Capitulo 17
Haña Siguridad Entre e Pueblo di Dios
1, 2. Con humanidad su situacion ta manera esun di hende den un área cu a ser ruiná dor di tormenta?
IMAGINA cu un tormenta violento a ruiná e área caminda bo ta biba. Bo cas a ser destruí, i tur bo pertenencianan a bai perdí. Cuminda ta scars. E situacion ta parce sin speransa. Anto, suministronan di alivio ta yega inesperadamente. Cuminda i paña ta ser percurá na abundancia. Un cas nobo ta ser trahá pa bo. Siguramente lo bo ta gradicidu na e persona kende a haci e percuracionnan aki disponibel.
2 Algu similar ta sosodiendo awe. Manera e tormenta ei, e rebelion di Adam i Eva a causa un daño grandi na e rasa humano. Humanidad su cas paradísico a bai perdí. For dje tempu ei, gobiernonan humano a faya den protehá hende for di guera, crímen, i inhusticia. Religion falsu a laga multitudnan hambrá pa alimento spiritual saludabel. Sin embargo, papiando spiritualmente, Jehova Dios awor ta percurando pa alimento, paña, i proteccion. Con e ta haciendo esei?
“E ESCLABO FIEL I DISCRETO”
3. Con Jehova ta percurá provisionnan pa humanidad, segun ta ser demostrá dor di cua ehempelnan?
3 Suministronan di alivio ta ser distribuí generalmente mediante un canal organisá, i di manera similar Jehova a prepará provision spiritual pa su pueblo. Por ehempel, e israelitanan tabata “Jehova su congregacion” pa rond di 1.500 aña. Entre nan tabatin esnan cu a sirbi como e canal di Dios pa instruí su Ley. (1 Crónicanan 28:8; 2 Crónicanan 17:7-9) Den e promé siglo E.C., Jehova a producí e organisacion cristian. Congregacionnan a ser formá, i nan a funcioná bou di e direccion di un cuerpo gobernante cu a consistí di apostelnan i ancianonan. (Echonan 15:22-31) Mescos awe, Jehova ta trata cu su pueblo mediante un grupo organisá. Con nos sa esaki?
4. Ken “e esclabo fiel i discreto” a resultá di ta den tempu moderno, i con Dios su provisionnan spiritual ta ser hací disponibel?
4 Jesus a bisa cu na e tempu di su presencia den poder di Reino, “e esclabo fiel i discreto” lo ser hañá percurando “alimento n’e tempu apropiado” pa Su siguidornan. (Mateo 24:45-47) Ora Jesus a ser instalá como Rey celestial na 1914, ken e “esclabo” aki a resultá di ta? Sigur no e clero di cristiandad. Pa gran parti, nan tabata alimentando nan tou cu propaganda cu ta apoyá nan propio gobiernonan nacional den Guera Mundial I. Pero alimento spiritual apropiado i oportuno a ser distribuí dor dje grupo di cristiannan berdadero kendenan tabata ungí cu e spiritu santu di Dios i tabata un parti di loke Jesus a yama e “trupa chikitu.” (Lucas 12:32) E cristiannan ungí aki a predicá e Reino di Dios mas bien cu gobiernonan humano. Como resultado, atrabes di añanan miyones di “otro carnénan” cu disposicion hustu a uni cu e “esclabo” ungí den practicá e religion berdadero. (Juan 10:16) Usando e ‘esclabo fiel’ i su Cuerpo Gobernante djawe, Dios ta dirigí su pueblo organisá pa haci alimento, paña, i proteccion spiritual disponibel pa tur cu ta deseá na tin e provisionnan aki.
“ALIMENTO N’E TEMPU APROPIADO”
5. Ki condicion spiritual ta existí den e mundu awe, pero kico Jehova ta haciendo relacioná cu esaki?
5 Jesus a bisa: “Hende mester biba, no di pan so, sino di tur expresion cu ta sali for di boca di Jehova.” (Mateo 4:4) Sin embargo, lamentablemente, e gran mayoria di hende no ta prestando atencion na Dios su expresionnan. Manera a ser profetisá dor di Jehova su profeta Amos, tin “un hamber, no pa pan, i un sed, no pa awa, sino pa tende e palabranan di Jehova.” (Amos 8:11) Asta hendenan masha religioso ta spiritualmente hambrá. No obstante, Jehova su boluntad ta pa “tur clase di hende ser salbá i yega na un conocimentu exacto dje berdad.” (1 Timoteo 2:3, 4) Por lo tantu, e ta percurando alimento spiritual na abundancia. Pero unda e por ser hañá?
