orashonnan? Bo ta papia ku Yehova manera lo bo a papia ku un bon amigu, òf bo tin ku mehorá den e aspekto akí?—Yer. 16:19.

13. Dikon nos mester asistí regularmente na nos reunionnan si nos ke sigui progresá spiritualmente?

¹³ Yehova ta stima tur esnan ku ta “tuma refugio den dje.” P’esei, asta despues ku nos a siña konosé Dios, nos mester keda pegá na e kongregashon kristian den kompania di personanan ku tambe konos’é. (Nah. 1:7) Sí, den e mundu malu akí, ta sabí pa nos keda den kompania di nos rumannan ku por animá nos. Kon esaki ta benefisiá nos? Wèl, den kongregashon, nos ta haña rumannan ku ta motivá nos pa “mustra amor i hasi bon obra.” (Heb. 10:24, 25) Pa nos por mustra i risibí e amor akí, nos mester asosiá ku nos rumannan kristian. Pues, nos mester asistí regularmente na nos reunionnan i duna komentario.

14. Dikon arepentí i kombertí ta un proseso kontinuo?

¹⁴ Pa nos por a bira kristian, nos mester a arepentí i kombertí, esta, stòp di hasi loke ta malu i hasi loke ta bon. Arepentí i kombertí ta un proseso kontinuo. Komo ku nos ta imperfekto, piká ta biba den nos; e ta manera un kolebra ku ta kla pa morde nos asina ku e haña un chèns. (Rom. 3:9, 10; 6:12-14) Pues, nos mester rekonosé ku nos ta faya. No opstante, nos ta kontentu ku Yehova tin pasenshi ku nos segun ku nos ta lucha ku nos debilidatnan i ta hasi esfuerso pa kambia. (Flp. 2:12; 2 Ped. 3:9) Loke por yuda nos den e aspekto akí ta di usa nos tempu i energia den Yehova su sirbishi en bes di kore tras di metanan egoista. Un ruman muhé a skirbi: “Aunke mi a lanta den e bèrdat, mi punto di bista di Yehova tabata distinto for di mayoria di hende. Mi tabata pensa ku hende mester tin miedu di Dios i ku nunka lo mi por a agrad’é.” Ku tempu, e ruman muhé akí a kuminsá tambaliá spiritualmente debí na e vários erornan ku el a kometé den su bida. E ruman a bisa: “No ku mi no tabata stima Yehova, pero mi no tabata konos’é bon. Ma despues di hopi orashon intenso, mi a kuminsá hasi kambio.” El a sigui bisa: “Yehova a yuda mi manera un tata ta yuda su yu. Ku pasenshi, el a yuda mi surpasá un opstákulo tras di otro, mustrando mi kiko mi mester a hasi.”

15. Kiko Hesus i su Tata ta tuma nota di dje?

¹⁵ “Sigui papia” tokante e bon notisia. Un angel di Dios a ekspresá e palabranan akí na Pedro i e otro apòstelnan despues di a libra nan for di prizòn. (Echo. 5:19-21) Sí, sirbishi di vèlt ta un otro punto riba nos lista di chekeo. Hesus i su Tata ta tuma nota di nos fe i ta mira e esfuerso ku nos ta hasi den sirbishi. (Rev. 2:19) E ansiano ku nos a menshoná anteriormente a bisa ku sirbishi ta un parti importante di nos bida.

16. Dikon ta bon pa nos reflekshoná riba nos dedikashon na Yehova?

¹⁶ Awor reflekshoná riba bo dedikashon. E kos di mas balioso ku nos tin ta nos amistat ku Yehova. Yehova konosé esnan ku ta pertenesé na dje. (Lesa Isaías 44:5.) Hasi un análisis profundo di bo relashon ku Yehova i pidié yuda bo fortalesé boso amistat. Reflekshoná tambe riba bo boutismo, i no lubidá e fecha importante ei. Esaki lo yuda bo kòrda ku bo boutismo ta simbolisá e desishon di mas importante ku bo a yega di tuma den bo bida.

17. Dikon nos mester perseverá si nos ke keda serka Yehova?

¹⁷ Den su karta na e rumannan di Galasia, Pablo a enfatisá e importansia di perseveransia. (Gal. 6:9) Esaki ta importante tambe pa tur kristian awe, pasobra nos tur por konfrontá situashon difísil den bida. Pero Yehova ta kla pa yuda nos. P’esei, sigui pidié pa su spiritu santu. I Yehova lo remplasá bo tristesa ku goso i bo angustia ku pas. (Mat. 7:7-11) Pensa riba esaki: Si Yehova ta perkurá pa e paranan, kuantu mas lo e no perkurá pa abo ku ta stim’é i ku a dediká bo bida na dje? (Mat. 10:29-31) Sea kual sea e situashon ku bo haña bo kuné, no entregá i bai bèk na e kosnan ku bo a laga atras. Nunka lubidá e bendishonnan ku nos ta disfrutá di dje debí na nos amistat ku Yehova.

18. Awor ku bo “a siña konosé Dios,” kiko bo ta determiná pa hasi?

¹⁸ Pues, sea ku nos ta resien batisá òf tin hopi aña den e bèrdat, kiko nos tur mester hasi? Nos mester sigui siña konosé Yehova i progresá den e bèrdat. Laga nos nunka neglishá nos amistat ku Yehova. Pa hasi sigur ku nos ta fortifikando nos relashon ku nos Amigu, Dios i Tata selestial, Yehova, nos tur mester hasi un chekeo spiritual regularmente.—Lesa 2 Korintionan 13:5, 6.