6. Con Jehova a alimentá su pueblo spiritualmente den tempu pasá?
6 Atrabes di historia, Jehova a distribuí alimento spiritual na su pueblo como un grupo. (Isaías 65:13) Por ehempel, e sacerdotenan israelita a reuní hombernan, muhernan, i muchanan pa ser instruí como un grupo den e Ley di Dios. (Deuteronomio 31:9, 12) Bou di direccion dje cuerpo gobernante, cristiannan dje promé siglo a organisá congregacionnan i a tene reunionnan p’e instruccion i animacion pa tur. (Romanonan 16:5; Filemon 1, 2) Testigonan di Jehova ta sigui e modelo aki. Bo ta ser cordialmente invitá pa asistí na tur nan reunionnan.
7. Con asistencia regular na reunionnan cristian ta conectá cu conocimentu i fe?
7 Naturalmente, ya bo por a siña hopi caba den bo studio personal dje Bijbel. Tal bes un Testigo a yudá bo. (Echonan 8:30-35) Pero bo fe por ser compará cu un mata cu lo seca i muri si e no ser duná e cuido apropiado. P’esei, bo mester ricibí alimentacion spiritual apropiado. (1 Timoteo 4:6) Reunionnan cristian ta percurá un programa continuo di instruccion diseñá pa alimentá bo spiritualmente i yudá bo sigui crece den fe segun cu bo ta aumentá den e conocimentu di Dios.—Colosensenan 1:9, 10.
8. Pakico nos ta ser animá pa asistí na e reunionnan di Testigonan di Jehova?
8 Reunionnan ta sirbi un otro propósito vital. Pablo a skirbi: “Laga nos considerá un e otro pa incitá otro na amor i obranan excelente, sin bandoná nos reunimentu huntu.” (Hebreonan 10:24, 25) E palabra griego traducí “incitá” por nificá tambe “haci skerpi.” Un proverbio bíblico ta declará: “Dor di heru, heru mes ta ser hací skerpi. Asina un hende ta haci skerpi e cara di un otro.” (Proverbionan 27:17) Nos tur tin mester di ser ‘hací skerpi’ continuamente. Presionnan di tur dia dje mundu por haci nos fe stompi. Ora nos asistí na reunionnan cristian, tin un intercambio di animacion. (Romanonan 1:11, 12) Miembronan dje congregacion ta sigui apostel Pablo su spiertamentu pa “sigui consolá un e otro i edificá un e otro,” i cosnan asina ta haci nos fe skerpi. (1 Tesalonicensenan 5:11) Ser presente regularmente na reunionnan cristian tambe ta indicá cu nos ta stima Dios i ta duna nos oportunidadnan pa alab’é.—Salmo 35:18.
“BISTI BOSO MES CU AMOR
9. Con Jehova a pone e ehempel den manifestá amor?
9 Pablo a skirbi: “Bisti boso mes cu amor, pasobra e ta un banchi perfecto di union.” (Colosensenan 3:14) Jehova bondadosamente a percurá e bistí aki pa nos. Den ki manera? Cristiannan por manifestá amor pasobra cu e ta un dje frutanan duná di Dios dje spiritu santu di Jehova. (Galationan 5:22, 23) Jehova mes a manifestá e amor di mas grandi dor di a manda su Yu unigénito di manera cu nos por tin bida eterno. (Juan 3:16) E demostracion supremo aki di amor a proveé un modelo pa nos den expresá e cualidad aki. “Si esaki ta e manera cu Dios a stima nos,” apostel Juan a skirbi, “anto nos mes ta bou di obligacion pa stima un e otro.”—1 Juan 4:11.
10. Con nos por beneficiá for di “henter e asociacion di ruman”?
10 Bo asistencia na e reunionnan na e Salon di Reino lo duná bo un oportunidad excelente pa demostrá amor. Einan lo bo topa un gran variedad di hende. Sin duda lo bo sintí bo atraí na hopi di nan mesora. Naturalmente, personalidad ta diferenciá asta entre esnan cu ta sirbi Jehova. Tal bes den pasado simplemente bo a evitá hende cu no tabatin e mésun interes of cualidadnan manera bo. Cristiannan, sin embargo, mester “tin amor pa henter e asociacion di ruman.” (1 Pedro 2:17) P’esei, haci’é bo meta pa cera conocí cu esnan na e Salon di Reino—asta individuonan kende nan edad, personalidad, rasa, of nivel di educacion ta diferenciá for di esun di bo. Probablemente lo bo haña cu cada un ta sobresalí den algun cualidad cariñoso.
11. Pakico bo no mester ser molestiá dor dje variedad di personalidad entre Jehova su pueblo?
11 E variedad di personalidad den e congregacion no mester molestiá bo. Pa ilustrá, imaginá cu hopi vehículo ta pasando banda di bo riba un caminda. No ta tur ta moviendo riba mésun velocidad, tampoco no ta tur ta den mésun condicion. Algun a core hopi kilometer, pero mescos cu bo, algun a caba di cuminsá core. Sin embargo, apesar dje diferencianan aki, tur ta biahando riba e caminda. Ta mescos cu e individuonan cu ta componé un congregacion. No ta tur ta desaroyá cualidadnan cristian riba e mésun velocidad. Ademas, no ta tur ta den e mésun condicion físico of emocional. Algun ta adorando Jehova pa hopi aña; otronan a caba di cuminsá. Tog, tur ta biahando riba e caminda cu ta hiba na bida eterno, “aptamente uní den e mésun mente i den e mésun liña di pensamentu.” (1 Corintionan 1:10) P’esei, busca e cualidadnan positivo mas bien cu e cualidadnan negativo di esnan den e congregacion. Haciendo esei lo calentá bo curason, pasobra lo bo realisá cu Dios ta realmente entre e hendenan aki. I siguramente esaki ta caminda bo kier ta.—1 Corintionan 14:25.
12, 13. (a) Si un hende den e congregacion ofendé bo, kico bo por haci? (b) Pakico ta importante pa no warda rencor?
12 Siendo cu tur hende ta imperfecto, tin biaha un hende den e congregacion por bisa of haci algu cu ta molestiá bo. (Romanonan 3:23) Disipel Santiago realísticamente a skirbi: “Nos tur ta trompecá hopi bes. Si un persona no ta trompecá den palabra, esun aki ta un hende perfecto.” (Santiago 3:2) Con lo bo reaccioná si un persona ofendé bo? Un proverbio bíblico ta bisa: “E perspicacia di un hende siguramente ta tarda su rabia, i ta bunita di su parti pa pasa por haltu di transgresion.” (Proverbionan 19:11) Tin perspicacia ta nificá mira bou dje superficie di un situacion, comprendé factornan básico cu ta pone un persona pa papia of actua den un cierto manera. Mayoria di nos ta usa hopi perspicacia den disculpá nos mes fayonan. Pakico no us’é tambe pa comprendé i cubri e imperfeccionnan di otronan?—Mateo 7:1-5; Colosensenan 3:13.
13 Nunca lubidá cu nos mester pordoná otro hende si nos mes kier ricibí Jehova su pordon. (Mateo 6:9, 12, 14, 15) Si nos ta practicando e berdad, nos lo trata otronan den un manera amoroso. (1 Juan 1:6, 7; 3:14-16; 4:20, 21) P’esei, si bo contra cu un problema cu un persona den e congregacion, resistí contra warda rencor. Si bo ta bistí cu amor, lo bo haci esfuerso pa solucioná e problema, i lo bo no vacilá pa pidi disculpa si bo a causa un ofensa.—Mateo 5:23, 24; 18:15-17.
14. Cu cua cualidadnan nos mester ta bistí?
14 Nos bistí spiritual mester incluí otro cualidadnan estrechamente relacioná cu amor. Pablo a skirbi: “Bisti boso mes cu tierno cariño di compasion, bondad, humildad di mente, suavedad, i gran pacenshi.” E cualidadnan aki, rondoná pa amor, ta parti dje “personalidad nobo” piadoso. (Colosensenan 3:10, 12) Lo bo haci e esfuerso pa bisti bo mes den e manera aki? Specialmente si bo bisti bo mes cu amor fraternal lo bo tin un marca cu ta identificá Jesus su disipelnan, pasobra el a bisa: “Den esaki tur hende lo sa cu boso ta mi disipelnan, si boso tin amor entre boso mes.”—Juan 13:35.
UN LUGA DI SIGURIDAD
15. Con e congregacion ta manera un proteccion?
15 E congregacion tambe ta sirbi como un proteccion, un refugio protectivo caminda bo por sintí bo sigur. Den dje lo bo haña hendenan di curason onrado kendenan ta haciendo esfuerso pa haci loke cu ta recto den bista di Dios. Hopi di nan a eliminá e mésun prácticanan i actitudnan malu cu cua abo kisas ta luchando pa vence. (Tito 3:3) Nan por yudá bo, pasobra nos ta ser bisá pa “sigui wanta e carga di un e otro.” (Galationan 6:2) Naturalmente, siguiendo un curso cu ta hiba na bida eterno ta al final bo mes responsabilidad. (Galationan 6:5; Filipensenan 2:12) Sin embargo, Jehova a percurá e congregacion cristian como un medio maraviyoso di yudansa i sosten. No ta importá con angustioso bo problemanan por ta, bo tin un recurso balioso disponibel pa bo—un congregacion amoroso cu lo para banda di bo den tempu di afliccion of necesidad.—Compará cu Lucas 10:29-37; Echonan 20:35.
16. Ki yudansa e ancianonan di congregacion ta proveé?
16 Entre esnan cu lo ta disponibel pa yudá bo ta “donnan den hende”—ancianonan di congregacion, of superintendentenan nombrá, cu ta pastoreá e tou cu buena gana i cu empeño. (Efesionan 4:8, 11, 12; Echonan 20:28; 1 Pedro 5:2, 3) En cuanto nan, Isaías a profetisá: “Cada un tin cu resultá di ser manera un refugio for di bientu i un lugá di sconde for di e tempestad di yobida, manera coriente di awa den un tera secu, manera e sombra di un baranca grandi den un tera agotá.”—Isaías 32:2.
17. (a) Ki sorto di yudansa Jesus specialmente kier a duna? (b) Ki percuracion Dios a primintí di haci pa su pueblo?
17 Ora Jesus tabata riba tera, supervision amoroso di parti e lidernan religioso lamentablemente a haci falta. E condicion dje hendenan a conmov’é Jesus profundamente, i e specialmente tabata kier a yuda nan spiritualmente. Jesus a sinti duele di nan pasobra “nan tabata soyá i plamá manera carné sin wardador.” (Mateo 9:36) Ki apropiadamente esaki ta describí e condicion djawe di hopi hende cu ta wanta problemanan angustioso sin hende pa bai cerca dje pa yudansa spiritual i consuelo! Pero Jehova su pueblo tin yudansa spiritual, pasobra el a primintí: “Lo mi lanta riba nan wardadornan kende realmente lo pastoreá nan; i nan lo no tin miedu mas, tampoco ningun teror lo bini riba nan, i ningun lo haci falta.”—Jeremías 23:4.
18. Pakico nos mester acercá un anciano si nos tin mester di yudansa spiritual?
18 Familiarisá cu e ancianonan nombrá den e congregacion. Nan tin hopi experencia den aplicá e conocimentu di Dios, pasobra nan a cumpli cu e cualificacionnan pa superintendente establecí den e Bijbel. (1 Timoteo 3:1-7; Tito 1:5-9) No vacilá pa acercá un di nan si bo tin mester di yudansa spiritual pa vence un hábito of un cualidad cu ta na conflicto cu Dios su rekisitonan. Lo bo haña cu e ancianonan ta sigui e spiertamentu di Pablo: “Papia cu consuelo na e almanan deprimí, sostené esnan débil, tene gran pacenshi pa cu tur.”—1 Tesalonicensenan 2:7, 8; 5:14.
DISFRUTA DI SIGURIDAD CU JEHOVA SU PUEBLO
19. Ki bendicionnan Jehova a drama riba esnan cu busca siguridad den su organisacion?
19 Apesar cu awor nos ta bibando awor meimei di condicionnan imperfecto, Jehova ta proveé nos cu alimento, paña, i refugio spiritual. Naturalmente, nos mester warda riba Dios su mundu nobo primintí pa por experenciá e beneficionan di un paradijs físico. Pero esnan cu ta parti di Jehova su organisacion ta disfrutando actualmente dje siguridad di un paradijs spiritual. En cuanto nan, Ezekiel a profetisá: “Nan realmente lo biba den siguridad, sin cu ningun hende pone nan tembla.”—Ezekiel 34:28; Salmo 4:8.
20. Con Jehova lo compensá pa cualkier cos cu nos sacrificá pa causa di su adoracion?
20 Ki gradicidu nos por ta cu Jehova ta percurá provisionnan spiritual amoroso mediante su Palabra i organisacion! Hala cerca di e pueblo di Dios. No keda sin haci esei pa miedu di loke amigunan of famianan lo por pensa di bo dor cu bo ta adkiriendo e conocimentu di Dios. Algun lo por oponé pasobra bo ta asociando cu Testigonan di Jehova i ta asistiendo na reunionnan n’e Salon di Reino. Pero Dios lo haci mas cu generosamente compensá pa cualkier cos cu bo ta sacrificá pa causa di su adoracion. (Malakías 3:10) Ademas, Jesus a bisa: “Ningun hende a bandoná cas of rumannan homber of rumannan muher of mama of tata of yunan of camponan pa mi causa i pa causa dje bon nobo cu lo no haña cien bes awor den e periodo di tempu aki, casnan i rumannan homber i rumannan muher i mamanan i yunan i camponan, cu persecucionnan, i den e sistema binidero di cosnan bida eterno.” (Marco 10:29, 30) Sí, no ta importá loke bo a laga atras of mester wanta, bo por haña compañerismo agradabel i siguridad spiritual entre e pueblo di Dios.
TEST BO CONOCIMENTU
Ken ta “e esclabo fiel i discreto”?
Ki provision Jehova a haci pa alimentá nos spiritualmente?
Con esnan den e congregacion cristian por yuda nos?
[Plachi di henter página 165]